KAPITLU 8

Kif Nistaʼ Nagħmel Ħbieb Tajbin?

“Jekk inkun irrabjata jkolli bżonn lil xi ħadd maʼ min nisfoga. Jekk ikolli d-​dwejjaq inkun irrid lil xi ħadd ifarraġni. Jekk inkun ferħana nkun irrid naqsam il-​ferħ tiegħi maʼ xi ħadd. Għalija l-​ħbieb huma bżonn.”—Brittany.

META kont għadek tfal kellek bżonn tfal oħrajn maʼ min tilgħab. Dawn kienu jżommulek kumpanija biex ma tkunx waħdek. Iżda issa għandek bżonn ħbieb veri—ħbieb maʼ min mhux biss tqattaʼ l-​ħin, iżda ħbieb maʼ min tkun tistaʼ wkoll taqsam il-​valuri tiegħek.

Iktar minn hekk, il-​Bibbja tgħid li “ħabib veru jħobb il-​ħin kollu; huwa ħu mwieled għal meta jkun hemm in-​niket.” (Proverbji 17:17) Dan il-​vers x’aktarx jiddeskrivi ħbiberija iktar profonda minn dik li kellek mat-​tfal li kont tilgħab magħhom fi tfulitek!

Fatt: Hekk kif joqrob iż-​żmien li ssir adult, ikollok bżonn ħbieb li:

1. Għandhom kwalitajiet ammirevoli

2. Jgħixu skont prinċipji taʼ min ifaħħarhom

3. Jinfluwenzawk b’mod pożittiv

Mistoqsija: Kif tistaʼ ssib ħbieb bħal dawn? Ejja neżaminaw dawn il-​fatturi, wieħed wieħed.

L-​1 Fattur għall-​Ħbiberija​—Kwalitajiet Ammirevoli

Dak li għandek tkun taf. Mhux kulħadd jistaʼ jkun ħabib veru. Il-​Bibbja saħansitra tgħid li “hemm dawk li lesti li jkissru lil sħabhom.” (Proverbji 18:24) Din tistaʼ tinstemaʼ bħala esaġerazzjoni. Iżda kkunsidra dan: Qatt kellek xi “ħabib” li pprofitta ruħu minnek? Xi ngħidu għal xi “ħabib” li qal xi ħaġa minn wara dahrek jew xerred xi qlajjiet dwarek? Esperjenza bħal din tistaʼ ġġiegħlek titlef il-​fiduċja f’dan il-​ħabib.a Dejjem ftakar li l-​kwalità taʼ ħbieb hi iktar importanti mill-​kwantità taʼ ħbieb li jkollok!

Dak li tistaʼ tagħmel. Agħżel ħbieb li jkollhom kwalitajiet taʼ min jimitahom.

“Kulħadd għandu ħarsa pożittiva lejn il-​ħabiba tiegħi Fiona. Nixtieq li n-​nies jgħidu affarijiet simili dwari wkoll. Nixtieq li jkolli l-​istess reputazzjoni li għandha hi. Għalija hi persuna ammirevoli.”—Yvette, 17-​il sena.

Ipprova dan l-​eżerċizzju.

1. Aqra Galatin 5:22, 23.

2. Staqsi lilek innifsek: ‘Il-​ħbieb tiegħi għandhom kwalitajiet li huma inklużi fil-​“frott taʼ l-​ispirtu”?’

3. Hawn taħt ikteb l-​ismijiet tal-​iktar ħbieb intimi tiegħek. Maġenb kull isem, ikteb l-​iktar kwalità li tiddeskrivi sew lill-​persuna.

Isem

․․․․․

Kwalità

․․․․․

Ħjiel: Jekk jiġuk f’moħħok kwalitajiet negattivi biss, forsi jkun wasal iż-​żmien li tfittex ħbieb aħjar!

It-​2 Fattur għall-​Ħbiberija​—Prinċipji taʼ Min Ifaħħarhom

Dak li għandek tkun taf. Iktar ma tkun iddisprat biex ikollok il-​ħbieb, iktar hemm ċans li taċċetta ħbieb li ma jkunux tajbin. Il-​Bibbja tgħid: “Min qed jagħmilha maʼ l-​istupidi se jaħbatlu ħażin.” (Proverbji 13:20) Il-​kelma “stupidi” ma tirreferix għal nies li jġibu marki baxxi fl-​iskola jew saħansitra nies li ma jkunux daqshekk intelliġenti. Minflok, din tiddeskrivi lil dawk li ma jaċċettawx raġunar għaqli u li jaqbdu triq ħażina moralment. Ħbieb bħal dawn m’għandekx xi tridhom!

Dak li tistaʼ tagħmel. Minflok ma tagħmel ħbieb maʼ min jiġi, kun selettiv. (Salm 26:4) Dan ma jfissirx li għandek tkun preġudikat. F’dan il-​kuntest, li wieħed ikun selettiv ifisser li jkun għaqli biżżejjed biex jara “d-​distinzjoni bejn bniedem sewwa u wieħed mill-​agħar, bejn wieħed li jaqdi lil Alla u wieħed li ma qdiehx.”—Malakija 3:18.

“Inħossni grat li l-​ġenituri tiegħi għenuni nsib ħbieb tampari li sejrin tajjeb spiritwalment.”—Christopher, 13-​il sena.

Wieġeb dawn il-​mistoqsijiet:

Meta nkun mal-​ħbieb tiegħi, inħossni jien ansjuż minħabba li huma għandhom mnejn jagħmluli pressjoni biex nagħmel xi ħaġa li naf li hi ħażina?

□ Iva

□ Le

Noqgħod lura jien milli llaqqa’ lil ħbiebi mal-​ġenituri tiegħi għax nibżaʼ li l-​ġenituri tiegħi ma japprovawhomx?

□ Iva

□ Le

Ħjiel: Jekk wiġibt iva għall-​mistoqsijiet t’hawn fuq, fittex ħbieb li jkollhom livelli iktar għoljin—dawk li jgħixu ħajja Kristjana eżemplari.

It-​3 Fattur għall-​Ħbiberija​—Jinfluwenzawk b’Mod Pożittiv

Dak li għandek tkun taf. Il-​Bibbja tgħid: “Ħbieb ħżiena jħassru karattru tajjeb.” (1 Korintin 15:33, Today’s English Version) Żagħżugħa jisimha Lauren tgħid: “Sħabi tal-​iskola jaċċettawni dment li nagħmel eżatt dak li jgħiduli biex nagħmel. Ħassejtni waħdi, u għalhekk iddeċidejt li naġixxi bħalhom ħalli jaċċettawni.” Lauren irrealizzat li meta tibdel il-​prinċipji tiegħek biex tkun bħall-​oħrajn, tkun qisek bħal biċċa taċ-​ċess li tiġi mmexxija ’l hawn u ’l hinn kif jaqbel lilhom. Int jixraqlek aħjar minn hekk!

Dak li tistaʼ tagħmel. Aqtaʼ l-​ħbiberija maʼ dawk li jinsistu li għandek tinbidel biex tkun bħalhom. Jekk tieħu dan il-​pass, għandu mnejn ikollok inqas ħbieb; iżda se tħossok aħjar dwarek innifsek u se jkollok iktar opportunità li tagħmel ħbieb tajbin—ħbieb li se jinfluwenzawk b’mod pożittiv.—Rumani 12:2.

“Clint, il-​ħabib tal-​qalb tiegħi, hu ġuvni bil-​għaqal u jaf jagħder, u għalhekk kien taʼ inkuraġġiment kbir għalija.”—Jason, 21 sena.

Staqsi lilek innifsek dawn il-​mistoqsijiet:

Nibdel jien il-​mod kif nilbes, nitkellem, jew naġixxi, sempliċement biex nintgħoġob mill-​ħbieb tiegħi?

□ Iva

□ Le

Immur jien mal-​ħbieb tiegħi f’postijiet dubjużi moralment sempliċement biex inkun bħalhom, iżda fejn kieku normalment ma mmurx?

□ Iva

□ Le

Ħjiel: Jekk wiġibt iva għall-​mistoqsijiet fil-​paġna taʼ qabel, itlob parir mingħand il-​ġenituri tiegħek jew mingħand xi adult matur ieħor. Jekk int wieħed mix-​Xhieda taʼ Ġeħova tistaʼ wkoll tavviċina lil xi anzjan Kristjan u tgħidlu li int tixtieq l-​għajnuna biex tagħżel ħbieb li jkunu jistgħu jinfluwenzawk b’mod aħjar.

AQRA IKTAR DWAR DAN IS-​SUĠĠETT F’KAPITLU 9 TAʼ VOLUME 2

[Nota ta’ taħt]

SKRITTURA PRINĊIPALI

“Hemm ħabib li jintrabat miegħek iktar minn ħuk.”​—Proverbji 18:24.

SUĠĠERIMENT

Għix fi qbil maʼ prinċipji retti, u dawk li jkunu qed jistinkaw biex jagħmlu l-​istess, x’aktarx li iktar jagħmlu ħbieb miegħek. Dawn ikunu l-​aqwa tip taʼ ħbieb!

KONT TAF . . . ?

Alla mhuwiex parzjali, iżda hu selettiv ferm meta jiġi biex jagħżel lil min se jaċċetta bħala ‘mistieden fit-​tinda tiegħu.’—Salm 15:1-​5.

L-​AZZJONI LI SE NIEĦU

Sabiex insib ħbieb tajbin, jien se ․․․․․

Xi wħud li huma ikbar minni u li nixtieq insir nafhom aħjar huma ․․․․․

Dak li nixtieq nistaqsi lill-​ġenitur(i) tiegħi dwar dan is-​suġġett hu ․․․․․

INT X’TAĦSEB?

● Liema kwalitajiet tqis li huma l-​iktar taʼ valur f’ħabib jew ħabiba, u għala?

● Liema bidliet għandek bżonn tagħmel sabiex tkun ħabib jew ħabiba aħjar?

[Kumment f’paġna 60]

“Meta l-​ġenituri tiegħi ħeġġewni biex noqgħod ’il bogħod minn grupp partikulari taʼ ħbieb, bejni u bejn ruħi għedt li dawn kienu l-​uniċi ħbieb maʼ min ridt nissieħeb. Iżda l-​parir tal-​ġenituri tiegħi kien tajjeb, u meta waqaft naħseb biss dwar dak li nippreferi jien, irrealizzajt li kien hemm bosta ħbieb aħjar minn fejn nagħżel.”​—Cole

[Kaxxa f’paġna 61]

Ipprova Dawn is-​Suġġerimenti

Tkellem mal-​ġenituri tiegħek dwar il-​ħbiberiji. Staqsihom x’tip taʼ ħbieb kellhom huma meta kienu tamparek. Għandhom xi dispjaċiri dwar l-​għażla tagħhom tal-​ħbieb? Jekk iva, għala? Staqsihom kif int tistaʼ tevita xi ftit mill-​problemi li ffaċċjaw huma.

Laqqaʼ lil ħbiebek mal-​ġenituri tiegħek. Jekk qed iżżomm lura milli tagħmel dan, staqsi lilek innifsek: ‘Għala?’ Hemm xi ħaġa dwar ħbiebek li taf li l-​ġenituri tiegħek mhumiex se japprovaw? Jekk iva, jistaʼ jkun li għandek bżonn tkun iktar selettiv meta tiġi biex tagħżel il-​ħbieb tiegħek.

Kun semmiegħ tajjeb. Uri interess fil-​benesseri u t-​tħassib tal-​ħbieb tiegħek.—Filippin 2:4.

Aħfer. Tistenniex perfezzjoni. “Ilkoll nitfixklu ħafna drabi.”—Ġakbu 3:2.

Agħti lil ħbiebek l-​ispazju tagħhom. M’hemmx għalfejn toqgħod ikkakkmat magħhom. Il-​ħbieb veri se jkunu hemm għalik meta jkollok bżonnhom.—Ekkleżjasti 4:9, 10.

[Stampa f’paġna 63]

Meta tibdel il-​prinċipji tiegħek biex tkun bħall-​oħrajn, tkun qisek bħal biċċa taċ-​ċess li tiġi mmexxija ’l hawn u ’l hinn kif jaqbel lilhom

KAPITLU 9

Kif Nistaʼ Nirreżisti t-​Tentazzjoni?

Karen ma tkunx ilha iktar minn għaxar minuti l-​party meta tara żewġ subien ġejjin b’ħafna basktijiet kbar tal-​karti f’idejhom. Hi taf x’fihom dawn il-​basktijiet għax ftit qabel kienet semgħet lil dawn is-​subien jgħidu li f’dan il-​party se jkun hemm ħafna xorb alkoħoliku.

F’daqqa waħda, Karen tismaʼ leħen familjari minn warajha. “X’int tagħmel bilwieqfa hemm, ja stramba?” Karen iddur u tara lill-​ħabiba tagħha Jessica b’żewġ fliexken birra f’idejha. Jessica tpoġġilha flixkun eżatt quddiem wiċċha u tgħidilha: “Issa tiġix tgħidli li għadek żgħira wisq biex tieħu ftit pjaċir!”

Karen tixtieq tirrifjuta. Imma l-​pressjoni biex taċċetta hija iktar qawwija milli stenniet. Jessica hija l-​ħabiba tagħha, u Karen ma tixtieqx li tiġi meqjusa bħala . . . “stramba,” kif qaltilha Jessica. Barra minn hekk, Jessica tifla sew u anki hi qed tixrob. Mela x’fiha ħażin b’daqshekk? ‘Mhux daqsxejn taʼ birra?’ tgħid Karen bejnha u bejn ruħha. ‘Mhijiex l-​istess bħad-​drogi jew bħas-​sess.’

MATUL iż-​żgħożija, it-​tentazzjonijiet jiġu f’diversi modi. Spiss, dawn ikunu jinvolvu lil dawk tas-​sess oppost. “It-​tfajliet fl-​iskola huma persistenti,” jgħid Ramon, li għandu 17-​il sena. “Jieħdu pjaċir imissuk u jaraw sa fejn tħallihom jaslu. Huma ma jaċċettawx il-​fatt li int tirrifjutahom!” Deanna, li wkoll għandha 17-​il sena, kellha esperjenza simili. “Darba minnhom, resaq lejja ġuvni u poġġa driegħu madwari,” tgħid hi. “Tajtu daqqa taʼ ponn fi driegħu u għedtlu: ‘X’int tagħmel? Lanqas biss nafek!’”

Int ukoll għandek mnejn tiffaċċja tentazzjonijiet, u forsi tħoss li l-​pressjonijiet se jibqgħu ġejjin. Tentazzjoni waħda wara l-​oħra tistaʼ titqabbel maʼ taħbita kontinwa fuq il-​bieb tiegħek, avolja jkollok tabella mdendla mal-​bieb biex ħadd ma jħabbatlek. Tismagħha int din it-​taħbita iktar spiss milli tixtieq? Pereżempju, hemm xi affarijiet f’din il-​lista li jħajruk?

□ It-​tipjip

□ Il-​pornografija

□ L-​alkoħol

□ Is-​sess

□ Id-​drogi

□ Xi ħaġa oħra ․․․․․

Jekk għamilt ✔ maġenb xi waħda jew iktar minn dawn t’hawn fuq, taqbadx u tikkonkludi li m’intix tajjeb biex tkun Kristjan. Int tistaʼ titgħallem tikkontrolla x-​xewqat ħżiena u tirreżisti t-​tentazzjonijiet. Kif? Ikun t’għajnuna li tagħraf x’jikkaġuna t-​tentazzjoni. Ikkunsidra tliet fatturi.

1. L-​imperfezzjoni. L-​inklinazzjoni biex nagħmlu dak li hu ħażin hija komuni fost il-​bnedmin imperfetti kollha. Saħansitra l-​appostlu Pawlu, li kien Kristjan matur, b’onestà ammetta: “Meta nixtieq nagħmel dak li hu sewwa, dak li hu ħażin ikolli fija.” (Rumani 7:21) B’mod ċar, saħansitra anki xi ħadd li jkun tassew rett kultant ikollu jiffaċċja x-​“xewqa tal-​laħam u x-​xewqa taʼ l-​għajnejn.” (1 Ġwanni 2:16) Imma jekk toqgħod il-​ħin kollu thewden dwar it-​tentazzjonijiet se tiggrava s-​sitwazzjoni, għax il-​Bibbja tgħid: “Meta x-​xewqa ssir fertili, tiled id-​dnub.”—Ġakbu 1:15.

2. L-​influwenzi mid-​dinja. It-​tentazzjonijiet issibhom kullimkien. “In-​nies il-​ħin kollu jitkellmu dwar is-​sess, kemm fl-​iskola u kemm fuq ix-​xogħol,” tgħid Trudy. “Fuq it-​televixin u fil-​films dejjem ipinġu s-​sess bħala sabiħ u eċċitanti. Rari tara l-​konsegwenzi koroh tiegħu!” Mill-​esperjenza, Trudy taf kemm jistgħu jkunu qawwijin influwenzi bħal dawn. “Taʼ 16-​il sena ħsibt li sirt inħobb lil xi ħadd,” tirrakkonta hi. “Ommi poġġiet bilqiegħda miegħi u qaltli li jekk kont se nibqaʼ sejra hekk se nispiċċa noħroġ tqila. Ixxokkjajt ruħi meta ommi qaltli hekk! Xahrejn wara ħriġt tqila.”

3. Ix-​“xewqat li jistaʼ jkollok fiż-​żgħożija.” (2 Timotju 2:22) Din il-​frażi tistaʼ tinkludi kwalunkwe xewqa li ż-​żgħażagħ spiss ikollhom, bħax-​xenqa qawwija li jiġu aċċettati minn oħrajn jew li jiġu meqjusin bħala adulti. Fihom infushom, dawn ix-​xewqat mhumiex ħżiena, imma jekk ma jiġux kontrollati jistgħu jagħmlu t-​tentazzjonijiet iktar diffiċli biex wieħed jirreżistihom. Pereżempju, ix-​xewqa kbira li tiġi meqjus bħala adult tistaʼ maż-​żmien iġġiegħlek tiċħad il-​valuri tajbin li ġejt mgħallem fid-​dar. Hekk ġralu Steve meta kellu 17-​il sena. Hu jgħid: “Jien irribellajt kontra l-​ġenituri tiegħi u għamilt kulma għallmuni huma stess biex ma nagħmilx—dan kollu għamiltu ftit wara li tgħammidt.”

Kif Tistaʼ Tirreżisti

M’għandniex xi ngħidu, l-​influwenzi li ssemmew qabel huma qawwijin. Minkejja dan, int tistaʼ tirreżisti t-​tentazzjoni. Kif?

● L-​ewwel, identifika l-​iktar tentazzjoni diffiċli għalik biex tirreżistiha. (Għandek mnejn diġà għamilt dan f’paġna 65.)

● Imbagħad, staqsi lilek innifsek: ‘Meta x’aktarx li tiġini din it-​tentazzjoni?’ Agħmel ✔ maġenb waħda minn dawn li ġejjin:

□ Meta nkun l-​iskola

□ Meta nkun waħdi

□ Meta nkun ix-​xogħol

□ Sitwazzjoni oħra ․․․․․

Il-​fatt li tkun taf meta huwa l-​iktar probabbli li tiġik it-​tentazzjoni jistaʼ saħansitra jgħinek tevitaha għalkollox. Pereżempju, ikkunsidra s-​sitwazzjoni li ssemmiet fil-​bidu taʼ dan il-​kapitlu. Karen liema twissija kellha li kien se jkun hemm il-​periklu fil-​party li attendiet?

․․․․․

Kif setgħet tevitaha għalkollox it-​tentazzjoni?

․․․․․

● Issa li identifikajt it-​tentazzjoni u sirt taf meta x’aktarx li tiffaċċjaha, tinsab lest biex tieħu azzjoni. L-​ewwel prijorità hi li tara kif se tnaqqas jew telimina kwalunkwe ħaġa li twasslek għat-​tentazzjoni. Hawn taħt ikteb x’tistaʼ tagħmel.

․․․․․

(Eżempji: Jekk wara l-​iskola spiss tiltaqaʼ maʼ sħabek tal-​iskola u dawn jipprovaw iħajruk biex tpejjep magħhom, forsi tistaʼ tgħaddi minn triq oħra biex tevitahom. Jekk, bla ma trid, spiss tirċievi materjal pornografiku permezz tal-​Internet, forsi tistaʼ tikkunsidra li tinstalla xi programmi li jimblokkaw is-​sors tal-​pornografija u l-​websajts kollha taʼ din ix-​xorta. Ukoll, tistaʼ tkun iktar speċifiku meta tittajpja l-​kliem li tkun trid tfittex fuq l-​Internet.)

M’għandniex xi ngħidu, ma tistax tevita t-​tentazzjonijiet kollha. Illum jew għada, int x’aktarx li se tiffaċċja ġibda partikolarment qawwija—forsi meta l-​inqas tkun qed tistennieha. X’tistaʼ tagħmel dwar dan?

Kun Preparat

Meta Ġesù “ġie ttantat minn Satana,” hu mill-​ewwel irrifjuta. (Marku 1:13) Għala? Għaliex hu kien diġà fehem il-​kwistjonijiet li qamu. Hu kien diġà determinat li dejjem jobdi lil Missieru. (Ġwanni 8:28, 29) Ġesù kien tassew sinċier meta qal: “Jien ma nżiltx mis-​sema biex nagħmel ir-​rieda tiegħi imma r-​rieda taʼ dak li bagħatni.”—Ġwanni 6:38.

Fil-​paġna li jmiss ikteb żewġ raġunijiet għala għandek tirreżisti t-​tentazzjoni li spiss tiffaċċja, u żewġ azzjonijiet li tistaʼ tieħu sabiex tiġi megħjun tirreżisti din it-​tentazzjoni.

Għala għandek tirreżisti:

1 ․․․․․

2 ․․․․․

Azzjonijiet li se jgħinuk tirreżisti:

1 ․․․․․

2 ․․․․․

Ftakar li meta ċċedi għat-​tentazzjonijiet, int issir ilsir tax-​xewqat tiegħek. (Titu 3:3) Għala għandek tħalli lilek innifsek tkun kontrollat mix-​xewqat qawwijin tiegħek? Kun matur biżżejjed biex tikkontrolla x-​xewqat tiegħek int minflok ma tħalli lilhom jikkontrollaw lilek. (Kolossin 3:5) Ukoll, għandek titlob biex tkompli tagħmel hekk.—Mattew 6:13.a

AQRA IKTAR DWAR DAN IS-​SUĠĠETT F’KAPITLU 15 TAʼ VOLUME 2

[Nota ta’ taħt]

SKRITTURA PRINĊIPALI

“Alla hu leali, u ma jħallikomx tiġu ttantati iktar milli tifilħu, imma mat-​tentazzjoni jiftħilkom ukoll it-​triq sabiex tkunu tistgħu tissaportuha.” —1 Korintin 10:13.

SUĠĠERIMENT

Sabiex tippjana t-​tweġibiet li tistaʼ tagħti meta xi ħadd jipprova jħajrek biex tagħmel xi ħaġa ħażina, uża l-​“Peer-​Pressure Planner,” li jinsab f’paġni 132 u 133 tal-​ktieb Questions Young People Ask—Answers That Work, Volume 2.

KONT TAF . . . ?

Alla bassar li Ġesù kellu jagħti prova li hu leali, iżda dan ma jfissirx li Ġesù kien bħal xi robot, programmat biex jobdi. Minflok, Ġesù kellu l-​libertà tal-​għażla. Il-​lealtà tiegħu kienet għażla, u mhux xi ħaġa li ġiet magħżula għalih minn qabel. Din hi raġuni waħda għala hu talab bil-​ħrara meta kien għaddej minn prova.—Ebrej 5:7.

L-​AZZJONI LI SE NIEĦU

Sabiex inkun iktar determinat(a) li nirreżisti t-​tentazzjonijiet, jien se ․․․․․

Xi nies, postijiet, u ċirkustanzi li għandi bżonn nevita jinkludu ․․․․․

Dak li nixtieq nistaqsi lill-​ġenitur(i) tiegħi dwar dan is-​suġġett hu ․․․․․

INT X’TAĦSEB?

● Jistgħu l-​ħlejjaq perfetti jiġu ttantati? —Ġenesi 6:1-​3; Ġwanni 8:44.

● Meta tirreżisti t-​tentazzjonijiet, x’effett ikollha l-​lealtà tiegħek fuq ħaddieħor? —Proverbji 27:11; 1 Timotju 4:12.

[Kumment f’paġna 68]

“Xi ħaġa t’għajnuna għalija hi li naf li għandi l-​iktar Esseri setgħan fl-​univers fuq in-​naħa tiegħi u li nistaʼ nitolbu l-​għajnuna f’kull ħin!”​—Christopher

[Kaxxa/​Stampa f’paġna 67]

Ipprova Dan!

Aqbad boxxla u agħmilha f’pożizzjoni li l-​labra tipponta lejn it-​Tramuntana. Imbagħad, poġġi kalamita maġenb il-​boxxla. X’jiġri? Il-​labra ma tibqax tagħti d-​direzzjoni eżatta. Minflok, din iddur lejn il-​kalamita.

Il-​kuxjenza tiegħek hi bħal din il-​boxxla. Jekk din tiġi mħarrġa kif suppost, se tipponta lejn id-​direzzjoni t-​tajba u se tgħinek tieħu deċiżjonijiet għaqlin. Imma s-​sħubija li tkun taʼ ħsara, bħal kalamita, tiġbdek b’tali mod li tfixkillek il-​ġudizzju morali. X’inhi t-​tagħlima? Ipprova evita nies u sitwazzjonijiet li jistgħu jfixklulek is-​sens morali!—Proverbji 13:20.

[Stampa f’paġna 69]

Meta ċċedi għat-​tentazzjonijiet, int issir ilsir tax-​xewqat tiegħek