Ħejji lil Uħud Ġodda Biex Jiffaċċjaw l-​Oppożizzjoni

¹ Meta individwi jibdew jistudjaw il-​Bibbja u jkunu ‘jixtiequ jgħixu bid-​devozzjoni lejn Alla,’ huma jsiru mira speċjali taʼ Satana. (2 Tim. 3:12) L-​oppożizzjoni tistaʼ tiġi minn sħabhom tax-​xogħol, taʼ l-​iskola, jew mill-​ġirien. Jistaʼ jkun speċjalment diffiċli meta qraba b’intenzjonijiet tajbin jopponu lill-​uħud ġodda.—Mt. 10:21; Mk. 3:21.

² L-​Oppożizzjoni Mbassra: Il-​ġodda jridu jifhmu li jridu jistennew il-​persekuzzjoni u li din turi li huma qed isiru dixxipli ġenwini taʼ Kristu. (Ġw. 15:20) Kultant, l-​oppożizzjoni minn oħrajn tistaʼ tkun minħabba ideat żbaljati dwar ix-​Xhieda taʼ Ġeħova. Żomm f’moħħok li meta wieħed jiġi diżonorat minħabba li hu segwaċi taʼ Ġesù u minħabba li jobdi lil Alla, dan iġiblu ferħ kbir. (Atti 5:27-29, 40, 41) Żgura lil uħud ġodda li Ġeħova jappoġġahom bl-​imħabba. (Salm 27:10; Mk. 10:29, 30) Minħabba li jżommu l-​integrità tagħhom huma jiġu fuq in-​naħa taʼ Ġeħova fil-​kwistjoni tas-​sovranità universali.—Prov. 27:11.

³ L-​Irwol taʼ l-​Għarfien Eżatt: Naqqax fl-​istudenti tiegħek tal-​Bibbja l-​importanza li huma jkomplu jieħdu għarfien eżatt minkejja l-​provi li forsi jkunu qed jiffaċċjaw. Permezz taʼ l-​oppożizzjoni, Satana jipprova ma jħallix l-​affarijiet li qed jitgħallmu jniżżlu l-​għeruq fil-​qalb figurattiva tagħhom. (Prov. 4:23; Lq. 8:13) Huma jridu jibqgħu jieħdu għarfien eżatt mill-​Kelma t’Alla ħalli l-​fidi tagħhom tniżżel l-​għeruq fis-​sod.—Salm 1:2, 3; Kol. 2:6, 7.

⁴ Il-​Bżonn tas-​Sabar: Fi kwalunkwe sitwazzjoni taʼ prova, is-​sabar hu essenzjali u jistaʼ jipproduċi riżultati mill-​aqwa. (Lq. 21:16-19) Meta l-​uħud ġodda jissaportu l-​oppożizzjoni, jibbenefikaw kemm huma u kemm oħrajn. Huma jesperjenzaw l-​abbiltà taʼ Ġeħova li jbierek bil-​kbir lil dawk li jissaportu lealment.—Ġk. 1:12.

⁵ L-​appostlu Pawlu feraħ minħabba l-​progress spiritwali taʼ ħutu f’Tessalonika. Hu rringrazzja lil Alla minħabba dawn l-​aħwa, li kien għen lil ħafna minnhom jidħlu fil-​verità. (2 Tess. 1:3-5) Aħna wkoll nistgħu nesperjenzaw l-​istess ferħ u sodisfazzjon jekk nippreparaw lill-​istudenti tagħna tal-​Bibbja biex jiffaċċjaw l-​oppożizzjoni u jissaportu.