STUDJU 14

Enfasizza l-punti prinċipali

Ebrej 8:1

X’GĦANDEK TAGĦMEL: Għin lill-udjenza tiegħek issegwik waqt it-taħdita, u uri ċar kif kull punt prinċipali għandu x’jaqsam mal-iskop u t-tema tiegħek.

KIF TAGĦMEL DAN:

Ara li jkollok skop f’moħħok. Ikkunsidra jekk it-taħdita tiegħek hijiex maħsuba biex tinforma, tikkonvinċi, jew tħeġġeġ lill-udjenza, u mbagħad żviluppaha skont dan. Kun ċert li l-punti prinċipali kollha jgħinuk tasal għall-iskop tiegħek.

Staqsi lilek innifsek: ‘L-udjenza tiegħi x’mistoqsijiet jew oġġezzjonijiet kieku jkollha dwar dan is-suġġett? U b’liema ordni kieku tpoġġihom?’ Imbagħad irranġa l-punti tiegħek fl-istess ordni ħalli l-udjenza tkun tistaʼ ssegwik, tifhem, u taċċetta l-informazzjoni.
Enfasizza t-tema tat-taħdita tiegħek. Irreferi għat-tema tul it-taħdita tiegħek billi tirrepeti l-kliem prinċipali tat-tema jew billi tuża kliem ieħor li jfisser l-istess.
Oħroġ il-punti prinċipali tiegħek b’mod ċar u sempliċi. Agħżel biss punti prinċipali li għandhom x’jaqsmu mat-tema tiegħek u li tistaʼ tgħallimhom b’mod effettiv fil-ħin li għandek. Illimita n-numru taʼ punti prinċipali, semmi b’mod ċar kull punt prinċipali, ieqaf għal ftit bejn kull wieħed, u mexxi ħelu ħelu minn punt għal ieħor.

Int forsi ssemmi l-punti prinċipali fl-introduzzjoni tiegħek biex tgħin lill-udjenza ssegwik jew forsi terġaʼ ssemmihom fil-konklużjoni tiegħek biex tgħin lill-udjenza tiftakarhom.