Il-valur taʼ gwida minn adult

X’TINVOLVI GWIDA MINN ADULT?

It-​tfal għandhom bżonn direzzjoni u pariri minn adulti. Bħala ġenitur, int qiegħed fl-​aħjar pożizzjoni biex twettaq dan l-​irwol; infatti, hu d-​dmir tiegħek. Madankollu, anki adulti oħrajn jistgħu jgħinu u jagħtu pariri lit-​tfal tiegħek.

GĦALA HU IMPORTANTI LI T-​TFAL IKOLLHOM GWIDA MINN ADULT?

F’ħafna pajjiżi, iż-​żgħar ftit li xejn jagħmluha mal-​adulti. Ikkunsidra dan:

• It-​tfal iqattgħu l-​biċċa l-​kbira tal-​ħin tagħhom l-​iskola, fejn ikun hemm ħafna iktar studenti milli għalliema u adulti oħra.

• Wara l-​iskola, meta jaslu d-​dar, xi tfal ikunu waħedhom għax il-​ġenituri t-​tnejn ikollhom jaħdmu.

• Studju fl-​Istati Uniti sab li t-​tfal bejn 8 u 12-​il sena bħala medja jqattgħu madwar 6 sigħat kuljum jaraw it-​televixin, jisimgħu l-​mużika, u jilagħbu logħob elettroniku.a

Il-​ktieb Hold On to Your Kids jgħid: ‘It-​tfal mhux qed imorru għand ommhom, missierhom, għalliema, u adulti responsabbli oħra għal istruzzjoni, eżempju, u gwida imma lejn dawk taʼ tamparhom.’

KIF TIPPROVDILHOM GWIDA

Qattaʼ ħin mat-​tfal tiegħek.

PRINĊIPJU BIBLIKU: “Ħarreġ tifel skond it-​triq xierqa għalih; lanqas meta jixjieħ ma jwarrab minnha.”—Proverbji 22:6.

It-​tfal b’mod naturali jmorru għand il-​ġenituri tagħhom għall-​gwida. Infatti, l-​esperti jgħidu li anki meta t-​tfal isiru adoloxxenti, huma jippreferu li jkunu l-​ġenituri tagħhom li jagħtuhom pariri milli dawk taʼ tamparhom. “Il-​ġenituri jibqgħu l-​iktar uħud li jħallu effett fuq l-​attitudni u l-​aġir tat-​tfal tagħhom matul l-​adoloxxenza u fil-​ftit snin taʼ wara,” jikteb Dr. Laurence Steinberg fil-​ktieb You and Your Adolescent. Hu jżid jgħid: “L-​adoloxxenti jimpurtahom minn dak li taħseb int u jisimgħu dak li tgħidilhom, anki jekk mhux dejjem se jammettu dan jew jaqblu maʼ kulma tgħidilhom.”

Ladarba t-​tfal tiegħek ikunu jridu l-​gwida tiegħek, ħu vantaġġ minn dan u agħmel kulma tistaʼ biex tagħtihielhom. Qattaʼ ħin mat-​tfal tiegħek u aqsam magħhom dak li taħseb, il-​valuri, u l-​esperjenzi tiegħek.

Sib lil xi ħadd li jkun taʼ eżempju għalihom.

PRINĊIPJU BIBLIKU: “Min qed jimxi maʼ l-​għorrief se jsir għaref.”—Proverbji 13:20.

Tistaʼ taħseb f’xi adult li jistaʼ jkun taʼ eżempju tajjeb għat-​tfal tiegħek? Għax ma tagħmilx arranġament biex dik il-​persuna tqattaʼ ħin magħhom? Naturalment, dan ma jfissirx li xi ħadd ieħor se jkun responsabbli għat-​tfal tiegħek. Flimkien mat-​taħriġ li tagħti inti, anki adult li taf li mhux se jweġġaʼ lit-​tfal tiegħek jistaʼ jgħinhom. Fil-​Bibbja nsibu l-​eżempju taʼ Timotju. Anki bħala adult, hu bbenefika bil-​kbir mis-​sħubija li kellu mal-​appostlu Pawlu, u Pawlu bbenefika mill-​ħbiberija taʼ Timotju.—Filippin 2:20, 22.

Illum, ħafna familji m’għadhomx jgħixu flimkien fl-​istess dar jew fil-​viċin, u jistaʼ jkun li n-​nanniet, iz-​zijiet, u qraba oħra jgħixu f’pajjiż ieħor. Jekk dan hu minnu fil-​każ tiegħek, ipprova oħloq opportunitajiet biex it-​tfal tiegħek iqattgħu ħin maʼ adulti li għandhom kwalitajiet li tixtieq tara fihom.