L-​Istudju tal-​Ktieb tal-​Kongregazzjoni​—Għala Għandna Bżonnu

1. Kif beda l-​arranġament taʼ lIstudju tal-​Ktieb tal-​Kongregazzjoni?

¹ Fl-​1895, gruppi taʼ studju fformati mill-​Istudenti tal-​Bibbja, kif kienu jissejħu dak iż-​żmien ix-​Xhieda taʼ Jehovah, kienu saru magħrufin bħala Gruppi tas-​Sebħ għall-​Istudju tal-​Bibbja. Il-​volumi tal-​Millennial Dawn (Sebħ tal-​Millennju) kienu jintużaw bħala l-​bażi għall-​istudju. Iktar tard, dawn il-​laqgħat bdew jissejħu Gruppi Bereani għall-​Istudju tal-​Bibbja. (Atti 17:11) Spiss kien jiltaqaʼ grupp taʼ daqs moderat f’xi dar privata, f’lejla konvenjenti għall-​grupp. Minn dawn il-​laqgħat żviluppa l-​Istudju tal-​Ktieb tal-​Kongregazzjoni.

2. Kif nistgħu nikkontribwixxu billi “nqawwu lil xulxin” waqt l-​istudju tal-​ktieb?

² Inkuraġġiment u Għajnuna: Peress li l-​gruppi taʼ l-​istudju tal-​ktieb jinżammu żgħar apposta, dawk li jattendu għandhom opportunità akbar biex jesprimu l-​fidi tagħhom. Ir-​riżultat ikun li “nqawwu li xulxin permezz tal-​fidi li għandna.”​—Rum. 1:​12.

3, 4. L-arranġament taʼ l-​istudju tal-​ktieb kif jgħinna nwettqu l-​ministeru tagħna?

³ Jekk nosservaw il-​mod kif jgħallem l-​indokratur taʼ l-​istudju tal-​ktieb nistgħu niġu megħjunin biex ‘inxandru bir-​reqqa l-​kelma tal-​verità.’ (2 Tim. 2:​15) Innota kif hu jenfasizza l-​bażi Skritturali tal-​materjal. Jekk ikun xieraq għall-​pubblikazzjoni li tkun qed tiġi kunsidrata, hu għandu mnejn jerġaʼ jsemmi l-​punti prinċipali permezz taʼ reviżjoni finali billi juża l-​Bibbja biss. L-​eżempju tajjeb tiegħu jistaʼ jgħinna ntejbu l-​mod kif ngħallmu fil-​ministeru Kristjan.​—1 Kor. 11:1.

⁴ Minbarra li jikkonduċi l-​lezzjoni taʼ kull ġimgħa, l-​indokratur taʼ l-​istudju tal-​ktieb ikun minn taʼ quddiem fl-​evanġelizzar. Hu jikkoopera maʼ l-​indokratur tas-​servizz biex jagħmel arranġamenti prattiċi għas-​servizz taʼ l-​għalqa. Jipprova jgħin lil kulħadd fil-​grupp tiegħu biex iwettaq ir-​responsabbiltà Kristjana tiegħu li jippriedka l-​aħbar tajba u jagħmel dixxipli.​—Mt. 28:​19, 20; 1 Kor. 9:​16.

5. Liema għajnuna persunali tistaʼ tinkiseb permezz taʼ l-​arranġament taʼ l-​istudju tal-​ktieb?

⁵ L-​indokratur taʼ l-​istudju tal-​ktieb hu interessat fil-​benesseri spiritwali taʼ kull persuna li hemm fil-​grupp. Dan l-​interess jurih fil-​laqgħat tal-​kongregazzjoni u meta jaħdem m’oħrajn fis-​servizz taʼ l-​għalqa. Juża wkoll okkażjonijiet meta jżur lil ħutu fid-​dar tagħhom biex jagħtihom inkuraġġiment spiritwali. Ħadd m’għandu jiddejjaq javviċina l-​indokratur taʼ l-​istudju tal-​ktieb kulmeta jħoss li għandu bżonn l-​għajnuna spiritwali.​—Is. 32:​1, 2.

6. (a) Ħutna f’ċerti pajjiżi kif ġew imsaħħin billi ltaqgħu fi gruppi żgħar? (b) Int kif ibbenefikajt personalment mill-​arranġament taʼ l-​istudju tal-​ktieb?

⁶ Saħħu lil Xulxin: F’pajjiżi fejn l-​attività tan-​nies t’Alla hi projbita, l-​aħwa spiss jiltaqgħu fi gruppi żgħar. Wieħed mill-​aħwa jiftakar: “Avolja l-​attivitajiet Kristjani tagħna kienu projbiti, kulmeta kien possibbli konna nagħmlu l-​laqgħat taʼ kull ġimgħa u konna niltaqgħu fi gruppi taʼ bejn 10 u 15-il ruħ. Mil-​laqgħat konna nieħdu s-​saħħa spiritwali tagħna, kemm mill-​istudju tagħna tal-​Bibbja u kemm mis-​sħubija wara l-​istudju. Konna nqabblu l-​esperjenzi tagħna, u dan għenna nintebħu li kull wieħed minna kellu l-​istess battalja.” (1 Pt. 5:9) Jalla aħna, bl-​istess mod, insaħħu lil xulxin billi nappoġġaw bis-​sħiħ l-​arranġament taʼ l-​Istudju tal-​Ktieb tal-​Kongregazzjoni.​—Efes. 4:​16.