Kif Jgħinna l-​Arranġament taʼ l-​Istudju tal-​Ktieb tal-​Kongregazzjoni

1. Kif jgħinuna l-​ħames laqgħat li għandna kull ġimgħa?

¹ Kull waħda mill-​ħames laqgħat li għandna kull ġimgħa hija differenti fil-​mod kif tiġi mmexxija u fl-​iskop tagħha. Madankollu, kollha huma importanti biex jgħinuna “nagħtu kas xulxin biex nitqanqlu għall-​imħabba u l-​għemejjel tajbin.” (Ebr. 10:​24, 25) X’inhuma xi aspetti uniċi u taʼ benefiċċju li fih l-​arranġament taʼ l-​Istudju tal-​Ktieb tal-​Kongregazzjoni?

2. Liema benefiċċji hemm f’li niltaqgħu fi grupp iżgħar għall-​istudju tal-​ktieb?

² Jgħinna Nagħmlu Progress Spiritwali: L-​attendenza għal-​laqgħa taʼ l-​istudju tal-​ktieb ġeneralment hija ħafna inqas mill-​attendenza għal-​laqgħat l-​oħrajn tal-​kongregazzjoni. Dan jagħmilha iktar faċli għalina li niżviluppaw ħbiberiji li jistgħu jgħinuna spiritwalment. (Prov. 18:24) Ipprovajt int issir taf lil kulħadd fil-​grupp taʼ l-​istudju tal-​ktieb tiegħek, forsi billi tistaqsi lil kull wieħed minnhom biex jaħdem miegħek fil-​ministeru? L-​arranġament taʼ l-​istudju tal-​ktieb jgħin ukoll lill-​indokratur taʼ l-​istudju tal-​ktieb biex isir jaf iċ-​ċirkustanzi uniċi taʼ kull wieħed u waħda fil-​grupp u joffri inkuraġġiment persunali.​—Prov. 27:23.

3. L-arranġament taʼ l-​istudju tal-​ktieb kif jinkuraġġixxi lil dak li jkun biex jikkummenta kif ukoll lill-​istudenti tal-​Bibbja biex jattendu?

³ Stidint lill-​istudenti tiegħek tal-​Bibbja biex jattendu l-​istudju tal-​ktieb miegħek? Uħud interessati li jżommu lura milli jattendu l-​laqgħat akbar tagħna għandhom mnejn jistħu inqas jekk jattendu laqgħa iżgħar, speċjalment f’dar privata. L-​atmosfera kordjali tagħmilha iktar faċli għaż-​żgħażagħ u għal dawk ġodda biex jikkummentaw. U ladarba l-​grupp huwa iżgħar, aħna għandna iktar opportunitajiet biex nikkummentaw u nfaħħru lil Ġeħova.​—Salm 111:1.

4. B’liema modi jistaʼ l-​arranġament taʼ l-​istudju tal-​ktieb ikun konvenjenti?

⁴ L-​istudji tal-​ktieb ġeneralment jinżammu f’postijiet li huma konvenjenti għall-​pubblikaturi madwar it-​territorju. Filwaqt li mhux possibbli għal kulħadd li jiġi assenjat fl-​iktar post viċin tiegħu, il-​fatt li nattendu l-​istudju tal-​ktieb assenjat lilna għandu mnejn jeħtieġ inqas distanza minn meta nattendu laqgħat oħrajn tal-​kongregazzjoni. Il-​post taʼ l-​istudju tal-​ktieb jistaʼ jintuża wkoll bħala post konvenjenti għal-​laqgħa tas-​servizz taʼ l-​għalqa.

5. Kif nistgħu nirċievu għajnuna fil-​ministeru mill-​indokratur taʼ l-​istudju tal-​ktieb?

⁵ Jgħinna għall-​Ministeru: L-​indokratur taʼ l-​istudju tal-​ktieb huwa interessat li jgħin lil kulħadd biex ikollu sehem regulari, produttiv, u mimli ferħ fil-​ministeru. Għalhekk, hu jistinka biex jaħdem maʼ kulħadd fil-​grupp, billi jagħti għajnuna persunali f’diversi aspetti tal-​ministeru. Jekk issib aspett partikulari tal-​ministeru diffiċli, bħal li tagħmel iż-​żjajjar lura, għid lill-​indokratur taʼ l-​istudju tal-​ktieb dwar dan. Forsi jkun jistaʼ jirranġalek biex taħdem maʼ pubblikatur taʼ l-​esperjenza fil-​grupp. Jekk tagħti attenzjoni bir-​reqqa għall-​metodi tajbin taʼ tagħlim li juża l-​indokratur taʼ l-​istudju tal-​ktieb hekk kif jikkonduċi l-​istudju tal-​ktieb, int se ttejjeb l-​abbiltà tiegħek biex tgħallem fl-​istudji tal-​Bibbja.​—1 Kor. 4:​17.

6. Għala għandna nipprovaw nibbenefikaw kemm jistaʼ jkun mill-​arranġament taʼ l-​istudju tal-​ktieb?

⁶ X’barka hu l-​Istudju tal-​Ktieb tal-​Kongregazzjoni! Dan l-​arranġament kollu mħabba mingħand Ġeħova jgħinna nibqgħu sodi spiritwalment matul iż-​żminijiet taʼ sfida li qed ngħixu fihom.​—Salm 26:12.