Sigurtà Vera—Issa u Għal Dejjem

M’HEMM ebda dubju li Alla Jehovah jistaʼ jipprovdi sigurtà għall-​poplu tiegħu. Hu “Alla li jistaʼ kollox.” (Salm 68:15 [Salm 68:14, New World Translation]) L-​isem uniku tiegħu jfisser “Hu Jġiegħel Li Jseħħ.” Dan jidentifikah bħala l-​uniku Wieħed fl-​univers li kapaċi jegħleb kull ostaklu sabiex iwettaq il-​wegħdiet tiegħu u jirnexxilu jagħmel dak li jrid. Alla nnifsu jistqarr: “Hekk jiġri minn kelmti: hija toħroġ minn fommi, u ma terġax lura vojta, imma tagħmel dak li jogħġob lili, u ttemm dak li nkun bgħattha tagħmel.”—Isaija 55:11.

Alla jipprovdi sigurtà għal dawk li jafdaw fih. Il-​Kelma tiegħu tiggarantih dan. “Isem il-​Mulej hu torri qawwi,” stqarr l-​għaref Sultan Salamun taħt ispirazzjoni divina. “Fih jistkenn il-​ġust b’moħħu mistrieħ.” Hu kompla qal: “Min jittama fil-​Mulej ikun fil-​kenn.”—Proverbji 18:10; 29:25.

Sigurtà għall-​Qaddejja t’Alla

Jehovah minn dejjem ipprovda sigurtà għal dawk li jistrieħu fuqu. Per eżempju, il-​profeta Ġeremija gawda l-​protezzjoni t’Alla. Meta l-​armati taʼ Babilonja assedjaw lil Ġerusalemm apostata, in-​nies kellhom “b’qalbhom ittaqtaq u mriegħda jiżnu l-​ħobż li jieklu.” (Eżekjel 4:16) Is-​sitwazzjoni saret tant kritika li xi nisa għallew u kielu ’l uliedhom stess. (Lamentazzjonijiet 2:20; 4:10) Avolja Ġeremija dak iż-​żmien kien miżmum arrestat minħabba l-​ippridkar bla biżaʼ tiegħu, Jehovah ra li “jagħtuh ħobża kull jum mit-​triq tal-​furnara, sakemm kien għad fadal ħobż fil-​belt.”—Ġeremija 37:21.

Meta Ġerusalemm waqgħet f’idejn il-​Babilonjani, Ġeremija la ġie maqtul u lanqas imkaxkar bħala priġunier lejn Babilonja. Minflok, “[i]l-kap tal-​għases [Babilonjan] tah l-​ikel u rigal, u bagħtu.”—Ġeremija 40:5.

Sekli wara, Ġesù Kristu assigura lill-​qaddejja t’Alla: “Toqogħdux tinkwetaw ruħkom u tgħidu, ‘X’se nieklu? jew ‘X’se nilbsu?’, għax dawn huma kollha ħwejjeġ li jfittxuhom il-​pagani. Imma Missierkom li hu fis-​smewwiet jaf li dan kollu teħtiġuh. Mela fittxu l-​ewwel is-​Saltna u l-​ġustizzja tiegħu, u dan kollu jingħatalkom ukoll.”—Mattew 6:31-33.

Ifisser dan li l-​qaddejja taʼ Jehovah se jgawdu protezzjoni divina mill-​gwaj kollu taʼ żmienna? Le, ma jfissirx hekk. Uħud leali m’humiex ħielsa mill-​ħsara. Il-​vera Kristjani jimirdu, jesperjenzaw il-​persekuzzjoni, jaqgħu vittmi tal-​kriminalità, imutu f’aċċidenti, u jsofru b’modi oħrajn.

Għalkemm Jehovah għalissa ma jfornix sigurtà totali mill-​ħsara, rapporti juru li hu fil-​fatt juża l-​qawwa tiegħu biex jipprovdi l-​bżonnijiet tal-​qaddejja tiegħu u jipproteġihom. Il-​Kristjani huma wkoll skansati minn ħafna problemi għax japplikaw prinċipji Bibliċi f’ħajjithom. (Proverbji 22:3) Barra minn hekk, igawdu s-​sigurtà taʼ sħubija madwar id-​dinja t’aħwa rġiel u nisa spiritwali u mimlijin imħabba, li jgħinu ’l xulxin kull meta jkun hemm il-​bżonn. (Ġwann 13:34, 35; Rumani 8:28) Per eżempju, b’rispons għall-​għawġ iddisprat taʼ ħuthom fl-​Irwanda li hija mfarrka bil-​gwerra, ix-​Xhieda taʼ Jehovah fl-​Ewropa malajr għamlu donazzjoni u bagħtulhom 65 tunnellata ħwejjeġ u b’kemm jiswew $1,600,000 f’mediċini, ikel, u provisti oħrajn.—Qabbel Atti 11:28, 29.

Għalkemm Jehovah jippermetti li jiġi t-​tiġrib fuq il-​vera Kristjani, huma għandhom l-​assiguranza li se jagħtihom il-​qawwa, l-​assistenza, u l-​għerf biex jissaportu. Waqt li kiteb lil kredenti sħabu, l-​appostlu Pawlu qal: “Ebda tiġrib ma laħaqkom li bniedem ma jiflaħx għalih; Alla hu fidil u ma jħallikomx tiġġarrbu aktar milli tifilħu; jaħseb li mat-​tiġrib jagħtikom il-​qawwa u l-​għajnuna biex tkunu tifilħu għalih.”—1 Korintin 10:13.

Dak li Alla Jagħmel għall-​Poplu Tiegħu

Illum, miljuni taʼ nies jitgħaxxqu jagħmlu r-​rieda t’Alla. M’humiex sforzati li jaqdu ’l Alla; jagħmlu hekk għax jafuh u jħobbuh. Min-​naħa tiegħu, għax Jehovah iħobb lill-​qaddejja leali tiegħu, għandu l-​iskop li jittrasforma l-​art f’ġenna fejn l-​umanità ubbidjenti se tgawdi paċi, saħħa fiżika, u sigurtà għal dejjem.—Luqa 23:43.

Alla se jagħmel dan permezz taʼ gvern fis-​sema, li għandu lis-​Sultan maħtur minnu, Ġesù Kristu, bħala l-​Ħakkiem tiegħu. (Danjel 7:13, 14) Il-​Bibbja tirreferi għal dan il-​gvern bħala s-​“saltna taʼ Alla” u bħala s-​“Saltna tas-​Smewwiet.” (1 Korintin 15:50; Mattew 13:44) Is-​Saltna t’Alla se tieħu post il-​gvernijiet umani kollha. Minflok ma jkun hawn ħafna gvernijiet fuq l-​art, se jkun hawn gvern wieħed biss. Dan se jaħkem bit-​tjieba fuq l-​art kollha.—Salm 72:7, 8; Danjel 2:44.

Jehovah jestendi lil kulħadd l-​istedina biex jgħix taħt is-​Saltna. Mod wieħed kif jagħmel dan huwa permezz tad-​distribuzzjoni vasta tal-​Bibbja, il-​ktieb li jispjega x’se tagħmel is-​Saltna għall-​umanità. Il-​Bibbja hija l-​iktar ktieb fid-​dinja li ġie ċċirkolat maʼ kullimkien, u issa hi disponibbli, kollha kemm hi jew f’parti, f’iktar minn 2,000 lingwa.

Alla Jehovah b’imħabba jgħin lin-​nies jifhmu dak li l-​Bibbja tgħallem dwar is-​Saltna. Hu jagħmel hekk billi jistruwixxi u jibgħat nies biex jispjegaw l-​Iskrittura ’l oħrajn. Iktar minn ħames miljun Xhieda taʼ Jehovah issa qegħdin jipproklamaw l-​aħbar tajba tas-​Saltna t’Alla f’iktar minn 230 pajjiż.

Sigurtà Vera Għal Kulħadd?

Kulħadd se jaċċettaha l-​istedina biex isir sudditu tas-​Saltna t’Alla billi jiġi konformi mal-​livelli taʼ tjieba tiegħu? Le, għax ħafna nies m’għandhom ebda interess f’li jagħmlu r-​rieda t’Alla. Huma jirrifjutaw sforzi biex jgħinuhom ibiddlu ħajjithom għall-​aħjar. Tabilħaqq, juru li huma bħal dawk li dwarhom Ġesù qal: “Għax il-​qalb taʼ dan il-​poplu twebbset; kienu tqal biex jisimgħu b’widnejhom, u għalqu għajnejhom, li ma jmorrux jaraw b’għajnejhom, u jisimgħu b’widnejhom u jifhmu b’moħ[ħ]hom, u hekk ibiddlu ħajjiethom u jiena nfejjaqhom.”—Mattew 13:15.

Kif qatt jistaʼ jkun hemm sigurtà vera fuq l-​art fost dawk li jirrifjutaw li jgħixu f’armonija mal-​mogħdijiet taʼ tjieba t’Alla? Ma jistax ikun hemm. Nies taʼ mingħajr Alla jheddu s-​sigurtà taʼ dawk li jridu jaqdu ’l Jehovah.

Alla ma jisforzax lin-​nies biex jinbidlu, imma lanqas ma se jittollera l-​ħażen indefinittivament. Għalkemm Jehovah bil-​paċenzja jkompli jibgħat lix-​Xhieda tiegħu biex jgħallmu lin-​nies dwar triqatu u l-​iskopijiet tiegħu, mhux se jkompli jagħmel hekk ħafna iktar. Ġesù Kristu bassar: “Din il-​Bxara t-​tajba tas-​Saltna tixxandar fid-​dinja kollha, biex il-​ġnus kollha jkollhom xhieda. Imbagħad jiġi t-​tmiem.”—Mattew 24:14.

X’se jkun ifisser it-​“tmiem” għal dawk li jiċħdu l-​livelli t’Alla? Se jfisser il-​ġudizzju avvers u l-​qerda tagħhom. Il-​Bibbja titkellem dwar il-​“[ħ]las lil dawk li ma jagħarfux lil Alla, u ’l dawk li ma jobdux l-​Evanġelju taʼ Sidna Ġesù. Dawn għad jitħallsu bil-​piena tat-​telfien taʼ dejjem.”—2 Tessalonkin 1:6-9.

Sa fl-​Aħħar—Sigurtà Vera Għal Dejjem!

Wara l-​qerda taʼ dawk li jiċħdu l-​mogħdijiet taʼ paċi taʼ Jehovah, is-​Saltna t’Alla se tintroduċi era glorjuża taʼ sigurtà għall-​benefiċċju taʼ dawk twajbin fuq l-​art. (Salm 37:10, 11) X’kuntrast se tkun dik id-​dinja ġdida maʼ din li ngħixu fiha llum!—2 Pietru 3:13.

Ħadd m’hu se jbati l-​ġuħ iktar. Kulħadd se jkollu bosta x’jiekol. Il-​Bibbja tgħid li l-​‘popli kollha se jgawdu mejda b’ikel fin.’ (Isaija 25:6) Mhux se jkun hemm nuqqas taʼ ikel, għax se “[j]kun kotran il-​qamħ fuq l-​art, jogħla sal-​qċaċet tal-​għoljiet.”—Salm 72:16.

In-nies qatt iktar ma se jgħammru f’gabubi u griebeġ. Taħt is-​Saltna t’Alla, ilkoll se jkollhom djar diċenti, u se jieklu ikel prodott fuq l-​art tagħhom stess. Il-​Bibbja twiegħed: “Huma għad jibnu djarhom u jgħammru fihom, iħawlu d-​dwieli u jieklu frotthom.”—Isaija 65:21.

Minflok qagħad maʼ kullimkien, se jkun hemm xogħol produttiv, u n-​nies se jieħdu riżultati tajbin minnu. Il-​Kelma t’Alla tgħid: “[I]l-magħżulin tiegħi jistgħallu xogħol idejhom. Ma jitħabtux għal xejn.”—Isaija 65:22, 23.

Taħt il-​ħakma tas-​Saltna, in-​nies mhux se jsofru u jmutu bil-​mard. Il-​Kelma t’Alla tassigurana: “Ħadd minn min igħammar hemm ma jgħid: ‘Jien marid.’”—Isaija 33:24.

Fil-Ġenna taʼ l-​art li dalwaqt se ssir realtà, is-​sofferenzi u l-​uġigħ, in-​niket u l-​mewt, se jiġu mneħħijin. Iva, saħansitra l-​mewt! In-​nies se jgħixu għal dejjem fil-​Ġenna taʼ l-​art! Il-​Bibbja tgħidilna li Alla se “jixxottalhom kull demgħa minn għajnejhom: ma jkunx hemm iżjed mewt, anqas biki jew agħjat jew tbatija ma jkun hemm iżjed, għax għabu l-​ħwejjeġ taʼ qabel.”—Apokalissi 21:4.

Taħt l-​istat taʼ ħakma taʼ Ġesù Kristu, il-​“Prinċep tas-​sliem,” il-​ħajja fuq l-​art sa fl-​aħħar se tkun verament sigura. Tabilħaqq, se jkun hemm sigurtà mad-​dinja kollha taħt il-​ħakma taʼ tjieba u taʼ mħabba taʼ l-​uniku gvern​—Is-​Saltna t’Alla.—Isaija 9:5, 6 [Isaija 9:6, 7 NW] Apokalissi 7:9, 17. (w96 5/15)

[Kumment f’paġna 4]

“Is-​sigurtà umana tindika fidi fil-​ġejjieni, . . . [fidi fl-​]istabbilità tas-​sitwazzjoni politika u ekonomika.”—Mara li tgħix fl-​Asja

[Kumment f’paġna 6]

“Inkun nistaʼ nħossni fis-​sigurtà meta nkun naf li nistaʼ nimxi fit-​toroq bil-​lejl mingħajr ma niġi stuprata.”—Tifla taʼ l-​iskola fl-​Afrika