Il-​Kelma taʼ Ġeħova Hi Ħajja

Punti Prinċipali mill-​Ktieb tat-​Tieni Samwel

IL-​FATT li nirrikonoxxu s-​sovranità taʼ Ġeħova jfisser li rridu nuru ubbidjenza perfetta? Persuna li turi integrità dejjem tagħmel dak li hu tajjeb f’għajnejn Alla? Liema tip taʼ individwu hu “għal qalbu” l-​Alla veru? (1 Samwel 13:14) Il-​ktieb Bibliku tat-​Tieni Samwel jagħti tweġibiet sodisfaċenti għal dawn il-​mistoqsijiet.

It-​Tieni Samwel inkiteb minn Gad u Natan, żewġ profeti li kellhom ħbiberija mill-​qrib mas-​Sultan David taʼ Iżrael tal-​qedem.a Dan il-​ktieb tlesta madwar is-​sena 1040 Q.E.K. lejn it-​tmiem tas-​saltna taʼ David li damet 40 sena, u jitkellem primarjament dwar David u r-​relazzjoni tiegħu maʼ Ġeħova. Dan ir-​rakkont eċċitanti jirrakkonta dwar kif ġens mifni bil-​ġlied isir saltna sinjura magħquda taħt sultan qalbieni. Dan ir-​rakkont li jħallik fuq ix-​xwiek hu mimli emozzjonijiet umani li ntqalu b’intensità kbira.

DAVID “DEJJEM JISSAĦĦAĦ”

(2 Samwel 1:1–​10:19)

Ir-​reazzjoni taʼ David għall-​aħbar li mietu Sawl u Ġonatan tikxef is-​sentimenti tiegħu għalihom u għal Ġeħova. F’Ħebron, David jinħatar bħala s-​sultan fuq it-​tribù taʼ Ġuda. Isboset, it-​tifel taʼ Sawl, isir sultan fuq il-​kumplament taʼ Iżrael. David ikompli “dejjem jissaħħaħ,” u madwar sebaʼ snin u nofs wara, isir sultan fuq Iżrael kollu.​—2 Samwel 5:​10.

David jieħu lil Ġerusalemm mill-​Ġebusin u jagħmilha l-​belt kapitali taʼ saltnatu. L-​ewwel darba li jipprova jittrasferixxi l-​arka tal-​patt lejn Ġerusalemm tirriżulta f’diżastru. Madankollu, it-​tieni darba jirnexxi, u David jibda jaqbeż bil-​ferħ. Ġeħova jagħmel patt maʼ David għal saltna. David jirbaħ lill-​għedewwa tiegħu waqt li Alla jieqaf miegħu.

Mistoqsijiet Skritturali Mweġbin:

2:​18​—Ġowab u ż-​żewġ ħutu għala ġew identifikati bħala l-​ulied taʼ ommhom, Seruja? Fl-​Iskrittura Ebrajka, il-​ġenealoġiji kienu jitniżżlu min-​naħa tal-​missier. Għandu mnejn li r-​raġel taʼ Seruja miet taʼ età żgħira jew forsi ma kienx meqjus bħala raġel tajjeb biex jitniżżel fil-​Bibbja. Jistaʼ jkun li Seruja tniżżlet minħabba li kienet oħt David jew għax kienet oħtu mill-​missier. (1 Kronaki 2:​15, 16) L-​unika referenza li tissemma rigward il-​missier tat-​tliet aħwa hija rigward il-​post fejn indifen f’Betlehem.​—2 Samwel 2:​32.

3:​29​—X’jiġifieri “jistrieħ fuq il-​ħatar”? Il-​ħatar kien jintuża fl-​insiġ tad-​drapp, xogħol li kien isir min-​nisa. Għalhekk, din l-​espressjoni tistaʼ tirreferi għall-​irġiel li ma kinux tajbin għal ċerti attivitajiet, bħal li jmorru għall-​gwerra, u b’hekk kienu mistennijin li jagħmlu x-​xogħol li s-​soltu kienu jagħmlu n-​nisa.

5:​1, 2​—Kemm kien għadda żmien minn meta nqatel Isboset sa meta David sar sultan fuq Iżrael kollu? Isboset dam isaltan sentejn, u jidher raġunevoli li nikkonkludu li beda jsaltan ftit wara l-​mewt taʼ Sawl, madwar l-​istess żmien li David beda jsaltan f’Ħebron. David saltan fuq Ġuda minn Ħebron għal sebaʼ snin u nofs. Ftit wara li sar sultan fuq Iżrael kollu, hu għamel lil Ġerusalemm il-​belt kapitali tiegħu. Għalhekk, minn mindu miet Isboset sa meta David sar sultan fuq Iżrael kollu kienu għaddew ħames snin.​—2 Samwel 2:​3, 4, 8-​11; 5:​4, 5.

8:2​—Kemm ġew maqtulin Mowabin wara l-​konflitt li Iżrael kellu magħhom? Wisq probabbli, in-​numru ġie determinat bil-​qjies iżjed milli bl-​għadd. Jidher li David ġiegħel lill-​Mowabin jimteddu fl-​art ħdejn xulxin f’filliera. Imbagħad, kejjel il-​filliera b’ħabel. Milli jidher, żewġ ħbula, jew żewġ terzi tal-​Mowabin, inqatlu, u ħabel wieħed, jew terz minnhom, tħallew ħajjin.

Lezzjonijiet Għalina:

2:1; 5:​19, 23. David talab lil Ġeħova qabel ma mar jgħix f’Ħebron u qabel ma mar jiffaċċja lill-​għedewwa tiegħu. Aħna wkoll għandna nfittxu l-​gwida taʼ Ġeħova qabel ma nieħdu xi deċiżjonijiet li se jeffettwaw l-​ispiritwalità tagħna.

3:​26-​30. Il-​vendetta taħsad konsegwenzi koroh.​—Rumani 12:​17-​19.

3:​31-​34; 4:​9-​12. David ma weriex vendetta u ostilità, u dan huwa taʼ eżempju għalina.

5:​12. Qatt m’għandna ninsew li Ġeħova għallimna triqatu u għamilha possibbli li jkollna relazzjoni tajba miegħu.

6:​1-7. Għalkemm David kellu intenzjonijiet tajbin, l-​isforzi tiegħu biex iċaqlaq l-​Arka f’karru kienu kontra l-​kmand taʼ Alla u rriżultaw f’falliment. (Eżodu 25:​13, 14; Numri 4:​15, 19; 7:​7-9) Il-​fatt li Għużża pprova jaqbad l-​Arka juri wkoll li l-​intenzjonijiet tajbin ma jbiddlux dak li Alla jikkmanda.

6:​8, 9. F’sitwazzjoni taʼ prova, għall-​ewwel David irrabja, imbagħad beżaʼ​—forsi saħansitra waħħal f’Ġeħova għat-​traġedja. Għandna ngħassu kontra li nwaħħlu f’Ġeħova għall-​problemi li jirriżultaw meta ninjoraw il-​kmandi tiegħu.

7:​18, 22, 23, 26. L-​umiltà, id-​devozzjoni esklużiva lejn Ġeħova, u l-​interess li jfaħħar lil ismu huma kwalitajiet li għandna nimitaw f’David.

8:2. Titwettaq profezija li ntqalet 400 sena qabel. (Numri 24:17) Il-​kelma taʼ Ġeħova dejjem isseħħ.

9:​1, 6, 7. David żamm il-​wegħda tiegħu. Aħna wkoll għandna nistinkaw biex inżommu kelmitna.

ĠEĦOVA JQAJJEM L-​INKWIET KONTRA L-​MIDLUK TIEGĦU

(2 Samwel 11:1–​20:26)

Ġeħova jgħid lil David: “Arani se naqlagħlek l-​inkwiet mill-​familja tiegħek stess; neħodlok in-​nisa tiegħek minn taħt għajnejk, u nagħtihom lil ħaddieħor, u jimtedd magħhom għad-​dawl taʼ din ix-​xemx.” (2 Samwel 12:11) X’inhi r-​raġuni għal din id-​dikjarazzjoni? Hi d-​dnub taʼ David maʼ Batseba. Għalkemm David nidem u dnubu nħafirlu, ma ġiex meħlus mill-​konsegwenzi tiegħu.

L-ewwel, it-​tarbija li Batseba tiled tmut. Imbagħad, Tamar, it-​tifla verġni taʼ David, tiġi stuprata minn Amnon, ħuha min-​naħa tal-​missier. Ħuha Absalom, joqtol lil Amnon bħala vendetta. Absalom jikkonfoffa kontra missieru stess u jagħmel lilu nnifsu sultan f’Ħebron. David huwa sforzat biex jaħrab lejn Ġerusalemm. Absalom ikollu relazzjonijiet maʼ għaxra mill-​konkubini li missieru ħalla warajh biex jieħdu ħsieb id-​dar. David jerġaʼ jsir sultan biss wara li Absalom jiġi maqtul. Irvell minn Seba mit-​tribù taʼ Benjamin jispiċċa bil-​mewt tiegħu stess.

Mistoqsijiet Skritturali Mweġbin:

14:7​—X’inhu simbolizzat mill-​frażi “ġamra ħajja li baqagħli”? Id-​dija taʼ ġamra li tinħaraq bil-​mod il-​mod tirreferi għal wild ħaj.

19:29​—David għala rreaġixxa bil-​mod kif irreaġixxa għall-​ispjegazzjoni taʼ Mefiboset? Meta semaʼ lil Mefiboset, David x’aktarx irrealizza li kien dineb meta aċċetta l-​kliem taʼ Siba mingħajr ma qies sew dak li qallu. (2 Samwel 16:​1-4; 19:​24-​28 [19:​25-29, NW]) X’aktarx, dan irrita lil David, u ma ried jismaʼ xejn iktar rigward din il-​ħaġa.

Lezzjonijiet Għalina:

11:​2-​15. Ir-​rakkont onest dwar in-​nuqqasijiet taʼ David jenfasizza l-​punt li l-​Bibbja hija l-​Kelma ispirata t’Alla.

11:​16-​27. Meta nikkommettu dnub serju, ma rridux nipprovaw naħbuh bħalma għamel David. Minflok, għandna nistqarru dnubietna lil Ġeħova u nfittxu l-​għajnuna taʼ l-​anzjani fil-​kongregazzjoni.​—Proverbji 28:13; Ġakbu 5:​13-​16.

12:​1-​14. Natan kien taʼ eżempju tajjeb għall-​anzjani maħturin fil-​kongregazzjoni. Huma għandhom jgħinu lil dawk li jaqgħu fid-​dnub biex ikunu jistgħu jirranġaw triqathom. L-​anzjani għandhom jużaw din ir-​responsabbiltà bl-​għaqal.

12:​15-​23. Billi kellu ħarsa ċara dwar dak li ġralu, David ġie megħjun biex jirreaġixxi b’mod tajjeb kontra l-​avversità.

15:12; 16:​15, 21, 23. Meta deher li Absalom kien se jsir sultan, ix-​xewqa għall-​prominenza wasslet lil Aħitofel biex isir traditur. Jekk tkun intelliġenti imma ma tkunx umli u leali, dan jistaʼ jkun taʼ nassa.

19:​24, 30. Mefiboset apprezza ħafna l-​qalb tajba bl-​imħabba taʼ David. Hu ssottometta ruħu minn jeddu għad-​deċiżjoni tas-​sultan dwar Siba. L-​apprezzament għal Ġeħova u għall-​organizzazzjoni tiegħu għandu jqanqalna biex inkunu sottomessi.

20:​21, 22. L-​għerf taʼ persuna waħda tistaʼ twaqqaf diżastru għal ħafna.​—Koħèlet 9:​14, 15.

ĦALLI NAQGĦU “F’ID IL-​MULEJ”

(2 Samwel 21: 1–​24:25)

Jaqaʼ l-​ġuħ għal tliet snin minħabba l-​ħtija tad-​demm li Sawl kellu għax qatel lill-​Gibgħonin. (Ġożwè 9:​15) Biex ikunu jistgħu jivvindikaw il-​ħtija tad-​demm, il-​Gibgħonin jitolbu l-​mewt taʼ sebgħa mit-​tfal subien taʼ Sawl. David jagħtihom f’idejn il-​Gibgħonin, u n-​nuqqas taʼ xita jispiċċa b’ħafna xita. Erbaʼ ġganti Filistin “mietu b’id David u b’id il-​qaddejja tiegħu.”​—2 Samwel 21:22.

David jikkommetti dnub serju billi jordna ċensiment illegali. Hu jindem u jagħżel li jaqaʼ “f’id il-​Mulej.” (2 Samwel 24:14) Bħala riżultat, 70,000 ruħ imutu bil-​pesta. David isegwi l-​kmand taʼ Ġeħova u l-​pesta tieqaf.

Mistoqsijiet Skritturali Mweġbin:

21:8​—Kif jistaʼ jingħad li t-​tifla taʼ Sawl, Mikal, kellha ħames subien, meta fit-​2 Samwel 6:​23 jgħid li mietet mingħajr ma kellha tfal? L-​iktar spjegazzjoni aċċettata hi li dawn it-​tfal kienu taʼ Merab, oħt Mikal, li żżewġet lil Għadrijel. X’aktarx li Merab mietet żgħira u Mikal, li ma kellhiex tfal, rabbiet is-​subien.

21:​9, 10​—Risfa kemm damet tgħasses liż-​żewġ uliedha subien u lill-​ħames neputijiet taʼ Sawl li ġew maqtulin mill-​Gibgħonin? Dawn is-​sebgħa ġew mgħallqin “fl-​ewwel jiem tal-​ħsad”​—f’Marzu jew f’April. L-​iġsma tagħhom tħallew fuq muntanja. Risfa qagħdet għassa mas-​sebaʼ iġsma matul il-​ġurnata u matul il-​lejl sakemm Ġeħova wera li r-​rabja tiegħu kienet naqset billi temm in-​nixfa. Kull xita qawwija kienet tkun xi ħaġa rari qabel it-​tmiem tal-​ħsad f’Ottubru. Għalhekk, Risfa setgħet damet tgħasses għal ħames jew sitt xhur. Imbagħad, David ġiegħel li jindifen l-​għadam taʼ l-​irġiel.

24:1​—David għala dineb serjament minħabba li ħa ċensiment? Iċ-​ċensiment minnu nnifsu ma kienx projbit mil-​Liġi. (Numri 1:​1-3; 26:​1-4) Il-​Bibbja ma tgħidx x’kien dak li qanqal lil David biex jgħodd lin-​nies. Madankollu, l-​1 Kronaki 21:1 jindika li Satana inkuraġġieh biex jagħmel dan. Fi kwalunkwe każ, il-​kap taʼ l-​armata, Ġowab, kien jaf li d-​deċiżjoni taʼ David li jirreġistra lin-​nies kienet ħażina, u pprova jipperswadi lil David milli jagħmel dan.

Lezzjonijiet Għalina:

22:​2-​51. L-​għanja taʼ David tassew tiddeskrivi b’mod sabiħ il-​fatt li Ġeħova huwa l-​Alla veru u li ħaqqu l-​fiduċja kollha tagħna!

23:​15-​17. David kellu rispett profond għal-​liġi t’Alla rigward il-​ħajja u d-​demm tant li f’din l-​okkażjoni qagħad lura milli jagħmel xi ħaġa li kienet tidher li tmur kontra dik il-​liġi. Għandna nikkultivaw attitudni bħal din lejn il-​kmandamenti kollha t’Alla.

24:10. Il-​kuxjenza taʼ David qanqlitu biex jindem. Hija l-​kuxjenza tagħna daqshekk sensittiva li nwieġbu b’dan il-​mod?

24:14. David kien jaf li Ġeħova jaħfer iktar mill-​bniedem. Għandna konvinzjoni bħal din?

24:17. David iddispjaċieh li d-​dnub tiegħu ġab sofferenza fuq il-​ġens kollu. Xi ħadd niedem għandu jħoss rimors rigward it-​tmaqdir li l-​azzjoni tiegħu għandha mnejn ġabet fuq il-​kongregazzjoni.

Nistgħu Nkunu Prezzjużi ‘għal Qalb’ Alla

It-​tieni sultan taʼ Iżrael ta prova li kien raġel ‘għal qalb’ Ġeħova. (1 Samwel 13:14) David qatt ma ddubita l-​livelli ġusti taʼ Ġeħova, u ma pprovax ifittex li jikseb stil taʼ ħajja indipendenti minn Alla. Kull darba li David dineb, hu ammetta dnubu, aċċetta d-​dixxiplina, u rranġa triqatu. David kien raġel taʼ integrità. M’għandniex aħna nkunu bħalu, speċjalment meta nidinbu?

L-istorja taʼ David turi biċ-​ċar li l-​fatt li nirrikonoxxu s-​sovranità taʼ Ġeħova jimplika li naċċettaw il-​livelli Tiegħu taʼ dak li hu tajjeb u dak li hu ħażin, u nipprovaw nagħmlu l-​aħjar biex ngħixu fi qbil magħhom bħala wħud li nżommu l-​integrità. Din hija xi ħaġa li nistgħu nagħmluha. Kemm aħna grati għal-​lezzjonijiet li nitgħallmu mill-​ktieb tat-​Tieni Samwel! Il-​messaġġ ispirat li hemm f’dawn il-​paġni huwa tassew ħaj u qawwi.​—Ebrej 4:​12.

[Nota taʼ taħt]

[Stampa f’paġna 16]

Billi żamm f’moħħu min ħatru bħala sultan, David ġie megħjun biex jibqaʼ umli

[Stampi f’paġna 18]

“Arani se naqlagħlek l-​inkwiet mill-​familja tiegħek stess”

Batseba

Tamar

Amnon