Nikkooperaw maʼ Dak li Jikkonduċilna l-​Istudju tal-​Ktieb tal-​Kongregazzjoni

¹ L-​Istudju tal-​Ktieb tal-​Kongregazzjoni għandu rwol vitali fl-​iżvilupp tal-​kapaċitajiet tagħna bħala ministri taʼ l-​aħbar tajba. Il-​gruppi jinżammu żgħar apposta biex jinkuraġġixxu atmosfera t’affezzjoni bħal dik ġewwa familja għall-​istudju tal-​Bibbja u waħda mill-​pubblikazzjonijiet tas-​Soċjetà. Dawn il-​gruppi iżgħar jipprovdu wkoll kundizzjonijiet ideali sabiex iħarrġuna f’li nkunu iktar effettivi fil-​ministeru taʼ l-​għalqa. Permezz taʼ l-​arranġament taʼ l-​istudju tal-​ktieb, kull individwu jistaʼ jingħata faċilment inkuraġġiment u attenzjoni persunali. Dan jinkludi li minn żmien għal żmien dak li jikkonduċi l-​istudju tal-​ktieb jistaʼ jagħmel żjajjar pastorali lil dawk fil-​grupp tiegħu biex jinkuraġġihom. Kif nistgħu nikkooperaw bis-​sħiħ maʼ dak li jikkonduċi l-​istudju u nibbenefikaw minn dan il-​provvediment mill-​aħjar?

² Sehem Żeluż fil-​Ministeru taʼ l-​Għalqa: Waħda mill-​iktar responsabbiltajiet importanti taʼ dak li jikkonduċi l-​istudju tal-​ktieb hija li jgħin lil kull membru fil-​grupp biex jieħu sehem b’mod żeluż fil-​ministeru. F’dan ir-​rigward, il-​ktieb Our Ministry f’paġna 44 ifakkarna li “r-​regolarità, iż-​żelu u l-​entużjażmu li hu juri għall-​attività taʼ l-​għalqa se jeffettwaw lill-​pubblikaturi.” Xi drabi, dak li jikkonduċi l-​istudju jaħdem mal-​membri tal-​familja tiegħu stess fis-​servizz, imma jieħu pjaċir ukoll jissieħeb m’oħrajn f’diversi aspetti tal-​ministeru skond ma jippermettu ċ-​ċirkustanzi tiegħu. Tistaʼ int tappoġġa regolarment il-​laqgħat għas-​servizz taʼ l-​għalqa? Dak li jikkonduċi l-​istudju tal-​ktieb tiegħek u pubblikaturi oħrajn se japprezzaw ferm jekk int tagħmel dan.

³ Il-​laqgħat għas-​servizz taʼ l-​għalqa jsiru f’postijiet komdi sabiex kulħadd ikun jistaʼ jkollu sehem żeluż fix-​xogħol taʼ l-​ippridkar. Waqt li jrid jikkunsidra l-​kundizzjonijiet lokali, kull grupp se jkun irid jibda kmieni fil-​ministeru. Ħafna pubblikaturi u pijunieri jkollhom suċċess kbir meta fi tmiem il-​ġimgħa jkomplu fil-​ministeru anki meta jaqbeż nofsinhar.

⁴ Tixtieq għajnuna f’xi aspett tal-​ministeru? Forsi dak li jikkonduċi l-​istudju tal-​ktieb jistaʼ jirranġa biex xi pubblikatur kapaċi mill-​grupp jaħdem miegħek. Fi tmiem ix-​xahar, kun żgur li titfaʼ r-​rapport tas-​servizz taʼ l-​għalqa tiegħek fil-​ħin. Kemm dak li jikkonduċi l-​istudju tal-​ktieb u kemm is-​segretarju japprezzaw il-​kooperazzjoni tiegħek f’dan l-​aspett importanti wkoll.—Qabbel Luqa 16:10.

⁵ Meta l-​Indokratur tas-​Servizz Iżur il-​Grupp: L-​indokratur tas-​servizz normalment iżur grupp taʼ l-​istudju tal-​ktieb kull xahar sabiex jinkuraġġixxi attività akbar u iktar sinifikanti fil-​ministeru taʼ l-​għalqa. Oqgħod attent ħafna għat-​taħdita taʼ 15-il minuta li jagħmel fi tmiem l-​istudju tal-​ktieb, għax din tipprovdi pariri speċifiċi li jgħinu lill-​grupp jitjieb f’diversi aspetti tax-​xogħol taʼ l-​ippridkar. L-​indokratur tas-​servizz ikun ħerqan ukoll li jaħdem maʼ membri differenti taʼ l-​istudju tal-​ktieb fi tmiem il-​ġimgħa. Kun ċert li tieħu vantaġġ minn dan il-​provvediment speċjali sabiex tkun tistaʼ tibbenefika mill-​esperjenza u l-​kapaċità tiegħu fis-​servizz taʼ l-​għalqa.

⁶ L-​eżempju persunali tagħna f’li nikkooperaw u nkunu lesti li ngħinu lil uħud taʼ inqas esperjenza, se jgħin f’li noħolqu atmosfera t’affezzjoni u ħbiberija fl-​Istudju tal-​Ktieb tal-​Kongregazzjoni hekk kif “nagħmlu l-​ġid maʼ kulħadd, l-​iktar maʼ qrabatna fil-​fidi.”—Gal. 6:10.