L-​Għoti taʼ Xiehda bħala Grupp Iġib il-​Ferħ

¹ Meta bagħat lis-​70 dixxiplu jippridkaw, Ġesù għallimhom x’għandhom jgħidu, organizzahom fi gruppi taʼ tnejn, u wriehom liema territorju kellhom ikopru. Dan ġabilhom il-​ferħ. (Lq. 10:​1-17) B’mod simili llum, l-​għoti taʼ xiehda bħala grupp iħarreġ, jorganizza, u jinkuraġġixxi lill-​poplu t’Alla għax-​xogħol taʼ l-​ippridkar.

² L-​Anzjani Jieħdu t-​Tmexxija: L-​anzjani għandhom irwol importanti f’li jgħinu lil kulħadd biex jieħu sehem regulari fix-​xogħol taʼ l-​ippridkar. L-​indokratur tas-​servizz jieħu t-​tmexxija billi jagħmel arranġamenti għas-​servizz matul il-​ġimgħa. Kull indokratur taʼ l-​istudju tal-​ktieb għandu r-​responsabbiltà li jorganizza l-​attività tal-​grupp tiegħu, speċjalment fi tmiem il-​ġimgħa. F’okkażjonijiet meta l-​kongregazzjoni kollha tiltaqaʼ għas-​servizz taʼ l-​għalqa, bħal per eżempju wara l-​istudju tat-​Torri taʼ l-​Għassa, kull indokratur taʼ l-​istudju tal-​ktieb għandu jieħu ħsieb il-​bżonnijiet tal-​grupp tiegħu.

³ “Kif Imur u bl-​Ordni”: Il-​ħu li jiġi inkarigat biex jikkonduċi l-​laqgħa għas-​servizz taʼ l-​għalqa għandu jibda fil-​ħin u jillimita l-​laqgħa għal 10 jew 15-il minuta. Ikun aħjar jekk il-​ħu jirranġa l-​gruppi li jkunu se jaħdmu flimkien u jqassam it-​territorju (sakemm l-​indokratur tas-​servizz taʼ l-​għalqa ma jkunx qed jieħu ħsieb taʼ dan, bħalma diġà ssemma) qabel ma jagħlaq bit-​talba. B’hekk jevita l-​bżonn li l-​aħwa jinġemgħu fuq it-​territorju, ladarba dan jistaʼ jnaqqas mid-​dinjità tax-​xogħol tagħna. Ukoll dan ikun fi qbil mal-​parir taʼ Pawlu: “Ħa jsir kollox kif imur u bl-​ordni.” (1 Kor. 14:40) Dawk kollha li jattendu għal dawn il-​laqgħat għandhom jikkontribwixxu għas-​suċċess taʼ l-​arranġament billi jaslu fil-​ħin, jikkooperaw bis-​sħiħ mal-​ħu li jkun qed jieħu t-​tmexxija, u jmorru fuq it-​territorju mill-​ewwel hekk kif jiġu mitluba jagħmlu dan.

⁴ Ninġibdu Lejn Xulxin f’Unità: L-​arranġamenti li jsiru għall-​għoti taʼ xiehda bħala grupp jipprovdulna opportunità eċċellenti biex insiru nafu lil oħrajn fil-​kongregazzjoni. Għalkemm m’hemm ebda oġġezzjoni jekk nirranġaw minn qabel biex naħdmu maʼ xi ħadd, biss jistaʼ wkoll ikun taʼ sodisfazzjon għalina jekk nattendu l-​laqgħat tas-​servizz taʼ l-​għalqa mingħajr ma nkunu għamilna arranġamenti minn qabel. Għandna mnejn niġu inkarigati naħdmu maʼ xi ħadd li ma tantx nafuh, u dan se jgħinna ‘niftħu qalbna beraħ’ fl-​imħabba tagħna.—2 Kor. 6:​11-13.

⁵ L-​għoti taʼ xiehda bħala grupp jinkuraġġina u jiġbidna lejn xulxin f’unità bħala ‘sħab fil-​ħidma għat-​tixrid tal-​verità.’ (3 Ġw. 8) Jalla nieħdu sehem bis-​sħiħ f’dan ix-​xogħol!