L-Iktar Kwalità Importanti t’Għalliem Tajjeb
1. Liema hi l-iktar kwalità importanti t’għalliem tajjeb?
1 Liema hi l-iktar kwalità importanti li tagħmel lil dak li jkun għalliem tajjeb tal-Bibbja? L-edukazzjoni sekulari? L-esperjenza? L-abbiltà naturali? Fil-fatt, hi l-istess kwalità li twettaq il-Liġi u li tidentifika lid-dixxipli taʼ Ġesù. Ukoll, mill-kwalitajiet prinċipali taʼ Ġeħova hi l-iktar kwalità li tispikka u li tiġbed lil dak li jkun. (Ġw. 13:35; Gal. 5:14; 1 Ġw. 4:8) Hi l-imħabba. Għalliema tajbin juru l-imħabba.
2. Għala huwa vitali li jkollna mħabba għan-nies?
2 Ħobb lin-Nies: L-Għalliem il-Kbir, Ġesù, wera mħabba lejn in-nies, u dan immotivahom biex jisimgħuh. (Lq. 5:12, 13; Ġw. 13:1; 15:13) Jekk jimpurtana min-nies, se nagħtu xhieda f’kull opportunità. Ostakli bħall-persekuzzjoni u l-apatija mhumiex se jwaqqfuna. Aħna se nuru interess persunali sinċier f’dawk li nippritkawlhom, u se nadattaw il-metodu tagħna skont it-tħassib tagħhom. Se nkunu lesti nieħdu l-ħin mhux biss meta nkunu maʼ kull student tal-Bibbja, imma wkoll meta nkunu qed nippreparaw minn qabel għal kull studju.
3. L-imħabba għall-veritajiet tal-Bibbja kif se tgħinna fil-ministeru?
3 Ħobb il-Veritajiet tal-Bibbja: Ġesù ħabb ukoll il-veritajiet tal-Bibbja u qieshom bħala teżori. (Mt. 13:52) Jekk aħna nħobbu l-verità, se nitkellmu bl-entużjażmu, u dan jistaʼ jqanqal l-eċċitament fis-semmiegħa tagħna. Imħabba bħal din se tgħinna niffokaw fuq l-informazzjoni prezzjuża li qed nagħtu minflok fuq il-limitazzjonijiet persunali tagħna, u b’hekk inħossuna inqas ansjużi fil-ministeru.
4. Kif nistgħu nikkultivaw l-imħabba?
4 Ikkultiva l-Imħabba: Kif nistgħu nikkultivaw l-imħabba għan-nies? Billi nirriflettu fuq l-imħabba li Ġeħova u Ibnu wrew u l-kundizzjoni spiritwali mwiegħra tan-nies fit-territorju tagħna. (Mk. 6:34; 1 Ġw. 4:10, 11) Imħabbitna għall-veritajiet tal-Bibbja se tikber permezz taʼ studju persunali u meditazzjoni regulari. L-imħabba hi aspett tal-frott tal-ispirtu. (Gal. 5:22) Allura nistgħu nitolbu lil Ġeħova għall-ispirtu qaddis u nistaqsuh biex jgħinna nikbru fi mħabbitna. (Lq. 11:13; 1 Ġw. 5:14) Huma x’inhuma l-edukazzjoni sekulari tagħna, l-esperjenza li għandna fil-verità, jew l-abbiltajiet naturali tagħna, nistgħu nkunu għalliema effettivi tal-Bibbja billi nuru l-imħabba.