Jistaʼ l-​Ħolm Ibassar il-​Futur?

Minn żmien il-​qedem, il-​bnedmin kellhom interess intensiv fil-​ħolm. L-​Eġizzjani ppreparaw kotba elaborati għall-​interpretazzjoni tal-​ħolm, u l-​Babilonjani kellhom lil dawk li jinterpretawlhom il-​ħolm. Fost il-​Griegi l-​użanza kienet li jieħdu l-​morda jorqdu fin-​niċeċ taʼ Asklepjus biex jirċievu struzzjonijiet dwar saħħithom waqt il-​ħolm. Fit-​tieni seklu taʼ l-​Era Komuni tagħna, Artemidorus ipproduċa ktieb li fih ta interpretazzjonijiet taʼ simboli tal-​ħolm. Ħafna kotba simili prodotti minn dak iż-​żmien ’l hawn ġew ibbażati fuq il-​ktieb tiegħu. Sal-​ġurnata tal-​lum, għadhom isiru sforzi biex jiġi interpretat il-​ħolm, imma fil-​fatt jagħti l-​ħolm dehen dwar avvenimenti li għad iridu jiġru?

Biex dan ikollu sinjifikat dwar il-​futur, irid ikun influwenzat minn xi forza superjuri. Fil-​Bibbja nsibu ħafna waqtiet fejn Alla ssupplixxa dik l-​istess forza. Ta ħolmiet profetiċi lill-​qaddejja tiegħu kif ukoll lil xi wħud li ma qimux lilu. Fil-​fatt, Ġob 33:14-16 jgħid: “Alla jitkellem . . . fil-​ħolm, f’xi dehra bil-​lejl, xħin jaqaʼ n-​ngħas fuq il-​bnedmin, u jkunu reqdin fuq friexhom, dak il-​ħin Alla jnebbaħhom.”

Alla għamel hekk fil-​każ tal-​Farawni Eġizzjan fi żmien Ġużeppi, li għex iktar minn 1,700 sena qabel l-​Era Komuni. Il-​ħolma tal-​Farawni tinsab f’Ġenesi 41:1-7, u fil-​versi 25 sa 32, Ġużeppi jinterpretaha bħala li tbassar sebaʼ snin “taʼ xabgħa kbir fl-​art kollha taʼ l-​Eġittu,” segwiti minn sebaʼ snin taʼ ġuħ. Ġużeppi spjega lil Farawni: “Kull ma se jagħmel Alla, urieh lill-​Fargħun.” (Ġenesi 41:28) Il-​ħolma kienet profetika taʼ dak li fil-​fatt seħħ.

Sultan prominenti tal-​Babilonjani kellu esperjenza simili. Nebukadneżżar kellu ħolma li inkwetatu ferm, imma ma setax jiftakarha. Għalhekk bagħat għas-​sħaħar tiegħu biex jgħarrfuh il-​ħolma u l-​interpretazzjoni tagħha. Din kienet talba impossibbli għalihom li jilqgħuha.—Danjel 2:1-11.

Ladarba kien Alla li ta l-​ħolma lis-​sultan, Hu għamilha possibbli li Danjel jirrivela l-​ħolma u l-​interpretazzjoni tagħha. Danjel 2:​19 jgħid: “Imbagħad il-​misteru kien irrivelat lil Danjel f’dehra bil-​lejl.” Danjel ta kredtu ’l Alla għal din il-​ħolma: “Il-​misteru li s-​sultan irid jitkixxef, la l-​għorrief, la l-​bassara, la l-​maġi u lanqas l-​astroloġi ma għandhom ħila juruh lis-​sultan. Iżda hemm Alla fis-​sema li jikxef il-​misteri, u li għarraf lis-​sultan Nebukadnessar x’sejjer jiġri fl-​aħħar jiem.”—Danjel 2:27, 28.

Xi kultant Alla ta struzzjonijiet lill-​poplu tiegħu permezz tal-​ħolm, u f’waqtiet oħrajn ta assiguranza taʼ favur divin jew għenhom jifhmu kif kien qiegħed jgħinhom. Fil-​każ taʼ Ġakobb, Alla rrivela l-​approvazzjoni tiegħu permezz taʼ ħolma.—Ġenesi 48:3, 4.

Meta Ġużeppi, il-​missier adottiv taʼ Ġesù, skopra li Marija kienet tqila, iddeċieda li jiddivorzjaha. Imbagħad irċieva istruzzjonijiet f’ħolma biex ma jagħmilx hekk. Mattew 1:20 jgħid: “Meta kien għadu qiegħed jaħsibha, deherlu anġlu tal-​Mulej fil-​ħolm u qallu: ‘Ġużeppi, bin David, xejn la tibżaʼ tieħu lil Marija b’martek, għax dak li tnissel fiha ġej mill-​Ispirtu s-​Santu.’” Iktar tard ngħata twissija f’ħolma: “Deher anġlu tal-​Mulej f’ħolma lil Ġużeppi u qallu: ‘Qum, ħu miegħek lit-​tifel u ’l ommu, u aħrab lejn l-​Eġittu.’”—Mattew 2:13.

Ħolm Li Mhux Ġej Minn Alla

Il-​fatt li l-​interpretazzjoni tal-​ħolm kienet komuni fost dawk li ma kinux il-​poplu t’Alla jindika li l-​ħolm inġenerali ma jistax jitqies bħala rivelatur tal-​futur taʼ min joqgħod fuqu. Fi żmien Ġeremija l-​profeta t’Alla, profeti foloz kienu qegħdin jgħidu: “Kelli ħolma! Kelli ħolma!” (Ġeremija 23:25) L-​intenzjonijiet tagħhom kienu li jiżvijaw lill-​poplu f’li jaħseb li Alla kien qiegħed jitkellem permezz tagħhom. Rigward dawn il-​ħalliema, Ġeremija kien ispirat biex jgħid: “Għax dan igħid il-​Mulej taʼ l-​eżerċti, Alla taʼ Israel: ‘Tħalluhomx iqarrqu bikom il-​profeti li hemm f’nofskom u l-​ħabbara tagħkom. Tagħtux widen għall-​ħolm li qegħdin joħolmu. Għax qegħdin iħabbrulkom il-​gideb f’ismi . . . ,’ Oraklu tal-​Mulej.”—Ġeremija 29:8, 9.

Ladarba dawn il-​profeti foloz kienu “ħabbara,” il-​ħolm tagħhom setaʼ kien influwenzat minn forzi spirti mill-​agħar bl-​iskop li jqarrqu bin-​nies. L-​istess hu indikat f’dak li jgħid Żakkarija 10:2: “Għax l-​allat taʼ djarhom igħidu kliem fieragħ; dawk li jħabbru kellhom dehriet qarrieqa, ifissru ħolm mhux minnu.”

Ix-Xitan huwa l-​arċi-qarrieq li għal eluf taʼ snin uża mexxejja reliġjużi biex jistqarru falz li Alla kellimhom permezz taʼ viżjonijiet u ħolm, l-​istess bħalma l-​profeti qarrieqa għamlu fi żmien Ġeremija u Żakkarija. Rigward uħud bħal dawn, il-​kittieb Bibliku Ġuda taħt ispirazzjoni kiteb lill-​Kristjani taʼ l-​ewwel seklu: “Għax fostna ndiehsu xi wħud li sa minn żmien ilu kienu mniżżlin minn qabel għal din il-​kundanna, nies bla reliġjon li jaqilbu l-​grazzja taʼ Alla tagħna f’żina u jiċħdu lil Ġesù Kristu, il-​Mulej u s-​Sid waħdieni tagħna.” Dawn l-​irġiel, hu qal, kienu, biex ngħidu hekk, “jagħtuha għall-​ħolm.”—Ġuda 4, 8, New World Translation.

Ittestja Dak Li Jiġi Sostnut

Persuna tistaʼ ssostni li Alla kellimha f’ħolma jew li l-​ħolm tagħha dwar ġrajjiet fil-​futur wera li kien veru, u madankollu dak mhux raġuni biżżejjed biex temminha u ssegwiha b’għajnejk magħluqin. Innota l-​istruzzjonijiet miktubin għall-​Israeliti, li nsibuhom f’Dewteronomju 13:2-4, 6 (Dewteronomju 13:1-3, 5, NW): “Jekk iqum f’nofsok xi profeta jew ħalliem, u jgħidlek li jagħtik sinjal jew il-​għaġeb li jkun wiegħdek u qallek: ‘Ħa mmorru wara allat oħrajn, li int ma tafx bihom u nadurawhom,’ la tismax il-​kliem taʼ dan il-​profeta jew il-​ħolm li hu jkun ħolom . . . Profeta bħal dan, jew ħalliem bħal dan, agħtuh il-​mewt.” Alla ppermetta li wħud bħal dawn jitkellmu falz bħala test tal-​lealtà tal-​poplu tiegħu.

Minflok ma nemmnu b’għajnejna magħluqin dak li jsostnu ħalliema kariżmatiċi, il-​korsa għaqlija hi li nittestjaw dak li jsostnu huma biex nevitaw li niġu żvijati mill-​arċi-qarrieq inviżibbli, li qiegħed ‘iqarraq bid-​dinja kollha.’ (Apokalissi 12:9) Imma kif jistaʼ jiġi ttestjat b’mod li tistaʼ toqgħod fuqu?

Il-Kelma miktuba t’Alla hija l-​gwida għall-​verità mogħtija b’mod divin. Dwarha, Ġesù Kristu qal: “Il-​kelma tiegħek hi l-​verità.” (Ġwann 17:17) Għalhekk aħna mwiddbin fl-1 Ġwann 4:1: “Egħżież, mhux lil kull xorta taʼ spirti għandkom temmnu. L-​ispirti stħarrġuhom, biex taraw ikunux ġejja minn Alla; għax kienu ħafna l-​profeti foloz li ħarġu fid-​dinja.” Meta jiġu mqabblin bir-​reqqa mal-​Bibbja, l-​istqarrijiet, il-​filosofiji, u l-​azzjonijiet tagħhom se jiġu f’konflitt magħha. Il-​Kelma t’Alla hija l-​awtorità għal dik li hi verità.

Qiegħed dak li joħlom, li jsostni li għandu xi għarfien speċjali, fil-​fatt juża d-​divinazzjoni jew prattiċi spiritistiċi oħrajn? Jekk iva, huwa kkundannat mill-​Kelma t’Alla. “Ma għandu jkun hemm ħadd li . . . jeħber, min jitkixxef il-​ġejjieni, min jagħmel il-​magħmul u s-​sħarijiet, min isejjaħ l-​erwieħ, min jobsor u jistħarreġ il-​mejtin. Għax mistkerrah quddiem il-​Mulej kull min jagħmel dawn il-​ħwejjeġ.”—Dewteronomju 18:10-12.

Jekk hu jsostni li għandu ruħ ġewwa fih li ma tmutx, ikun qiegħed jikkontradixxi l-​Kelma t’Alla li tistqarr b’mod ċar: “Ir-​ruħ li tidneb, tmut.” (Eżekjel 18:4, Karm Żammit) Qiegħed hu jgħolli lilu nnifsu u jiġbed segwaċi għal warajh? Mattew 23:12 twissi: “Min jitgħolla, jitbaxxa.” U Atti 20:30 iwissi lill-​Kristjani: “Minn fostkom stess għad iqumu xi wħud li jgħallmu dak li hu kontra s-​sewwa, bil-​ħsieb li jdawru d-​dixxipli għal warajhom.”

Jappoġġja azzjonijiet vjolenti? Ġakbu 3:17, 18 jikkundannah: “Il-​għerf li ġej mis-​sema, qabel kollox hu għerf safi, imbagħad hu għerf li jfittex is-​sliem, it-​tjubija u l-​ħlewwa, huwa kollu ħniena u frott tajjeb, bla ma jħares lejn l-​uċuh u bla qerq. Dawk li jfittxu s-​sliem jiżirgħu fis-​sliem u jkollhom il-​frott tal-​ġustizzja.” Ifittex hu awtorità jew influwenza politika fid-​dinja? Il-​Kelma t’Alla tikkundannah b’mod sod, billi tgħid: “Min . . . [i]rid isir ħabib tad-​dinja huwa għadu taʼ Alla.” B’hekk il-​Bibbja tesponi dak li hu falz.—Ġakbu 4:4.

Jekk persuna jkollha ħolma dwar il-​mewt taʼ membru tal-​familja jew xi ħabib, x’aktarx li jkun minħabba li kienet ikkonċernata dwar din il-​persuna. Li l-​persuna setgħet mietet preċiżament fil-​lejl tal-​ħolma, fih innifsu mhux prova li l-​ħolma kienet profetika. Għal kull ħolma taʼ dan it-​tip li tidher li ssir realtà, hemm mijiet li ma jseħħux.

Għalkemm Alla għamel użu mill-​ħolm fil-​passat biex jirrivela avvenimenti profetiċi u jagħti istruzzjonijiet waqt li l-​Kelma miktuba tiegħu kienet qiegħda tiġi prodotta, m’għandux għalfejn jagħmel hekk illum. Dik il-​Kelma miktuba fiha l-​istruzzjonijiet kollha minn Alla li l-​umanità għandha bżonn f’dan iż-​żmien, u l-​profeziji tagħha jirrigwardjaw avvenimenti iktar minn elf sena oħra fil-​futur. (2 Timotju 3:16, 17) Għalhekk nistgħu nħossuna fiduċjużi li l-​ħolm tagħna m’huwiex indikazzjonijiet minn Alla dwar avvenimenti futuri imma funzjonijiet essenzjali tal-​moħħ biex nibqgħu f’saħħitna mentalment. (w96 10/1)

[Stampa f’paġna 7]

Bħalma l-​ħolma tal-​Farawni wriet x’kien se jiġri, il-​Kelma t’Alla titfaʼ dawl fuq il-​futur tagħna