Sir Af lil Ħutek
1 Il-Bibbja tiddeskrivi ħabib veru bħala individwu li jintrabat miegħek iktar minn ħuk, li l-imħabba u l-lealtà tiegħu huma kostanti, u li jiġi għall-għajnuna tiegħek matul żmien l-hemm. (Prov. 17:17; 18:24) Mhux se jonqos li jkollna ħbieb bħal dawn ġewwa l-kongregazzjoni jekk nagħmlu l-isforz biex insiru nafu u nħobbu lil xulxin.—Ġw. 13:35.
2 Qabel u wara l-laqgħat għandna opportunitajiet mill-aħjar biex insiru nafu lil ħutna. Għala ma tasalx kmieni u wara ddum ftit sabiex tkun tistaʼ tgawdi sħubija kordjali u ferriħija? Fittex varjetà t’aħwa biex titħaddet magħhom, inkluż uħud ixjeħ li għandhom iktar esperjenza u wħud iżgħar jew daqsxejn mistħija.
3 Aqbad Konversazzjonijiet: Agħmel iktar milli kemm kemm issellem lil ħutek u daqshekk. Tistaʼ taqbad konversazzjoni billi taqsam xi esperjenza dwar il-ministeru taʼ l-għalqa, xi punt interessanti f’rivista reċenti, jew xi kumment dwar il-laqgħa li tkun għadha kemm spiċċat. Tistaʼ titgħallem ħafna dwar ħutek jekk tkun semmiegħ tajjeb, billi tinkuraġġihom jitkellmu dwar l-esperjenzi tagħhom u l-affarijiet li qed jitgħallmu. Sempliċement billi ssaqsihom kif saru jafu lil Jehovah jistaʼ jikxef ħafna affarijiet. F’ħajjithom, xi wħud għaddew minn esperjenzi li jsaħħu l-fidi, waqt li oħrajn issa stess qed jissaportu sitwazzjonijiet li ħafna minna forsi lanqas biss nimmaġinawhom. Jekk nirrealizzaw dan se niġu megħjunin, bħala ħbieb veri, biex inkunu konxji tal-bżonnijiet t’oħrajn u ngħinuhom.
4 Siru Ħbieb taʼ Xulxin: Wara l-mewt tat-tifla tagħha, waħda oħt sabitha diffiċli li tkanta l-għanjiet tas-Saltna li kienu jsemmu l-irxoxt. Hi tiftakar: “Darba minnhom, waħda oħt li kienet bil-qiegħda n-naħa l-oħra tal-passaġġ ratni nibki. Hi ġiet ħdejja, dawret driegħha madwari, u kantat il-bqija taʼ l-għanja miegħi. Veru ħassejtni mimlija b’imħabba għall-aħwa u fraħt li konna attendejna l-laqgħat, billi rrealizzajt li hemmhekk konna se nsibu l-għajnuna, hemm fis-Sala tas-Saltna.” Għandna nsiru ħbieb taʼ ħutna billi noffrulhom faraġ meta jkun hemm bżonn u inkuraġġiment il-ħin kollu.—Lhud 10:24, 25.
5 Hekk kif din id-dinja qadima ssir dejjem iżjed oppressiva, ejjew inkunu ddeterminati li nsiru nafu lil ħutna aħjar. Dan it-tpartit taʼ inkuraġġiment ġenwin se juri li jkun barka għal kulħadd.—Rum. 1:11, 12.