Minn Uffiċjal tal-​SS Għal Qaddej tal-​Alla l-​Veru

Kif rakkontata minn Gottlieb Bernhardt

Jien kont naqdi bħala uffiċjal fl-​SS tal-​Ġermanja. Kont wieħed mill-​gwardji taʼ grad għoli taʼ Hitler fil-​Kastell taʼ Wewelsburg. F’April tal-​1945, irċivejt ordni biex noqtol xi priġunieri f’kamp tal-​konċentrament fil-​qrib. Dawn kienu Xhieda taʼ Ġeħova. L-​SS kienu jesiġu ubbidjenza assoluta lejn l-​awtorità. Bla mistenni, sibt ruħi bejn ħaltejn jekk nobdix din l-​ordni jew jekk nagħmilx dak li kont naf li hu tajjeb. Ħa nispjega għalfejn.

JIEN twilidt fl-​1922, f’raħal viċin ix-​Xmara Renu fil-​Ġermanja. Għalkemm f’dawn l-​inħawi kien hemm ħafna nies Kattoliċi ferventi, il-​familja tagħna kienet tagħmel parti minn moviment reliġjuż imsejjaħ Pjetiżmu li oriġina fis-​seklu 17. Fl-​1933, meta kelli 11-​il sena, Hitler telaʼ fil-​gvern fil-​Ġermanja. Ftit snin wara, minħabba li kont nispikka fl-​istudji akkademiċi kif ukoll fl-​isports, ġejt magħżul biex nattendi akkademja qrib il-​belt taʼ Marienburg, illum Malbork, fil-​Polonja. Hawnhekk, mijiet taʼ kilometri ’l bogħod mid-​dar, kont involut sew fl-​ideoloġija tas-​Soċjalisti Nazzjonali, jew tan-​Nazisti. L-​istudenti kienu jiġu mgħallmin affarijiet bħall-​unur, il-​bżulija, il-​lealtà, l-​ubbidjenza, is-​sens taʼ dmir, u r-​rispett riverenzjali għall-​wirt Ġermaniż tagħna.

It-​Tieni Gwerra Dinjija u l-​SS

Meta faqqgħet it-​Tieni Gwerra Dinjija fl-​1939, jien inktibt fil-​Leibstandarte SS Adolf Hitler, diviżjoni militari speċjali taħt il-​kmand persunali taʼ Hitler. Din id-​diviżjoni kienet tipprovdi gwardji persunali għall-​uffiċjali tal-​gvern, u kienet tintuża għal ħidmiet militari speċjali. Jien rajt battalji jiġu miġġielda fil-​Belġju, fi Franza, fl-​Olanda, fir-​Rumanija, fil-​Bulgarija, u fil-​Greċja. Waqt li kont il-​Bulgarija, attendejt funzjoni reliġjuża li tmexxiet minn qassis tal-​armata. Jien għedt bejni u bejn ruħi, ‘Tgħid l-​għadu qed jagħmel l-​istess funzjonijiet?’ Ukoll, staqsejt lili nnifsi: ‘Alla jitfaʼ l-​barka tiegħu fuq il-​gwerer? Hu jżomm maʼ xi naħa jew m’oħra?’

Wara ftit, ġejt magħżul biex nattendi l-​Junkerschule, akkademja għal irġiel żgħażagħ li fil-​futur kienu se jokkupaw karigi għoljin fil-​militar. Imbagħad, ġejt inkarigat f’diviżjoni li tgħasses il-​kwartieri ġenerali tar-​Reich f’Berlin, fejn darba rajt lil Hitler jgħajjat kemm jiflaħ quddiem in-​nies maʼ politikant f’kariga għolja. Jien għedt bejni u bejn ruħi, ‘X’għarukaża, kif qed jaġixxi!’ Iżda ma ssograjtx ngħid hekk b’leħen għoli.

F’Berlin, iltqajt maʼ Inge, li wkoll kienet taħdem fil-​kwartieri ġenerali. Il-​ġurnata tat-​tieġ tagħna kienet qed toqrob. Kien proprju f’dan iż-​żmien li bħala diviżjoni ntbgħatna ħabta u sabta bl-​ajru għall-​gwerra fir-​Russja mingħajr lanqas biss kellna ħwejjeġ adattati għax-​xitwa! Minħabba din is-​sitwazzjoni, aħna s-​suldati bqajna xxokkjati għax fix-​xitwa tal-​1941/1942, it-​temperaturi niżlu iktar minn 30 grad Celsius taħt iż-​żero. Kien hawnhekk li ngħatajt it-​tieni Salib tal-​Ħadid. Imbagħad, wara li ġejt ferut serjament, intbgħatt lura l-​Ġermanja bl-​ajru. Jien u Inge żżewwiġna fl-​1943.

Għall-​inkarigu li kien imiss intbgħatt fil-​kwartieri ġenerali taʼ Hitler f’Obersalzberg, fil-​muntanji tal-​Bavarja. F’dawn il-​kwartieri kien hemm ukoll Heinrich Himmler, il-​kap tal-​SS li rranġali biex inkun taħt il-​kura taʼ Felix Kersten, li kien it-​tabib persunali tiegħu u li kien ukoll jagħmillu l-​massaġġi. Iktar tard, sirt naf li Kersten kellu proprjetà bl-​isem taʼ Hartzwalde, qrib Berlin. Lejn l-​aħħar tal-​gwerra, hu talab lil Himmler biex iħalli lix-​Xhieda taʼ Ġeħova li kienu f’kamp tal-​konċentrament fil-​qrib biex imorru jaħdmu fil-​proprjetà tiegħu. Himmler qabel, u Kersten ittratta lix-​Xhieda b’rispett. Xhud li kien jaħdem għal Kersten fl-​Isvezja dejjem kien ipoġġi kopja tat-​Torri tal-​Għassa fil-​bagalja taʼ Kersten għax-​Xhieda fil-​Ġermanja.a

Meta ltqajt max-​Xhieda taʼ Ġeħova

Lejn tmiem is-​sena 1944, Himmler inkarigani bħala l-​assistent persunali taʼ ġeneral tal-​SS li kien kmandant tal-​Kastell taʼ Wewelsburg. Dan il-​kastell kien fortizza li nbniet 400 sena ilu, qrib il-​belt taʼ Paderborn. Himmler ippjana li jagħmel Wewelsburg ċentru għall-​ideoloġija tal-​SS. Maġenb il-​fortizza kien hemm kamp tal-​konċentrament żgħir imsejjaħ Niederhagen, li kien jilqaʼ kategorija speċjali taʼ priġunieri—ix-​Xhieda taʼ Ġeħova, li kienu jissejħu wkoll Studenti tal-​Bibbja.

Priġunier jismu Ernst Specht kien jiġi diversi drabi biex idewwili l-​ġrieħi. “L-​għodwa t-​tajba Sir,” kien jgħidli.

“Għalfejn ma tgħidx ‘Heil Hitler!’?” Staqsejtu jien b’leħen sod.

Hu wiġibni bit-​tattika billi staqsieni, “Int ġejt imrobbi bħala Kristjan?”

“Iva,” għedtlu. “Jien trabbejt bħala Pjetist.”

Hu ssokta jgħidli, “Allura int taf li l-​Bibbja twiegħed salvazzjoni (heil) permezz taʼ persuna waħda biss—Ġesù Kristu. Huwa għalhekk li ma nistax ngħid ‘Heil Hitler!’”

Bqajt skantat u impressjonat, u b’hekk staqsejtu, “Int għaliex qiegħed hawn?”

“Jien Student tal-​Bibbja,” qalli hu.

Il-​konversazzjonijiet maʼ Ernst u maʼ Xhud ieħor, Erich Nikolaizig, li kien jaħdem bħala parrukkier, messewli qalbi. Imma diskussjonijiet bħal dawn kienu projbiti, u l-​fizzjal kmandant ordnali biex nieqaf. Madankollu, ħassejt li kieku kulħadd fil-​Ġermanja—l-​hekk imsejjaħ pajjiż Kristjan fejn miljuni taʼ nies huma membri tal-​knisja—ġab ruħu bħax-​Xhieda, ma kienx ikun hemm gwerra. Jien kont tal-​fehma li dawn huma nies li għandhom jiġu ammirati u mhux persegwitati.

Matul dan iż-​żmien, ċemplet armla li ma kinitx taf fejn se taqbad tagħti rasha biex titlob trasport għal binha li kien jeħtieġ li ssirlu operazzjoni tal-​appendiċite b’urġenza. Minnufih ordnajt it-​trasport iżda l-​fizzjal kmandant tiegħi kkanċella l-​ordni. Għala? Għax żewġha kien ngħata l-​mewt peress li kien membru taʼ grupp taʼ nies li f’Lulju tal-​1944 ipprovaw jassassinaw lil Hitler. It-​tifel miet u jien ma stajt nagħmel xejn dwar dan. Din il-​ġrajja għadha fuq il-​kuxjenza tiegħi sal-​ġurnata tal-​lum.

Għalkemm kelli ftit iktar minn 20 sena, bdejt nara l-​ħajja kif tassew hi u mhux bħalma pinġewha n-​Nazisti fil-​propaganda tagħhom. Fl-​istess ħin, l-​ammirazzjoni tiegħi lejn ix-​Xhieda taʼ Ġeħova u lejn it-​tagħlim tagħhom żdiedet. Din imbagħad wasslitni biex nieħu l-​iktar deċiżjoni drammatika taʼ ħajti.

F’April tal-​1945, kienu resqin l-​armati tal-​Alleati, u l-​uffiċjal taʼ fuqi ħarab minn Wewelsburg. Imbagħad waslet diviżjoni b’ordnijiet mingħand Himmler biex tinqered il-​fortizza u biex jinqatlu l-​priġunieri. Il-​kmandant tal-​kamp tal-​konċentrament fil-​qrib tani lista tal-​priġunieri li kellhom jingħataw il-​mewt—kollha Xhieda. Għala? Kien jingħad li dawn kienu jafu fejn jinsabu t-​teżori tal-​arti misruqin mit-​Tielet Reich, xogħlijiet tal-​arti li mid-​dehra kienu nħbew f’xi ftit mill-​bini. Dan is-​sigriet ma setax jinkixef! Allura x’kelli nagħmel dwar l-​ordni biex jingħataw il-​mewt?

Jien avviċinajt lill-​kmandant tal-​kamp u għedtlu: “Ġejjin it-​truppi Amerikani. Ma taħsibx li jkun għaqli għalik u għan-​nies tiegħek li titilqu?” Ma tantx dam jaħsibha! Imbagħad, jien għamilt xi ħaġa li uffiċjal tal-​SS lanqas biss għandha tgħaddilu minn rasu li jagħmel—m’obdejtx ordni. B’hekk, ix-​Xhieda baqgħu ħajjin.

Onorat li Nkun Ħuhom

Wara l-​gwerra, jien u Inge kkuntattjajna lix-​Xhieda taʼ Ġeħova u bdejna nistudjaw il-​Bibbja bis-​serjetà. Xhud jisimha Auguste, flimkien maʼ xi wħud oħrajn, għenuna nagħmlu dan. Kemm minħabba li kont ġejt ferut fil-​gwerra u kemm minħabba l-​perijodu iebes taʼ wara l-​gwerra, il-​ħajja kienet diffiċli. Jien u marti xorta waħda ddedikajna ħajjitna lil Ġeħova u tgħammidna—jien fl-​1948, u Inge fl-​1949.

Fis-​snin 50, bosta Xhieda li kienu f’Wewelsburg matul il-​gwerra marru lura hemmhekk għal riunjoni. Dawn kienu jinkludu lil Ernst Specht, Erich Nikolaizig, u priġunier leali ieħor, Max Hollweg. Jien inħossni tassew onorat li nissejjaħ ħuhom, għax dawn l-​irġiel qalbenin li jaqdu lil Alla kienu ssograw ħajjithom biex jagħtuni xhieda. Preżenti wkoll għar-​riunjoni kien hemm Martha Niemann li kienet taqdi bħala segretarja f’Wewelsburg. Anki hi kienet baqgħet tassew impressjonata bil-​kondotta tax-​Xhieda u kienet saret qaddejja dedikata taʼ Ġeħova.

Meta nħares lura lejn is-​snin, nara bosta evidenza li “d-​dinja kollha qiegħda taħt il-​qawwa taʼ [Satana x-​Xitan]”—xi ħaġa li ma kontx nifhem bħala żagħżugħ bla esperjenza u li kelli l-​ideali tiegħi. (1 Ġwanni 5:19) Ukoll, nara ċar id-​differenza bejn li naqdi lil reġimi tiranniċi, bħalma kien taʼ Hitler, u li naqdi lil Ġeħova. Dawn tal-​ewwel jesiġu li nobduhom b’għajnejna magħluqin, filwaqt li Ġeħova jridna naqduh sforz l-​imħabba bbażata fuq l-​għarfien eżatt dwar il-​personalità u l-​iskopijiet tiegħu, bħalma huwa rivelat fil-​Bibbja. (Luqa 10:27; Ġwanni 17:3) Tabilħaqq, Ġeħova huwa l-​wieħed li se naqdi sakemm indum ħaj.

[Nota taʼ taħt]

[Stampa f’paġna 27]

Ritratt tat-​tieġ tagħna fi Frar tal-​1943

[Stampa f’paġna 27]

Il-​Kastell taʼ Wewelsburg kellu jiġu mibdul f’ċentru għall-​ideoloġija tal-​SS

[Stampa f’paġna 28]

Maʼ marti Inge llum