Kapitlu 97
Ħaddiema fil-Għalqa tad-Dwieli
“ĦAFNA li huma l-ewwel,” Ġesù għadu kif qal, “se jkunu l-aħħar, u tal-aħħar l-ewwel.” Issa hu juri dan billi jgħid storja. “Is-saltna tas-smewwiet,” jibda hu, “hi bħal wieħed raġel, sid taʼ dar, li ħareġ kmieni fil-għodu biex jikri ħaddiema għall-għalqa tad-dwieli tiegħu.”
Ġesù jkompli: “Meta [sid id-dar] kien ftiehem mal-ħaddiema għal dinier kuljum, hu bagħathom ’il quddiem fil-għalqa tad-dwieli tiegħu. Waqt li ħareġ ukoll madwar it-tielet siegħa, hu ra oħrajn bil-wieqfa bla m’għandhom x’jagħmlu fis-suq; u lil dawk qal, ‘Intom ukoll, morru fil-għalqa tad-dwieli, u dak kollu li hu ġust se nagħtikom.’ Mela marru. Jerġaʼ hu ħareġ madwar is-sitt u d-disaʼ siegħa u għamel l-istess. Fl-aħħarnett, madwar il-ħdax-il siegħa hu ħareġ u sab oħrajn bil-wieqfa, u qalilhom, ‘Għala kontu bil-wieqfa hawn il-jum kollu bla m’għandkom x’tagħmlu?’ Huma qalulu, ‘Għaliex ħadd ma kriena.’ Hu qalilhom, ‘Intom ukoll morru fil-għalqa tad-dwieli.’”
Sid id-dar, jew sid il-għalqa tad-dwieli, huwa Alla Jehovah, u l-għalqa tad-dwieli hija l-ġens taʼ Iżrael. Il-ħaddiema fil-għalqa tad-dwieli huma persuni mdaħħlin fil-patt tal-Liġi; huma b’mod speċifiku dawk il-Lhud li kienu jgħixu fi żmien l-appostli. Huwa biss mal-ħaddiema li jaħdmu l-ġurnata kollha li jsir qbil fuq il-paga. Il-paga hija dinier għax-xogħol tal-ġurnata. Ladarba “t-tielet siegħa” hija d-9:00 taʼ fil-għodu, dawk imsejħin fit-tielet, fis-sitt, fid-disaʼ, u fil-ħdax-il siegħa jaħdmu, rispettivament, 9 sigħat, 6 sigħat, 3 sigħat, u siegħa waħda biss.
Il-ħaddiema li ħadmu 12-il siegħa, jew il-jum kollu, jirrappreżentaw lill-mexxejja Lhud li kienu okkupati kontinwament b’servizz reliġjuż. Huma m’humiex bħad-dixxipli taʼ Ġesù, li kienu impjegati, għall-biċċa l-kbira tal-ħajjiet tagħhom, fis-sajd jew f’impjiegi sekulari oħra. Ma kienx qabel il-Ħarifa tas-sena 29 E.K. li “sid id-dar” bagħat lil Ġesù Kristu biex jiġbor lil dawn biex ikunu d-dixxipli tiegħu. Huma b’hekk saru “l-aħħar,” jew il-ħaddiema tal-għalqa tad-dwieli li marru fil-ħdax-il siegħa.
Fl-aħħarnett, il-ġurnata tax-xogħol simbolika tintemm bil-mewt taʼ Ġesù, u jiġi ż-żmien biex jitħallsu l-ħaddiema. Ir-regola mhix tas-soltu taʼ li l-aħħar wieħed jitħallas l-ewwel tiġi segwita, bħalma huwa spjegat: “Meta sar fil-għaxija, sid il-għalqa tad-dwieli qal lir-raġel li kien qed jeħodlu ħsieb, ‘Sejjaħ lill-ħaddiema u ħallashom il-paga tagħhom, billi tissokta minn tal-aħħar għal tal-ewwel.’ Meta ġew l-irġiel tal-ħdax-il siegħa, kull wieħed irċieva dinier. Mela, meta ġew tal-ewwel, huma kkonkludew li kellhom jirċievu iktar; imma huma wkoll irċevew il-ħlas bir-rata taʼ dinier. Malli rċevewh bdew igergru kontra sid id-dar u qalu, ‘Dawn tal-aħħar taw siegħa xogħol; xorta int għamilthom daqsna li ġarrejna t-tagħbija tal-jum u s-sħana tikwi!’ Imma bi tweġiba lil wieħed minnhom hu qal, ‘Sieħeb, ma qed nagħmillek xejn ħażin. Int ftehimt miegħi għal dinier, mhux hekk? Ħu dak li hu tiegħek u mur. Jien irrid nagħti lil dan l-aħħar wieħed l-istess bħalek. Mhux skond il-liġi għalija li nagħmel dak li rrid bl-affarijiet tiegħi stess? Jew hi għajnek mill-agħar għaliex jien tajjeb?’” B’konklużjoni, Ġesù jirrepeti punt magħmul iktar kmieni, billi jgħid: “B’dan il-mod dawk tal-aħħar se jkunu l-ewwel, u tal-ewwel l-aħħar.”
Li jirċievu d-dinier iseħħ, mhux mal-mewt taʼ Ġesù, imma nhar Pentekoste tas-sena 33 E.K., meta Kristu, ir-“raġel li kien qed jeħodlu ħsieb,” isawwab spirtu qaddis fuq id-dixxipli tiegħu. Dawn id-dixxipli taʼ Ġesù huma bħal “tal-aħħar,” jew il-ħaddiema tal-ħdax-il siegħa. Id-dinier ma jirrappreżentax ir-rigal tal-ispirtu qaddis innifsu. Id-dinier huwa xi ħaġa għad-dixxipli biex jużawha hawn fuq l-art. Huwa xi ħaġa li tfisser il-għixien tagħhom, il-ħajja taʼ dejjem tagħhom. Huwa l-privileġġ taʼ li wieħed ikun Iżraelit spiritwali, midluk biex jippriedka dwar is-Saltna t’Alla.
Malajr dawk li kienu mikrijin l-ewwel josservaw li d-dixxipli taʼ Ġesù tħallsu, u jarawhom jużaw id-dinier simboliku. Imma huma jridu iktar minn l-ispirtu qaddis u l-privileġġi tas-Saltna mseħbin miegħu. It-tgergir u l-oġġezzjonijiet tagħhom jieħdu l-forma taʼ persekuzzjoni għad-dixxipli taʼ Kristu, “l-aħħar” ħaddiema fil-għalqa tad-dwieli.
Huwa dak it-twettieq tal-ewwel seklu l-uniku twettieq tat-tixbieha taʼ Ġesù? Le, il-kleru tal-Kristjaneżmu f’dan is-seklu 20, minħabba l-pożizzjonijiet u r-responsabbiltajiet tagħhom, kienu “l-ewwel” li ġew mikrijin għax-xogħol fil-għalqa tad-dwieli simbolika t’Alla. Huma qiesu lill-predikaturi ddedikati u assoċjati mal-Watch Tower Bible and Tract Society bħala li huma “tal-aħħar” f’dak li hu inkarigu validu fis-servizz t’Alla. Imma huma, fil-fatt, dawn l-istess uħud, li lilhom il-kleru maqdar, li rċevew id-dinier—l-unur li jaqdu bħala ambaxxaturi midlukin tas-Saltna tas-sema t’Alla. Mattew 19:30–20:16.
▪ X’inhu rrappreżentat mill-għalqa tad-dwieli? Min huma rrappreżentati minn sid il-għalqa tad-dwieli u mill-ħaddiema li ħadmu 12-il siegħa u siegħa waħda?
▪ Il-ġurnata tax-xogħol simbolika meta ntemmet, u l-ħlas meta sar?
▪ X’inhu rrappreżentat mill-ħlas tad-dinier?