Kif Tibbenefika mill-Grupp Tiegħek tas-Servizz tal-Għalqa
1. Liema benefiċċji mill-arranġament tal-Istudju tal-Ktieb tal-Kongregazzjoni għadhom disponibbli permezz tal-grupp tagħna tas-servizz tal-għalqa?
1 Timmissja xi affarijiet mill-Istudju tal-Ktieb tal-Kongregazzjoni? Il-gruppi kienu jkunu żgħar u l-atmosfera kienet tkun iktar rilassata. Dan kien jagħmilha faċli biex wieħed jibni ħbiberiji li jkunu sors taʼ appoġġ spiritwali. (Prov. 18:24) L-indokratur tal-istudju tal-ktieb sar midħla taċ-ċirkustanzi uniċi tagħna u setaʼ jipprovdi inkuraġġiment b’mod persunali. (Prov. 27:23; 1 Pt. 5:2, 3) Dawn il-benefiċċji għadhom disponibbli permezz tal-grupp tagħna tas-servizz tal-għalqa.
2. Kif nistgħu nieħdu l-inizjattiva biex nibnu ħbiberiji li jkunu sors taʼ appoġġ spiritwali fil-grupp tagħna tas-servizz tal-għalqa?
2 Ħu l-Inizjattiva: Il-gruppi tas-servizz tal-għalqa ġeneralment ikunu magħmulin mill-istess ammont taʼ nies daqs kemm kienu l-gruppi tal-istudju tal-ktieb. Meta taħdem “spalla maʼ spalla” fil-ministeru m’oħrajn, jistaʼ jkollok rabta mill-qrib magħhom. (Flp. 1:27) Maʼ kemm-il persuna differenti fil-grupp tiegħek ħdimt? Tistaʼ ‘twessaʼ qalbek’ f’dan ir-rigward? (2 Kor. 6:13) Iktar minn hekk, kultant nistgħu nistiednu lil xi ħadd mill-grupp tagħna jingħaqad magħna fil-lejla tal-Qima tal-Familja jew jiekol xi ikla magħna. F’xi kongregazzjonijiet, il-gruppi tas-servizz tal-għalqa juru ospitalità mal-kelliemi li jiġi minn kongregazzjoni oħra biex jagħtihom taħdita, u dan jagħmluh skont meta jkun imisshom. Matul il-ġimgħa li fiha jkun imissu xi grupp partikulari, il-grupp jinġabar flimkien għal xi ikla u biex wieħed jinkuraġġixxi lill-ieħor, anke jekk il-kelliemi minn kongregazzjoni oħra ma jiġix.
3. X’inhuma xi opportunitajiet biex ikollna żjara pastorali fil-grupp tagħna tas-servizz tal-għalqa?
3 Għalkemm issa l-kongregazzjoni tiltaqaʼ flimkien darbtejn biss fil-ġimgħa, dan ma jfissirx li l-pubblikaturi għandu jkollhom inqas żjajjar pastorali. L-indokraturi tal-gruppi jiġu maħturin f’kull grupp biex jagħtu lill-individwi inkuraġġiment b’mod persunali u taħriġ għall-ministeru. Jekk l-indokratur tal-grupp tiegħek għadu m’għamilx arranġament biex jaħdem miegħek fil-ministeru, għala ma titolbux biex taħdem miegħu? Iktar minn hekk, darba kull xahar, l-indokratur tas-servizz jieħu sehem fil-ministeru maʼ grupp differenti matul tmiem il-ġimgħa. F’kongregazzjonijiet iżgħar fejn ikun hemm biss ftit gruppi tas-servizz tal-għalqa, hu għandu mnejn jagħmel arranġamenti biex iżur lil kull grupp darbtejn matul is-sena. Tirranġaha l-iskeda tiegħek biex toħroġ fil-ministeru meta hu jżur il-grupp tiegħek?
4. (a) Il-laqgħat għas-servizz kif jiġu organizzati? (b) Għala għandna nikkunsidraw li niftħu darna għal-laqgħat tas-servizz tal-għalqa?
4 Spiss ikun utli li kull grupp jiltaqaʼ b’mod separat għas-servizz tal-għalqa fi tmiem il-ġimgħa. Il-fatt li jkollna diversi postijiet fejn niltaqgħu għas-servizz fl-istess ħin, bejn wieħed u ieħor, jistaʼ jagħmilha iktar faċli għall-pubblikaturi biex imorru għal-laqgħa għas-servizz u forsi għat-territorju. Il-pubblikaturi jistgħu jiġu organizzati malajr u jerħulha lejn it-territorju bla dewmien. Ikun iktar faċli wkoll għall-indokratur tal-grupp biex jagħti attenzjoni mill-qrib lil dawk tal-grupp tiegħu. Madankollu, minħabba ċ-ċirkustanzi forsi jkun aħjar li jingħaqdu żewġ gruppi jew iktar. Jekk il-kongregazzjoni kollha kemm hi tiltaqaʼ flimkien għas-servizz fl-ewwel Sibt tax-xahar jew wara l-Istudju tat-Torri tal-Għassa, spiss ikun taʼ benefiċċju li kull grupp ipoġġi bilqiegħda flimkien u l-indokratur tal-grupp jingħata ftit minuti biex jorganizza l-grupp tiegħu qabel ma l-laqgħa għas-servizz tal-għalqa tiġi fi tmiemha permezz tat-talba.—Ara l-kaxxa “Tistaʼ Tiftaħ Darek?”
5. Għalkemm l-arranġament tal-Istudju tal-Ktieb tal-Kongregazzjoni ntemm, dwar xiex nistgħu nkunu fiduċjużi?
5 Għalkemm l-arranġament tal-Istudju tal-Ktieb tal-Kongregazzjoni ntemm, Ġeħova għadu jipprovdi kulma għandna bżonn biex nagħmlu r-rieda tiegħu. (Ebr. 13:20, 21) Taħt il-ħarsien taʼ Ġeħova, ma jonqosna xejn. (Salm 23:1) Il-grupp tagħna tas-servizz tal-għalqa jwassal għal bosta barkiet. Jekk nieħdu l-inizjattiva u ‘niżirgħu bil-kotra,’ se ‘naħsdu bil-kotra.’—2 Kor. 9:6.
[Kaxxa f’paġna 6]
Tistaʼ Tiftaħ Darek?
Xi kongregazzjonijiet jgħaqqdu l-gruppi tas-servizz fi tmiem il-ġimgħa għax ma jkunx hemm biżżejjed djar fejn jiltaqgħu. Il-laqgħat għas-servizz tal-għalqa huma aspett ieħor tal-arranġament tal-kongregazzjoni, u allura li żżomm laqgħat bħal dawn f’darek huwa tassew privileġġ. Tistaʼ tagħmel id-dar tiegħek disponibbli? Iżżommx lura minħabba li d-dar tiegħek tkun modesta. L-anzjani se jikkunsidraw il-lokalità fejn tinsab darek u fatturi oħrajn simili għal dawk li ġew kunsidrati meta ntgħażlu l-lokalitajiet għall-istudju tal-ktieb. Jekk tixtieq tiftaħ darek, informa lill-indokratur tal-grupp tiegħek.