Kun Preparat Sew Biex Tgħallem
1. Għala għandna niffokaw fuq li nibnu l-apprezzament meta nikkonduċu studju tal-Bibbja?
1 Meta nikkonduċu studju tal-Bibbja rridu nkunu preparati sew biex inqanqlu lill-istudent ħalli jaqdi lil Ġeħova. L-isforzi tagħna se jkunu effettivi jekk ngħinuh japprezza l-verità tal-Bibbja. Dan imbagħad se jimmotiva lill-istudent. (Dt. 6:5; Prov. 4:23; 1 Kor. 9:26) Kif se nagħmluh dan?
2. It-talb kif jistaʼ jgħinna biex nippreparaw għal xi studju?
2 Preparazzjoni bit-Talb: Ladarba huwa Ġeħova li jkabbar iż-żerriegħa tal-verità f’qalb l-istudent, ikun xieraq li nibdew nippreparaw għall-istudju billi nitolbu speċifikament għall-istudent u għall-bżonnijiet partikulari tiegħu. (1 Kor. 3:6; Ġak. 1:5) Talb bħal dan jistaʼ wkoll jgħinna niddeterminaw kif nistgħu ngħinuh iżjed biex jimla qalbu “bl-għarfien eżatt” dwar ir-rieda taʼ Ġeħova.—Kol. 1:9, 10.
3. Kif nistgħu nippreparaw bl-istudent f’moħħna?
3 Qis lill-Istudent: Ġesù kien jaf li tagħlim effettiv jinvolvi li wieħed iqis lill-udjenza. F’minn tal-inqas żewġ okkażjonijiet, Ġesù ġie mistoqsi l-istess mistoqsija: “Xi rrid nagħmel biex niret il-ħajja taʼ dejjem?” Kull darba li wieġeb, hu uża metodu differenti. (Lq. 10:25-28; 18:18-20) Għandna nżommu lill-istudent f’moħħna meta nippreparaw. Liema skritturi ċitati se naqraw miegħu? Kemm se nipprovaw inkopru materjal? L-istudent liema punti fil-lezzjoni għandu mnejn isibhom diffiċli biex jifhimhom jew jaċċettahom? Jekk nistgħu naħsbu f’xi mistoqsijiet li jistaʼ jistaqsi l-istudent, se nkunu preparati aħjar biex inwieġbu b’mod effettiv.
4. Preparazzjoni tajba x’tinkludi?
4 Irrivedi l-Materjal: Għalkemm studjajna l-materjal bosta drabi fil-passat, din se tkun l-ewwel darba li se nistudjawh mal-istudent. Jekk irridu nilħqulu qalbu, preparazzjoni tajba għal kull studju hija vitali. Dan ifisser li nagħmlu dak li ninkuraġġixxu li jagħmel l-istudent tagħna. Irrivedi l-materjal, inkluż l-iskritturi ċitati, bl-istudent f’moħħok, u rriga taħt il-punti prinċipali.—Rum. 2:21, 22.
5. Kif nistgħu nimitaw lil Ġeħova?
5 Ġeħova hu interessat intensament fil-progress taʼ kull student tal-Bibbja. (2 Pt. 3:9) Billi nieħdu l-ħin biex nippreparaw għal kull studju tal-Bibbja, aħna nuru l-istess interess bl-imħabba.