STUDJU 2

Kun naturali

2 Korintin 2:17

X’GĦANDEK TAGĦMEL: Tkellem b’mod naturali u sinċier li juri kif tħossok dwar is-suġġett u dwar is-semmiegħa tiegħek.

Ipprepara bit-talb u bir-reqqa. Itlob għall-għajnuna biex tikkonċentra fuq il-messaġġ u mhux fuqek innifsek. F’moħħok irid ikollok idea ċara tal-punti prinċipali li għandek bżonn twassal. Esprimi l-ħsibijiet fi kliemek u mhux sempliċement tgħid espressjonijiet kelma b’kelma kif jidhru fuq il-karta.

Jekk għandek f’moħħok li taqra mill-Bibbja jew xi pubblikazzjoni oħra, sir af is-silta sew ħalli l-qari tiegħek ikun fluwenti. Jekk se tikkwota lil xi nies, aqra kliemhom b’sentiment, mingħajr ma tkun drammatiku żżejjed.
Tkellem mill-qalb. Aħseb dwar għala s-semmiegħa tiegħek għandhom bżonn jisimgħu l-messaġġ. Iffoka fuqhom. Imbagħad, il-mod taʼ kif toqgħod bilwieqfa jew bilqiegħda, il-ġesti tiegħek, u l-espressjonijiet taʼ wiċċek se juru li int dħuli u sinċier.

Titfixkilx in-naturalezza maʼ li tkun kunfidenti żżejjed. Żomm id-dinjità tal-messaġġ tiegħek billi titkellem b’mod ċar u tuża grammatika tajba.
Ħares lejn is-semmiegħa tiegħek. Żomm kuntatt bl-għajnejn meta jkun xieraq li tagħmel dan. Meta tagħti taħdita, ħares lejn xi ħadd fl-udjenza għal ftit ħin, u mhux tħares fuq fuq lejn l-aħwa kollha bħala grupp.