Ittra Mingħand il-​Ġemgħa li Tiggverna

Kemm aħna mberkin bħala Xhieda taʼ Jehovah! Aħna mhux biss għandna l-​privileġġ li nafu lil Jehovah, l-​uniku Alla ħaj u veru, il-​Ħallieq taʼ l-​univers, iżda wkoll li nġorru ismu u naqduh. Ma jistax ikollna barka akbar minn din!​—Is. 43:12; Lhud 8:11.

Aħna għandna t-​tama tas-​salvazzjoni u l-​inkarigu li nxandru l-​aħbar tajba tas-​Saltna sabiex oħrajn ukoll ikunu jistgħu jqimu lil Jehovah u jkollhom l-​istess tama. (Mt. 24:14; Rum. 10:​13, 14; 1 Tess. 5:8) B’ferħ ukoll, aħna nagħmlu parti minn fratellanza internazzjonali t’adoraturi li jħobbu u jgħinu b’mod attiv lil xulxin. Kemm huwa premjanti dan kollu!

Il-Bibbja b’mod xieraq tistidinna: “Aqdu bil-​ferħ lill-​Mulej. . . . Idħlu b’għana taʼ ħajr mill-​bibien tiegħu, bit-​tifħir fil-​btieħi tat-​tempju tiegħu; roddulu ħajr u bierku ismu! Għax twajjeb il-​Mulej, għal dejjem it-​tjieba tiegħu; minn żmien għal żmien il-​fedeltà tiegħu.” (Salm 100:​2-5) Biex taqdi lil Jehovah bil-​ferħ irid ikollok relazzjoni persunali b’saħħitha miegħu. Hu jagħmilha possibbli li jkollna relazzjoni bħal din, u huwa l-​privileġġ tagħna li nikkultivawha. Meta jkollna relazzjoni bħal din, inkunu nafu li Jehovah qiegħed dejjem hemm lest biex jgħinna u jsaħħaħna meta niġu fil-​bżonn. Aħna nafu fiċ-​ċert li hu se jipprovdilna s-​saħħa spiritwali u d-​direzzjoni li għandna bżonn biex niffaċċjaw l-​isfidi tal-​ħajja fl-​aħħar jiem taʼ din is-​sistema t’affarijiet. Minkejja l-​pressjonijiet li niffaċċjaw, aħna xorta waħda ferħanin fil-​ministeru tagħna, u nirringrazzjaw lil Jehovah kuljum għax, bħalma tfakkarna l-​Kelma tiegħu, ‘hu jaħseb fina.’​—1 Pt. 5:7.

Matul is-​sena l-​oħra, Jehovah berikna b’mod verament abbundanti. Fil-​Konvenzjoni Distrettwali “Nagħmlu Dak li Tgħid il-​Kelma t’Alla,” fraħna ħafna meta konna maʼ eluf oħrajn li għandhom l-​istess fidi prezzjuża, inkantaw u ngawdu flimkien mill-​mejda spiritwali taʼ Jehovah. Fl-​Istudju tal-​Ktieb tal-​Kongregazzjoni ħadna pjaċir bl-​esperjenza li saħħitilna l-​fidi meta studjajna flimkien il-​ktieb Oqgħod Attent għall-​Profezija taʼ Danjel! U fuq kollox, kemm kien eċċitanti għalina meta rċivejna l-​ewwel volum tal-​pubblikazzjoni l-​ġdida Il-​Profezija taʼ Isaija​—Dawl għall-​Bnedmin Kollha! ‘Il-​kalċi tagħna huwa mfawwar.’​—Salm 23:5.

Kemm iġibilna ferħ meta niftakru li miljuni minn ħutna spiritwali qegħdin ilkoll f’għaqda naqdu lil Jehovah! Kemm niġu inkuraġġiti meta naqraw dwar il-​quċċati ġodda li lħaqna fejn għandu x’jaqsam il-​ministeru taʼ l-​għalqa! Nifirħu meta naraw il-​bosta miljuni li attendew għall-​Mafkar tal-​mewt tal-​Mulej​—u dan għamluh minkejja l-​kundizzjonijiet tad-​dinja. Hekk kif inħarsu lejn l-​għalqa dinjija, huwa ovvju li “l-​ħsad huwa kbir.” (Lq. 10:2) Is-​sena l-​oħra, kull ġimgħa kien hemm medja taʼ 5,555 student tal-​Bibbja li pprogressaw sal-​punt li waslu biex issimbolizzaw id-​dedikazzjoni tagħhom permezz tal-​magħmudija fl-​ilma. Filwaqt li l-​ħsad f’ċertu partijiet tad-​dinja huwa akbar minn f’partijiet oħrajn, aħna lkoll nieħdu gost b’dak li Jehovah qed jagħmel. Naraw prova ċara tal-​barka tiegħu fuq l-​isforzi magħqudin tal-​qaddejja tiegħu.

Il-bini tas-​Swali tas-​Saltna ġodda huwa raġuni oħra għalxiex nifirħu! Aħna nifirħu ħafna meta naraw l-​appoġġ b’qalb sħiħa li qed jingħata f’dan ix-​xogħol minn ħutna f’pajjiżi li qed jiżviluppaw. Mijiet taʼ Swali tas-​Saltna diġà nbnew bl-​għajnuna tal-​Gruppi għall-​Bini tas-​Swali tas-​Saltna li ngħataw kull taħriġ meħtieġ. Dawn l-​aħwa jmorru minn kongregazzjoni għall-​oħra f’pajjiżhom stess sabiex imexxu l-​proġetti tal-​bini tas-​Swali tas-​Saltna. Peress li għad baqaʼ ħafna Swali tas-​Saltna x’jinbnew, hemm sejħa għal iktar volontieri minn dawn il-​pajjiżi li qed jiżviluppaw biex jgħinu f’dan ix-​xogħol bżonnjuż. Jekk int tgħix f’pajjiż bħal dan, tistaʼ tkun volontier? O, kemm japprezzaw l-​għeżież ħutna li jkollhom is-​Sala tas-​Saltna tagħhom fejn jiltaqgħu biex jagħtu qima! U kemm huma grati lejn l-​aħwa madwar id-​dinja taʼ l-​għajnuna finanzjarja li jagħtu sabiex dan jistaʼ jkun possibbli!

Aħbarijiet dwar rebħiet legali huma eċċitanti ferm għalina. Madankollu, f’ħafna postijiet hemm ukoll nies prominenti li jixtiequ joħonqu l-​qima taʼ Jehovah. Hekk kif inkampaw maʼ dawn is-​sitwazzjonijiet, b’fiduċja nafu li fejn għandha x’taqsam l-​għajnuna, lil Jehovah ma jeffettwahx in-​numru taʼ dawk kontrina jew kemm il-​qaddejja tiegħu jistgħu jidhru bla difiża. (2 Kron. 14:10 [14:11, New World Translation]) Aħna nfaħħrukom ħutna kollha talli tkomplu tieqfu sod għall-​qima vera.

Komplu saħħu l-​fidi tagħkom u strieħu kompletament fuq Jehovah għad-​direzzjoni tiegħu hekk kif bil-​ferħ twettqu r-​responsabbiltajiet Kristjani tagħkom. (Prov. 3:​5, 6) M’għandniex għalxiex naqtgħu qalbna, minkejja dak li jitħalla jsir mill-​għadu tagħna. Ftakru fl-​inkuraġġiment li Eliżew ta lill-​qaddej ansjuż tiegħu: “La tibżax! hemm nies aktar magħna milli magħhom.” (2 Slat. 6:​15-​17) Illum, bl-​istess mod l-​armata tas-​sema taʼ Jehovah qegħda lesta biex tipproteġi l-​interessi tal-​qima pura bħalma kienet fi żmien Eliżew. Aħna nħarsu lejn il-​futur b’fiduċja. Jehovah jikkontrolla kollox. Il-​ġnus ma jistgħux iħabbtuha miegħu. Hu ħatar lil Ibnu bħala sultan u tah l-​awtorità sħiħa biex imexxi. “Hienja dawk kollha li jistkennu fih!”​—Salm 2:​1-6, 12.

Għeżież ħutna, nitolbukom tiftakru li aħna dejjem naħsbu fikom b’għożża. Aħna nitolbu b’mod ħerqan li kull wieħed u waħda minnkom tistgħu “tieqfu sħaħ, u b’konvinzjoni soda fir-​rieda kollha t’Alla.”​—Kol. 4:​12, NW.

Ħutkom,

Il-​Ġemgħa li Tiggverna tax-​Xhieda taʼ Jehovah