Għallem lil Uliedek Ikunu Paċifiċi

Minħabba li kienet eċċitata li l-​familja tagħha kienet se tmur toqgħod fin-​naħa l-​oħra tal-​pajjiż, Nicole, taʼ tmien snin, kienet regolarment tinforma lill-​ħabiba tal-​qalb tagħha Gabrielle dwar kull dettall. Darba waħda, Gabrielle qabdet u qalet lil Nicole li ma kienx jimpurtaha li kienet se titlaq. Nicole tant kemm weġġgħet u kienet irrabjata qalet lil ommha, “Qatt ma rrid nerġaʼ naraha lil Gabrielle!”

IL-​KRIŻIJIET tat-​tfulija bħal dik taʼ Nicole u Gabrielle taʼ spiss jeħtieġu li jiġu solvuti bl-​għajnuna tal-​ġenituri tat-​tfal​—mhux biss biex itaffu s-​sentimenti mweġġgħin imma wkoll biex juru kif għandhom jittrattaw il-​kwistjoni. It-​tfal żgħar minnhom juru “l-​karatteristiki taʼ tifel ċkejken,” u taʼ spiss ma jkunux konxji tal-​ħsara li jistgħu jikkaġunaw il-​kliem u l-​azzjonijiet tagħhom. (1 Korintin 13:11) Għandhom bżonn l-​għajnuna biex jiżviluppaw il-​kwalitajiet li jistgħu jwasslu għal relazzjonijiet paċifiċi m’oħrajn fil-​familja u f’postijiet oħrajn.

Il-ġenituri Kristjani juru ħeġġa kbira biex iħarrġu lil uliedhom ħalli ‘jfittxu l-​paċi u jiġru warajha.’ (1 Pietru 3:​11) L-​hena li jiġi meta wieħed iġib il-​paċi jisboq dak kollu li huwa meħtieġ biex hu jegħleb sentimenti taʼ suspett, frustrazzjoni, u riżentiment. Jekk int ġenitur, kif tistaʼ tgħallem lil uliedek ikunu paċifiċi?

Għinhom Jiżviluppaw Xewqa biex Jogħġbu lill-​“Alla tal-​Paċi”

Ġeħova jissejjaħ “l-​Alla tal-​paċi” u jiġi identifikat bħala l-​wieħed li “jagħti l-​paċi.” (Filippin 4:9; Rumani 15:33) B’hekk, ġenituri għaqlin jużaw bis-​sengħa l-​Kelma t’Alla, il-​Bibbja, biex inaqqxu f’uliedhom ix-​xewqa biex jogħġbu lil Alla u biex jimitaw il-​kwalitajiet tiegħu. Per eżempju, għin lil uliedek jimmaġinaw dak li l-​appostlu Ġwanni ra f’viżjoni impressjonanti​—qawsalla taʼ l-​għaġeb lewn l-​iżmerald li kienet madwar it-​tron taʼ Ġeħova.a (Rivelazzjoni 4:​2, 3) Spjega li din il-​qawsalla tirrappreżenta l-​paċi u t-​trankwillità li hemm madwar Ġeħova u li barkiet bħal dawn se jingħataw lil dawk kollha li jobduh.

Ġeħova jipprovdi wkoll gwida permezz taʼ Ibnu, Ġesù, li huwa msejjaħ il-​“Prinċep tas-​sliem.” (Isaija 9:​5, 6 [9:​6, 7, NW]) Għalhekk, aqra u ddiskuti maʼ wliedek rakkonti Bibliċi li fihom Ġesù għallem lezzjonijiet taʼ valur dwar li nevitaw argumenti u tilwim. (Mattew 26:​51-​56; Marku 9:​33-​35) Spjega għala Pawlu, li qabel kien “raġel insolenti,” biddel il-​modi tiegħu u kiteb li “lsir tal-​Mulej m’għandux għalfejn jiġġieled, imma għandu jkun ġentili maʼ kulħadd, . . . iżomm ruħu mrażżan quddiem il-​ħażen.” (1 Timotju 1:​13; 2 Timotju 2:​24) Uliedek għandhom mnejn iwieġbu aħjar milli immaġinajt.

Evan jiftakar li meta kellu sebaʼ snin kien hemm tifel li kien jinkih fuq il-​private taʼ l-​iskola. “Tant kont irrabjat għat-​tifel li ridt inpattihielu!” hu jgħid. “Imbagħad, ftakart lezzjoni li tgħallimt id-​dar dwar dawk li jipprovaw jibdew il-​ġlied. Kont naf li Ġeħova jrid li ma ‘rrodd lil ħadd ħsara bi ħsara’ u ‘nżomm il-​paċi mal-​bnedmin kollha.’” (Rumani 12:​17, 18) Imbagħad, Evan sab is-​saħħa u l-​kuraġġ biex itaffi din is-​sitwazzjoni taħraq billi wieġeb b’mod ħelu. Hu ried jogħġob lill-​Alla tal-​paċi.

Kun Ġenitur Paċifiku

Hemm atmosfera taʼ paċi fid-​dar tiegħek? Jekk iva, uliedek jistgħu jitgħallmu ħafna dwar il-​paċi billi sempliċement josservawk. L-​effettività tiegħek f’li tgħallem lil uliedek biex ikunu paċifiċi tiddependi ħafna minn kemm int timita l-​modi paċifiċi t’Alla u taʼ Kristu.​—Rumani 2:​21.

Russ u Cindy jaħdmu iebes biex iħarrġu liż-​żewġ uliedhom subien, billi jħeġġuhom biex jaġixxu b’mod taʼ mħabba meta oħrajn jirritawhom. Cindy tgħid, “L-​attitudni li jien u Russ nuru lejn uliedna u lejn oħrajn meta jqumu xi diffikultajiet tilgħab parti kbira f’kif kieku wliedna jittrattaw sitwazzjonijiet simili.”

Anki meta tagħmel żball​—u liema ġenitur ma jagħmilx żball?​—int xorta tistaʼ tuża l-​opportunità biex tgħallem lezzjonijiet taʼ valur. “Kien hemm żminijiet meta jien u marti, Terry, irreaġixxejna b’herra u ddixxiplinajna lit-​tliet uliedna qabel ma konna nkunu nafu l-​fatti kollha,” jammetti Stephen. “Meta kien jiġri hekk, konna nitolbu skuża.” Terry żżid: “Aħna nfiehmu lil uliedna li aħna wkoll imperfetti u li nagħmlu żbalji. Aħna nħossu li dan mhux biss żied mal-​paċi fil-​familja tagħna imma wkoll għen lit-​tfal biex jitgħallmu kif jiġru warajha.”

Qed jitgħallmu wliedek kif ikunu paċifiċi billi josservaw il-​mod kif tittrattahom? Ġesù wissa: “Għalhekk, kulma tridu li l-​bnedmin jagħmlulkom, intom tridu tagħmluh lilhom ukoll.” (Mattew 7:​12) Minkejja li għandek in-​nuqqasijiet tiegħek, kun ċert li l-​imħabba u l-​affezzjoni li turi lil uliedek se jipproduċu riżultati tajbin. Uliedek se jkunu iktar lesti li jwieġbu meta d-​direzzjoni tingħata bl-​imħabba.

Kun Tqil biex Tirrabja

Proverbji 19:11 jgħid: “Bniedem bil-​għaqal idum ma jagħdab.” Kif tistaʼ tgħin lil uliedek biex jikkultivaw dehen bħal dan? David jiddeskrivi mod prattiku kif hu u martu, Mariann, ikellmu lit-​tifel u t-​tifla tagħhom u kif sabuh t’għajnuna. Hu jgħid: “Meta huma jħossuhom imdejqin, għax xi ħadd ikun qal jew għamel xi ħaġa li weġġgħethom, aħna ngħinuhom biex ikollhom empatija. Nistaqsuhom mistoqsijiet sempliċi bħal: ‘L-​individwu kellu ġurnata stressata? Jistaʼ jkun li hu għajjur? Weġġgħu xi ħadd?’” Mariann iżżid, “Dan normalment jikkalmahom lit-​tfal minflok ma jibqgħu mdejqin dwar is-​sitwazzjoni jew jargumentaw dwar min għandu raġun jew tort.”

Taħriġ bħal dan jistaʼ jġib riżultati taʼ l-​għaġeb. Innota kif Nicole, li ssemmiet fil-​bidu taʼ dan l-​artiklu, ġiet megħjuna minn ommha, Michelle, b’mod li mhux sempliċement rebħet lura l-​ħbiberija mal-​ħabiba tagħha Gabrielle. “Jien u Nicole qrajna kapitlu 14 tal-​ktieb Tgħallem mill-​Għalliem il-​Kbir,” tgħid Michelle.b “Imbagħad spjegajtilha x’ried ifisser Ġesù meta qal li aħna għandna naħfru lil xi ħadd ‘sa sebgħa u sebgħin darba.’ Wara li smajt bir-​reqqa lil Nicole hekk kif esprimiet is-​sentimenti tagħha, jien għentha biex tħoss id-​dwejjaq u l-​frustrazzjoni li kellha Gabrielle għax l-​aqwa ħabiba tagħha kienet se tmur toqgħod daqshekk ’il bogħod.”​—Mattew 18:​21, 22.

Id-dehen ġdid li sabet Nicole dwar x’għandu mnejn ġiegħel lil Gabrielle tirrabja daqshekk għenha tħoss għaliha u qanqalha ċċempel lil Gabrielle biex titlobha skuża. “Minn dakinhar ’l hawn,” tgħid Michelle, “Nicole saret tieħu pjaċir turi konsiderazzjoni għas-​sentimenti t’oħrajn u tagħmel affarijiet sbieħ għalihom biex iġġegħelhom iħossuhom aħjar.”​—Filippin 2:​3, 4.

Għin lil uliedek biex ma joqogħdux jinkwetaw dwar l-​iżbalji u n-​nuqqas taʼ qbil. Forsi se jkollok is-​sodisfazzjon li tara lil uliedek jesprimu qalb tajba u affezzjoni tenera m’oħrajn.​—Rumani 12:10; 1 Korintin 12:25.

Inkuraġġixxi l-​Ġieħ tal-​Maħfra

“Hu ġieħ . . . [li wieħed] jagħlaq għajnejh għall-​offiża,” jistqarr Proverbji 19:11. Ġesù, fl-​iktar mument agonizzanti tiegħu, imita lil Missieru u wera li kien lest li jaħfer. (Luqa 23:34) Uliedek jistgħu jitgħallmu l-​ġieħ tal-​maħfra meta jħossu personalment l-​hena tal-​maħfra tiegħek.

Per eżempju, Willy, taʼ ħames snin, jieħu pjaċir ipinġi man-​nanna tiegħu. Darba waħda, in-​nanna għal għarrieda waqfet tpinġi, għajtet maʼ Willy, u telqet ’l hemm. Willy kien imdejjaq. Sam, missieru, qal: “In-​nanna taʼ Willy tbati bil-​marda taʼ l-​Alzheimer. Għalhekk, spjegajna dan lil Willy b’mod li jkun jistaʼ jifhem.” Wara li fakkar lil Willy li hu kien ġie maħfur għal diversi drabi u li kellu jagħmel l-​istess m’oħrajn, Sam baqaʼ mistagħġeb minn dak li għamel Willy. “Tistaʼ timmaġina kif bqajna skantati jien u marti,” jgħid Sam, “hekk kif rajna lit-​tifel żgħir tagħna jmur għand nanntu taʼ 80 sena, ikellimha biex jitlobha skuża, u jaqbdilha idejha biex jerġaʼ jiħodha fuq il-​mejda?”

Huwa tabilħaqq ġieħ meta t-​tfal jitgħallmu ‘jkomplu jissaportu’ n-​nuqqasijiet u l-​iżbalji t’oħrajn u jaħfrulhom. (Kolossin 3:​13) Anki meta n-​nies jaġixxu apposta b’mod li jfixkel, żgura lit-​tfal tiegħek li tweġiba paċifika tistaʼ tirnexxi, għax “min jogħġob lill-​Mulej bl-​imġiba tiegħu, ukoll maʼ l-​għedewwa jżomm is-​sliem.”​—Proverbji 16:7.

Ibqaʼ Għin lil Uliedek Ikunu Paċifiċi

Meta l-​ġenituri jużaw il-​Kelma t’Alla biex jgħallmu lil uliedhom “f’kundizzjonijiet paċifiċi” u bħala “dawk li qegħdin iġibu l-​paċi,” huma jkunu tassew taʼ benefiċċju għal uliedhom. (Ġakbu 3:​18) Ġenituri bħal dawn qegħdin jippreparaw lit-​tfal tagħhom b’dak li għandhom bżonn biex isolvu l-​konflitti u jkunu paċifiċi. Dan jikkontribwixxi ferm għall-​hena u s-​sodisfazzjon matul ħajjithom.

Dan u Kathy għandhom tliet adoloxxenti li mexjin tajjeb spiritwalment. “Għalkemm kien hemm xi sfidi biex inħarrġuhom matul is-​snin bikrin tagħhom,” jgħid Dan, “aħna tassew ferħanin li wliedna sejrin tajjeb fis-​servizz taʼ Ġeħova. Issa huma għandhom relazzjoni paċifika m’oħrajn, u jaħfru mill-​qalb lil oħrajn meta jkun hemm xi ħaġa li tistaʼ tkisser il-​paċi.” Kathy tgħid, “Dan huwa verament inkuraġġanti għalina, ladarba l-​paċi hija parti mill-​frott taʼ l-​ispirtu t’Alla.”​—Galatin 5:​22, 23.

Mela, b’raġuni tajba, bħala ġenituri Kristjani, ‘tiqfux’ jew ‘tegħjewx’ tgħallmu lil uliedkom biex jgħixu b’mod paċifiku​—anki jekk għall-​ewwel il-​progress ikun jidher li qed isir bil-​mod. Waqt li tagħmel dan, kun żgur li ‘l-​Alla taʼ l-​imħabba u tal-​paċi jkun miegħek.’​—Galatin 6:​9; 2 Korintin 13:11.

[Noti taʼ taħt]

[Kaxxa/Stampa f’paġna 20]

INFLUWENZA POŻITTIVA?

Komponiment pubblikat mill-​Media Awareness Network intitolat “Violence in Media Entertainment” (Il-Vjolenza fid-​Divertiment tal-​Mezzi tax-​Xandir) josserva: “Il-​konċett tal-​vjolenza bħala mezz biex jiġu solvuti l-​problemi huwa enfasizzat fid-​divertiment fejn kemm il-​ħżiena kif ukoll l-​eroj taʼ spiss jużaw il-​vjolenza.” Meta ġew analizzati l-​programmi tat-​televixin, il-​films, u l-​vidjos tal-​mużika, madwar 10 fil-​mija biss minnhom ikkunsidraw il-​konsegwenzi ħżiena tal-​vjolenza. Minflok, il-​komponiment jgħid, “il-​vjolenza kienet sempliċement preżentata bħala ġustifikata, naturali, u inevitabbli​—l-​iktar mod ovvju kif jiġu solvuti l-​problemi.”

Taħseb li għandek bżonn tagħmel aġġustamenti f’dak li taraw fuq it-​televixin fid-​dar tiegħek? Tħallix id-​divertiment tal-​mezzi tax-​xandir idgħajjef l-​isforzi tiegħek biex tgħallem lil uliedek ikunu paċifiċi.

[Stampa f’paġna 17]

Naqqax f’uliedek ix-​xewqa biex jogħġbu lill-​“Alla tal-​paċi”

[Stampa f’paġna 18]

Agħmel kull sforz meħtieġ biex tikkoreġi kliem u azzjonijiet li jweġġgħu

[Stampa f’paġna 19]

Uliedek għandhom jitgħallmu jitolbu skuża u jaħfru