La Bambouseraie—Ħolma Li Saret Realtà

MINN KORRISPONDENT TAʼ STENBAĦ! FI FRANZA

DAQS 150 sena ilu fin-​nofsinhar taʼ Franza, Eugène Mazel, importatur taʼ ħwawar Asjatiċi, irħielha biex jagħmel dik li kellha ssir l-​akbar mixtla tal-​bambù fid-​dinja, bi kważi 200 tip differenti taʼ dan ix-​xitel li jikber daqshekk malajr u li jintuża għal daqstant affarijiet. Sa l-​1855, l-​ambizzjoni taʼ Mazel kienet imxekkla minn ostaklu primarju wieħed: Il-​bambù ma kienx jikber fl-​Ewropa.

Attentati biex dan ix-​xitel jiġi importat mill-​Asja sfaw fix-​xejn. Waqt li l-​bambù jiflaħ kemxejn mhux ħażin fl-​abitat propju tiegħu (ċerti tipi jistgħu jifilħu temperaturi baxxi daqs –24 grad Celsius u jistgħu jikbru f’għoli taʼ 5,000 metru), kien impossibbli li l-​għeruq jinżammu ħajjin waqt il-​vjaġġi twal tul il-​kontinenti. Madankollu, mal-​miġja taʼ bastimenti tal-​baħar b’iktar veloċità, kampjuni tal-​bambù ġew importati b’suċċess fl-​Ingilterra fl-​1827 u, iktar tard fi Franza. Il-​ħolma taʼ Mazel kienet pass ieħor eqreb lejn ir-​realtà!

L-isfida li issa kien imiss għal Mazel kienet li jsib post addattat għall-​mixtla tiegħu. Fl-​1855, hu xtara biċċa art li kien fiha madwar 339,948 metru kwadru qrib Anduze, fin-​nofsinhar taʼ Franza, li kienet tibbenefika mill-​klima tal-​Mediterran u kienet imbierka b’ħamrija tajba. Xogħol kbir kellu jsir biex l-​ilma tax-​xmara li kien hemm fil-​qrib jgħaddi għal din il-​biċċa art. Imma l-​isforzi ħabrieka taʼ Mazel irnexxew.

B’sogħba, sa l-​1890, Mazel spiċċa fallut u kellu jbigħ il-​ġnien prezzjuż tiegħu. Iżda bi pjaċir, oħrajn komplew fejn ħalla hu, sabiex issa kull sena madwar 350,000 ruħ iżuru La Bambouseraie​—il-​ħolma taʼ Mazel li saret realtà.

[Sors taʼ l-​istampa f’paġna 31]

L-​istampi kollha: La Bambouseraie de Prafrance