Hija l-​Għajnuna Filantropika s-​Soluzzjoni?

GĦALKEMM fuq l-​aħbarijiet tismaʼ ħafna dwar id-​diżastri naturali, il-​faqar, il-​ġuħ, il-​mard, u problemi potenzjali fl-​ambjent, ġiet osservata wkoll xejra ftit iktar pożittiva—waħda taʼ ġenerożità. Kultant fuq l-​aħbarijiet tismaʼ avviżi dwar nies għonja li jagħtu donazzjonijiet taʼ mijiet taʼ miljuni, saħansitra biljuni, taʼ dollari għal raġunijiet validi. Spiss tara ċelebritajiet jużaw il-​fama li għandhom biex jiġbdu l-​attenzjoni lejn problemi serji. Anki ħafna nies li għandhom dħul medju jagħtu donazzjonijiet għal diversi motivi validi. Però, il-​ġenerożità finanzjarja waħedha sa liema punt tistaʼ tkun t’għajnuna, speċjalment meta nitħaddtu dwar il-​futur?

Era tad-​Deheb għall-​Ġenerożità?

F’ċerti pajjiżi milli jidher il-​ġenerożità qed issir iktar u iktar popolari. “Fil-​bidu tas-​seklu wieħed u għoxrin, hawn iktar fondazzjonijiet [filantropiċi] b’iktar riżorsi finanzjarji f’iktar pajjiżi milli qatt kien hawn qabel,” innota sors wieħed. U hekk kif iktar u iktar nies qed isiru għonja, huwa mistenni li l-​ġenerożità tkompli tiżdied. Mhux biss se jkun hemm uħud li se jkollhom iktar x’jagħtu imma wkoll hekk kif l-​għonja jmutu u jħallu l-​għana tagħhom bħala wirt, huwa mistenni li s-​sehem li jmur lill-​għaqdiet tal-​karità se jiżdied. Mhux taʼ b’xejn li The Economist, ġurnal Ingliż taʼ l-​aħbarijiet, qal li forsi qed niffaċċjaw il-​bidu t’“era tad-​deheb għall-​għajnuna filantropika.”

Raġuni waħda għala n-​nies qed jagħmlu dan hu minħabba li l-​gvernijiet jonqsu milli jieħdu ħsieb problemi globali urġenti. Mibgħut speċjali tal-​ĠM għall-​HIV/AIDS fl-​Afrika semma “nuqqas kbir taʼ tmexxija politika” bħala raġuni waħda għala ċ-​ċelebritajiet qed jinvolvu ruħhom iktar u iktar fi kwistjonijiet globali li jinvolvu s-​saħħa. Kemm jekk il-​problema tinvolvi l-​faqar, il-​kura tas-​saħħa, l-​ambjent, l-​edukazzjoni, u kemm jekk il-​ġustizzja soċjali, l-​għonja b’mod partikulari qed juru “nuqqas taʼ paċenzja li dejjem jikber minħabba li l-​isforzi tal-​gvern u l-​isforzi internazzjonali m’humiex biżżejjed biex il-​problemi jiġu solvuti jew imorru għall-​aħjar,” jgħid Joel Fleishman fil-​ktieb tiegħu The Foundation: A Great American Secret—How Private Wealth Is Changing the World. Xi filantropi għonja li huma ħerqanin biex iġibu bidla minn issa, jipprovaw japplikaw metodi li rnexxewlhom fin-​negozju.

Il-​Qawwa taʼ l-​Għajnuna Filantropika

Fil-​bidu tas-​seklu 20 kien hemm l-​hekk imsejħa era tad-​deheb għall-​għajnuna filantropika. Negozjanti li għandhom qawwa kbira bħal Andrew Carnegie u John D. Rockefeller, Sr., iddeċidew li jużaw l-​għana kbir tagħhom biex jgħinu lil min hu fil-​bżonn. Dawn il-​benefatturi raw li l-​għaqdiet tradizzjonali tal-​karità, waqt li kienu qed jitimgħu lil nies imġewħin jew jikkuraw tfal morda, ma kinux qed jieħdu ħsieb il-​kaġun taʼ dawn l-​affarijiet. Minħabba li ħassew il-​bżonn li l-​għoti jsir b’mod iktar strateġiku, huma stabbilew istituti u fondazzjonijiet li kienu se jinkuraġġixxu bidla soċjali u jipprovdu l-​fondi għal riċerka mmirata biex il-​problemi jiġu eliminati mill-​għeruq. Minn dakinhar ’l hawn, letteralment eluf t’organizzazzjonijiet bħal dawn ġew stabbiliti madwar id-​dinja, u iktar minn 50 minnhom għandhom fondi taʼ iktar minn biljun dollaru kull wieħed.

M’għandniex xi ngħidu, sar ħafna ġid minħabba dawn l-​inizjattivi. Hemm numru bla għadd taʼ skejjel, libreriji, sptarijiet, ġonna, u mużewijiet li jixhdu għal dan. Bl-​istess mod, programmi li jgħinu biex ir-​rabaʼ jipproduċi iktar ikel għenu biex jiġi provdut iktar ikel lil pajjiżi milqutin mill-​faqar. L-​għajnuna finanzjarja li ngħatat għar-​riċerka medika kkontribwiet għal avanzi fil-​kura tas-​saħħa u, f’ċerti każi, tneħħa għalkollox ċertu mard, bħad-​deni tas-​suffejra.

Illum, minħabba li l-​problemi globali qed jiġu miġġildin b’iktar urġenza u b’iktar riżorsi minn qatt qabel, l-​opportunità għas-​suċċess tidher probabbli għal ħafna nies. Fl-​2006, wieħed li qabel kien president taʼ l-​Istati Uniti qal lil grupp taʼ filantropi: “M’huwiex possibbli nenfasizzaw iżżejjed l-​effett li l-​ġenerożità privata se jkollha fuq il-​ġid tan-​nies b’mod ġenerali.”

Però, ħafna huma iktar attenti fil-​ħarsa tagħhom. Laurie Garrett, esperta fil-​qasam tal-​kura tas-​saħħa globali, kitbet: “Individwu għandu mnejn jaħseb li b’dawn il-​flus kollha disponibbli dalwaqt se jkun possibbli li nsolvu ħafna mill-​problemi tas-​saħħa globali. Imma dan ikun sejjer żball.” Għala? Hi ssemmi l-​burokrazija, il-​korruzzjoni, in-​nuqqas taʼ koordinazzjoni fl-​isforzi li jsiru, u t-​tendenza fost min jagħti l-​flus li jiddetermina għal liema mard għandhom jintużaw flusu—per eżempju, għall-​AIDS.

Minħabba li l-​isforzi m’humiex koordinati sew u l-​flus qed jiġu “diretti l-​iktar għal mard speċifiku li hu magħruf ħafna—minflok għas-​saħħa pubblika b’mod ġenerali,” Garrett tħoss li “hemm periklu kbir li l-​era taʼ ġenerożità li hawn bħalissa mhux biss se tonqos milli twettaq l-​istennijiet imma wkoll se ġġiegħel li l-​affarijiet imorru għall-​agħar.”

Għala l-​Flus M’Humiex Biżżejjed

Is-​suċċess taʼ l-​għajnuna filantropika, minkejja l-​mira tagħha, dejjem se jkun limitat. Għala? Raġuni waħda hi li la l-​flus u lanqas l-​edukazzjoni sekulari tajba ma jistgħu jeliminaw problemi bħar-​regħba, il-​mibegħda, il-​preġudizzju, in-​nazzjonaliżmu, it-​tribwaliżmu, u t-​twemmin reliġjuż falz. Għalkemm dawn l-​affarijiet iżidu l-​gwajijiet tal-​bniedem, m’humiex il-​kaġun ewlieni tat-​tbatija. Bħalma turi l-​Bibbja, hemm involuti fatturi saħansitra iktar fundamentali.

Wieħed minnhom hu l-​imperfezzjoni tal-​bniedem minħabba d-​dnub. (Rumani 3:23; 5:12) Minħabba l-​imperfezzjoni tagħna għandna t-​tendenza li naħsbu u nagħmlu affarijiet ħżiena. Ġenesi 8:21 jgħid: “Qalb il-​bniedem miġbuda għall-​ħażen sa minn ċkunitu.” Peress li jċedu għal din l-​inklinazzjoni ħażina, miljuni jieħdu sehem fl-​immoralità sesswali u fl-​abbuż tad-​drogi. Mill-​banda l-​oħra, dawn l-​attivitajiet jikkontribwixxu biex jinfirxu diversi tipi taʼ mard, bħall-​AIDS.—Rumani 1:26, 27.

It-tieni kaġun għat-​tbatija umana hu li aħna ma nafux naħkmu lilna nfusna b’mod effettiv. “M’hijiex f’idejh [il-bniedem] . . . anqas min jimxi ma jistaʼ jiddirieġi l-​passi tiegħu,” jgħid Ġeremija 10:23. In-​“nuqqas kbir taʼ tmexxija politika,” li rreferejna għalih qabel, huwa raġuni waħda għala ħafna organizzazzjonijiet filantropiċi jagħmlu d-​donazzjonijiet tagħhom mingħajr ma jfittxu l-​għajnuna tal-​gvern. Il-​Bibbja tispjega li l-​bnedmin kellhom iduru lejn il-​Ħallieq bħala Ħakkiem, mhux lejn xulxin.—Isaija 33:22.

Iktar minn hekk, il-​Bibbja twiegħed li l-​Ħallieq, Alla Ġeħova, se jsolvi l-​problemi kollha li qed inikktu l-​umanità. Tabilħaqq, hu diġà ħa miżuri kbar għal dan l-​iskop.

L-​Akbar Filantropu

Il-​kelma “filantropija” ġejja minn kelma Griega li tfisser “imħabba għall-​bnedmin.” Ħadd m’għandu mħabba akbar għall-​bnedmin milli għandu l-​Ħallieq tagħna. Ġwanni 3:16 jgħid: “Alla tant ħabb lid-​dinja li ta l-​Iben uniġenitu tiegħu, biex kulmin jeżerċita l-​fidi fih ma jinqeridx imma jkollu l-​ħajja taʼ dejjem.” Iva, Ġeħova ta ħafna iktar minn sempliċi flus biex jeħles lill-​bnedmin mill-​qabda soda tad-​dnub u l-​mewt. Hu ta lill-​Iben prezzjuż tiegħu bħala “fidwa għal ħafna.” (Mattew 20:28) L-​appostlu Pietru kiteb dwar Ġesù: “Hu ġarr dnubietna f’ġismu stess fuq iz-​zokk, sabiex neħilsu mid-​dnubiet u ngħixu għall-​ġustizzja. U ‘bil-​ġrieħi tiegħu ġejtu mfejqin.’”—1 Pietru 2:24.

Ġeħova ħa ħsieb ukoll il-​problema tal-​ħakma. Għal dan l-​għan, hu stabbilixxa gvern dinji msejjaħ is-​Saltna t’Alla. Waqt li taħkem mis-​sema, din is-​Saltna se tneħħi l-​ħżiena kollha u se ġġib paċi u armonija fuq il-​Pjaneta Art.—Salm 37:10, 11; Danjel 2:44; 7:13, 14.

Minħabba li se jieħu ħsieb għalkollox il-​kaġuni ewlenin għat-​tbatija umana, Alla se jwettaq dak li huwa impossibbli għall-​bnedmin kollha, kemm b’mod individwali u kemm bħala grupp. Fi qbil maʼ dan, minflok ma jistabbilixxu organizzazzjonijiet filantropiċi, ix-​Xhieda taʼ Ġeħova, minħabba li jimitaw lil Kristu, jippreferu jiddedikaw il-​ħin u r-​riżorsi finanzjarji tagħhom biex jiddikjaraw “l-​aħbar tajba tas-​saltna” t’Alla.—Mattew 24:14; Luqa 4:43.

[Kaxxa/Stampa f’paġna 21]

“Alla Jħobb lil Min Jagħti bil-​Ferħ”

Dan il-​kliem, misjub fil-​Bibbja fit-​2 Korintin 9:7, huwa prinċipju li jiggwida lix-​Xhieda taʼ Ġeħova. Meta jagħtu mill-​ħin, l-​enerġija, u l-​affarijiet materjali tagħhom għall-​benefiċċju t’oħrajn, huma jistinkaw biex jagħtu kas dan l-​inkuraġġiment: “Ħa ma nħobbu la bil-​kliem u lanqas bl-​ilsien, imma bl-​għemil u l-​verità.”—1 Ġwanni 3:18.

Meta jkun hemm bżonn, bħal meta jkun hemm xi diżastru naturali, ix-​Xhieda jarawh bħala privileġġ li jgħinu lil dawk li jkunu ġew effettwati. Per eżempju, wara li l-​Uragani Katrina, Rita, u Wilma laqtu r-​reġjuni tan-​nofsinhar taʼ l-​Istati Uniti, ħafna eluf taʼ Xhieda volontieri marru fl-​inħawi li ġew effettwati biex jagħtu daqqa t’id fix-​xogħol taʼ l-​għajnuna u tal-​bini mill-​ġdid. Taħt is-​superviżjoni tal-​kumitati lokali għall-​għajnuna, il-​volontieri sewwew u rrestawraw iktar minn 5,600 dar tax-​Xhieda taʼ Ġeħova u 90 Sala tas-​Saltna—kważi kulma ġarrab il-​ħsara.

M’huwiex meħtieġ mix-​Xhieda taʼ Ġeħova li jagħtu 10 fil-​mija mid-​dħul tagħhom u b’ebda mod ieħor ma jittallbu għall-​fondi. Ix-​xogħol tagħhom huwa appoġġat għalkollox minn kontribuzzjonijiet volontarji.—Mattew 6:3, 4; 2 Korintin 8:12.

[Stampi f’paġna 19]

Il-​flus ma jistgħux jaqilgħu mill-​għeruq il-​kaġun tal-​mard u t-​tbatija umana

[Sors]

© Chris de Bode/Panos Pictures