Is-​Sistema Navigazzjonali tal-​Girwiel taʼ Denbu bl-​Istrixxi

IL-​GIRWIEL taʼ denbu bl-​istrixxi jagħmel waħda mill-​iktar pases affaxxinanti magħrufin mill-​bniedem. Il-​vjaġġ twil 11,000 kilometru tal-​għasfur jistaʼ jieħu iktar minn tmint ijiem.

Ikkunsidra: Xi riċerkaturi jemmnu li għan-​navigazzjoni, xi tipi taʼ għasafar jużaw il-​qawwa manjetika tal-​art, bħallikieku kellhom xi boxxla f’moħħhom. Hu possibbli li l-​girwiel isib triqtu wkoll permezz tax-​xemx binhar u permezz tal-​kwiekeb billejl. Donnu li l-​girwiel jistaʼ wkoll iħoss maltempati li jkunu resqin u li permezz tagħhom ikun jistaʼ jibbenefika mill-​irjieħ li jkunu ġejjin minn warajh. Xorta waħda, id-​dettalji taʼ kif dawn l-​għasafar jagħmlu l-​vjaġġ inkredibbli tagħhom iħallu lill-​esperti mbellhin. Il-​bijologu Bob Gill jgħid: “Ili 20 sena nistudja dwarhom, u għadhom iġibuli għajnejja wara widnejja.”

Int X’Taħseb? Is-​sistema navigazzjonali tal-​girwiel taʼ denbu bl-​istrixxi ġiet bl-​evoluzzjoni? Jew ġiet disinjata?