Kapitlu Sitta

Il-​Kwistjoni li Lkoll Kemm Aħna Rridu Niffaċċjaw

1, 2. (a) Liema kwistjoni qajjem Satana fl-​Għeden? (b) Din il-​kwistjoni kif inhi implikata minn dak li qal?

INT involut fl-​iktar kwistjoni importanti li l-​umanità qatt iffaċċjat. Il-​pożizzjoni tiegħek rigward din il-​kwistjoni se tiddetermina l-​futur etern tiegħek. Din tqajmet meta faqqgħet ir-​ribelljoni fl-​Għeden. Dak iż-​żmien, Satana staqsa lil Eva: “Tassew li Alla qalilkom: ‘La tiklux mis-​siġar kollha tal-​ġnien’?” Hi wieġbet li rigward il-​frott taʼ siġra waħda Alla qal: “La tiklux minnu, . . . inkella tmutu.” Imbagħad, Satana akkuża direttament lil Jehovah li kien giddieb, billi qal li la l-​ħajja taʼ Eva u lanqas dik taʼ Adam ma kienet tiddependi mill-​ubbidjenza lejn Alla. Satana sostna li Alla kien qed iċaħħad lill-​ħlejjaq tiegħu minn xi ħaġa tajba—il-​kapaċità li jistabbilixxu huma stess il-​livelli fil-​ħajja tagħhom. Satana qal: “Alla jaf li dak in-​nhar li tieklu minnu jinfetħu għajnejkom u ssiru bħal allat, li jafu t-​tajjeb u l-​ħażin.”—Ġenesi 3:​1-5.

² Fi kliem ieħor, Satana kien qed jgħid li l-​bnedmin ikunu f’pożizzjoni aħjar jekk jieħdu d-​deċiżjonijiet għalihom infushom milli jekk jobdu l-​liġijiet t’Alla. B’hekk, hu sfida l-​mod kif Alla jaħkem. Dan qajjem l-​iktar kwistjoni importanti li tirrigwarda s-​sovranità universali t’Alla, jiġifieri, id-​dritt tiegħu li jaħkem. Tqajmet il-​mistoqsija: X’inhu l-​aħjar għall-​bniedem, il-​mod kif Jehovah jaħkem jew ħakma indipendenti minnu? Aħseb ftit, Jehovah setaʼ qered lil Adam u Eva minnufih, imma dan ma kienx jissetilja l-​kwistjoni tas-​sovranità b’mod sodisfaċenti. Billi jħalli soċjetà umana tiżviluppa għall-​perijodu taʼ żmien, Alla setaʼ juri eżattament x’kienet se tipproduċi l-​indipendenza minnu u mil-​liġijiet tiegħu.

3. Liema kwistjoni sekondarja qajjem Satana?

³ L-​attakk taʼ Satana fuq id-​dritt taʼ Jehovah biex jaħkem ma waqafx b’dak li seħħ fl-​Għeden. Hu tefaʼ dubju fuq il-​lealtà t’oħrajn lejn Jehovah. Din saret kwistjoni sekondarja li hi marbuta mill-​qrib maʼ l-​oħra. Bl-​isfida tiegħu inkluda kemm lin-​nisel taʼ Adam u Eva kif ukoll l-​ulied spirti t’Alla, saħansitra l-​Iben uniġenitu tant maħbub minn Jehovah. Per eżempju, fi żmien Ġob, Satana esprima l-​fehma li dawk li jaqdu lil Jehovah jagħmlu hekk, mhux għax iħobbu lil Alla u l-​mod kif jaħkem, imma għal raġunijiet egoistiċi. Hu argumenta li meta jesperjenzaw xi tbatija, kollha jċedu għax-​xewqat egoistiċi.—Ġob 2:​1-6; Apokalissi 12:10.

Il-​Prova li Tat l-​Istorja

4, 5. L-​istorja liema prova tat dwar jekk il-​bniedem jistax jidderieġi l-​passi tiegħu stess?

⁴ Punt vitali fil-​kwistjoni tas-​sovranità huwa dan: Alla ma ħalaqx lill-​bnedmin biex jgħixu indipendenti mill-​ħakma tiegħu u jkollhom suċċess. Għall-​benefiċċju tagħhom hu għamilhom jiddependu mil-​liġijiet ġusti u sewwa tiegħu. Il-​profeta Ġeremija għaraf: “Jien naf, Mulej, triq il-​bniedem m’hijiex f’idejh, anqas min jimxi ma jistaʼ jiddirieġi l-​passi tiegħu. Għakkisni [“Ikkoreġini,” NW] Mulej.” (Ġeremija 10:​23, 24) Għalhekk, il-​Kelma t’Alla tħeġġeġ: “Ittama fil-​Mulej b’qalbek kollha, u tafdax fl-​għaqal tiegħek.” (Proverbji 3:5) Sewwa sew bħalma Alla għamel lill-​bnedmin kollha suġġetti għal-​liġijiet fiżiċi tiegħu biex jibqgħu ħajjin, hu għamel ukoll liġijiet morali, li jekk jiġu obduti jirriżultaw f’soċjetà magħquda.

⁵ B’mod ċar, Alla kien jaf li l-​familja umana ma setaʼ qatt ikollha s-​suċċess li tirregola lilha nfisha mingħajr il-​ħakma tiegħu. F’attentat fieragħ biex ikunu indipendenti mill-​ħakma t’Alla, il-​bnedmin għamlu sistemi politiċi, ekonomiċi, u reliġjużi differenti. Dawn id-​differenzi wasslu lin-​nies f’konflitt kontinwu bejniethom, u dan irriżulta fi vjolenza, gwerer, u mewt. “Bniedem jaħkem fuq ieħor u jagħmillu l-​ħsara.” (Koħèlet 8:9) Ġara eżatt hekk matul l-​istorja umana. Kif imbassar fil-​Kelma t’Alla, in-​nies ħżiena u l-​imposturi komplew “imorru mill-​ħażin għall-​agħar.” (2 Timotju 3:13) Barra minn hekk, is-​seklu 20, li ra lill-​umanità tilħaq riżultati kbar f’dik li hi xjenza u industrija, ra l-​agħar gwajijiet li qatt kien hawn. Il-​kliem taʼ Ġeremija 10:23 ngħata prova bil-​kbir—il-​bnedmin ma nħolqux biex jidderieġu l-​passi tagħhom stess.

6. Alla kif dalwaqt se jsolvi l-​indipendenza tal-​bnedmin minnu?

⁶ Il-​konsegwenzi traġiċi u fit-​tul taʼ l-​indipendenza minn Alla wrew darba għal dejjem li l-​ħakma mill-​bnedmin qatt ma jistaʼ jkollha suċċess. Il-​ħakma t’Alla hija l-​unika triq għall-​hena, l-​unità, is-​saħħa, u l-​ħajja. U l-​Kelma t’Alla turi li Jehovah mhux se jibqaʼ jittollera l-​ħakma indipendenti tal-​bniedem; din qed toqrob lejn tmiemha. (Mattew 24:​3-14; 2 Timotju 3:​1-5) Dalwaqt se jintervieni fil-​ġrajjiet umani biex jistabbilixxi l-​ħakma tiegħu fuq l-​art. Il-​profezija Biblika tistqarr: “Fi żmien dawn is-​slaten [il-ħakmiet umani li jeżistu llum], Alla tas-​sema jqajjem saltna [fis-sema] li ma tinqered qatt, u li l-​ħakma tagħha ma tgħaddix għal poplu ieħor [il-bnedmin qatt iktar ma se jaħkmu fuq l-​art]. Hija tfarrak u ttemm is-​saltniet l-​oħra kollha [taʼ llum], waqt li hi tibqaʼ wieqfa għal dejjem.”—Danjel 2:44.

Insalvaw għad-​Dinja l-​Ġdida t’Alla

7. Meta l-​ħakma t’Alla ttemm il-​ħakma tal-​bniedem, min se jibqaʼ ħaj?

⁷ Meta l-​ħakma t’Alla ttemm il-​ħakma tal-​bniedem, min se jsalva? Il-​Bibbja twieġeb: “It-​tajbin [dawk li jappoġġaw id-​dritt t’Alla li jaħkem] jgħammru fl-​art, u n-​nies sewwa joqogħdu fiha; imma l-​ħżiena [dawk li ma jappoġġawx id-​dritt t’Alla li jaħkem] mill-​art jitqaċċtu, u l-​qarrieqa jinqalgħu minnha.” (Proverbji 2:​21, 22) B’mod simili, is-​salmista stqarr: “Ftit ieħor, u l-​ħażin ma jkunx aktar . . . Il-​ġusti jirtu l-​art, u jgħammru fiha għal dejjem.”—Salm 37:​10, 29.

8. Alla kif se jivvindika bis-​sħiħ is-​sovranità tiegħu?

⁸ Wara li s-​sistema taʼ Satana tiġi meqruda, Alla se jġib id-​dinja l-​ġdida tiegħu, li se telimina kompletament il-​vjolenza qerrieda, il-​gwerer, il-​faqar, is-​sofferenza, il-​mard, u l-​mewt li żammew lill-​umanità fil-​jasar għal eluf taʼ snin. Il-​Bibbja tiddeskrivi bi kliem sabiħ il-​barkiet li qed jistennew lill-​umanità ubbidjenti: “Hu [Alla] jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.” (Apokalissi 21:​3, 4) Permezz tal-​gvern tas-​Saltna tiegħu fis-​sema taħt Kristu, Alla se jivvindika (jiġġustifika, jew jagħti prova) bis-​sħiħ id-​dritt Tiegħu li jkun is-​Sovran tagħna, jiġifieri, il-​Ħakkiem tagħna.—Rumani 16:20; 2 Pietru 3:​10-13; Apokalissi 20:​1-6.

Kif Xi Nies Wieġbu għall-​Kwistjoni

9. (a) Dawk li baqgħu leali lejn Jehovah kif kienu jqisuha l-​kelma tiegħu? (b) Noè kif ta prova tal-​lealtà tiegħu, u kif nistgħu nibbenefikaw mill-​eżempju tiegħu?

⁹ Matul l-​istorja kollha tal-​bniedem, kien hemm irġiel u nisa leali li taw prova tal-​lealtà tagħhom lejn Jehovah bħala s-​Sovran. Kienu jafu li ħajjithom kienet tiddependi milli jisimgħu minnu u jobduh. Noè kien wieħed minnhom. Għalhekk, Alla qal lil Noè: “Għalija tmiem il-​ħajjin kollha wasal . . . Agħmel għalik arka.” U Noè ssottometta ruħu għad-​direzzjoni taʼ Jehovah. Minkejja li kienu mwissijin, nies oħra fi żmienu komplew jgħixu ħajjithom bħallikieku ma kien se jiġri xejn mhux tas-​soltu. Imma Noè bena arka enormi u kompla jippriedka lil oħrajn dwar il-​mogħdijiet ġusti u sewwa taʼ Jehovah. Ir-​rakkont ikompli jgħid: “Hekk għamel Noè, għamel kull ma ordnalu Alla.”—Ġenesi 6:​13-22; Lhud 11:7; 2 Pietru 2:5.

10. (a) Abraham u Sara kif appoġġaw is-​sovranità taʼ Jehovah? (b) B’liema mod nistgħu nibbenefikaw mill-​eżempji t’Abraham u Sara?

¹⁰ Abraham u Sara wkoll kienu taʼ eżempju mill-​aħjar billi appoġġaw is-​sovranità taʼ Jehovah, filwaqt li għamlu kulma kkmandahom. Kienu jgħixu f’Ur tal-​Kaldin, li kienet belt prosperuża. Imma meta Jehovah qal lil Abraham biex imur f’art oħra, art li ma kienx familjari magħha, Abraham ‘telaq kif kien qallu l-​Mulej.’ Mingħajr ebda dubju, Sara kienet tgħix ħajja komda—kellha dar, ħbieb, u qraba. Madankollu, kienet sottomessa lejn Jehovah u lejn żewġha u marret fl-​art taʼ Kangħan, għalkemm ma kinitx taf x’sitwazzjoni se ssib hemmhekk.—Ġenesi 11:31–​12:4; Atti 7:​2-4.

11. (a) F’liema ċirkustanzi Mosè appoġġa s-​sovranità taʼ Jehovah? (b) Kif nistgħu nibbenefikaw mill-​eżempju taʼ Mosè?

¹¹ Mosè kien bniedem ieħor li appoġġa s-​sovranità taʼ Jehovah. Hu għamel dan fl-​iktar ċirkustanzi diffiċli—billi ffaċċja wiċċ imbwiċċ lil Fargħun taʼ l-​Eġittu. Mhux għax Mosè kien fiduċjuż fih innifsu. Għall-​kuntrarju, hu ddubita mill-​kapaċità tiegħu li jitkellem tajjeb. Imma xorta obda lil Jehovah. Bl-​appoġġ taʼ Jehovah u bl-​għajnuna taʼ ħuh, Aron, Mosè wassal kemm-il darba l-​kelma taʼ Jehovah lil Fargħun li kien stinat. Saħansitra ftit minn ulied Iżrael kienu jikkritikaw lil Mosè bl-​aħrax. Madankollu, Mosè għamel kulma kkmandalu Jehovah bil-​lealtà, u permezz tiegħu, Iżrael inħareġ mill-​Eġittu.—Eżodu 7:6; 12:​50, 51; Lhud 11:​24-27.

12. (a) X’juri li l-​lealtà lejn Jehovah tinvolvi iktar milli tagħmel dak li Alla speċifika bil-​miktub? (b) Jekk nifhmu dan it-​tip taʼ lealtà kif jistaʼ jgħinna napplikaw l-​1 Ġwann 2:15?

¹² Dawk li kienu leali lejn Jehovah ma rraġunawx li kulma kien meħtieġ hu li jobdu dak li Alla tahom bil-​miktub. Meta mart Putifar ipprovat tħajjar lil Ġużeppi biex jagħmel l-​adulterju magħha, ma kien hemm l-​ebda kmandament minn Alla bil-​miktub li kien jipprojbixxi dan. Madankollu, Ġużeppi kien jaf dwar l-​arranġament taż-​żwieġ stabbilit minn Jehovah fl-​Għeden. Hu kien konxju li jekk ikollu relazzjonijiet sesswali mal-​mara taʼ raġel ieħor ma kienx se jogħġob lil Alla. Ġużeppi ma kienx interessat li jipprova jara sa liema punt Alla se jħallih ikun bħall-​Eġizzjani. Appoġġa l-​mogħdijiet taʼ Jehovah billi mmedita fuq kif Alla ttratta maʼ l-​umanità u mbagħad applika skond il-​kuxjenza dak li għaraf li hi r-​rieda t’Alla.—Ġenesi 39:​7-12; Salm 77:​12, 13 (77:​11, 12, NW).

13. Ix-​Xitan kif ġie provat li hu giddieb rigward (a) Ġob? (b) it-​tliet Ebrej?

¹³ Anki jekk ikunu għaddejjin minn xi prova ħarxa, dawk li tassew jafu lil Jehovah ma jwarrbux lil hinn minnu. Satana allega li jekk Ġob jitlef ħafna mill-​ġid jew is-​saħħa tiegħu, saħansitra hu jwarrab lil Alla, minkejja li Jehovah kien japprovah. Imma Ġob ta prova li x-​Xitan huwa giddieb, avolja Ġob innifsu ma kienx jaf għala kienu ġew fuqu dawk id-​diżastri kollha. (Ġob 2:​9, 10) Sekli wara, waqt li kien għadu jipprova juri l-​punt tiegħu, Satana ġiegħel lis-​sultan irrabjat taʼ Babilonja jhedded lil tliet żgħażagħ Ebrej bil-​mewt ġewwa forn tan-​nar jekk ma jqimux statwa mpoġġija mis-​sultan. Imġagħlin jagħżlu bejn l-​ubbidjenza għall-​kmand tas-​sultan u l-​ubbidjenza għal-​liġi taʼ Jehovah kontra l-​idolatrija, huma wrew b’determinazzjoni li kienu jaqdu lil Jehovah u li hu kien is-​Sovran Suprem tagħhom. Il-​fedeltà tagħhom lejn Alla kienet iktar prezzjuża għalihom minn ħajjithom tal-​preżent!—Danjel 3:​14-18.

14. Kif inhu possibbli għalina bħala bnedmin imperfetti li nagħtu prova li aħna tassew leali lejn Jehovah?

¹⁴ Għandna nikkonkludu minn dawn l-​eżempji li biex tkun leali lejn Jehovah trid tkun perfett, jew li min jagħmel żball ikun falla kompletament? Dażgur li le! Il-​Bibbja tgħidilna li xi drabi Mosè naqas. Għalkemm Jehovah ma ħax pjaċir, hu ma warrbux lil Mosè. L-​appostli taʼ Ġesù Kristu wkoll kellhom id-​dgħjufijiet tagħhom. Waqt li jqis l-​imperfezzjoni li writna, Jehovah jieħu pjaċir jekk ma ninjorawx apposta r-​rieda tiegħu fi kwalunkwe rispett. Jekk minħabba d-​dgħjufija niġu involuti f’xi ħażen, huwa importanti li nindmu sinċerament u ma naqgħux fid-​drawwa li nirrepetu l-​iżball. B’dan il-​mod, aħna nuru li tassew inħobbu dak li Jehovah jgħid li hu tajjeb u nobogħdu dak li jurina li hu ħażin. Fuq il-​bażi tal-​fidi tagħna fil-​valur tas-​sagrifiċċju taʼ Ġesù li jpatti għad-​dnub, aħna nistgħu niġu approvati minn Alla bħala l-​qaddejja nodfa tiegħu.—Għamos 5:15; Atti 3:19; Lhud 9:14.

15. (a) Min fost il-​bnedmin kollha żamm integrità perfetta lejn Alla, u dan xi prova ta? (b) Kif aħna megħjunin minn dak li għamel Ġesù?

¹⁵ Minkejja dan, jistaʼ jkun li ubbidjenza perfetta lejn is-​sovranità taʼ Jehovah hija sempliċement impossibbli għall-​bnedmin? It-​tweġiba għal din il-​mistoqsija kienet bħal “misteru” għal xi 4,000 sena. (1 Timotju 3:16) Adam, għalkemm kien maħluq perfett, ma ħalliex eżempju perfett taʼ devozzjoni lejn Alla. Mela min setaʼ? Żgur li ħadd min-​nisel midneb tiegħu. L-​uniku raġel li setaʼ jagħmel dan kien Ġesù Kristu. (Lhud 4:15) Dak li wettaq Ġesù ta prova li Adam, li kellu iktar ċirkustanzi favorevoli, li kieku ried setaʼ żamm integrità perfetta. It-​tort ma kienx fix-​xogħol tal-​ħolqien t’Alla. Għalhekk, Ġesù Kristu huwa l-​eżempju li nipprovaw nimitaw biex nuru mhux biss ubbidjenza lejn il-​liġi divina imma wkoll devozzjoni persunali lejn Jehovah, is-​Sovran Universali.—Dewteronomju 32:​4, 5.

X’Inhi t-​Tweġiba Persunali Tagħna?

16. Għala għandna bżonn noqogħdu għassa l-​ħin kollu dwar l-​attitudni tagħna lejn is-​sovranità taʼ Jehovah?

¹⁶ Kull wieħed u waħda minna llum irid jiffaċċja l-​kwistjoni tas-​sovranità universali. Jekk stqarrejna fil-​beraħ li aħna fuq in-​naħa taʼ Jehovah, Satana se jagħmilna l-​mira tiegħu. Se jagħmel pressjoni minn kull direzzjoni u se jibqaʼ jagħmel dan sat-​tmiem tas-​sistema mill-​agħar tiegħu. Għandna nibqgħu dejjem għassa. (1 Pietru 5:8) Il-​kondotta tagħna turi fuq liema naħa qegħdin fil-​kwistjoni suprema tas-​sovranità taʼ Jehovah u l-​kwistjoni sekondarja taʼ integrità lejn Alla taħt prova. Ma nistgħux inqisu l-​kondotta żleali bħala mhux importanti sempliċement għax hija komuni fid-​dinja. Li nżommu l-​integrità jirrikjedi li nħabirku biex napplikaw il-​mogħdijiet ġusti u sewwa taʼ Jehovah f’kull aspett tal-​ħajja.

17. X’hemm dwar l-​oriġini tal-​gideb u s-​serq li għandhom iġagħluna nwarrbuhom?

¹⁷ Per eżempju, ma nistgħux nimitaw lil Satana, li hu “missier il-​gideb.” (Ġwann 8:44) Irridu dejjem ngħidu l-​verità f’dak kollu li nagħmlu. Fis-​sistema taʼ Satana, iż-​żgħażagħ taʼ spiss ma jgħidux il-​verità lill-​ġenituri tagħhom. Imma ż-​żgħażagħ Kristjani jevitawh dan, u b’hekk jagħtu prova li m’hijiex vera l-​akkuża taʼ Satana li n-​nies t’Alla jabbandunaw l-​integrità tagħhom meta jiġu taħt prova. (Ġob 1:​9-11; Proverbji 6:​16-19) Imbagħad hemm il-​prattiċi tan-​negozju li jistgħu jidentifikaw persuna man-​naħa taʼ “missier il-​gideb” minflok man-​naħa t’Alla tal-​verità. Dawn il-​prattiċi għandna nwarrbuhom. (Mikea 6:​11, 12) Ukoll, is-​serq qatt m’hu ġustifikat, anki jekk persuna tkun fil-​bżonn jew jekk dak li jinsteraq ikun taʼ xi ħadd għani. (Proverbji 6:​30, 31; 1 Pietru 4:15) Anki jekk is-​serq ikun komuni fejn ngħixu jew jekk dak li nieħdu jkun insinifikanti, xorta waħda dan huwa kontra l-​liġijiet t’Alla.—Luqa 16:10; Rumani 12:2; Efesin 4:28.

18. (a) Fi tmiem ir-​Renju t’Elf Sena taʼ Kristu, liema prova se tiġi fuq l-​umanità kollha? (b) Liema drawwa rridu nikkultivaw issa?

¹⁸ Matul ir-​Renju t’Elf Sena taʼ Kristu, Satana u ddemonji tiegħu se jkunu fl-​abbiss, u ma jkunux jistgħu jinfluwenzaw lill-​umanità. X’serħan se jkun dan! Imma wara l-​elf sena, se jinħallu għal ftit żmien. Satana u dawk li jsegwuh se jagħmlu pressjoni fuq dawk il-​bnedmin li jkunu kisbu l-​perfezzjoni u qed iżommu l-​integrità lejn Alla. (Apokalissi 20:​7-10) Jekk ikollna l-​privileġġ li nkunu ħajjin dak iż-​żmien, kif se nirreaġixxu rigward il-​kwistjoni tas-​sovranità universali? Ladarba mbagħad l-​umanità kollha se tkun perfetta, kwalunkwe azzjoni taʼ żlealtà se tkun magħmula bi ħsieb u tirriżulta f’qerda eterna. Kemm huwa vitali li nikkultivaw id-​drawwa issa li nwieġbu b’mod pożittiv għal kwalunkwe direzzjoni li Jehovah jagħtina, kemm jekk tiġi mill-​Kelma tiegħu u kemm jekk mill-​organizzazzjoni tiegħu! Meta nagħmlu dan, inkunu qed nuru d-​devozzjoni ġenwina tagħna lejh bħala s-​Sovran Universali.

Diskussjoni Bħala Reviżjoni

• Liema hi l-​akbar kwistjoni li lkoll kemm aħna rridu niffaċċjaw? Kif ġejna involuti fiha?

• X’inhu notevoli dwar kif l-​irġiel u n-​nisa tal-​qedem taw prova taʼ l-​integrità tagħhom lejn Jehovah?

• Għala huwa vitali li nonoraw lil Jehovah kuljum permezz tal-​kondotta tagħna?