Bnedmin taʼ Kull Xorta Se Jiġu Salvati
1. Minn xiex tiddependi r-reputazzjoni tagħna m’Alla?
1 Il-qalb tajba mhix mistħoqqa t’Alla fetħet it-triq għas-salvazzjoni. Hija r-rieda taʼ Ġeħova li “bnedmin taʼ kull xorta jiġu salvati u jaslu għall-għarfien eżatt dwar il-verità.” (1 Tim. 2:3, 4) Ir-reputazzjoni tagħna m’Alla ma tiddependix mir-razza, l-istat soċjali, l-abbiltajiet, jew id-dehra tagħna taʼ barra, imma mill-fatt li neżerċitaw fidi fis-sagrifiċċju tal-fidwa taʼ Ġesù. (Ġw. 3:16, 36) Bħala ħaddiema sħab m’Alla, irridu neħilsu minn kull preġudizzju li jistaʼ jinfluwenzana biex niċħdu nies li Ġeħova hu lest li jaċċettahom.
2, 3. X’jistaʼ jgħinna ma niġġudikawx lin-nies mid-dehra tagħhom taʼ barra?
2 Tiġġudikax: Ġeħova jara dak li n-nies huma minn ġewwa, mingħajr malizzja jew parzjalità. (1 Sam. 16:7) Hu jara wkoll il-potenzjal li għandhom. Għalhekk, hu jara lil dawk li jixtiequ jogħġbuh bħala ġid, jew mixtiqin. (Ħag. 2:7) Naraw aħna lil oħrajn bħalma jarahom Alla?
3 Xi nies li niltaqgħu magħhom fil-ministeru jistgħu jaħsduna bid-dehra tagħhom. Għandhom mnejn jilbsu bl-addoċċ jew indeċenti, ikollhom daqna goffa, jew jilbsu msielet fi mneħirhom jew f’xofftejhom. Xi wħud jistgħu jkunu bla dar. Oħrajn għandhom mnejn jittrattawna bl-aħrax. Minflok ma niġġudikaw lil dawn l-uħud bħala li probabbilment qatt ma jistgħu jsiru aduraturi taʼ Ġeħova, irid ikollna attitudni pożittiva, “għax anki aħna darba konna bla sens, diżubbidjenti, [u] imqarrqin.” (Titu 3:3) Jekk nirrealizzaw dan, se nkunu ħerqanin li nippridkaw lil kulħadd, anki lil dawk li mid-dehra taʼ barra forsi jidhru li ma jistħoqqilhomx.
4, 5. X’nitgħallmu mill-eżempji taʼ Ġesù u Pawlu?
4 Eżempji taʼ l-Ewwel Seklu: Ġesù Kristu ħa l-ħin biex jgħin anki lil dawk li oħrajn setgħu ħassew li m’hemmx tama għalihom. (Lq. 8:26-39) Għalkemm qatt m’approva l-ħażen, hu kien jaf li n-nies setgħu jinqabdu f’ħajja ħażina. (Lq. 7:37, 38, 44-48) Għalhekk, hu wera l-mogħdrija, minħabba li “tħassarhom, għax kienu bħal nagħaġ mingħajr ragħaj.” (Mk. 6:34) Nistgħu aħna nimitaw l-eżempju tiegħu iktar bis-sħiħ?
5 L-appostlu Pawlu ġie mħaġġar, imsawwat, u mitfugħ il-ħabs. (Atti 14:19; 16:22, 23) Ġagħlu dan it-trattament aħrax jirrabja u jikkonkludi li kien qed jaħli l-ħin fost ċerti ġnus u gruppi etniċi? Lanqas xejn. Hu kien jaf li kien hemm individwi taʼ qalb onesta fost il-gruppi etniċi kollha, u kien determinat li jsibhom. Għandna aħna l-istess ħarsa lejn dawk li huma taʼ sfond u kultura differenti fit-territorju tagħna?
6. X’effett jistaʼ jkollha l-attitudni tagħna fuq uħud ġodda fil-laqgħat tal-kongregazzjoni?
6 Nilqgħu lil Oħrajn Illum: Ħafna wħud mill-poplu t’Alla huma ferħanin li fil-kongregazzjoni jiġu milqugħin minn aħwa li m’humiex influwenzati mid-dehra taʼ barra. Raġel b’daqna goffa, b’xagħar twil sa spallejh, u bi ħwejjeġ maħmuġin, daħal f’Sala tas-Saltna fil-Ġermanja. Hu kellu reputazzjoni ħażina. Minkejja dan, fil-laqgħa hu ġie milqugħ mill-qalb. Tant baqaʼ impressjonat li ġimgħa wara reġaʼ mar. Fi żmien qasir, hu naddaf id-dehra tiegħu, waqaf ipejjep, u żżewweġ lill-mara li kien jgħix magħha. Ma damux biex flimkien maʼ wliedhom bdew jaqdu lil Ġeħova bħala familja magħquda.
7. Kif nistgħu nimitaw lil Alla tagħna li hu imparzjali?
7 Hekk kif nimitaw lil Alla tagħna li hu imparzjali, jalla nistiednu lil kulħadd biex jibbenefika mill-qalb tajba mhix mistħoqqa t’Alla.
[Kumment f’paġna 3]
“Alla mhux parzjali, imma f’kull ġens min jibżaʼ minnu u jagħmel is-sewwa hu aċċettat minnu.”—Atti 10:34, 35.