Huma Rnexxielhom Jgħixu b’Xewka f’Ġisimhom

“Tqegħditli xewka f’ġismi, messaġġiera tax-​Xitan, biex toqgħod tniggiżni.”—2 KORINTIN 12:7.

1.X’inhuma xi ftit mill-​problemi li qed jiffaċċjaw in-​nies illum?

QED tissielet maʼ xi prova li ilha ħafna fuqek? Jekk inhu hekk, m’intix waħdek. F’dan iż-​“żmien iebes,” il-​Kristjani leali qed iħabbtu wiċċhom m’oppożizzjoni ħarxa, problemi tal-​familja, mard, problemi finanzjarji, inkwiet emozzjonali, il-​mewt taʼ xi ħadd maħbub, u sfidi oħrajn. (2 Timotju 3:​1-5) F’ċerti pajjiżi, il-​ħajjiet taʼ ħafna huma mhedda minħabba l-​ġuħ u l-​gwerer.

2, 3. Liema attitudni negattiva tistaʼ tirriżulta minħabba d-​diffikultajiet li jistgħu jinqalgħulna u li jkunu bħal xewk f’ġisimna, u din kif tistaʼ tkun taʼ periklu?

² Problemi bħal dawn jistgħu jkissru lil dak li jkun, speċjalment jekk jinqalgħu ħafna diffikultajiet f’daqqa. Innota xi jgħid Proverbji 24:10: “Jekk int tintreħa [“skuraġġit,” NW] fir-​riżq it-​tajjeb, x’saħħa għandek fir-​riżq il-​ħażin?” Iva, l-​iskuraġġiment li jiġi fuqna minħabba l-​provi tagħna jistaʼ jisirqilna s-​saħħa li tant għandna bżonn u jdgħajfilna d-​determinazzjoni biex nissaportu sa l-​aħħar. Kif jistaʼ jiġri dan?

³ Sewwa, meta nkunu skuraġġiti faċli nħallu l-​emozzjonijiet tagħna jiġru bina, u dawn ma jħalluniex naraw il-​fatti kif inhuma. Per eżempju, huwa faċli għalina li nagħmlu għaġeb u nkabbru d-​diffikultajiet tagħna u mbagħad noqogħdu nitħassru lilna nfusna. Xi wħud jistgħu saħansitra jilmentaw m’Alla, “Għala qed tippermetti li jiġrili hekk?” Jekk wieħed iħalli attitudni negattiva bħal din trabbi l-​għeruq ġewwa qalbu, din tistaʼ teqridlu l-​ferħ u l-​fiduċja tiegħu f’Jehovah. Qaddej t’Alla jistaʼ tant iħossu skuraġġit li jasal saħansitra biex iċedi u ma jkomplix jitqabad “it-​taqbida t-​tajba tal-​fidi.”—1 Timotju 6:12.

4, 5. Kultant, Satana kif inhu involut fil-​problemi tagħna, u madankollu, dwar xiex nistgħu nkunu fiduċjużi?

⁴ Żgur li m’huwiex Alla Jehovah li jġib fuqna l-​provi li ngħaddu minnhom. (Ġakbu 1:13) Xi provi jistgħu jiġu fuqna sempliċement għax inkunu qed nipprovaw nuru l-​lealtà tagħna lejh. Fil-​fatt, kull min jaqdi lil Jehovah ikun qed jagħmel lilu nnifsu mira taʼ l-​akbar għadu tiegħu, Satana x-​Xitan. Fiż-​żmien qasir li baqagħlu, dan il-​wieħed mill-​agħar, “l-​alla taʼ din id-​dinja,” qed jagħmel ħiltu kollha biex iġiegħel lil kulmin iħobb lil Jehovah iċedi u ma jibqax jagħmel ir-​rieda Tiegħu. (2 Korintin 4:4) Satana jikkaġuna kemm jiflaħ sofferenza fuq l-​aħwa kollha madwar id-​dinja. (1 Pietru 5:9) Huwa veru li Satana ma jikkaġunax direttament kull problema li jkollna, imma hu jistaʼ jieħu vantaġġ mill-​problemi li niffaċċjaw biex ikompli jkissirna.

⁵ Madankollu, hu kemm hu tal-​biżaʼ Satana jew l-​armi tiegħu, aħna nistgħu nirbħulu! Kif nistgħu nkunu ċerti minn dan? Għaliex Alla Jehovah jiġġieled għan-​nom tagħna. Hu jaċċerta ruħu li l-​qaddejja tiegħu ma jkunux fil-​għama dwar it-​tattiċi li juża Satana. (2 Korintin 2:11) Fil-​fatt, il-​Kelma t’Alla tgħidilna ħafna dwar il-​provi li jnikktu lill-​Kristjani veri. Fil-​każ taʼ l-​appostlu Pawlu, il-​Bibbja użat l-​espressjoni “xewka f’ġismi.” Għala? Ejja naraw kif il-​Kelma t’Alla tispjega din il-​frażi. Imbagħad se naraw li m’aħniex l-​uniċi li għandna bżonn l-​għajnuna t’Alla biex negħlbu l-​provi tagħna.

Għala l-​Provi Jistgħu Jiġu Mqabblin maʼ Xewk

6. X’ried ifisser Pawlu b’“xewka f’ġismi,” u x’setgħet kienet din ix-​xewka?

⁶ Pawlu, li għadda minn ħafna provi estremi, kien imnebbaħ biex jikteb: “Tqegħditli xewka f’ġismi, messaġġiera tax-​Xitan, biex toqgħod tniggiżni ħalli ma nintefaħx.” (2 Korintin 12:7) X’kienet din ix-​xewka li Pawlu kellu f’ġismu? Bla dubju, xewka li tidħol ’il ġewwa taħt il-​ġilda tistaʼ tweġġaʼ ħafna. Għalhekk din il-​metafora qed tirreferi għal xi ħaġa li lil Pawlu ġabitlu ħafna wġigħ—sew jekk fiżiku, emozzjonali, jew it-​tnejn. Jistaʼ jkun li Pawlu kellu xi problema f’għajnejh jew xi marda fiżika oħra. Jew inkella, ix-​xewka setgħet kellha x’taqsam maʼ dawk l-​individwi li sfidaw il-​kwalifiki taʼ Pawlu bħala appostlu u bdew jiddubitaw mix-​xogħol tiegħu taʼ l-​ippridkar u t-​tagħlim. (2 Korintin 10:​10-12; 11:​5, 6, 13) Kienet x’kienet, din ix-​xewka baqgħet għand Pawlu u ma setax jeħles minnha.

7, 8. (a) X’tindika l-​espressjoni ‘toqgħod tniggeż’? (b) Għala huwa vitali li nkampaw maʼ kwalunkwe xewka li qed tnikkitna bħalissa?

⁷ Innota li x-​xewka baqgħet tniggżu lil Pawlu. Taʼ interess, il-​verb Grieg li uża Pawlu hawnhekk ġej mill-​kelma li tfisser “l-​għekiesi tas-​swabaʼ taʼ l-​id.” Din il-​kelma hija użata b’mod letterali f’Mattew 26:67 u b’mod figurattiv fl-​1 Korintin 4:11. F’dawn il-​versi hemm l-​idea li tissawwat bil-​ponn. Meta nqisu l-​mibegħda kbira li Satana għandu għal Jehovah u l-​qaddejja Tiegħu, nistgħu nibqgħu ċerti li x-​Xitan feraħ mhux ftit li Pawlu kellu xewka li baqgħet tniggżu. Illum, Satana qed jifraħ bl-​istess mod x’ħin jara lilna wkoll inbatu minħabba xi xewka f’ġisimna li jistaʼ jkollna.

⁸ Għaldaqstant, bħal Pawlu, irridu nkunu nafu kif nistgħu nkampaw jekk ikollna xi xewka bħal din. Ħajjitna tiddependi milli nagħmlu dan! Ftakar, Jehovah irid li jkollna ħajja taʼ dejjem fid-​dinja l-​ġdida tiegħu, fejn l-​ebda problema li tkun bħal xewka għalina ma tistaʼ terġaʼ tfixkilna. Sabiex jgħinna nirbħu dan ir-​rigal mill-​isbaħ, Alla tana ħafna eżempji fil-​Kelma mqaddsa tiegħu, il-​Bibbja. Dawn juruna kif il-​qaddejja leali tiegħu rnexxielhom jgħixu b’xewka f’ġisimhom. Huma kienu nies komuni u imperfetti, sewwa sew bħalna. L-​eżempji taʼ xi wħud minn fost din is-​“sħaba hekk kbira taʼ xhieda” jistgħu jgħinuna “nibqgħu niġru [“bis-​sabar,” NW] t-​triq tal-​prova li għandna quddiemna.” (Lhud 12:1) Jekk nimmeditaw fuq dak li ssaportew, nistgħu nsaħħu l-​fiduċja tagħna li kapaċi nkampaw maʼ kwalunkwe xewka li Satana juża kontrina.

Ix-​Xewk li Nikket lil Mefiboset

9, 10. (a) X’ġara biex Mefiboset spiċċa b’xewka f’ġismu? (b) Is-​Sultan David liema qalb tajba wera maʼ Mefiboset, u aħna kif nistgħu nimitaw lil David?

⁹ Ikkunsidra lil Mefiboset, bin Ġonatan il-​ħabib taʼ David. Meta Mefiboset kellu ħames snin, waslet l-​aħbar li missieru, Ġonatan, u nannuh, is-​Sultan Sawl, kienu ġew maqtula. Il-​mara li kienet tieħu ħsiebu taha ferħ taʼ ġenn. Hi “qabditu u . . . fl-​għaġla li kellha biex taħrab, it-​tifel waqaʼ u zzappap.” (2 Samwel 4:4) Din id-​diżabilità żgur li kienet xewka kbira għal Mefiboset li kellu jibqaʼ jissaportiha waqt li kien qed jikber.

¹⁰ Xi snin wara, is-​Sultan David, imqanqal mill-​imħabba kbira li kellu għal Ġonatan, wera qalb tajba bl-​imħabba maʼ Mefiboset. David tah il-​propjetà kollha taʼ Sawl u qabbad lil Siba, li kien il-​qaddej taʼ Sawl, biex jieħu ħsieb din l-​art. David qal ukoll lil Mefiboset: ‘Int tibqaʼ tiekol dejjem mill-​mejda tiegħi.’ (2 Samwel 9:​6-10) Mingħajr ebda dubju, il-​qalb tajba bl-​imħabba li wera David kienet taʼ faraġ għal Mefiboset u għenitu jtaffi l-​uġigħ li kellu minħabba d-​diżabilità tiegħu. X’tagħlima mill-​aqwa! Aħna wkoll għandna nuru qalb tajba maʼ dawk li qed jissieltu maʼ xi xewka f’ġisimhom.

11. Siba x’sostna dwar Mefiboset, imma kif nafu li dak li qal kien gidba? (Ara n-​nota taʼ taħt.)

¹¹ Iktar tard, Mefiboset kellu jissielet maʼ xewka oħra f’ġismu. Il-​qaddej tiegħu Siba mmalafamah mas-​Sultan David, li f’dak iż-​żmien kien qed jaħrab minn Ġerusalemm minħabba r-​rewwixta t’Absalom, bin David. Siba qal li Mefiboset baqaʼ f’Ġerusalemm apposta għax kien qed jittama li jieħu s-​saltna f’idejh.a David emmen il-​qlajja’ taʼ Siba u ta l-​propjetà kollha li kellu Mefiboset lil dak il-​giddieb!—2 Samwel 16:​1-4.

12. Mefiboset kif irreaġixxa għas-​sitwazzjoni tiegħu, u għala hu t’eżempju eċċellenti għalina?

¹² Madankollu, meta fl-​aħħar Mefiboset iltaqaʼ maʼ David, hu qal lis-​sultan x’kien ġara verament. Hu kien qed iħejji biex jingħaqad maʼ David meta Siba qarraq bih u offra li jmur minfloku. Ħa passi David biex isewwi l-​ħażen li sar? Mhux għalkollox. Hu qasam il-​propjetà bejn iż-​żewġt irġiel. Din, mela, setgħet kienet xewka oħra f’ġisem Mefiboset. Kien hu diżappuntat bil-​kbir? Ipprotesta għad-​deċiżjoni li ħa David, u qagħad igerger li ma kinitx ġusta? Le, hu qagħad umilment għax-​xewqa tas-​sultan. Hu ffoka fuq l-​aspett pożittiv, u feraħ li dak il-​wieħed li kellu d-​dritt li jkun is-​sultan taʼ Iżrael reġaʼ lura qawwi u sħiħ. Mefiboset tana tassew eżempju eċċellenti bil-​mod kif issaporta d-​diżabilità tiegħu, il-​malafama, u d-​diżappunt.​—2 Samwel 19:​24-​30.

Neħemija Kampa mal-​Provi Tiegħu

13, 14. Neħemija kellu jiffaċċja liema xewk meta reġaʼ lura biex jibni mill-​ġdid is-​swar taʼ Ġerusalemm?

¹³ Aħseb ftit dwar ix-​xewk figurattiv li kellu jissaporti Neħemija meta, fil-​ħames seklu Q.E.K., reġaʼ lura fil-​belt taʼ Ġerusalemm li kienet għadha bla swar. Hu sab li l-​belt kienet letteralment bla difiża, u l-​Lhud li kienu rritornaw lura f’arthom kienu diżorganizzati, skuraġġiti, u maħmuġin f’għajnejn Jehovah. Għalkemm kellu l-​awtorizzazzjoni tas-​Sultan Artasersi biex jerġaʼ jibni s-​swar taʼ Ġerusalemm, Neħemija ma damx ma induna li l-​missjoni tiegħu ma kinitx milqugħa tajjeb mill-​gvernaturi taʼ l-​artijiet qrib. “Qabdithom diqa kbira għax kien ġie wieħed li ried jagħmel il-​ġid lil ulied Iżrael.”—Neħemija 2:10.

¹⁴ Dawk il-​barranin li kienu kontra għamlu dak kollu li setgħu biex iwaqqfu x-​xogħol taʼ Neħemija. It-​theddid, il-​gideb, il-​malafama, l-​intimidazzjoni tagħhom—inkluż l-​ispiji li ntbagħtu biex jaqtgħulu qalbu—żgur li kienu bħal xewk f’ġismu li baqaʼ jniggżu. Ċeda hu għat-​tnassis taʼ dawk l-​għedewwa? Le! Hu ma ddgħajjifx imma fada kompletament f’Alla. Għalhekk, meta fl-​aħħar tlestew is-​swar taʼ Ġerusalemm, dawn baqgħu għal żmien twil bħala xiehda taʼ l-​appoġġ li Jehovah ta b’imħabba lil Neħemija.—Neħemija 3:33–4:6 (4:​1-​12, NW); 6:​1-​19.

15. Liema problemi fost il-​Lhud inkwetaw profondament lil Neħemija?

¹⁵ Bħala gvernatur, Neħemija kellu jħabbat wiċċu wkoll maʼ ħafna problemi fost in-​nies t’Alla. Dawn id-​diffikultajiet kienu qishom xewk li tant inkwetah għaliex kien jeffettwa r-​relazzjoni tal-​poplu maʼ Jehovah. L-​għonja kienu qed jitolbu imgħax għoli, u ħuthom, li kienu fqar, kellhom jitilqu r-​rabaʼ u saħansitra jbigħu ’l uliedhom fil-​jasar sabiex iħallsu d-​dejn tagħhom u t-​taxxa Persjana. (Neħemija 5:​1-10) Ħafna Lhud kienu qed jiksru l-​liġi tas-​Sibt u ma kinux qed jgħinu fil-​manteniment tal-​Leviti u tat-​tempju. Iżjed minn hekk, xi wħud kienu żżewġu “nisa minn Asdod, minn Għammon, u minn Mowab.” Kemm weġġgħu dan lil Neħemija! Imma l-​ebda xewka minn dawn ma ġagħlitu jaqtaʼ qalbu. Għal darba wara l-​oħra hu wera li kien iżomm b’żelu mal-​liġijiet taʼ tjieba t’Alla. Jalla aħna, bħal Neħemija, ma nħallux in-​nuqqas taʼ lealtà t’oħrajn iġagħalna nonqsu milli naqdu lealment lil Jehovah.—Neħemija 13:​10-​13, 23-​27.

Ħafna Wħud Leali Oħrajn Irnexxielhom Ikampaw

16-18. L-​inkwiet fil-​familja kif kiddhom lil Iżakk u Rebekka, lil Anna, David, u Hosegħa?

¹⁶ Il-​Bibbja fiha ħafna iktar eżempji taʼ nies li kampaw maʼ sitwazzjonijiet taʼ niket li kienu qishom xewk. Sors komuni għal dawn is-​sitwazzjonijiet taʼ niket kienu l-​problemi tal-​familja. Iż-​żewġ nisa t’Għesaw “kienu taʼ mrar għal qalb Iżakk u Rebekka,” il-​ġenituri t’Għesaw. Rebekka saħansitra qalet li kienet iddejqet minn ħajjitha minħabba dawk in-​nisa. (Ġenesi 26:​34, 35; 27:46) Aħseb ukoll f’Anna, u kif Peninna, il-​mara l-​oħra taʼ żewġha, “kienet tinkiha u tweġġagħha” għaliex Anna ma setax ikollha tfal. Forsi Anna kienet tgħaddi minn dan it-​turment taʼ spiss meta kienet tkun bejn l-​erbaʼ ħitan taʼ darhom. Barra minn hekk, Peninna kienet toqgħod tinbixha wkoll fil-​pubbliku—bla dubju quddiem il-​qraba u l-​ħbieb—meta l-​familja kienet titlaʼ għall-​festa f’Silo. Għal Anna, dan żgur li kien bħallikieku x-​xewka kienet dieħla iktar ’il ġewwa.—1 Samwel 1:​4-7.

¹⁷ Immedita ftit dwar dak li kellu jgħaddi minnu David minħabba l-​għira esaġerata tal-​kunjatu tiegħu, is-​Sultan Sawl. Biex isalva ġildu, David kellu jmur jgħix fl-​għerien fid-​deżert taʼ Għajn-geddi, fejn kellu jixxabbat maʼ rdumijiet għoljin u perikolużi. Min jaf kemm kien imdejjaq u mxebbaʼ b’din l-​inġustizzja, għax ma kien għamillu xejn lil Sawl. Madankollu, David kellu jqattaʼ snin sħaħ jgħix bħala maħrub—u dan kollu minħabba l-​għira taʼ Sawl.—1 Samwel 24:​15, 16 (24:​14, 15, NW); Proverbji 27:4.

¹⁸ Immaġina l-​inkwiet fil-​familja li kien imdawwar bih il-​profeta Hosegħa. Martu saret adultera. L-​immoralità tagħha kienet bħal xewk imwaħħal f’qalbu. U min jaf kemm kompla jsofri meta miż-​żína tagħha twieldu żewġt itfal illeġittimi!—Hosegħa 1:​2-9.

19. Liema persekuzzjoni ħarxa ġiet fuq il-​profeta Mikajja?

¹⁹ Xewka oħra fil-​ġisem hi l-​persekuzzjoni. Ikkunsidra l-​esperjenza tal-​profeta Mikajja. Meta t-​twajjeb Mikajja ra li s-​sultan mill-​agħar Aħab kien ġabar madwaru l-​profeti foloz u kien emmen il-​gideb sfaċċat tagħhom, żgur li dan ġagħlu jħossu turmentat. Imbagħad, x’għamel il-​kap taʼ dawk il-​qarrieqa meta Mikajja qal lil Aħab li dawk il-​profeti kollha kienu qed jitkellmu bl-​“ispirtu tal-​gideb”? Hu “ta daqqa taʼ ħarta lil Mikajja”! Saħansitra agħar minn hekk kienet ir-​reazzjoni t’Aħab għat-​twissija taʼ Jehovah li l-​battalja biex jerġaʼ jieħu Ramot-gilgħad taħt idejh kienet se tintilef. Aħab ordna li Mikajja jiġi mitfugħ il-​ħabs bi ftit ħobż u ilma. (1 Slaten 22:​6, 9, 15-​17, 23-​28) Ftakar, ukoll, f’Ġeremija u kif hu ġie trattat mill-​persekuturi qattiela tiegħu.—Ġeremija 20:​1-9.

20. Maʼ liema xewk kellha tħabbat wiċċha Nagħomi, u kif ġiet premjata?

²⁰ Il-​mewt taʼ xi ħadd maħbub hija sitwazzjoni oħra taʼ mrar li tistaʼ tkun bħal xewka fil-​ġisem. Nagħomi kellha tiffaċċja l-​uġigħ li ġabet magħha l-​mewt taʼ żewġha u taż-​żewġ uliedha subien. Minkejja li kienet għadha mnikkta, hi rritornat lejn Betlehem. Lil ħbiebha qaltilhom biex ma jsejħulhiex iktar Nagħomi imma Mâra, isem li kien jirrifletti l-​imrar li kienet ġarrbet. Imma fl-​aħħar, Jehovah ippremja s-​sabar tagħha b’neputi li kien jagħmel parti mil-​linja li twassal għall-​Messija.—Rut 1:​3-5, 19-​21; 4:​13-​17; Mattew 1:​1, 5.

21, 22. Liema telfiet ġarrab Ġob, u kif irreaġixxa?

²¹ Aħseb daqsxejn dwar ix-​xokk kbir li ħa Ġob meta semaʼ dwar il-​mewta vjolenti u għal għarrieda taʼ l-​għeżież għaxart itfal tiegħu, minbarra t-​telf tal-​merħliet u l-​qaddejja tiegħu kollha. F’salt wieħed ħajtu nqalbet taʼ taħt fuq! Imbagħad, waqt li kien għadu għaddej minn dan kollu, Satana laqtu b’marda. Ġob setaʼ ħaseb li din il-​marda kerha kienet se toqtlu. Tant ma felaħx iżjed għall-​uġigħ li xtaq imut biex jistrieħ.—Ġob 1:​13-​20; 2:​7, 8.

²² Biex tgħaxxaqha, martu, bin-​niket u l-​hemm li kellha, marret fuqu u qaltlu: “Isħet ’l Alla u mut!” X’xewka kienet din għal qalb muġugħa tiegħu! Imbagħad, it-​tlett iħbieb taʼ Ġob, minflok ma farrġuh, attakkawh b’ħafna raġunar falz. Saħansitra xlewh li kien dineb fil-​moħbi u li kien tort taʼ dawn id-​dnubiet li ġralu dak li ġralu. Biex ngħidu hekk, bl-​argumenti żbaljati tagħhom komplew jimbottaw ix-​xewk f’ġismu iktar ’il ġewwa. Ftakar, ukoll, li Ġob ma kienx jaf għala kienu qed jiġrulu dawn l-​affarijiet terribbli; lanqas ma kien jaf li ħajtu kienet se tiġi meħlusa. Iżda xorta waħda, “Ġob ma dinibx u ma qalx dagħwa waħda kontra Alla.” (Ġob 1:22; 2:​9, 10; 3:3; 14:13; 30:17) Minkejja li ġie mifluġ b’ħafna xewk f’daqqa, hu baqaʼ dejjem iżomm l-​integrità tiegħu. Kemm jinkuraġġina dan!

23. Dawk l-​uħud leali li ddiskutejna dwarhom għala rnexxielhom jgħixu b’xewka f’ġisimhom?

²³ Fil-​Bibbja nsibu ħafna iżjed eżempji bħal dawn li għadna kemm rajna. Dawn il-​qaddejja leali lkoll kellhom jissieltu max-​xewk figurattiv tagħhom. U kemm problemi differenti kellhom jiffaċċjaw! Iżda, kellhom xi ħaġa komuni bejniethom. Ilkoll kemm huma baqgħu jaqdu lil Jehovah. Minkejja l-​provi diffiċli kollha tagħhom, huma għelbu lil Satana bis-​saħħa li tahom Jehovah. Kif? L-​artiklu li jmiss se jwieġeb din il-​mistoqsija u se jurina kif aħna wkoll nistgħu nkampaw maʼ kwalunkwe ħaġa li tistaʼ tkun bħal xewka f’ġisimna.

[Nota taʼ taħt]

Int Kif Twieġeb?

• Il-problemi li niffaċċjaw għala jistgħu jiġu mqabblin maʼ xewk f’ġisimna?

• Liema xewk kellhom jissaportu Mefiboset u Neħemija?

• Mill-eżempji Skritturali taʼ rġiel u nisa li rnexxielhom jgħixu b’xewka f’ġisimhom, liema laqtek l-​iktar, u għala?

[Stampi f’paġna 15]

Mefiboset kellu jkampa mad-​diżabilità tiegħu, il-​malafama, u d-​diżappunt

[Stampa f’paġna 16]

Neħemija żamm sħiħ minkejja l-​oppożizzjoni