Il-​Ħarsa tal-​Bibbja

Huwa l-​Ħolm Messaġġ Mingħand Alla?

JINTQAL li l-​idea li ġietu l-​inventur Elias Howe biex jiddisinja l-​magna tal-​ħjata kienet ibbażata fuq ħolma. Il-​kompożitur Mozart qal li ħafna mit-​temi tal-​mużika tiegħu ġewlu fil-​ħolm tiegħu. Il-​kimiku Friedrich August Kekule von Stradonitz bl-​istess mod qal li skopra l-​forma tal-​molekula tal-​benzina f’ħolma. Dawn m’humiex l-​uniċi eżempji. Matul l-​istorja ħafna kulturi kienu jemmnu li l-​ħolm kellu x’jaqsam mas-​soprannaturali. Xi wħud jemmnu li kemm id-​dinja tal-​ħolm u kemm dik taʼ meta nkunu mqajmin huma t-​tnejn reali.

Il-Bibbja fiha diversi rakkonti fejn il-​ħolm jiġi deskritt bħala sors importanti taʼ informazzjoni—għamla taʼ komunikazzjoni divina. (Mħallfin 7:13, 14; 1 Slaten 3:5) Per eżempju, Alla kkomunika m’Abraham, Ġakobb, u Ġużeppi fil-​ħolm. (Ġenesi 28:10-19; 31:10-13; 37:5-11) Is-​Sultan Babiloniż Nabukodonosor irċieva ħolm profetiku mingħand Alla. (Danjel 2:1, 28-45) Allura, ifisser dan li għandna raġuni tajba biex nemmnu li saħansitra llum xi ħolm huwa messaġġ mingħand Alla?

Ħolm Mingħand Alla

Fil-​Bibbja, il-​ħolm ispirat minn Alla ġie mogħti minnu għal raġuni speċifika. Veru, xi kultant min joħlom ma kienx jifhem it-​tifsir tal-​ħolm mill-​ewwel. Madankollu, f’ħafna każi Alla nnifsu “li jikxef il-​misteri” pprovda l-​ispjegazzjoni sabiex ma jkun hemm l-​ebda dubju dwar it-​tifsira tal-​ħolma. (Danjel 2:28, 29; Għamos 3:7) Il-​ħolm minn Alla ma kellux affarijiet taʼ taħwid li ma jagħmilx sens bħalma taʼ spiss ikollu l-​ħolm normali.

Xi drabi, il-​ħolm kien jintuża minn Alla biex jipproteġi mill-​periklu lil individwi li kellhom irwol primarju f’li jitwettaq l-​iskop tiegħu. Min kien jirċievi dan il-​ħolm mhux bilfors kien ikun qaddej t’Alla. Per eżempju, l-​astroloġi li kienu marru jaraw liċ-​ċkejken Ġesù ma marrux lura biex jaraw lil Erodi l-​qattiel bħalma kien talabhom hu. Għala? Għax irċivew twissija f’ħolma. (Mattew 2:7-12) Minħabba f’hekk, Ġużeppi, il-​missier adottiv taʼ Ġesù, kellu biżżejjed żmien biex jaħrab lejn l-​Eġittu mal-​familja tiegħu, fi qbil mad-​direzzjoni li hu wkoll kien irċieva f’ħolma. Dan salva l-​ħajja taċ-​ċkejken Ġesù.—Mattew 2:13-15.

Sekli qabel, fargħun Eġizzjan ħolom dwar sebaʼ sbuliet tal-​qamħ b’saħħithom u sebaʼ baqriet smien u mlaħħmin u mbagħad ra sebaʼ sbuliet tal-​qamħ morda u sebaʼ baqriet magħlubin. Ġużeppi, bl-​għajnuna divina, fisser il-​ħolm tajjeb: l-​Eġittu kellu jgawdi sebaʼ snin taʼ xabaʼ u mbagħad kellu jkun hemm sebaʼ snin taʼ għaks. Billi kienu jafu dan minn qabel, l-​Eġizzjani setgħu jippreparaw l-​ikel u jaħżnuh. Dan serva biex iżomm id-​dixxendenti t’Abraham ħajjin u jġibhom lejn l-​Eġittu.—Ġenesi, kapitlu 41; 45:5-8.

Is-sultan Nabukodonosor taʼ Babilonja wkoll kellu ħolma. Din kienet tbassar il-​qawma u l-​waqgħa tal-​qawwiet dinjin tal-​futur li kien se jkollhom impatt dirett fuq il-​poplu t’Alla. (Danjel 2:31-43) Iktar tard, ħolom ħolma oħra li kienet tbassar dwar li hu stess kellu jiġġennen u mbagħad ifiq. Din il-​ħolma profetika kellha twettiq akbar, billi kienet immirata lejn it-​twaqqif tas-​Saltna t’Alla, li permezz tagħha Alla kellu jwettaq ir-​rieda tiegħu.—Danjel 4:7-34 [4:10-37, NW].

Xi Ngħidu għal Żmienna?

Iva, Alla kkomunika maʼ xi nies permezz tal-​ħolm. Imma l-​Bibbja tindika li dan kien pjuttost rari. Il-​ħolm qatt ma kien il-​mod prinċipali kif Alla kien jikkomunika. Kien hemm ħafna qaddejja leali t’Alla li qatt ma rċivew messaġġi minn Alla permezz tal-​ħolm. Il-​fatt li Alla uża l-​ħolm biex jikkomunika mal-​bniedem jistaʼ jitqabbel maʼ meta feraq il-​Baħar l-​Aħmar. Nafu li hekk għamel darba, imma żgur li m’huwiex il-​mod normali taʼ kif jaġixxi mal-​poplu tiegħu.—Eżodu 14:21.

L-appostlu Pawlu għaraf li fi żmienu l-​ispirtu t’Alla kien jaħdem fuq il-​qaddejja tiegħu b’ħafna modi taʼ l-​għaġeb. Pawlu qal: “Lil wieħed [jingħatalu] kliem l-​għerf, mill-​istess Spirtu; lil ieħor il-​kelma tas-​sapjenza mill-​istess Spirtu; lil ieħor il-​fidi mill-​istess Spirtu; lil ieħor id-​don tal-​fejqan mill-​istess Spirtu; lil ieħor is-​setgħa tal-​mirakli, lil ieħor id-​don tal-​profezija; lil ieħor id-​don taʼ l-​għażla taʼ l-​ispirti, lil ieħor diversi ilsna; lil ieħor it-​tifsir taʼ l-​ilsna.” (1 Korintin 12:7-10 [12:8-10, NW]) Għalkemm il-​ħolm ispirat b’mod divin ma jissemmiex b’mod speċifiku, milli jidher għadd taʼ Kristjani rċivew ħolm ispirat b’mod divin bħala wieħed mid-​doni taʼ l-​ispirtu u bħala twettiq taʼ Ġoel 3:1 [2:28, NW].—Atti 16: 9, 10.

Madankollu, dwar dawn id-​doni speċjali l-​appostlu qal: “Jgħibu l-​profeziji, jisktu l-​ilsna, jgħib l-​għerf.” (1 Korintin 13:8) Skond l-​evidenza, fost id-​doni li kellhom “jgħibu” kien hemm it-​tipi differenti taʼ komunikazzjoni divina. Wara l-​mewt taʼ l-​appostli, Alla ma baqax jagħti dawn id-​doni speċjali lill-​qaddejja tiegħu.

Illum l-​esperti għadhom qed jipprovaw jifhmu l-​proċess tal-​ħolm u jekk għandux skop prattiku. Il-​Bibbja ma titfaʼ l-​ebda dawl fuq dawn il-​kwistjonijiet. Madankollu, il-​Bibbja tipprovdi twissija lil dawk li jinsistu li jiksbu komunikazzjoni divina fil-​ħolm tagħhom. F’Żakkarija 10:2 din tgħid: “Dawk li jħabbru . . . ifissru ħolm mhux minnu.” Alla jwissi wkoll kontra t-​teħbir. (Dewteronomju 18:10-12) Meta jqisu dawn it-​twissijiet, il-​Kristjani llum ma jistennewx li jirċievu gwida divina fil-​ħolm tagħhom. Minflok, huma jqisu l-​ħolm sempliċement bħala xi ħaġa li jesperjenzawha matul l-​irqad.