Kif Tagħraf u Tegħleb xi Dgħjufija Spiritwali

SKOND IL-​MITOLOĠIJA GRIEGA, AKILLE KIEN L-​IKTAR GWERRIER GRIEG qalbieni fil-​Gwerra Trojana, li kienet kampanja kontra l-​belt taʼ Trojja. Il-​leġġenda tgħid li meta Akille kien ċkejken, ommu għaddsitu fl-​ilma tax-​Xmara Stiġe, u b’hekk sar invulnerabbli, ħlief għall-​parti minn fejn żammitu ommu​—il-​famuż għarqub t’Akille. Dan kien preċiż fejn il-​vleġġa fatali, sparata minn Paris, iben is-​Sultan Prijam taʼ Trojja, laqtet lil Akille u qatlitu.

Il-Kristjani huma suldati taʼ Kristu, u huma involuti fi gwerra spiritwali. (2 Timotju 2:3) “Għax il-​ġlieda tagħna,” jispjega l-​appostlu Pawlu, “m’hijiex kontra d-​demm u l-​laħam, imma kontra s-​Setgħat, kontra l-​Qawwiet, kontra l-​Prinċpijiet taʼ din id-​dinja taʼ dlamijiet, kontra l-​ispirti ħżiena li jgħammru fil-​wisaʼ tas-​smewwiet.” Iva, l-​għedewwa tagħna m’huma ħadd ħlief Satana x-​Xitan u d-​demonji.—Efesin 6:12.

Ovvjament, din kienet tkun ġlieda żbilanċjata li kieku mhux għall-​għajnuna li nirċievu mingħand Alla Jehovah, li ġie deskritt bħala “gwerrier.”(Eżodu 15:3) Biex nipproteġu lilna nfusna mill-​għedewwa kefrin tagħna, hu jagħtina armatura spiritwali. Dan hu għala l-​appostlu ħeġġeġ: “Ilbsu l-​armatura taʼ Alla biex tkunu tifilħu tieqfu għat-​tnassis tax-​Xitan.”—Efesin 6:11.

Bla dubju taʼ xejn, l-​armatura pprovduta minn Alla Jehovah hija taʼ l-​aqwa kwalità, u kapaċi tirreżisti kull tip t’assalt spiritwali. Ħares ftit lejn il-​lista li Pawlu ta: ħżiem tal-​verità, kurazza tat-​tjieba, xedd għar-​riġlejn taʼ l-​Evanġelju, tarka tal-​fidi, elmu tas-​salvazzjoni, u xabla taʼ l-​Ispirtu. Kif qatt jistaʼ jkollna tagħmir aħjar minn dan? B’armatura bħal din fuqu, suldat Kristjan għandu kull opportunità biex joħroġ vittorjuż, minkejja kemm ikun jidher impossibbli.—Efesin 6:13-17.

Avolja l-​armatura spiritwali li jagħtina Jehovah hija taʼ l-​aqwa kwalità u hija sors taʼ sigurtà għalina, m’għandniex nissottovalutaw l-​affarijiet. Meta nqisu dak li ġralu Akille, li suppost kien invinċibbli, jistaʼ jkun li aħna wkoll għandna punt dgħajjef, għarqub t’Akille spiritwali? Dan jistaʼ jkun fatali jekk ninqabdu għall-​għarrieda.

Eżamina l-​Armatura Spiritwali Tiegħek

Ice skater li rebaħ darbtejn il-​midalja tad-​deheb fl-​Olimpijadi, u li kien jidher li kellu kundizzjoni fiżika eċċellenti, ħabta u sabta ħassu ħażin u miet waqt sessjoni taʼ taħriġ. Ftit taż-​żmien wara, ġiet irrapportata aħbar inkwetanti f’The New York Times: “Kull sena, mis-​600,000 Amerikan li jagħtihom attakk tal-​qalb, nofshom ma jħossu ebda sintomi qabel.” B’mod ċar, l-​istat taʼ saħħitna ma nistgħux niddeterminawh sempliċement mill-​mod kif inħossuna.

Huwa l-​istess fil-​każ tal-​benesseri spiritwali tagħna. Il-​parir tal-​Bibbja hu: “Min jidhirlu li hu wieqaf, joqgħod attent li ma jaqax.” (1 Korintin 10:12) Avolja l-​armatura spiritwali tagħna hija l-​aqwa waħda li qatt jistaʼ jkollna, xorta tistaʼ tiżviluppa xi dgħjufija. Dan huwa minħabba li twelidna bid-​dnub, u n-​natura midinba u imperfetta tagħna faċilment tistaʼ tegħleb id-​determinazzjoni tagħna li nagħmlu r-​rieda t’Alla. (Salm 51:7 [Salm 51:5, NW]) Minkejja l-​intenzjonijiet tajbin tagħna, il-​qalb qarrieqa tagħna tistaʼ tidħaq bina billi tivvinta raġunar jew skużi li jidhru validi imma ma jkunux, u b’hekk faċilment ninjoraw id-​dgħjufija tagħna u nidħqu bina nfusna billi naħsbu li kollox miexi ħarir.—Ġeremija 17:9; Rumani 7:21-23.

Barra minn hekk, aħna ngħixu f’dinja fejn is-​sens tat-​tajjeb u l-​ħażin hu taʼ spiss imħawwad u mgħawweġ. In-​nies għandhom mnejn jiddeterminaw jekk xi ħaġa hijiex tajba jew ħażina skond kif iħossuhom huma. Dan it-​tip taʼ raġunar qed jippromwovuh fir-​reklamar, fid-​divertiment popolari, u fuq il-​mezzi tax-​xandir. Ovvjament, jekk ma noqogħdux attenti, nistgħu niġu aljenati biex nibdew naħsbuha b’dan il-​mod, u l-​armatura spiritwali tagħna għandha mnejn tibda tiddgħajjef.

Minflok ma naqgħu f’sitwazzjoni perikoluża bħal din, għandna nagħtu kas il-​parir tal-​Bibbja: “Għarblu lilkom infuskom jekk intomx fil-​fidi; ġarrbu lilkom infuskom.” (2 Korintin 13:5) Meta nagħmlu hekk, inkunu nistgħu nindunaw b’xi dgħjufijiet li forsi jkunu żviluppaw u nieħdu l-​passi neċessarji biex nirranġawhom qabel ma jindunaw bihom l-​għedewwa tagħna u jibdew l-​attakk tagħhom. Iżda test bħal dan kif nagħmluh? X’inhuma xi sintomi li għandna noqogħdu għassa għalihom f’dan l-​eżami tagħna nfusna?

Nagħrfu s-​Sintomi

Sintomu komuni wieħed li jistaʼ jindika dgħjufija spiritwali huwa li nibdew nittraskuraw id-​drawwiet tagħna taʼ studju persunali. Xi wħud iħossu li għandhom jistudjaw iktar, imma donnu li huma sempliċement ma jsibux ħin biex jagħmlu dan. Bil-​ħajja mgħaġġla li ngħixu llum, huwa faċli li naqgħu f’sitwazzjoni kerha bħal din. Madankollu, xi ħaġa agħar hija li n-​nies taʼ spiss jiġġustifikaw l-​aġir tagħhom billi jirraġunaw li s-​sitwazzjoni tagħhom mhix daqshekk ħażina, ladarba huma jaqraw il-​pubblikazzjonijiet Bibliċi kulmeta jkunu jistgħu u jattendu għal xi laqgħat Kristjani.

Jekk nirraġunaw hekk inkunu qed inqarrqu bina nfusna. Huwa bħal raġel li jaħseb li għandu wisq x’jagħmel biex ipoġġi bil-​qegħda u jiekol ikla sew, u għalhekk jiekol xi ħaġa żgħira bil-​ħatfa hu u jgħaġġel minn attività għall-​oħra. Għalkemm forsi ma jmutx bil-​ġuħ, illum jew għada jistgħu jinqalgħulu xi problemi taʼ saħħa. B’mod simili, jekk ma nimlewx ruħna b’ikel spiritwali nutrittiv regolarment, malajr jistgħu jiżviluppaw xi punti dgħajfin fl-​armatura spiritwali tagħna. Minħabba li aħna bbombardjati l-​ħin kollu bi propaganda u attitudnijiet dinjin, faċilment nistgħu nċedu għall-​attakki qattelin taʼ Satana.

Sintomu ieħor taʼ dgħjufija spiritwali huwa t-​telf tas-​sens t’urġenza fil-​gwerra spiritwali tagħna. Fi żmien taʼ paċi, suldat ma jħosshomx it-​tensjoni u l-​periklu tal-​battalja. B’hekk, għandu mnejn ma jħoss ebda urġenza biex ikun għal-​lest. Jekk jibagħtu għalih għall-​għarrieda, wisq probabbli ma jkunx ippreparat. L-​istess jiġri spiritwalment. Jekk inħallu s-​sens t’urġenza tagħna jmajna, jistaʼ jkun li ma nibqgħux ippreparati biex niġġieldu b’suċċess l-​attakki li jistgħu jiġu fuqna.

Iżda kif nistgħu nkunu nafu jekk waqajniex f’din is-​sitwazzjoni? Nistgħu nistaqsu lilna nfusna xi mistoqsijiet li jistgħu jikxfu kif inhuma l-​affarijiet fir-​realtà: Ħerqan jien biex nieħu sehem fil-​ministeru daqs kemm inkun ħerqan biex immur xi ħarġa? Inkun lest jien li nieħu l-​ħin biex nipprepara għal-​laqgħat daqs kemm inkun lest li nużah biex immur nixtri jew nara t-​TV? Qed jiddispjaċini issa li tlaqt xi karriera jew irrifjutajt xi opportunitajiet meta sirt Kristjan? Ngħir jien għall-​hekk imsejħa ħajja komda li qed jgħixu oħrajn? Dawn huma mistoqsijiet li jġegħluk taħseb, imma huma t’għajnuna biex nindunaw b’xi dgħjufija fl-​armatura spiritwali tagħna.

Ladarba l-​armatura protettiva li għandna hija spiritwali, huwa essenzjali li l-​ispirtu t’Alla jaħdem mingħajr tfixkil f’ħajjitna. Dan jiġi rifless f’kemm il-​frott taʼ l-​ispirtu t’Alla jkun evidenti fl-​attivitajiet kollha tagħna. Tħossok irritat jew saħansitra mbaqbaq malli oħrajn jagħmlu jew jgħidu xi ħaġa li ma togħġbokx? Issibha diffiċli biex taċċetta l-​parir, jew tħoss li oħrajn huma dejjem imqabbdin miegħek? Tħossok għajjur ħafna għall-​barkiet t’oħrajn jew għal dak li jirnexxilhom iwettqu? Issibha diffiċli li tingwalaha m’oħrajn, speċjalment maʼ taʼ madwarek? Eżami onest tagħna nfusna se jgħinna naraw jekk ħajjitna hijiex mimlija bil-​frott taʼ l-​ispirtu t’Alla jew jekk ix-​xogħlijiet tal-​laħam humiex qed jitfaċċaw fina bla ma nindunaw.—Galatin 5:22-26; Efesin 4:22-27.

Passi Pożittivi biex Negħlbu Dgħjufija Spiritwali

Li nagħrfu s-​sintomi taʼ dgħjufija spiritwali hija ħaġa; imma li niffaċċjawhom u nieħdu passi biex nirranġaw l-​affarijiet hija pjuttost ħaġa oħra. Sfortunatament, ħafna għandhom it-​tendenza li jġibu l-​iskużi, jipprovaw isibu raġunijiet biex jiġġustifikaw lilhom infushom, iċekknu l-​problema, jew jiċħdu li din teżisti. Kemm hu perikoluż dan​—bħallikieku wieħed imur għall-​gwerra liebes armatura b’xi partijiet neqsin! Korsa bħal din tħalli l-​bieb miftuħ għall-​attakki taʼ Satana. Pjuttost, għandna nieħdu passi pożittivi malajr kemm jistaʼ jkun biex nirranġaw xi difetti li nistgħu ninnotaw. X’nistgħu nagħmlu?—Rumani 8:13; Ġakbu 1:22-25.

Minħabba li aħna involuti fi gwerra spiritwali​—battalja li tinkludi li Kristjan jikkontrolla lil moħħu u lil qalbu—​irridu nagħmlu dak kollu li nistgħu biex nissalvagwardjaw il-​fakultajiet tagħna. Ftakar li fost il-​partijiet taʼ l-​armatura spiritwali tagħna hemm il-​“kurazza tal-​ġustizzja [“tjieba,” NW],” li tipproteġi lil qalbna, u “l-​elmu tas-​salvazzjoni,” li jipproteġi lil moħħna. Li nitgħallmu nużaw dawn il-​provvedimenti b’mod effettiv jistaʼ jagħmel id-​differenza bejn rebħa u telfa.—Efesin 6:14-17; Proverbji 4:23; Rumani 12:2.

Li nilbsu “l-​kurazza tal-​ġustizzja [“tjieba,” NW],” b’mod xieraq jirrikjedi li niċċekkjaw lilna nfusna l-​ħin kollu rigward l-​imħabba tagħna għat-​tjieba u l-​mibegħda tagħna għall-​ħażen. (Salm 45:8 [Salm 45:7, NW]; Salm 97:10; Għamos 5:15) Il-​livelli tagħna tbaxxew bħal dawk tad-​dinja? Sirna nieħdu gost issa​—sew jekk fir-​realtà u sew jekk narawhom fuq it-​TV u fiċ-​ċinema, fil-​kotba u fir-​rivisti—​b’affarijiet li darba forsi kienu jixxokkjawna jew iweġġgħuna? L-​imħabba għat-​tjieba se tgħinna naraw li dawk l-​affarijiet li fid-​dinja huma gglorifikati bħala libertà u affarijiet li jagħmluk tidher sofistikat għandhom mnejn fir-​realtà jkunu biss promiskwità u kburija taħt sura oħra.—Rumani 13:13, 14; Titu 2:12.

Li nilbsu “l-​elmu tas-​salvazzjoni” jinvolvi li nżommu ċari f’moħħna l-​barkiet meraviljużi li hemm quddiemna, u ma nħallux lilna nfusna niġu aljenati mix-​xinxilli tad-​dinja. (Lhud 12:2, 3; 1 Ġwann 2:16) Jekk ikollna din il-​ħarsa, din se tgħinna npoġġu l-​interessi spiritwali qabel il-​qligħ materjali jew il-​vantaġġ persunali. (Mattew 6:33) B’hekk, biex inkunu ċerti li lbisna din il-​parti mill-​armatura sew, irridu nistaqsu onestament lilna nfusna: Wara xiex qed niġri fil-​ħajja? Għandi miri spiritwali speċifiċi? X’qed nagħmel biex nilħaqhom? Sew jekk aħna wħud mill-​Kristjani midlukin li fadal u sew jekk aħna mill-​“kotra kbira” numeruża, għandna nimitaw lil Pawlu, li qal: “Ma jidhirlix li dan ġa lħaqtu; imma ħaġa waħda ngħid: waqt li ninsa ’l taʼ warajja kollu, jiena nagħmel ħilti kollha biex nilħaq dak li hemm quddiemi; niġri ’l quddiem lejn it-​tmiem.”—Apokalissi 7:9; Filippin 3:13, 14.

Id-deskrizzjoni li ta Pawlu taʼ l-​armatura spiritwali tagħna tikkonkludi b’din it-​twissija: “Itolbu dejjem fl-​Ispirtu, b’kull xorta taʼ talb u f’kull ħtieġa, ishru fih bla ma tieqfu, u itolbu għall-​ħtiġiet tal-​qaddisin kollha.” (Efesin 6:18) Dan jindika żewġ passi pożittivi li nistgħu nieħdu biex negħlbu jew nevitaw li niżviluppaw xi dgħjufija spiritwali: Li niżviluppaw relazzjoni tajba m’Alla, u li nifformaw rabta mill-​qrib maʼ Kristjani sħabna.

Jekk ikollna d-​drawwa li nduru lejn Jehovah b’talb taʼ “kull xorta” (stqarrija taʼ dnubietna, petizzjonijiet għall-​maħfra, talb għall-​gwida, ringrazzjament għall-​barkiet, tifħir mill-​qalb) u “f’kull ħtieġa [“okkażjoni,” NW],” (pubblikament, privatament, personalment, spontanjament), aħna niksbu intimità maʼ Jehovah. Din hija l-​akbar protezzjoni li jistaʼ jkollna.—Rumani 8:31; Ġakbu 4:7, 8.

Mill-banda l-​oħra, aħna mwissijin biex nitolbu “għall-​qaddisin kollha,” jiġifieri, għall-​Kristjani sħabna. Jistaʼ jkun li fit-​talb tagħna niftakru f’ħutna spiritwali li jinsabu f’artijiet ’il bogħod u li qegħdin ibatu l-​persekuzzjoni jew għaddejjin minn sofferenzi oħrajn. Imma xi ngħidu għall-​Kristjani li naħdmu u nassoċjaw magħhom jum wara jum? Huwa xieraq li nitolbu għalihom ukoll, l-​istess bħalma Ġesù talab għad-​dixxipli tiegħu. (Ġwann 17:9; Ġakbu 5:16) Talb bħal dan iressaqna eqreb taʼ xulxin u jsaħħaħna biex nirreżistu l-​attakki tal-​“Ħażin.”—2 Tessalonikin 3:1-3.

Finalment, żomm sewwa f’moħħok it-​twissija kollha mħabba taʼ l-​appostlu Pietru: “Qrib hu t-​tmiem taʼ kollox; għalhekk kunu għaqlin u meqjusin biex tagħtu ruħkom għat-​talb. Fuq kollox, ħa jkollkom imħabba sħiħa lejn xulxin, għax l-​imħabba tgħatti kotra taʼ dnubiet.” (1 Pietru 4:7, 8) Huwa tant faċli li nħallu l-​imperfezzjonijiet umani​—kemm tagħna u kemm t’oħrajn—​jinfiltraw ġo qlubna u ġo mħuħna u jsiru ostakli, affarijiet li jfixkluna. Satana jafha sewwa din id-​dgħjufija umana. Ifred u saltan hija waħda mit-​tattiċi makakki tiegħu. Għalhekk, irridu nkunu ħfief biex ngħattu dnubiet bħal dawn b’imħabba intensa għal xulxin u ma ‘nagħtux il-​wisaʼ lix-​Xitan.’—Efesin 4:25-27.

Żomm f’Saħħtek Spiritwalment Issa

Meta tinduna li xagħrek ikun imħabbel, jew l-​ingravata ma tkunx f’postha, x’tagħmel? Wisq probabbli tirranġahom malajr kemm jistaʼ jkun. Ftit huma n-​nies li ma jagħtux kas u jħalluhom kif ikunu, bħallikieku anomaliji fiżiċi bħal dawn m’humiex importanti. Ejja nkunu daqstant pronti biex naġixxu fejn jidħlu d-​dgħjufijiet spiritwali tagħna. In-​nies għandhom mnejn iqarrsu wiċċhom għad-​difetti fiżiċi, imma difetti spiritwali li jibqgħu ma jitranġawx jistgħu jirriżultaw fid-​diżapprovazzjoni taʼ Jehovah.—1 Samwel 16:7.

Jehovah b’imħabba tana dak kollu li neħtieġu biex jgħinna naqilgħu mill-​għeruq kwalunkwe dgħjufija spiritwali u biex nibqgħu b’saħħitna spiritwalment. Permezz tal-​laqgħat Kristjani, tal-​pubblikazzjonijiet Bibliċi, u taʼ Kristjani sħabna maturi li jimpurtahom minna, hu jipprovdi tfakkiriet u suġġerimenti kontinwi rigward x’għandna nagħmlu. Irid jiġi minna li naċċettawhom u napplikawhom. Dan jirrikjedi sforz u dixxiplina fuqna nfusna. Imma ftakar dak li l-​appostlu Pawlu qal bl-​onestà kollha: “Jien issa hekk niġri, mhux qisni bl-​addoċċ; ma nissarax bħallikieku qiegħed nagħti fil-​vojt. Iżda ngħakkes bl-​aħrax lil ġismi u njassru, biex ma jiġrilix li, wara li nkun ippridkajt lil ħaddieħor, jiena stess insib ruħi kkundannat.”—1 Korintin 9:26, 27.

Kun attent, u qatt tippermetti li jiżviluppa għarqub t’Akille spiritwali. Minflok, bl-​umiltà u l-​kuraġġ, ejja nagħmlu dak li hu neċessarju issa biex nagħrfu u negħlbu kwalunkwe dgħjufija spiritwali li għandna.

[Kumment f’paġna 19]

“GĦARBLU LILKOM INFUSKOM JEKK INTOMX FIL-​FIDI; ĠARRBU LILKOM INFUSKOM.”—2 Korintin 13:5.

[Kumment f’paġna 21]

‘AGĦTU RUĦKOM GĦAT-​TALB. FUQ KOLLOX, ĦA JKOLLKOM IMĦABBA SĦIĦA LEJN XULXIN, GĦAX L-​IMĦABBA TGĦATTI KOTRA TAʼ DNUBIET.’—1 Pietru 4:7, 8.

[Kaxxa/Stampa f’paġna 20]

STAQSI LILEK INNIFSEK...

◆ Ħerqan jien li nieħu l-​ħin biex nipprepara għal-​laqgħat daqs kemm inkun ħerqan biex immur nixtri jew nara t-​TV?

◆ Ngħir jien għall-​hekk imsejħa ħajja komda li qed jgħixu oħrajn?

◆ Inħossni irritat jew saħansitra mbaqbaq malli oħrajn jagħmlu jew jgħidu xi ħaġa li ma togħġobnix?

◆ Insibha diffiċli biex naċċetta l-​parir, jew inħoss li oħrajn huma dejjem imqabbdin miegħi?

◆ Insibha diffiċli li ningwalaha m’oħrajn?

◆ Il-​livelli tiegħi tbaxxew bħal dawk tad-​dinja?

◆ Għandi miri spiritwali speċifiċi?

◆ X’qed nagħmel biex nilħaq il-​miri spiritwali tiegħi?

[Sorsi taʼ l-​Istampa f’paġna 18]

Akille: From the book Great Men and Famous Women; Suldati Rumani u paġna 21: Historic Costume in Pictures/Dover Publications, Inc., New York