Uri Interess Persunali—Billi Turi Qalb Tajba
1 Meta ftakret dwar l-ewwel darba li ltaqgħet max-Xhieda taʼ Ġeħova, mara li kienet preġudikata kontra x-Xhieda qalet: “Ma niftakar xejn minn dak li tkellimna dwaru, imma dak li niftakar hu kemm kienet qalbha tajba miegħi, u kemm kienet ospitabbli u umli. Ħassejtni verament miġbuda lejha bħala persuna.” Dawn il-kummenti jenfasizzaw kemm hu importanti li nuru interess persunali sinċier f’dawk li nippridkawlhom.—Flp. 2:4.
2 L-Imħabba Hi Qalbha Tajba: Mod wieħed kif nuru l-imħabba m’oħrajn hu billi nuruhom qalb tajba. (1 Kor. 13:4) Individwu li juri qalb tajba jinteressah b’mod attiv fil-benesseri taʼ ħaddieħor, u jipprova jagħmel affarijiet biex jgħinhom. M’għandniex xi ngħidu, ix-xogħol taʼ l-ippridkar fih innifsu hu għemil taʼ qalb tajba. Imma l-interess ġenwin tagħna fin-nies se jidher iktar ċar meta nagħmlu iktar milli sempliċement nippridkawlhom. L-imġiba kollha tagħna man-nies—il-fatt li nkunu dħulin, nuru manjieri tajbin, il-mod kif nisimgħu, dak li ngħidu u kif ngħiduh, saħansitra l-espressjoni taʼ wiċċna meta nkellmu lil oħrajn—se turi jekk jimpurtaniex minnhom verament.—Mt. 8:2, 3.
3 L-interess bi mħabba fin-nies se jqanqalna wkoll biex noffrulhom l-għajnuna b’modi prattiċi. Meta kien qed jippriedka minn bieb għal bieb, ħu pijunier ġie mkeċċi minn armla anzjana malli saret taf min kien. Hi qaltlu li kienet fuq sellum fil-kċina tipprova tibdel bozza x’ħin daqq il-qanpiena. Hu qalilha, “Huwa perikoluż għalik li tagħmel din il-biċċa xogħol waħdek.” Hi stidnitu jidħol ġewwa. Bidlilha l-bozza u telaq. Meta bin il-mara mar jittawlilha ftit ħin wara biex jara kif inhi, hi qaltlu x’kien ġara. Tant impressjona ruħu li mar ifittex lill-ħu biex jesprimi l-apprezzament tiegħu. Dan wassal għal konversazzjoni mill-aqwa, u l-iben aċċetta studju tal-Bibbja.
4 Jekk nuru qalb tajba, se nirriflettu l-imħabba li għandu Ġeħova għan-nies u se nsebbħu lmessaġġ tas-Saltna. Għalhekk, jalla dejjem “nirrikkmandaw lilna nfusna bħala ministri t’Alla . . . bil-qalb tajba.”—2 Kor. 6:4, 6.