Kif l-​Indokraturi taʼ l-​Istudju tal-​Ktieb tal-​Kongregazzjoni Juru Interess Persunali

¹ L-​iskop taʼ l-​Istudju tal-​Ktieb tal-​Kongregazzjoni hu li jagħmilha “possibbli li tingħata iktar attenzjoni persunali lil kull individwu biex jikber spiritwalment. . . . Dan jirrifletti l-​qalb tajba bl-​imħabba taʼ Jehovah u t-​tħassib teneru għall-​poplu tiegħu.” (om pġ. 75; Is. 40:11) L-​indokratur taʼ l-​istudju tal-​ktieb għandu rwol importanti f’li jagħti attenzjoni persunali bħal din.

² Waqt l-​Istudju tal-​Ktieb: Ladarba l-​gruppi taʼ l-​istudju tal-​ktieb jinżammu żgħar apposta, huwa iktar faċli għall-​indokratur taʼ l-​istudju tal-​ktieb biex isir jaf sew lill-​membri tal-​grupp tiegħu. (Prov. 27:23) Kull ġimgħa normalment ikun hemm opportunitajiet li jassoċjaw flimkien qabel u wara l-​istudju. Fi żmien xahar, hu jkun jistaʼ jitkellem kważi maʼ kull persuna fil-​grupp. Dan jgħin lill-​membri tal-​grupp taʼ l-​istudju tal-​ktieb iħossuhom komdi li jmorru għandu meta jkunu qed jiffaċċjaw xi provi jew ikollhom bżonn taʼ l-​inkuraġġiment.—Is. 32:2.

³ L-​indokratur taʼ l-​istudju tal-​ktieb jipprova jinkuraġġixxi lil kulħadd fil-​grupp tiegħu biex jipparteċipa waqt l-​istudju. Mod wieħed kif jagħmel dan hu billi jikkonduċi l-​istudju b’mod ħanin u ġentili. (1 Tess. 2:7b, 8) Hu jara kif isib modi biex jinvolvi lil kulħadd fid-​diskussjoni, inkluż lit-​tfal. Jekk hemm xi wħud li jistħu jikkummentaw, hu jistaʼ joffri l-​għajnuna tiegħu privatament billi jirranġa magħhom minn qabel biex jaqraw xi skrittura jew jikkummentaw fuq xi paragrafu partikulari. Jew jistaʼ jurihom kif jikkummentaw fi kliemhom stess.

⁴ Jekk l-​assistent taʼ l-​indokratur taʼ l-​istudju tal-​ktieb hu qaddej ministerjali, l-​indokratur għandu jirranġa miegħu biex jikkonduċi l-​istudju darba kull xahrejn minfloku. Dan jagħti opportunità lill-​indokratur li josserva lill-​assistent u jagħtih suġġerimenti prattiċi. X’arranġament mill-​aħjar biex jgħin lill-​aħwa jtejbu l-​arti tagħhom tat-​tagħlim!—Titus 1:​9, Saydon.

⁵ Fil-​Ministeru taʼ l-​Għalqa: Waħda mir-​responsabbiltajiet prinċipali taʼ l-​indokratur taʼ l-​istudju tal-​ktieb hi li jkun minn taʼ quddiem fl-​evanġelizzar. (Num. 27:​16, 17) Hu jagħmel arranġamenti prattiċi għal għoti taʼ xiehda bħala grupp u jagħmel minn kollox biex jgħin lil kulħadd fil-​grupp isib il-​ferħ fil-​ministeru. (Efes. 4:​11, 12) Biex iwettaq dan, jagħmilha l-​mira tiegħu li jaħdem maʼ kull membru tal-​grupp fis-​servizz. Hu jaħdem ukoll maʼ l-​indokratur tas-​servizz biex jagħmel arranġamenti għal dawk li jkunu jixtiequ jtejbu xi aspett tal-​ministeru billi jirranġa sabiex jingħataw għajnuna mingħand xi pubblikatur taʼ iktar esperjenza.

⁶ Bħala Ragħaj Kollu Mħabba: L-​indokratur taʼ l-​istudju tal-​ktieb jimpurtah minn dawk li minħabba ċ-​ċirkustanzi tagħhom jistgħu biss ikollhom sehem żgħir fix-​xogħol taʼ l-​ippridkar. Hu jara li dawk li huma limitati minħabba l-​età jew minħabba li ma jistgħux joħorġu mid-​dar, u dawk li huma limitati għal xi żmien minħabba mard serju jew diżabilità jkunu jafu bl-​arranġament li jistgħu jirrapportaw kull 15-il minuta li jagħmlu fil-​ministeru taʼ l-​għalqa jekk ma jkunux jistgħu jagħmlu siegħa sħiħa matul ix-​xahar. (Il-Kumitat tas-​Servizz tal-​Kongregazzjoni jiddetermina min jikkwalifika għal dan l-​arranġament.) Hu jieħu interess ukoll f’dawk assenjati fil-​grupp li forsi saru inattivi, u jagħmel minn kollox biex jgħinhom jerġgħu jaqbdu l-​attività tagħhom fil-​kongregazzjoni.—Lq. 15:​4-7.

⁷ Kemm aħna grati għall-​interess u l-​imħabba li juru l-​indokraturi taʼ l-​istudju tal-​ktieb! Lattenzjoni persunali li jagħtu tgħin biex “aħna lkoll naslu biex insiru ħaġa waħda fil-​fidi . . . ; nsiru raġel magħmul, fl-​aħjar taʼ żmienu. U hekk isseħħ il-​milja taʼ Kristu.”—Efes. 4:13.