Diżabilitati—Madankollu Produttivi Ħafna
1 Jekk int fost il-ħafna Xhieda taʼ Jehovah li għandhom diżabilità, xorta jistaʼ jkollok ministeru produttiv ħafna. Fil-fatt, iċ-ċirkustanzi tiegħek jistgħu jipprovdu opportunitajiet speċjali għalik biex tagħti xiehda u tinkuraġġixxi lil oħrajn.
2 Opportunitajiet biex Tagħti Xhieda: Ħafna li jkollhom jissieltu b’diżabilità qed jagħtu sehem sħiħ fil-ministeru. Per eżempju, oħt waħda li l-abbiltajiet tagħha li timxi u titkellem ġew effettwati bis-serjetà minħabba operazzjoni sabet li setgħet tieħu sehem fix-xogħol bir-rivisti jekk ir-raġel tagħha jipparkja l-karozza ħdejn bankina fejn jgħaddu ħafna nies. F’okkażjoni waħda, hi qassmet 80 rivista f’sagħtejn! Iċ-ċirkustanzi speċjali tiegħek forsi wkoll iġibuk f’kuntatt maʼ nies li kieku jkun diffiċli li nilħquhom. Jekk dan hu l-każ, ħares lejhom bħala t-territorju speċjali tiegħek.
3 L-ippridkar tiegħek jistaʼ jkun effettiv ħafna! Waqt li oħrajn josservaw id-determinazzjoni tiegħek u l-effett tajjeb li l-verità tal-Bibbja kellha fil-ħajja tiegħek, forsi jinġibdu lejn il-messaġġ tas-Saltna. Iktar minn hekk, meta tiltaqaʼ maʼ nies li għaddejjin minn inkwiet, l-esperjenza tiegħek fil-ħajja tistaʼ tippreparak biex tipprovdilhom faraġ mill-Kelma t’Alla.—2 Kor. 1:4.
4 Int Tistaʼ Ssaħħaħ lil Oħrajn: Ma ġejtx int inkuraġġit bl-esperjenza taʼ Laurel Nisbet, li kellha toqgħod f’magna li tħaddem il-pulmun għal 37 sena u madankollu għenet lil 17-il individwu biex jiksbu għarfien eżatt tal-verità mill-Bibbja? Bl-istess mod, l-eżempju tiegħek jistaʼ jqanqal lil sħabek fit-twemmin biex jistinkaw fis-servizz taʼ Jehovah.—g93 1/22 pġi. 18-21.
5 Saħansitra jekk iċ-ċirkustanzi tiegħek iwaqqfuk milli toħroġ fil-ministeru daqskemm tkun tixtieq, xorta tistaʼ ssaħħaħ lil oħrajn. Ħu wieħed qal: “Jien tgħallimt li saħansitra bniedem b’diżabilità kbira jistaʼ jkun taʼ servizz kbir għal oħrajn. Jien u marti konna qisna speċi t’ankra għal uħud differenti fil-kongregazzjoni. Minħabba ċ-ċirkustanzi tagħna aħna dejjem hawn, dejjem disponibbli.” Madankollu, minħabba d-diżabilità tiegħek, huwa mifhum li mhux dejjem tistaʼ taġixxi fi qbil maż-żelu tiegħek. Xorta waħda, bi ftit għajnuna jistaʼ jkollok sehem attiv fil-ministeru. Għalhekk, jekk għandek bżonn xi għajnuna, iżżommx lura milli tiġbed l-attenzjoni taʼ l-anzjani jew t’oħrajn fil-kongregazzjoni li jistgħu jgħinuk.
6 Jehovah jara dak kollu li tagħmel sabiex taqdih, u hu jifraħ bis-servizz tiegħek b’ruħek kollha. (Salm 139:1-4) Waqt li tistrieħ fuqu, hu jistaʼ jagħtik il-qawwa biex ikollok ministeru produttiv ħafna u taʼ skop.—2 Kor. 12:7-10.