Kapitlu 6

Il-​Kwistjoni li l-​Ħolqien Kollu Jrid Jiffaċċja

1. (a) Satana qajjem liema kwistjoni f’Għeden? (b) Dik il-​kwistjoni kif inhi implikata b’dak li qal?

META faqqaʼ l-​irvell f’Għeden ġiet imqajma kwistjoni serja li teffettwa l-​ħolqien kollu. Waqt li resaq lejn Eva, Satana implika li hi u żewġha Adam kienu qegħdin jiġu mċaħħdin serjament. Huwa staqsa: “Huwa tassew hekk li Alla qal li ma tridux tieklu minn kull siġra tal-​ġnien?” Eva wieġbet li kien biss dwar siġra waħda li Alla qal: “Ma tridux tieklu minnha, le, ma tridux tmissuha biex ma tmutux.” Għal dak Satana akkuża direttament lil Jehovah li hu giddieb, billi qal li la l-​ħajja t’Eva u lanqas dik t’Adam ma kienet tiddependi fuq ubbidjenza lejn Alla. Huwa sostna li Alla kien qiegħed iżomm lura mill-​ħlejjaq tiegħu xi ħaġa tajba​—l-​abbiltà li jfasslu l-​livelli tagħhom stess fil-​ħajja. “Intom żgur li m’intomx se tmutu,” iddikjara Satana. “Għax Alla jaf li fl-​istess jum li tieklu minnha għajnejkom tassew se jinfetħu u intom tassew se ssiru bħal Alla, tafu t-​tajjeb u l-​ħażin.” (Ġen. 3:​1-5) Satana wassal lil Eva biex temmen li jkun aħjar għaliha li tieħu deċiżjonijiet għaliha nfisha. B’implikazzjoni, hemmhekk sfida d-​dritt t’Alla li jaħkem u l-​mod kif jaħkem. Il-​kwistjoni li tqajmet kienet attwalment tinvolvi s-​sovranità universali.

2. X’setaʼ jissalvagwardja lill-​ewwel koppja umana?

² L-​imħabba għal Jehovah setgħet issalvagwardjat lil Eva. Rispett lejn l-​istat taʼ kap taʼ żewġha setaʼ wkoll żammha lura milli tagħmel il-​ħażin. Imma hi ħasbet biss dwar dak li deher li kien taʼ benefiċċju immedjat. Dak li kien ipprojbit sar mixtieq f’għajnejha. Imqarrqa għalkollox mir-​raġunar taʼ Satana, hi kisret il-​liġi t’Alla. Imbagħad involviet lil Adam. Għalkemm ma ġiex imqarraq mill-​gidba taʼ Satana, hu, ukoll, wera nuqqas enormi t’apprezzament lejn l-​imħabba t’Alla. Hu injora l-​istat taʼ kap taʼ Jehovah u għażel li jingħaqad b’ruħu u ġismu mal-​mara ribelluża tiegħu.​—Ġen. 3:6; 1 Tim. 2:​13, 14.

3. (a) Liema kwistjoni oħra hija relatata mill-​qrib maʼ l-​attakk taʼ Satana fuq is-​sovranità taʼ Jehovah? (b) Min huma effettwati b’dan?

³ L-​attakk taʼ Satana fuq is-​sovranità taʼ Jehovah ma waqafx maʼ dak li seħħ f’Għeden. Is-​suċċess li kien jidher li kellu hemmhekk ġie segwit billi huwa xeħet dubju fuq il-​lealtà t’oħrajn lejn Jehovah. Din, allura, saret kwistjoni sekondarja relatata mill-​qrib. L-​isfida tiegħu ġiet estiża biex tinkludi kemm lin-​nisel t’Adam u kemm l-​ulied spirti kollha t’Alla, saħansitra lill-​iben imwieled l-​ewwel li kien maħbub b’għożża minn Jehovah. Fi żmien Ġob, Satana ħaqqaqha li dawk li jaqdu lil Jehovah jagħmlu hekk, mhux għaliex iħobbu lil Alla u l-​mod kif jaħkem, imma għal raġunijiet egoistiċi. Huwa argumenta li, meta jiġu ssuġġettati għat-​tbatija, kollha kellhom iċedu għal xewqat egoistiċi. Kellu raġun?​—Ġob 1:​6-12; 2:​1-6; Riv. 12:10.

KIF WIEĠBU GĦALL-​KWISTJONI

4. Ħafna bnedmin għala m’appoġġjawx is-​sovranità taʼ Jehovah?

⁴ Jehovah m’eskludiex il-​possibiltà li oħrajn kellhom jingħaqdu maʼ Satana fl-​irvell. Fil-​fatt, meta għadda l-​ġudizzju f’Għeden, Alla rrefera għal dawk li kellhom jifformaw iż-​‘żerriegħa tas-​serpent.’ (Ġen. 3:15) Il-​Fariżej li kkomplottaw il-​mewt taʼ Ġesù u Ġuda l-​Iskarjota, li ttradixxa lil Kristu, kienu fost dawk. Huma mhux sempliċement ħadu pass ħażin qabel ma ndunaw. Kienu jafu x’kien is-​sewwa, u madankollu minn rajhom ħadu waqfa f’oppożizzjoni lejn Jehovah u l-​qaddejja tiegħu. Madankollu, numru bla għadd t’oħrajn li ma kkonformawx mal-​ħtiġijiet taʼ Jehovah aġixxew fl-​injoranza.​—Atti 17:​29, 30.

5. (a) Kuntrarju għal Eva, dawk li baqgħu leali lejn Jehovah kif kienu jħarsu lejn il-​kelma tiegħu? (b) Noè kif ta prova tal-​lealtà tiegħu, u kif nistgħu aħna nibbenefikaw mill-​eżempju tiegħu?

⁵ F’kuntrast maʼ dawn kollha kien hemm irġiel u nisa taʼ fidi li informaw ruħhom dwar il-​Ħallieq tagħhom u taw prova tal-​lealtà tagħhom lejh bħala Sovran. Huma emmnu lil Alla. Kienu jafu li ħajjiethom kienu jiddependu fuq li jagħtuh widen u jobduh. Noè kien dan it-​tip taʼ raġel. Għalhekk, meta Alla qal lil Noè, “It-​tmiem tal-​laħam kollu ġie quddiemi . . . Agħmel għalik innifsek arka,” Noè ssottometta ruħu għad-​direzzjoni taʼ Jehovah. Nies oħrajn taʼ dak iż-​żmien, minkejja li ngħataw twissija, komplew bir-​rutina normali tal-​ħajja bħal li kieku ma kien se jiġri xejn li mhux tas-​soltu. Imma Noè bena arka ġganteska u baqaʼ mehdi jippriedka lil oħrajn dwar il-​mogħdijiet taʼ tjieba taʼ Jehovah. Bħalma jgħid ir-​rakkont, “Noè ssokta jagħmel skond dak kollu li Alla kien ikkmandah. Hu għamel sewwa sew hekk.”​—Ġen. 6:​13-22; ara wkoll Ebrej 11:7 u 2 Pietru 2:5.

6. (a) X’hemm iktar li kkaratterizza lil uħud li żammew l-​integrità? (b) Sara kif uriet dawn il-​kwalitajiet, u b’liema mod nistgħu aħna nibbenefikaw mill-​eżempju tagħha?

⁶ L-​istima għolja għall-​prinċipju taʼ l-​istat taʼ kap, flimkien maʼ l-​imħabba persunali lejn Jehovah, kienet u għada tispikka wkoll fost uħud li jżommu l-​integrità. Ma kinux bħal Eva, li ġriet qabel żewġha. Lanqas bħal Adam, li ma tax kas il-​liġi taʼ Jehovah. Sara, il-​mara t’Abraham, uriet dawn il-​kwalitajiet mill-​aħjar. Mhux biss fil-​kliem tagħha imma wkoll f’qalbha Abraham kien il-​“mulej” tagħha. Iżjed minn hekk, hi ħabbet lil Jehovah personalment u kienet mara taʼ fidi. M’Abraham, kienet qiegħda ‘tistenna l-​belt [is-saltna t’Alla] li għandha sisien reali, li l-​bennej tagħha u dak li għamilha hu Alla.’​—1 Piet. 3:​5, 6; Eb. 11:​10-16.

7. (a) Mosè taħt liema ċirkostanzi appoġġja s-​sovranità taʼ Jehovah? (b) L-​eżempju tiegħu kif jistaʼ jibbenefikana?

⁷ Madwar 430 sena wara li Abraham telaq minn art twelidu, Mosè kien ta l-​appoġġ tiegħu lis-​sovranità taʼ Jehovah meta kien ikkonfrontat wiċċ imb’wiċċ maʼ Farawni taʼ l-​Eġittu. Mhux li Mosè kien kunfidenti fih innifsu. Għall-​kuntrarju, hu ddubita l-​abbiltà tiegħu li jitkellem tajjeb biżżejjed. Imma obda lil Jehovah. Bl-​appoġġ taʼ Jehovah u bil-​għajnuna taʼ ħuh Aronne, ripetutament Mosè wassal il-​kelma taʼ Jehovah lil Farawni. Farawni kien stinat. Saħansitra ftit minn ulied Iżrael kienu qegħdin jikkritikaw bl-​aħrax lil Mosè. Imma lealment Mosè għamel dak kollu li kkmandah Jehovah, u permezz tiegħu Iżrael ġie meħlus mill-​Eġittu.​—Eżo. 7:6; 12:​50, 51.

8. (a) X’juri li l-​lealtà lejn Jehovah tinvolvi iktar milli tagħmel dak li Alla semma speċifikament bil-​kitba? (b) L-​apprezzament lejn dan it-​tip taʼ lealtà kif jistaʼ jgħinna napplikaw 1 Ġwann 2:15?

⁸ Dawk li kienu leali lejn Jehovah ma rraġunawx li kulma kien meħtieġ kien li wieħed jikkonforma maʼ l-​ittra tal-​liġi, u jobdi dak biss li Jehovah kien poġġa fil-​kitba. Meta mart Potifar ipprovat tħajjar lil Ġużeppi biex ikollu relazzjonijiet adulterużi magħha, ma kien hemm ebda kmandament miktub mingħand Alla li kien jipprojbixxi speċifikament l-​adulterju. Imma fuq il-​bażi taʼ dak li Ġużeppi kien jaf dwar l-​arranġament taż-​żwieġ stabbilit minn Jehovah f’Għeden, kien konxju illi li jkollu relazzjonijiet sesswali mal-​mara taʼ raġel ieħor kien se jkun taʼ dispjaċir għal Alla. Ġużeppi ma kienx interessat f’li jittestja l-​limiti sa fejn Alla kien se jħallih ikun bħall-​Eġizzjani. Hu appoġġja l-​mogħdijiet taʼ Jehovah billi mmedita fuq il-​mod kif Alla ttratta maʼ l-​umanità u mbagħad applika kuxjenzjożament dik li hu għaraf li kienet ir-​rieda t’Alla.​—Ġen. 39:​7-12; qabbel Salm 77:​11, 12.

9. Ix-​Xitan kif ġie ripetutament ipprovat li hu giddieb fl-​allegazzjoni li qajjem fi żmien Ġob?

⁹ Saħansitra jekk jiġu ttestjati bl-​aħrax, dawk li verament jafu lil Jehovah ma jdurux lura minnu. Satana allega li jekk Ġob kellu jitlef dak li kien jippossiedi jew jiġi abbużat fiżikament, saħansitra dan il-​wieħed li dwaru Jehovah tkellem bi stima kellu jabbanduna lil Alla. Imma Ġob ta prova li Satana kien giddieb, u dan għamlu avolja ma kienx jaf il-​kaġun għall-​gwaj kollu li kien qiegħed jibilgħu. (Ġob 2:3, 9, 10) Waqt li baqaʼ jittanta jagħti prova tal-​punt tiegħu, Satana iktar tard ġiegħel lis-​sultan mgħaddab taʼ Babilonja jhedded lil tliet żgħażagħ Ebrej bil-​mewt ġewwa kalkara tħeġġeġ jekk ma kinux se jmilu fil-​qima quddiem xbiha mibnija mis-​sultan. Billi ġew sforzati jagħżlu bejn il-​kmand tas-​sultan u l-​liġi taʼ Jehovah kontra l-​idolatrija, għamlu magħruf b’sodizza li huma qdew lil Jehovah u li hu kien is-​Sovran Suprem tagħhom. Il-​fedeltà tagħhom lejn Alla kienet iktar prezzjuża għalihom mill-​ħajja.​—Dan. 3:​14-18.

10. Kif inhu possibbli għalina bħala bnedmin imperfetti li nagħtu prova li aħna verament leali lejn Jehovah?

¹⁰ Għandna aħna nikkonkludu minn dan li biex tkun leali lejn Jehovah persuna trid tkun perfetta, li wieħed li jagħmel żball falla kompletament? Bl-​ebda mod! Il-​Bibbja tgħidilna speċifikament dwar mumenti meta Mosè naqas. Jehovah kien iddispjaċut, imma ma warrabx lil Mosè. L-​appostli, għalkemm kienu eżemplari f’diversi modi, kellhom id-​dgħjufijiet tagħhom. Il-​lealtà tirrikjedi ubbidjenza konsistenti mill-​qalb. Imma, meta jieħu inkunsiderazzjoni l-​imperfezzjoni li writna, Jehovah jieħu pjaċir jekk aħna ma ninjorawx apposta r-​rieda tiegħu bi kwalunkwe mod. Jekk, minħabba dgħjufija, niġu involuti fil-​ħażen, huwa importanti li nindmu sinċerament u għalhekk ma nagħmluhx bi drawwa. B’hekk nuru biċ-​ċar li verament inħobbu dak li Jehovah jgħid li huwa tajjeb u nobogħdu dak li hu juri li huwa ħażin. Fuq il-​bażi tal-​fidi tagħna fil-​valur tas-​sagrifiċċju taʼ Ġesù li jpatti għad-​dnub, nistgħu ngawdu waqfa nadifa quddiem Alla.​—Amos 5:15; Atti 3:19; Eb. 9:14.

11. (a) Min fost il-​bnedmin żamm devozzjoni perfetta lejn Alla, u din taʼ liema ħaġa tat prova? (b) Kif niġu mgħejjunin b’dak li hu għamel?

¹¹ Minkejja dan, jistaʼ jkun li devozzjoni perfetta lejn Alla sempliċement m’hijiex possibbli għall-​bnedmin? Għal xi 4,000 sena t-​tweġiba għal dan kienet “sigriet sagru.” (1 Tim. 3:16) Adam, għalkemm maħluq perfett, ma stabbiliex eżempju perfett taʼ devozzjoni lejn Alla. Min setaʼ? Ċertament ebda wieħed min-​nisel midneb tiegħu. Ġesù Kristu kien l-​uniku bniedem li għamel hekk. Dak li wettaq Ġesù ta prova li Adam, li kellu ċirkostanzi iktar favorevoli, setaʼ jżomm integrità perfetta li kieku ried. Id-​difett ma kienx fix-​xogħol kreattiv t’Alla. Ġesù Kristu hu għalhekk l-​eżempju li aħna nfittxu biex nimitaw f’li nuru mhux biss ubbidjenza lejn il-​liġi divina imma wkoll devozzjoni persunali lejn Jehovah, is-​Sovran Universali.

X’INHI T-​TWEĠIBA PERSUNALI TAGĦNA?

12. Għala għandna nkunu kontinwament attenti għall-​attitudni tagħna lejn is-​sovranità taʼ Jehovah?

¹² Kull wieħed u waħda minna llum irid jiffaċċja l-​kwistjoni universali. Ma nistgħux niskansawha. Jekk aħna stqarrejna bil-​miftuħ li qegħdin fuq in-​naħa taʼ Jehovah, Satana jagħmilna mira. Iġib pressjoni minn kull direzzjoni immaġinabbli u se jkompli jagħmel dan dritt sat-​tmiem tas-​sistema mill-​agħar tiegħu. Ma rridux nillaxkaw l-​għassa tagħna. (1 Piet. 5:8) Il-​kondotta tagħna turi fejn ninstabu f’relazzjoni mal-​kwistjoni suprema.

13. (a) X’hemm dwar l-​oriġini tal-​gideb u s-​serq li għandu jġegħilna naħarbuhom? (b) Wieġeb il-​mistoqsijiet fl-​aħħar taʼ dan il-​paragrafu, waħda wara l-​oħra, rigward sitwazzjonijiet li jinklinaw lil xi nies lejn ħażen bħal dan.

¹³ Ma nistgħux naffordjaw li nittrattaw il-​kondotta żleali bħala bla importanza sempliċement għaliex dan huwa komuni fid-​dinja. Li nżommu l-​integrità jitlob minna li napplikaw il-​modi taʼ tjieba taʼ Jehovah f’kull aspett tal-​ħajja. Bħala eżempju, ikkunsidra dan li ġej:

(1) Satana nqeda b’gidba sabiex iwassal lill-​ewwel ġenituri tagħna għad-​dnub. Sar “missier il-​gidba.” (Ġwn. 8:44)

Iż-​żgħażagħ kultant taħt liema ċirkostanzi jonqsu li jgħidu l-​verità lill-​ġenituri tagħhom? Għala huwa importanti għaż-​żgħażagħ Kristjani li jevitaw dan? (Prov. 6:​16-19)

Liema prattiċi fin-​negozju jistgħu jidentifikaw lil persuna maʼ “missier il-​gidba” minflok maʼ dak Alla tal-​verità? (Mik. 6:​11, 12)

Jekk ngħidu affarijiet li jagħtu impressjoni aħjar minn dak li huwa veru dwarna nfusna, huwa dak ħażin dment li ma nweġġgħux lil ħaddieħor? (Salm 119:163; qabbel Atti 5:​1-11.)

Jekk xi ħadd ġie involut f’ħażen serju, għala huwa importanti li ma tipprovax tgħattilu billi tgħid ħaġa b’oħra? (Prov. 28:13)

(2) Meta Eva u mbagħad Adam aġixxew fuq it-​tħeġġiġ taʼ Satana biex jieħdu deċiżjonijiet għalihom infushom inkwantu għal dak li huwa tajjeb u ħażin, l-​ewwel ħaġa li għamlu kienet li ħadu xi ħaġa li ma kenitx tappartjeni lilhom. Saru ħallelin.

Huwa s-​serq iġġustifikat jekk persuna hi fil-​bżonn jew jekk dak li mingħandu qegħdin jittieħdu l-​oġġetti għandu ħafna? (Prov. 6:​30, 31; 1 Piet. 4:15)

Huwa inqas oġġezzjonabbli jekk fejn noqogħdu din hija prattika komuni jew dak li jittieħed huwa żgħir? (Rum. 12:2; Ef. 4:28; Luqa 16:10)

14, 15. (a) Fl-​aħħar tar-​Renju t’Elf Sena taʼ Kristu liema prova se tiġi fuq l-​ispeċi umana kollha? (b) Dak li nagħmlu issa kif se jeffettwa r-​riżultat għalina f’dak iż-​żmien?

¹⁴ Matul ir-​Renju t’Elf Sena taʼ Kristu, Satana u d-​demonji tiegħu se jkunu fl-​abbissi, mingħajr il-​kapaċità li jinfluwenzaw lill-​umanità. X’serħan se jkun dak! Imma wara l-​elf sena, se jiġu meħlusin għal ftit żmien. Satana u dawk li jimxu warajh se jagħmlu pressjoni fuq l-​“uħud qaddisin,” dawk taʼ l-​umanità restawrata li qegħdin iżommu l-​integrità tagħhom. Se javanza bħal li kieku fi gwerra kontra “l-​belt maħbuba,” Ġerusalemm il-​Ġdida tas-​sema, billi jipprova jelimina għalkollox it-​tjieba li din stabbiliet fuq l-​art.​—Riv. 20:​7-10.

¹⁵ Wisq probabbli, bħalma għamel fil-​passat, Satana se juża l-​qerq, flimkien maʼ appelli għall-​egoiżmu u l-​kburija, sabiex iħajjar il-​bnedmin għal atti taʼ nuqqas taʼ lealtà lejn Jehovah. Jekk inhu l-​privileġġ tagħna li nkunu ħajjin f’dak iż-​żmien, personalment kif se nirreaġixxu? Fejn se jkunu qlubna rigward il-​kwistjoni universali? Ladarba l-​umanità kollha dak iż-​żmien se tkun perfetta, kwalunkwe att taʼ nuqqas taʼ lealtà se jkun apposta u se jirriżulta f’qerda eterna. Sabiex inkunu nistgħu nagħtu prova tal-​lealtà f’dak iż-​żmien, kemm huwa vitali li nikkultivaw issa d-​drawwa li naġixxu malajr u b’mod pożittiv għal kwalunkwe direzzjoni li jagħti Jehovah, kemm jekk hija permezz tal-​Kelma tiegħu u kemm jekk hija permezz taʼ l-​organizzazzjoni tiegħu! Billi nagħmlu hekk, aħna nuru d-​devozzjoni ġenwina tagħna lejh bħala s-​Sovran Universali.

Diskussjoni Bħala Reviżjoni

● Liema hija l-​kwistjoni l-​kbira li l-​ħolqien kollu jrid jiffaċċja? Aħna kif ġejna involuti?

● X’jispikka dwar il-​modi taʼ kif kull wieħed u waħda mill-​irġiel u n-​nisa murijin f’paġna 49 ta prova taʼ l-​integrità tiegħu lejn Jehovah?

● Għala huwa vitali li kuljum noqogħdu attenti li nonoraw lil Jehovah bil-​kondotta tagħna?

[Stampi f’paġna 49]

APPOĠĠJAW IS-​SOVRANITÀ TAʼ JEHOVAH

NOÈ

SARA

MOSÈ

ĠUŻEPPI

ĠOB

Kif Nistgħu Nibbenefikaw Mill-​Eżempju Tagħhom?