Jingħataw Raġunijiet Validi

META tagħmel stqarrija, is-​semmiegħa tiegħek għandhom kull dritt jistaqsu: “Għala huwa minnu dan? Xi provi hemm li dak li qed jgħid il-​kelliemi għandu jiġi aċċettat?” Bħala għalliem, int għandek l-​obbligu li jew twieġeb mistoqsijiet bħal dawn jew inkella li tgħin lis-​semmiegħa tiegħek isibu t-​tweġibiet. Jekk il-​punt hu vitali għall-​argument tiegħek, kun ċert li tagħti lis-​semmiegħa tiegħek raġunijiet konvinċenti biex jaċċettawh. Dan se jikkontribwixxi biex il-​preżentazzjoni tiegħek tipperswadihom.

L-​appostlu Pawlu uża l-​persważjoni. Hu pprova jgħin lil dawk li kellem biex jibdlu fehmiethom billi uża argumenti f’lokhom, irraġunar loġiku, u billi talab bil-​ħrara. Hu ħalla eżempju mill-​aqwa għalina. (Atti 18:4; 19:8) M’għandniex xi ngħidu, xi kelliema pubbliċi jużaw il-​persważjoni biex iqarrqu bin-​nies. (Mt. 27:20; Atti 14:19; Kol. 2:4) Għandhom mnejn jibdew billi jgħidu li xi ħaġa żbaljata hi minnha, jistrieħu fuq sorsi preġudikati, jużaw argumenti superfiċjali, jinjoraw il-​fatti li ma jaqblux mal-​ħarsa tagħhom, jew jipprovaw jolqtu iktar is-​sentimenti minflok l-​irraġunar. Irridu noqogħdu attenti li nevitaw dawn il-​metodi kollha taʼ rraġunar.

Ibbażat fis-​Sod fuq il-​Kelma taʼ Alla. Dak li ngħallmu m’għandux ikun minna nfusna. Aħna nistinkaw biex naqsmu maʼ oħrajn dak li tgħallimna mill-​Bibbja. F’dan ix-​xogħol ġejna megħjunin bil-​kbir mill-​pubblikazzjonijiet tal-​klassi tal-​ilsir leali u għaqli. Dawn il-​pubblikazzjonijiet jinkuraġġuna neżaminaw l-​Iskrittura bir-​reqqa. Min-​naħa tagħna, aħna nidderieġu lil oħrajn lejn il-​Bibbja, u dan ma nagħmluhx bil-​mira li nuruhom li għandna raġun, imma bix-​xewqa umli li nħalluhom jaraw għalihom infushom x’tgħid il-​Bibbja. Aħna naqblu maʼ Ġesù Kristu li qal f’talba lil Missieru: “Kelmtek hi l-​verità.” (Ġw. 17:17) M’hemm ebda awtorità akbar minn Alla Ġeħova, il-​Ħallieq tas-​sema u l-​art. Il-​validità tal-​argumenti tagħna tiddependi milli nibbażawhom fuq il-​Kelma tiegħu.

Kultant għandek mnejn tkellem nies li mhumiex familjari mal-​Bibbja jew li ma jqisuhiex bħala l-​Kelma taʼ Alla. Għandek tuża l-​għaqal biex tkun taf meta u kif għandek tintroduċi versi Bibliċi. Imma għandek tistinka biex malajr kemm jistaʼ jkun tidderieġi l-​attenzjoni tagħhom lejn dan is-​sors taʼ informazzjoni taʼ awtorità.

Għandek tikkonkludi li jekk sempliċement tikkwota skrittura rilevanti tkun qed tipprovdi argument li ma jistgħux jiċħduh? Mhux bilfors. Jistaʼ jkollok bżonn tidderieġi l-​attenzjoni lejn il-​kuntest biex turi li l-​iskrittura tassew tappoġġa dak li qed tgħid. Jekk tkun sempliċement qed toħroġ prinċipju minn skrittura u l-​kuntest ma jkunx qed jiddiskuti s-​suġġett, forsi jkollok bżonn tipprovdi iktar evidenza. Għandu mnejn ikun meħtieġ li tuża skritturi oħrajn konnessi mal-​kwistjoni biex tissodisfa lill-​udjenza li dak li qed tgħid hu tassew ibbażat fis-​sod fuq l-​Iskrittura.

Evita li tisħaq iżżejjed fuq dak li l-​Iskrittura tagħti prova dwaru. Aqraha bir-​reqqa. Il-​vers għandu mnejn jittratta dwar is-​suġġett ġenerali li tkun qed tiddiskuti. Madankollu, biex l-​argument tiegħek ikun konvinċenti, is-​semmiegħ tiegħek għandu jifhem il-​provi tal-​argument tiegħek.

Agħti Iktar Evidenza li Hi fi Qbil. F’xi każi, jistaʼ jkun taʼ għajnuna li tuża evidenza minn sorsi taʼ min joqgħod fuqhom minbarra l-​Bibbja biex tgħin lin-​nies jifhmu kemm hi raġunevoli l-​Iskrittura.

Pereżempju, tistaʼ tipponta lejn l-​univers viżibbli bħala prova li hemm Ħallieq. Int tistaʼ tiġbed l-​attenzjoni lejn il-​liġijiet naturali, bħall-​gravità, u tirraġuna li minħabba l-​eżistenza taʼ liġijiet bħal dawn nistgħu nissopponu li hemm Leġislatur. Il-​loġika se tkun korretta jekk tkun fi qbil maʼ dak li hu mistqarr fil-​Kelma taʼ Alla. (Ġob 38:31-​33; Salm 19:1; 104:24; Rum. 1:20) Evidenza bħal din hi taʼ għajnuna għaliex turi li dak li tgħid il-​Bibbja hu konsistenti maʼ fatti li kulħadd jistaʼ jarahom.

Qed tistinka biex tgħin lil xi ħadd jirrealizza li l-​Bibbja hi tassew il-​Kelma taʼ Alla? Tistaʼ tikkwota x’jgħidu l-​istudjużi dwar dan, imma hu dan prova biżżejjed? Kwotazzjonijiet bħal dawn sempliċement jgħinu lin-​nies li jirrispettaw lil dawk l-​istudjużi. Tistaʼ tuża x-​xjenza biex turi li l-​Bibbja hi vera? Kieku kellek tuża l-​opinjoni taʼ xjenzati imperfetti bħala l-​awtorità tiegħek, int tkun qed tibni fuq bażi dgħajfa. Mill-​banda l-​oħra, jekk tibda bil-​Kelma taʼ Alla u mbagħad tidderieġi l-​attenzjoni lejn is-​sejbiet tax-​xjenza li jenfasizzaw l-​eżattezza tal-​Bibbja, l-​argumenti tiegħek se jkunu stabbiliti fuq bażi soda.

Tkun xi tkun qed tistinka biex turi, agħti biżżejjed evidenza. L-​ammont taʼ evidenza meħtieġ se jiddependi mill-​udjenza tiegħek. Pereżempju, jekk qed tiddiskuti l-​aħħar jiem kif inhuma deskritti fit-​2 Timotju 3:1-​5, għandek mnejn tiġbed l-​attenzjoni tal-​udjenza tiegħek lejn rapport fl-​aħbarijiet magħruf sew li jindika li l-​bnedmin huma “mingħajr imħabba naturali.” Dan l-​eżempju wieħed jistaʼ jkun biżżejjed biex turi li dan l-​aspett tas-​sinjal tal-​aħħar jiem issa qed jitwettaq.

L-​analoġija—taqbila bejn żewġ affarijiet li għandhom aspetti importanti komuni bejniethom—spiss tistaʼ tkun taʼ għajnuna. L-​analoġija fiha nfisha ma turix li xi ħaġa hi minnha; biex tkun valida trid tkun taqbel maʼ dak li tgħid il-​Bibbja nfisha. Imma l-​analoġija tistaʼ tgħin lill-​individwu jara kemm hu raġunevoli l-​ħsieb. Pereżempju, analoġija bħal din tistaʼ tintuża meta tispjega li s-​Saltna taʼ Alla hi gvern. Tistaʼ turi li bħall-​gvernijiet umani, is-​Saltna taʼ Alla għandha ħakkiema, sudditi, liġijiet, sistema ġudizzjarja, u sistema taʼ edukazzjoni.

Spiss jistgħu jintużaw esperjenzi li seħħew fir-​realtà biex jintwera l-​għerf li hemm f’li jiġu applikati l-​pariri tal-​Bibbja. Ukoll, l-​esperjenzi persunali jistgħu jintużaw biex jappoġġaw l-​istqarrijiet li jsiru. Pereżempju, meta turi lil individwu kemm hu importanti li jaqra u jistudja l-​Bibbja, tistaʼ tispjega li meta int għamilt dan ħajtek marret għall-​aħjar. Biex jinkuraġġixxi lil ħutu, l-​appostlu Pietru rrefera għat-​trasfigurazzjoni, li hu kien raha b’għajnejh stess. (2 Pt. 1:16-​18) Pawlu wkoll semma l-​esperjenzi tiegħu stess. (2 Kor. 1:8-​10; 12:7-​9) M’għandniex xi ngħidu, għandek tuża l-​esperjenzi persunali tiegħek b’mod moderat għaliex ma tridx tiġbed attenzjoni żejda lejk innifsek.

Ladarba n-​nies ġejjin minn sfondi differenti u jaħsbu b’modi differenti, l-​evidenza li tikkonvinċi lil individwu wieħed mhux dejjem tikkonvinċi lil ieħor. Għalhekk, ikkunsidra l-​opinjonijiet tas-​semmiegħa tiegħek meta tiddeċiedi liema argumenti se tuża u kif se tippreżentahom. Proverbji 16:23 jgħid: “Qalb l-​għaref iġġiegħel lil fommu juri d-​dehen, u żżid il-​persważjoni lil xofftejh.”