Aħbarijiet tas-​Saltna Nru. 37

Messaġġ għad-​Dinja Kollha

It-​Tmiem tar-​Reliġjon Falza Huwa fil-​Qrib!

▪ X’inhi r-​reliġjon falza?

▪ Kif se tintemm?

▪ Int kif se tiġi effettwat?

X’Inhi r-​Reliġjon Falza?

Tħossok int imdejjaq minħabba d-​delitti li jsiru f’isem ir-​reliġjon? Tħoss nuqqas taʼ ġustizzja meta tara l-​gwerer, it-​terroriżmu, u l-​korruzzjoni minn dawk li jgħidu li jaqdu lil Alla? Ir-​reliġjon għala tidher li hija l-​kaġun taʼ daqstant problemi?

Il-ħtija m’hijiex tar-​reliġjonijiet kollha, imma tar-​reliġjon falza. Persunaġġ reliġjuż li huwa rispettat minn ħafna, Ġesù Kristu, wera li r-​reliġjon falza tipproduċi għemejjel ħżiena, bħalma “siġra mħassra tagħmel frott ħażin.” (Mattew 7:15-17) Ir-​reliġjon falza x’tip taʼ frott ħażin tagħmel?

Ir-​Reliġjon Falza . . .

◼ TINDAĦAL FIL-​GWERER U L-​POLITIKA: “Fl-​Asja kif ukoll f’pajjiżi oħrajn,” jgħid il-​ġurnal Asiaweek, “mexxejja li huma għatxana għall-​poter jimmanipulaw b’egoiżmu l-​opinjonijiet reliġjużi tan-​nies biex jaqdu l-​bżonnijiet tagħhom.” B’riżultat taʼ dan, il-​ġurnal iwissi: “Id-​dinja tinsab f’riskju li tegħreq f’ġenn kbir.” Mexxej reliġjuż prominenti fl-​Istati Uniti ddikjara: “Hemm bżonn li jinqatlu t-​terroristi sabiex jispiċċa l-​qtil.” X’inhi s-​soluzzjoni tiegħu? “Noqtluhom kollha f’isem il-​Mulej.” Kuntrarju għal dan, il-​Bibbja tgħid: “Jekk xi ħadd jgħid: ‘Inħobb lil Alla,’ iżda jobgħod lil ħuh, hu giddieb.” (1 Ġwanni 4:20) Ġesù saħansitra qal: “Komplu ħobbu lill-​għedewwa tagħkom.” (Mattew 5:44) Madankollu, kemm hawn reliġjonijiet li l-​membri tagħhom jinvolvu ruħhom fil-​gwerer?

◼ IXXERRED DUTTRINA FALZA: Il-​maġġorparti mir-​reliġjonijiet jgħallmu li r-​ruħ, jew l-​ispirtu, hija xi parti inviżibbli mill-​bniedem li tibqaʼ tgħix wara l-​mewt tal-​ġisem fiżiku. Permezz taʼ dan it-​tagħlim, ħafna minn dawn ir-​reliġjonijiet jieħdu vantaġġ mill-​membri tagħhom, u jiħdulhom il-​flus biex jitolbu għall-​erwieħ tal-​mejtin. Madankollu, il-​Bibbja tgħallem duttrina differenti. “Ir-​ruħ li tidneb, tmut.” (Eżekjel 18:4, Karm Żammit) “Il-​ħajjin, għallinqas, jafu li għad imutu, iżda l-​mejtin ma jafu xejn.” (Koħèlet 9:5) Ġesù għallem li l-​mejtin se jiġu rxoxtati—xi ħaġa li ma jkunx hemm bżonnha jekk il-​bnedmin għandhom ruħ immortali. (Ġwanni 11:11-25) Tgħallem ir-​reliġjon tiegħek li r-​ruħ ma tmutx?

◼ TITTOLLERA SESS IMMORALI: F’pajjiżi tal-​Punent, gruppi reliġjużi jaħtru membri tal-​kleru li huma omosesswali u lesbjani, u jħeġġu lill-​gvernijiet biex jirrikonoxxu ż-​żwiġijiet bejn tnejn taʼ l-​istess sess. Saħansitra knejjes li jikkundannaw l-​immoralità ttolleraw mexxejja reliġjużi li abbużaw sesswalment mit-​tfal. Imma l-​Bibbja x’tgħallem dwar dan? Din tgħid ċar u tond: “Titqarrqux. La ż-​żienja, la l-​idolatri, la l-​adulteri, la l-​irġiel miżmumin għal skopijiet mhux naturali, la l-​irġiel li jimteddu maʼ l-​irġiel . . . ma jirtu s-​saltna t’Alla.” (1 Korintin 6:9, 10) Taf int b’reliġjonijiet li jagħlqu għajnhom għas-​sess immorali?

X’hemm miżmum fil-​futur għal reliġjonijiet li jipproduċu frott ħażin? Ġesù wissa: “Kull siġra li ma tagħmilx frott tajjeb titqaċċat u tintefaʼ fin-​nar.” (Mattew 7:19) Iva, ir-​reliġjon falza se titqaċċat u tinqered! Imma dan kif u meta se jiġri? Viżjoni profetika dokumentata fil-​ktieb Bibliku taʼ Rivelazzjoni, f’kapitli 17 u 18, se tipprovdi t-​tweġiba.

Ir-​Reliġjon Falza Kif Se Tintemm?

Immaġina x-​xena. Mara żienja tinsab bil-​qiegħda fuq dahar bhima tal-​biżaʼ. Il-​bhima għandha sebat irjus u għaxart iqrun. (Rivelazzjoni 17:1-4) Il-​mara żienja lil min tirrappreżenta? Din teżerċita influwenza “fuq . . . is-​slaten taʼ l-​art.” Hi tilbes il-​vjola, tuża l-​inċens, u għandha rikkezzi kbar ħafna. Iżjed minn hekk, permezz tal-​prattiċi spiritistiċi tagħha, “il-​ġnus kollha ġew imqarrqin.” (Rivelazzjoni 17:18; 18:12, 13, 23) Il-​Bibbja tgħinna naraw li din il-​mara żienja hija entità reliġjuża madwar id-​dinja kollha. Din ma tirrappreżentax lil reliġjon waħda partikulari, imma lir-​reliġjonijiet kollha li jipproduċu frott imħassar.

Il-bhima li l-​mara żienja hija riekba fuqha tagħti stampa tal-​qawwiet politiċi.a (Rivelazzjoni 17:10-13) Ir-​reliġjon falza tirkeb fuq dahar din il-​bhima politika, u tipprova tinfluwenza d-​deċiżjonijiet tagħha u tikkontrolla d-​direzzjoni tagħha.

Madankollu, ftit ieħor se sseħħ ġrajja taʼ l-​għaġeb. “L-​għaxart iqrun li rajt, u l-​bhima salvaġġa, dawn se jobogħdu lill-​prostituta u jħarbtuha u jneżżgħuha, u jiklulha laħamha u jaħarquha għalkollox bin-​nar.” (Rivelazzjoni 17:16) F’azzjoni li se tiġri f’daqqa u b’ħasda, il-​qawwiet politiċi tad-​dinja se jattakkaw ir-​reliġjon falza u jeqirduha kompletament! X’se jqanqal azzjoni bħal din? Il-​ktieb Bibliku taʼ Rivelazzjoni jwieġeb: “Alla daħħlilhom fi qlubhom li jwettqu l-​ħsieb tiegħu.” (Rivelazzjoni 17:17) Iva, Alla se jitlob kont mir-​reliġjon falza għall-​atti krudili u mistkerrha kollha li kkommettiet f’ismu. Billi jaġixxi b’ġustizzja perfetta, hu se juża n-​namrati politiċi tagħha bħala l-​istrumenti tiegħu biex jeqirduha.

X’għandek bżonn tagħmel jekk ma tridx li jkollok l-​istess tmiem tar-​reliġjon falza? “Oħorġu minnha, poplu tiegħi,” iħeġġeġ il-​messaġġier t’Alla. (Rivelazzjoni 18:4) Tabilħaqq, issa huwa ż-​żmien li twarrab mir-​reliġjon falza! Imma fejn tistaʼ tmur? Mhux lejn l-​ateiżmu, għax il-​futur tiegħu huwa mudlam ukoll. (2 Tessalonikin 1:6-9) L-​uniku rifuġju huwa fir-​reliġjon vera. Kif tistaʼ tidentifika r-​reliġjon vera?

Kif Tidentifika r-​Reliġjon Vera

X’inhu l-​frott tajjeb li trid tipproduċi r-​reliġjon vera?—Mattew 7:17.

Ir-​Reliġjon Vera . . .

◼ TIPPRATTIKA L-​IMĦABBA: L-​aduraturi veri “m’humiex parti mid-​dinja,” m’humiex mifrudin minħabba r-​razza jew il-​kultura, u juru ‘l-​imħabba bejniethom.’ (Ġwanni 13:35; 17:16; Atti 10:34, 35) Minflok ma joqtlu lil xulxin, huma lesti li jmutu għal xulxin.—1 Ġwanni 3:16.

◼ TAFDA L-​KELMA T’ALLA: Minflok ma tgħallem it-​“tradizzjoni” u ‘l-​kmandi tal-​bnedmin bħala duttrini,’ ir-​reliġjon vera tibbaża d-​duttrina tagħha fuq il-​Kelma t’Alla, il-​Bibbja. (Mattew 15:6-9) Għala? Għaliex “l-​Iskrittura kollha hi mnebbħa minn Alla u tiswa biex tgħallem, twiddeb, tikkoreġi, tiddixxiplina fis-​sewwa.”—2 Timotju 3:16.

◼ ISSAĦĦAĦ IL-​FAMILJI U ŻŻOMM LIVELLI MORALI GĦOLJIN: Ir-​reliġjon vera tħarreġ lill-​irġiel miżżewġin biex “iħobbu lin-​nisa tagħhom, bħal ġisimhom stess,” tgħin lin-​nisa biex jiżviluppaw ‘rispett profond lejn żewġhom,’ u tgħallem lit-​tfal biex ‘jobdu lill-​ġenituri tagħhom.’ (Efesin 5:28, 33; 6:1) Barra minn hekk, dawk li huma fdati b’pożizzjonijiet t’awtorità għandu jkollhom morali taʼ min jimitahom.—1 Timotju 3:1-10.

Hawn xi reliġjon li tilħaq dawn il-​livelli? Il-​ktieb Holocaust Politics, pubblikat fl-​2001, jgħid: “Li kieku kien hawn iktar nies li pprattikaw dak li x-​Xhieda taʼ Ġeħova għallmu u ppridkaw, l-​Olokawst setaʼ ġie evitat u l-​ġenoċidji ma jibqgħux jgħakksu d-​dinja iktar.”

Tabilħaqq, f’235 pajjiż, ix-​Xhieda taʼ Ġeħova mhux biss jippridkaw il-​livelli morali tal-​Bibbja—huma jgħixuhom. Aħna nħeġġuk biex tistaqsi lix-​Xhieda taʼ Ġeħova għal iktar għajnuna ħalli titgħallem dak li Alla jirrikjedi minnek sabiex il-​mod kif int tadurah ikun aċċettabbli. Issa huwa ż-​żmien biex tieħu azzjoni. Iddumx. It-​tmiem tar-​reliġjon falza huwa fil-​qrib!—Sofonija 2:2, 3.

Jekk tixtieq iktar informazzjoni dwar il-​messaġġ ibbażat fuq il-​Bibbja li qed jippridkaw ix-​Xhieda taʼ Ġeħova, iżżommx lura milli tikkuntattjahom fl-​indirizz t’hawn taħt.

□ Mingħajr ebda obbligu, nixtieqkom tibagħtuli kopja tal-​browxer Ibqaʼ Għassa!

□ Jekk jogħġobkom ikkuntattjawni rigward studju tal-​Bibbja fid-​dar bla ħlas.

[Nota taʼ taħt]

[Kliem f’paġna 3]

Ir-​reliġjon falza teżerċita influwenza “fuq . . . is-​slaten taʼ l-​art”

[Kliem f’paġna 3]

“Oħorġu minnha, poplu tiegħi”