Kapitlu 55

Ħafna Dixxipli Ma Jibqgħux Isegwu Lil Ġesù

ĠESÙ qed igħallem f’sinagoga ġo Kapernahum dwar il-​parti tiegħu bħala l-​ħobż veru mis-​sema. It-​taħdita tiegħu b’mod evidenti hija estensjoni tad-​diskussjoni li bdiet man-​nies meta sabuh huma u ġejjin lura min-​naħa tal-​Lvant tal-​Baħar tal-​Galilija, fejn huma kienu kielu mill-​ħobż u mill-​ħutiet ipprovduti b’mod mirakoluż.

Ġesù jissokta bir-​rimarki tiegħu, billi jgħid: “Il-​ħobż li se nagħti jien huwa laħmi għall-​ħajja tad-​dinja.” Sentejn biss qabel, fir-​Rebbiegħa tas-​sena 30 E.K., Ġesù qal lil Nikodemu li Alla tant ħabb lid-​dinja li hu pprovda lil Ibnu bħala Salvatur. B’hekk, Ġesù issa qed juri li kull wieħed mid-​dinja tal-​bnedmin li jiekol b’mod simboliku mil-​laħam tiegħu, billi jeżerċita fidi fis-​sagrifiċċju li dalwaqt se jagħmel, jistaʼ jirċievi l-​ħajja taʼ dejjem.

In-nies, madankollu, jitfixklu minħabba l-​kliem taʼ Ġesù. “Kif jistaʼ dan ir-​raġel jagħtina laħmu biex nikluh?” jistaqsu huma. Ġesù jrid li s-​semmiegħa tiegħu jifhmu li l-​ikel tal-​laħam tiegħu kellu jsir b’mod figurattiv. Mela, biex jenfasizza dan, hu jgħid xi ħaġa li hi jerġaʼ iktar oġġezzjonabbli jekk tittieħed b’mod litterali.

“Jekk ma tiklux il-​laħam taʼ Bin il-​bniedem u ma tixorbux demmu,” jiddikjara Ġesù, “m’għandkom ebda ħajja fikom infuskom. Dak li jiekol minn laħmi u jixrob demmi għandu l-​ħajja taʼ dejjem, u jien se nirxoxtah fl-​aħħar jum; għax laħmi hu ikel veru, u demmi hu xorb veru. Dak li jiekol minn laħmi u jixrob demmi jibqaʼ f’għaqda miegħi, u jiena f’għaqda miegħu.”

Veru, it-​tagħlim taʼ Ġesù kien ikun jinstemaʼ offensiv ferm kieku kien qed jissuġġerixxi l-​kannibaliżmu. Imma, naturalment, Ġesù mhux qed igħid li wieħed irid jiekol il-​​laħam u jixrob id-​demm b’mod litterali. Hu qed jenfasizza sempliċement li dawk kollha li jirċievu l-​ħajja taʼ dejjem iridu jeżerċitaw fidi fis-​sagrifiċċju li hu se jagħmel meta joffri l-​ġisem uman u perfett tiegħu u jxerred id-​demm tal-​ħajja tiegħu. Iżda, saħansitra ħafna mid-​dixxipli tiegħu ma jagħmlu ebda sforz biex jifhmu t-​tagħlim tiegħu u għalhekk joġġezzjonaw: “Dan id-​diskors ikexkex; min jistaʼ jisimgħu?”

Billi jaf li ħafna mid-​dixxipli tiegħu qed igemgmu, Ġesù jgħid: “Ifixkilkom dan? Xi tgħidu, għalhekk, kieku kellkom tilmħu lil Bin il-​bniedem tielaʼ lejn fejn kien qabel? . . . Il-​qwiel li għedtilkom huma spirtu u huma ħajja. Imma hemm xi wħud minnkom li ma jemmnux.”

Ikompli Ġesù: “Dan hu għala għedtilkom, Ħadd ma jistaʼ jiġi għandi jekk ma jkunx ġie mogħti lilu mill-​Missier.” Għal dan, ħafna mid-​dixxipli tiegħu jitilqu u ma jsegwuhx iktar. Mela Ġesù jdur lejn it-​12-il appostlu tiegħu u jistaqsi: “Ma tridux tmorru intom ukoll, hux?”

Iwieġeb Pietru: “Mulej, għand min se mmorru? Int għandek qwiel taʼ ħajja taʼ dejjem; u aħna emminna u sirna nafu li inti l-​Qaddis t’Alla.” X’espressjoni mill-​isbaħ taʼ lejaltà, saħansitra jekk Pietru u l-​appostli l-​oħra forsi ma fehmux għalkollox it-​tagħlim taʼ Ġesù dwar din il-​ħaġa!

Għalkemm ferħan bit-​tweġiba taʼ Pietru, Ġesù josserva: “Jien għażiltkom lilkom it-​tnax, mhux hekk? Madankollu wieħed minnkom huwa kalunnjatur.” Qed jitkellem dwar Ġuda l-​Iskarjota. X’aktarx li f’dan il-​punt Ġesù jiskopri f’Ġuda “bidu” taʼ korsa żballjata.

Ġesù għadu kif iddiżappunta lin-​nies billi rreżista l-​attentati tagħhom biex jagħmluh sultan, u huma forsi qed jirraġunaw, ‘Kif jistaʼ dan ikun il-​Messija jekk mhux se jassumi l-​pożizzjoni li tixraq lill-​Messija?’ Din, ukoll, kellha tkun kwistjoni friska fl-​imħuħ tan-​nies. Ġwann 6:​51-71; 3:16.

▪ Ġesù jagħti l-​laħam tiegħu għal min, u dawn kif ‘jieklu laħmu’?

▪ Liema kliem ieħor taʼ Ġesù jkexkex lin-​nies, madankollu hu x’qed jenfasizza?

▪ Meta ħafna ma jibqgħux isegwu lil Ġesù, Pietru x’iwieġeb?