Indokraturi li Huma minn taʼ Quddiem—Dawk li Jikkonduċu l-​Istudju tal-​Ktieb tal-​Kongregazzjoni

¹ Huwa privileġġ taʼ l-​għaġeb għal anzjan jew qaddej ministerjali kkwalifikat li jaqdi bħala dak li jikkonduċi l-​Istudju tal-​Ktieb tal-​Kongregazzjoni. Peress li jrid jieħu ħsieb il-​bżonnijiet spiritwali taʼ dawk fil-​grupp tiegħu, għandu responsabbiltà serja. Id-​dmirijiet tiegħu jinqasmu fi tliet kategoriji.

² Tagħlim Kapaċi: Dak li jikkonduċi l-​Istudju tal-​Ktieb tal-​Kongregazzjoni jeħtieġ li jipprepara bir-​reqqa biex kull ġimgħa jkun ċert li dawk fil-​grupp ikunu qed jifhmu. Hu jipprova jkabbar l-​apprezzament għall-​materjal li nkunu qed nistudjaw. Minflok ma jikkummenta żżejjed hu stess matul l-​istudju, meta jkun hemm bżonn iqajjem iktar mistoqsijiet rilevanti biex joħroġ il-​punti ewlenin tal-​lezzjoni. L-​isfida tiegħu hi li jagħmel l-​istudju interessanti u istruttiv, u li jinvolvi lil kulħadd fid-​diskussjoni. L-​objettiv tiegħu hu li jibni spiritwalment, li jenfasizza l-​valur prattiku taʼ l-​istudju, u li jġiegħel il-​materjal jilħaq kemm il-​moħħ u kemm il-​qalb.​—1 Tess. 2:13.

³ Indokrar t’Għajnuna: Dak li jikkonduċi l-​Istudju tal-​Ktieb tal-​Kongregazzjoni huwa “bħal ilqugħ għar-​riħ, u kenn fit-​tempesta.” (Is. 32:2) Hu tassew jimpurtah minn dawk kollha fil-​grupp tiegħu u meta xi ħadd minnhom jiskuraġġixxi ruħu, dan jara li tingħatalu għajnuna spiritwali.​—Eżek. 34:​15, 16; 1 Tess. 2:​7, 8.

⁴ Evanġelizzar Żeluż: Il-​kuxjenza taʼ dak li jikkonduċi l-​Istudju tal-​Ktieb tal-​Kongregazzjoni ġġagħlu jagħmel arranġamenti prattiċi għal dawk kollha fil-​grupp tiegħu biex jipparteċipaw bis-​sħiħ fil-​ministeru taʼ l-​għalqa. Huwa jkun minn taʼ quddiem fix-​xogħol taʼ l-​evanġelizzar, billi jaf li r-​regolarità, iż-​żelu, u l-​entużjażmu li juri għas-​servizz se jirriflettihom ukoll il-​kumplament tal-​grupp. (Kol. 4:17; 2 Tess. 3:9) Minn żmien għall-​ieħor, hu jagħmel li jistaʼ biex jaħdem fis-​servizz maʼ kull membru tal-​grupp tiegħu. Jekk irridu nsinnu l-​abbiltajiet tagħna taʼ l-​ippridkar u tat-​tagħlim fil-​ministeru, dak li jikkonduċi l-​Istudju tal-​Ktieb tal-​Kongregazzjoni jistaʼ jgħinna nilħqu l-​mira tagħna.​—1 Tim. 4:16; 2 Tim. 4:5.

⁵ Aħna tassew imberkin b’dawn id-​doni fi bnedmin li huma lesti li joffrulna għajnuna spiritwali u appoġġ kollu mħabba. (1 Tess. 5:14) Jalla nuru l-​apprezzament tagħna għal dan il-​provvediment taʼ l-​għaġeb minn Jehovah permezz tal-​parteċipazzjoni regulari u l-​appoġġ leali tagħna għax-​xogħol taʼ l-​evanġelizzar.​—Lhud 10:25.