¹ Ftakar fl-​ewwel darba li smajt bil-​messaġġ tas-​Saltna. Veritajiet sempliċi qanqlulek ix-​xewqa li tikseb l-​għarfien u l-​fehma. Malajr bdejt tara l-​bżonn li tagħmel bidliet fil-​mod taʼ ħajja tiegħek għax it-​triqat taʼ Jehovah huma ferm ogħla minn tiegħek. (Is. 55:​8, 9) Imxejt ’il quddiem, iddedikajt ħajtek, u tgħammidt.

² Anki wara li għamilt xi progress spiritwali, kien għad hemm xi dgħjufijiet li ridt tegħleb. (Rum. 12:2) Forsi kellek il-​biżaʼ mill-​bniedem, li żammek lura milli tieħu sehem fis-​servizz taʼ l-​għalqa. Jew forsi kont qed tonqos milli turi l-​frott taʼ l-​ispirtu t’Alla. Minflok ma bqajt iżżomm lura, kont determinat li timxi ’l quddiem billi għamilt miri teokratiċi għalik innifsek.

³ Jistaʼ jkun li għaddew bosta snin minn meta għamilt id-​dedikazzjoni tiegħek. Meta tħares lura, liema progress tistaʼ tara li għamilt? Ilħaqt xi ftit mill-​miri tiegħek? Għad għandek l-​istess żelu li ‘kellek fil-​bidu’? (Lhud 3:14) Timotju kien diġà Kristjan matur b’ħafna snin taʼ esperjenza meta Pawlu ħeġġu: “Dawn il-​ħwejjeġ ħu ħsiebhom, agħti ruħek għalihom, biex kulħadd jara li int miexi ’l quddiem.”—1 Tim. 4:15.

⁴ Għandek Bżonn Teżamina Lilek Innifsek: Meta noqogħdu naħsbu fil-​fond dwar kif kienet ħajjitna fil-​passat, naraw li għad għandna xi ftit mid-​dgħjufijiet li kellna meta bdejna? Inqasna milli nilħqu xi miri li għamilna? Jekk inhu hekk, għala? Avolja setaʼ kellna intenzjonijiet tajba, jistaʼ jkun li qgħadna nittratienu. Forsi ħallejna l-​ansjetajiet tal-​ħajja jew il-​pressjonijiet taʼ din is-​sistema jżommuna lura.—Lq. 17:​28-30.

⁵ Filwaqt li ma tantx nistgħu nagħmlu affarijiet dwar il-​passat, żgur li nistgħu nagħmlu xi ħaġa dwar il-​futur. Nistgħu neżaminaw lilna nfusna bl-​onestà kollha, niddeterminaw fejn jonqosna xi ħaġa, u mbagħad nagħmlu sforz bis-​serjetà biex nitjiebu. Jistaʼ jkun li għandna bżonn nitjiebu f’li nuru l-​frott taʼ l-​ispirtu t’Alla, bħal per eżempju r-​rażan, il-​ħlewwa, jew is-​sabar. (Gal. 5:​22, 23) Jekk insibuha diffiċli biex ningwalawha m’oħrajn jew nikkooperaw maʼ l-​anzjani, huwa importanti li nikkultivaw l-​umiltà.—Flp. 2:​2, 3.

⁶ Nistgħu nuru li mexjin ’il quddiem billi nirsistu għal privileġġi taʼ servizz? Bi sforz akbar l-​aħwa rġiel forsi jkunu jistgħu jikkwalifikaw bħala qaddejja ministerjali jew anzjani. Xi wħud minna għandna mnejn inkunu nistgħu naqdu bħala pijunieri regulari. Jerġaʼ ħafna iktar jistgħu jilħqu l-​mira taʼ li jaqdu bħala pijunieri awżiljarji. Oħrajn jistgħu jistinkaw biex itejbu d-​drawwiet taʼ studju persunali, jipparteċipaw b’mod iktar attiv fil-​laqgħat tal-​kongregazzjoni, jew isiru iktar produttivi bħala pubblikaturi tal-​kongregazzjoni.

⁷ Ovvjament, jiddependi minna b’mod individwali li niddeċiedu fejn għandna bżonn nimxu ’l quddiem. Nistgħu nkunu żguri li l-​isforzi sinċiera tagħna biex ‘nimxu ’l quddiem’ lejn il-​maturità se jżidulna ħafna l-​ferħ tagħna u se jagħmluna membri tal-​kongregazzjoni iktar produttivi.—Lhud 6:1. (km-E 12/95)