Kapitlu 61
Tifel Ippossessat Imfejjaq
WAQT li Ġesù, Pietru, Ġakbu, u Ġwanni qegħdin x’imkien ieħor, x’aktarx fuq parti mqabbża ’l barra tal-Muntanja Ħermon, id-dixxipli l-oħra jidħlu fi problema. Meta jiġi lura, Ġesù minnufih jara li hemm xi ħaġa ħażina. Hemm folla miġbura madwar id-dixxipli tiegħu, u l-iskribi qed jargumentaw magħhom. Malli jaraw lil Ġesù, in-nies jistagħġbu ferm u jiġru biex jilqgħuh. “Fuqiex qed tħaqquha magħhom?” jistaqsi hu.
Billi joħroġ ’il quddiem minn ġol-folla, wieħed raġel jinżel għar-rkobbtejh quddiem Ġesù u jispjega: “Għalliem, ġibtlek lil ibni għaliex għandu spirtu mutu; u kulfejn jaħtfu jsabbtu mal-art, u joħroġ ir-ragħwa u jheżheż snienu u jitlef saħħtu. U jien għedt lid-dixxipli tiegħek biex ikeċċuh, imma huma ma kellhomx ħila.”
L-iskribi mid-dehra qed japprofittaw irwieħhom ħafna mill-fatt li d-dixxipli ma fejqux lit-tifel, u forsi qed jirredikolaw l-isforzi tagħhom. Eżatt f’dan il-mument kritiku, jasal Ġesù. “O ġenerazzjoni bla fidi,” igħid hu, “kemm irrid indum magħkom? Kemm irrid indum nissaportikom?”
Ġesù donnu qed jindirizza kliemu lil kulmin hemm preżenti, imma bla dubju l-kliem tiegħu huwa dirett b’mod partikulari lejn l-iskribi, li kienu qed jaqilgħu l-inkwiet għad-dixxipli tiegħu. Wara dan, Ġesù jgħid dwar it-tifel: “Ġibuhuli.” Imma hekk kif it-tifel jiġi lejn Ġesù, id-demonju li jippossessah iħabbtu mal-art u jitfgħu f’konvulżjonijiet vjolenti. It-tifel jitgerbeb mal-art u joħroġ ir-ragħwa minn ħalqu.
“Kemm ilu jiġrilu hekk?” jistaqsi Ġesù.
“Minn ċkunitu ’l hawn,” iwieġeb il-missier. “Kemm-il darba [id-demonju] kien jitfgħu kemm fin-nar u kemm fl-ilma biex jeqirdu.” Imbagħad il-missier jitlob: “Jekk tistaʼ tagħmel xi ħaġa, ikollok ħniena minna u għinna.”
Forsi għal snin sħaħ, il-missier kien qed ifittex il-għajnuna. U issa, peress li d-dixxipli taʼ Ġesù ma fejquhulux, id-disprament tiegħu hu kbir. Biex iwieġeb għall-appell iddisprat tar-raġel, Ġesù jgħid b’inkuraġġiment: “Dik l-espressjoni, ‘Jekk tistaʼ’! L-affarijiet kollha jistgħu jkunu għal wieħed jekk wieħed għandu fidi.”
“Jien għandi fidi!” igħajjat minnufih il-missier, imma hu jitlob: “Għinni fejn għandi bżonn fidi!”
Waqt li jinduna li l-folla qed tiġri f’daqqa għal fuqhom, Ġesù jċanfar lid-demonju: “Ja spirtu mutu u trux, nordnalek, oħroġ minn ġo fih u tidħolx fih iżjed.” Hekk kif id-demonju jitlaq, hu jerġaʼ jġiegħel lit-tifel igħajjat u jitfgħu f’ħafna konvulżjonijiet. Imbagħad it-tifel jibqaʼ fl-art bla ma jitħarrek, tant li ħafna min-nies jibdew igħidu: “Mejjet!” Imma Ġesù jaqbad lit-tifel minn idu, u dan iqum.
Iktar kmieni, meta d-dixxipli kienu ġew mibgħutin biex jippridkaw, huma kienu keċċew xi demonji. Mela issa, meta huma jidħlu ġo dar, jistaqsu lil Ġesù privatament: “Għala ma stajniex inkeċċuh?”
Billi jindika li dan kien minħabba n-nuqqas taʼ fidi tagħhom, Ġesù jwieġeb: “Din ix-xorta ma tistaʼ toħroġ b’xejn ħlief bit-talb.” B’mod evidenti l-preparazzjoni kienet meħtieġa biex jitkeċċa d-demonju setgħan b’mod speċjali li kien involut f’dan il-każ. Fidi qawwija flimkien maʼ talb għall-għajnuna t’Alla li tagħti l-qawwa kienet meħtieġa.
U mbagħad Ġesù jżid: “Verament ingħidilkom, Jekk għandkom fidi d-daqs taʼ żerriegħa tal-mustarda, se tgħidu lil din il-muntanja, ‘Trasferixxi minn hawn għal hemm,’ u hi se tittrasferixxi, u xejn ma se jkun impossibbli għalikom.” Kemm tistaʼ tkun qawwija l-fidi!
L-ostakli u d-diffikultajiet li jwaqqfu l-progress fis-servizz taʼ Jehovah jistgħu jidhru li ma jistgħux jiġu megħluba u li ma jistgħux jiġu mċaqalqin bħal muntanja kbira litterali. Madankollu, Ġesù qed juri li jekk aħna nikkultivaw il-fidi fi qlubna, insaqquha u ninkuraġġuha biex tikber, se tespandi għall-maturità u se tgħinna biex negħlbu ostakli u diffikultajiet bħal muntanji. Mark 9:14-29; Mattew 17:19, 20; Luqa 9:37-43.
▪ Ġesù maʼ liema sitwazzjoni jiltaqaʼ meta jiġi lura mill-Muntanja Ħermon?
▪ Ġesù x’inkuraġġiment jagħtih lil missier it-tifel ippossessat minn demonju?
▪ Id-dixxipli għala ma rnexxilhomx ikeċċu lid-demonju?
▪ Ġesù kemm juri li tistaʼ ssir qawwija l-fidi?