Tmiem għall-​Vjolenza Domestika

FORSI tinħasad meta ssir taf li dawn iż-​żewġ xeni huma dwar l-​istess koppja.

Bħal ħafna minn dawk li jikkommettu l-​vjolenza domestika, Frank jaf kif jilgħabha tal-​qaddis meta oħrajn ikunu qed jarawh jew meta jkun mal-​kunjati. Imma meta jkun waħdu maʼ martu, Frank ikun kattiv immens.

Bosta rġiel bħal Frank trabbew f’familji vjolenti, u bħala adulti jaħsbu li l-​imġiba tagħhom hi aċċettabbli—saħansitra normali. Imma l-​vjolenza domestika xejn mhi normali. Huwa għalhekk li l-​biċċa l-​kbira min-​nies jitkexkxu meta jsiru jafu li raġel ikun sawwat lil martu.

Minkejja dan, il-​vjolenza domestika hi komuni b’mod allarmanti. Pereżempju, fl-​Istati Uniti, stħarriġ wera li matul ġurnata waħda, aġenziji li jaħdmu kontra l-​vjolenza domestika madwar il-​pajjiż jirċievu medja taʼ iktar minn 16-​il telefonata kull minuta. Il-​vjolenza domestika hi epidemija mifruxa mad-​dinja kollha li tistaʼ tinstab f’kull grupp kulturali, ekonomiku, u soċjali. Ladarba ħafna inċidenti ma jiġux rapportati, bla dubju s-​sitwazzjoni hi agħar milli juru l-​istatistiki.b

Rapporti tal-​vjolenza domestika jqajmu dawn il-​mistoqsijiet: Kif jistaʼ raġel jasal sal-​punt li jittratta lil xi ħadd—aħseb u ara lil martu—b’mod daqstant ħażin? Jistgħu l-​irġiel li jsawtu lin-​nisa tagħhom jingħataw għajnuna?

Ix-​Xhieda taʼ Ġeħova, il-​pubblikaturi taʼ din ir-​rivista, jemmnu li l-​pariri prattiċi tal-​Bibbja jistgħu jgħinu lill-​irġiel vjolenti jbiddlu l-​imġiba tagħhom. Huwa faċli li jagħmlu dan? Le. Huwa possibbli? Iva! L-​edukazzjoni tal-​Bibbja għenet lil ħafna jbiddlu karattru vjolenti maʼ wieħed taʼ qalb tajba u rispett. (Kolossin 3:8-​10) Ikkunsidra l-​esperjenza taʼ Tony u Valerie.

Kif kienet ir-​relazzjoni tagħkom fil-​bidu?

Valerie: Fil-​lejla li tgħarrasna, Tony fajjarli daqqa taʼ ħarta li ħallietni mbenġla għal ġimgħa sħiħa. Hu skuża ruħu fuq li skuża ruħu u wiegħed li qatt ma kien se jerġaʼ jagħmel hekk. Matul il-​bosta snin li ilna miżżewġin, dan il-​kliem smajtu kemm-​il darba.

Tony: Kollox kien itellagħhomli, bħal jekk marti ma kinitx tlestili l-​ikel xħin irrid jien. Darba użajt pistola biex insawwat lil Valerie. Darb’oħra tant sawwattha li ħsibtni qtiltha. Imbagħad, ipprovajt inbeżżagħha billi heddidtha li se noqtol lit-​tifel tagħna hekk kif għamilt sikkina m’għonqu.

Valerie: Kont dejjem beżgħana. Kultant kien ikolli naħrab mid-​dar sakemm Tony jikkalma. Minkejja dan kollu, jien sibtha saħansitra iktar diffiċli biex inkampa mal-​abbuż verbali milli mal-​vjolenza fiżika.

Tony, int minn dejjem kont vjolenti?

Tony: Iva, minn tfuliti. Jien trabbejt f’ambjent vjolenti. Missieri spiss kien isawwat ’l ommi quddiemi u quddiem ħuti. Wara li telaq, ommi bdiet tgħix maʼ raġel ieħor, u hu wkoll kien isawwatha. Hu wkoll stupra lil oħti—u lili. Għal dan weħel il-​ħabs. Naturalment, naf li xejn minn dan ma jiskuża l-​imġiba tiegħi.

Valerie, għala bqajt miegħu?

Valerie: Għax bżajt. Ħsibt bejni u bejn ruħi, ‘X’nagħmel jekk jiġi jfittixni u joqtol lili jew lill-​ġenituri tiegħi? X’nagħmel jekk nirrapportah u s-​sitwazzjoni tmur għall-​agħar?’

L-​affarijiet meta bdew jinbidlu?

Tony: Marti bdiet tistudja l-​Bibbja max-​Xhieda taʼ Ġeħova. Għall-​ewwel, kont ngħir għall-​ħbieb ġodda tagħha, u ħsibt li kelli bżonn insalvaha minn din is-​“setta” stramba. Allura sirt saħansitra iktar vjolenti, mhux biss maʼ Valerie imma wkoll max-​Xhieda. Imma ġurnata minnhom, it-​tifel tagħna Daniel li kellu erbaʼ snin u li kien ibati b’deni għoli, iddaħħal l-​isptar għal kważi tliet ġimgħat. Matul dak iż-​żmien, ix-​Xhieda għenuna ħafna—saħansitra sal-​punt li ħadu ħsieb it-​tifla tagħna Desiree, li kellha sitt snin. Wara li Valerie ħadmet taʼ bil-​lejl, wieħed Xhud qattaʼ l-​ġurnata maʼ Daniel sabiex hi tkun tistaʼ torqod ftit. Il-​qalb tajba li wrew dawn in-​nies—l-​istess nies li kont tant insultajt—effettwatni bil-​kbir. Sa fl-​aħħar fhimt li dawn in-​nies jaġixxu bħal Kristjani veri, u allura tlabt lix-​Xhieda biex jagħmluli studju tal-​Bibbja. Waqt l-​istudju, tgħallimt kif raġel għandu jittratta lil martu u kif m’għandux jittrattaha. Warrabt l-​imġiba vjolenti u abbużiva tiegħi darba għal dejjem. Eventwalment, sirt Xhud taʼ Ġeħova.

Liema prinċipji Bibliċi għenuk tinbidel?

Tony: Hemm ħafna! Fl-​1 Pietru 3:7, il-​Bibbja tgħid li għandi ‘nonoraha’ lil marti. Galatin 5:23 jinkuraġġixxi “l-​ħlewwa” u ‘r-​rażan.’ Efesin 4:31 jikkundanna t-​“tgħajjir.” Ebrej 4:13 jgħid li “kollox hu . . . mikxuf beraħ quddiem” Alla. Allura Alla jara l-​kondotta tiegħi, anki jekk ma jarawhiex il-​ġirien. Tgħallimt ukoll li kelli nbiddel il-​ħbieb tiegħi, ladarba “kumpanija ħażina tħassar id-​drawwiet siewja.” (1 Korintin 15:33) Sħabi tal-​passat kienu fil-​fatt iħeġġuni nkun vjolenti. Huma ħassew li jkun xieraq li ssawwat mara biex iżżommha “kontrollata.”

Kif tħossukom dwar iż-​żwieġ tagħkom issa?

Valerie: Għaddew 25 sena mindu Tony sar wieħed mix-​Xhieda taʼ Ġeħova. Minn dak iż-​żmien ’l hawn, hu ġenwinament wera mħabba, qalb tajba, u konsiderazzjoni lejja.

Tony: Ma nistax inbiddel il-​ħsara, l-​uġigħ, u t-​tbatija li ġibt fuq familti, u marti żgur li ma kienx jistħoqqilha l-​mod kif trattajtha. Imma nħares ’il quddiem għat-​twettiq taʼ Isaija 65:17, meta dan il-​perijodu ikrah mill-​passat tagħna ma nibqgħux niftakruh.

Liema pariri tagħtu lil familji li qed iġarrbu l-​vjolenza domestika?

Tony: Jekk int vjolenti fiżikament jew verbalment maʼ familtek, ammetti li għandek bżonn l-​għajnuna, u iksibha. Hemm ħafna għajnuna disponibbli. Għalija, l-​istudju tal-​Bibbja max-​Xhieda taʼ Ġeħova u s-​sħubija magħhom għenuni negħleb it-​tendenzi vjolenti tiegħi li kienu saru parti minni.

Valerie: Tgħaġġilx biex tqabbel is-​sitwazzjoni tiegħek maʼ dik taʼ xi ħadd ieħor jew biex issegwi l-​parir tan-​nies li jaħsbu li jafu x’inhu l-​aħjar għalik. Għalkemm mhux kulħadd se jkollu l-​istess riżultat, jien ferħana li ma tlaqtx lil żewġi, għax issa ġejna mberkin b’relazzjoni tajba.

IT-​TMIEM TAL-​VJOLENZA DOMESTIKA

Il-​Bibbja tgħid: “L-​Iskrittura kollha hi mnebbħa minn Alla u tiswa biex tgħallem, twiddeb, tikkoreġi.” (2 Timotju 3:16) Bħal Tony, li l-​esperjenza tiegħu hi rakkontata f’dan l-​artiklu, ħafna wħud li kienu abbużivi maʼ marthom jew maʼ żewġhom applikaw il-​pariri tal-​Bibbja u rnexxielhom ibiddlu l-​ħsib u l-​kondotta tagħhom.

Tixtieq titgħallem iktar dwar kif il-​Bibbja tistaʼ tgħin liż-​żwieġ tiegħek? Għal iktar informazzjoni kkuntattja lix-​Xhieda taʼ Ġeħova lokalment, jew idħol fuq is-​sit www.jw.org/mt.