Ħafna nies waqfu jattendu servizzi reliġjużi għax ma sabu ebda gwida jew faraġ spiritwali. Allura, għala għandek tattendi l-​laqgħat Kristjani li huma organizzati mix-​Xhieda taʼ Ġeħova? X’se ssib hemmhekk?

Il-​ferħ li tkun fost nies li jħobbu u li jimpurtahom. Fl-​ewwel seklu, il-​Kristjani kienu organizzati f’kongregazzjonijiet, u kienu jagħmlu laqgħat biex iqimu ’l Alla, jistudjaw l-​Iskrittura, u jinkuraġġixxu wieħed lil ieħor. (Ebrej 10:24, 25) Minħabba li kienu jiltaqgħu f’ambjent mimli mħabba, huma kienu jħossu li qegħdin fost ħbieb taʼ veru—ħuthom spiritwali. (2 Tessalonikin 1:3; 3 Ġwanni 14) Aħna nsegwu l-​eżempju tal-​Kristjani tal-​ewwel seklu u nesperjenzaw ferħ simili.

Il-​benefiċċju li titgħallem kif tapplika prinċipji Bibliċi. Illum, bħalma kien minnu fi żminijiet Bibliċi, l-​irġiel, in-​nisa, u t-​tfal ilkoll jiltaqgħu flimkien. Għalliema kwalifikati jużaw il-​Bibbja biex jgħinuna nagħrfu kif għandna napplikaw il-​prinċipji Bibliċi fil-​ħajja taʼ kuljum. (Dewteronomju 31:12; Neħemija 8:8) Ilkoll nistgħu nipparteċipaw f’diskussjonijiet mal-​udjenza u fil-​kant, u b’hekk inkunu nistgħu nesprimu t-​tama Kristjana tagħna.—Ebrej 10:23.

Il-​barka li l-​fidi tiegħek f’Alla tissaħħaħ. L-​appostlu Pawlu qal lil waħda mill-​kongregazzjonijiet taʼ żmienu: “Għandi xewqa kbira li narakom, . . . biex ninkuraġġixxu lil xulxin bil-​fidi tagħna, intom lili u jien lilkom.” (Rumani 1:11, 12) Fil-​laqgħat, il-​kuntatt regulari maʼ sħabna fit-​twemmin isaħħilna l-​fidi u d-​determinazzjoni biex ngħixu f’armonija mal-​prinċipji Bibliċi.

Għala ma taċċettax din l-​istedina biex tattendi l-​laqgħa li jmiss fil-​kongregazzjoni tagħna u tesperjenza dawn l-​affarijiet għalik innifsek? Se tingħata merħba mill-​qalb. Il-​laqgħat huma kollha bla ħlas—ma jsir ebda ġbir.

• Il-​laqgħat tal-​kongregazzjoni tagħna, liema eżempju jsegwu?

• Kif nistgħu nibbenefikaw billi nattendu l-​laqgħat Kristjani?

Anki jekk ikollna nimxu minn ġo ġungla b’ħafna siġar ġo xulxin jew noħorġu f’temp kiefer, aħna b’mod regulari nattendu l-​laqgħat Kristjani tagħna. Minkejja l-​isfidi tal-​ħajja u l-​għeja li taqaʼ wara ġurnata xogħol, ix-​Xhieda taʼ Ġeħova għala jagħmlu sforz bħal dan biex jassoċjaw maʼ sħabhom fit-​twemmin?

Huwa għall-​ġid tagħna. ‘Agħtu kas xulxin,’ kiteb Pawlu, hu u jitkellem dwar dawk li nassoċjaw magħhom fil-​kongregazzjoni. (Ebrej 10:24) Din l-​espressjoni tfisser li għandna nsiru nafu lil xulxin. Għalhekk, il-​kliem tal-​appostlu jinkuraġġina biex nuru interess f’ħaddieħor. Billi nsiru nafu familji Kristjani oħrajn, se nindunaw li wħud minnhom irnexxielhom jegħlbu sfidi simili għal tagħna u dawn il-​familji jistgħu jgħinuna nirnexxu wkoll.

Niżviluppaw ħbiberiji b’saħħithom. Fil-​laqgħat tagħna ma niltaqgħux sempliċement maʼ nies li nafuhom fuq fuq, imma mal-​ħbieb tal-​qalb tagħna. F’okkażjonijiet oħrajn, aħna nqattgħu ħin flimkien f’rikreazzjoni li tibni. Kif nibbenefikaw minn assoċjazzjoni bħal din? Nitgħallmu napprezzaw aktar wieħed lil ieħor, u dan isaħħaħ l-​imħabba tagħna. Imbagħad, meta sħabna jkunu qed jiffaċċjaw problemi, aħna nkunu lesti ngħinuhom għax diġà nkunu żviluppajna ħbiberiji b’saħħithom. (Proverbji 17:17) Billi nassoċjaw maʼ kull membru tal-​kongregazzjoni, nuru li ‘nieħdu ħsieb xulxin bl-​istess mod.’—1 Korintin 12:25, 26.

Ninkuraġġuk tagħżel ħbieb li qed jagħmlu r-​rieda t’Alla. Se ssib ħbieb bħal dawn fost ix-​Xhieda taʼ Ġeħova. Jekk jogħġbok tħalli xejn iwaqqfek milli tassoċja magħna.

• Għala huwa għall-​ġid tagħna li nassoċjaw flimkien fil-​laqgħat?

• Meta tixtieq iżżur il-​kongregazzjoni tagħna biex issir tafna aħjar?

Fil-​biċċa l-​kbira, fil-​laqgħat Kristjani tal-​bidu kien ikun hemm kant, talb, u l-​qari mill-​Iskrittura u diskussjoni fuqha; ma kien ikun hemm l-​ebda ritwal. (1 Korintin 14:26) Fil-​laqgħat tagħna jsiru affarijiet simili ħafna.

L-​istruzzjoni hi bbażata fuq il-​Bibbja u hi prattika. Fi tmiem il-​ġimgħa, kull kongregazzjoni tiltaqaʼ biex tismaʼ taħdita mill-​Bibbja taʼ 30 minuta rigward kif l-​Iskrittura tapplika għal ħajjitna u għal żminijietna. Ilkoll niġu inkuraġġiti biex insegwu fil-​Bibbja tagħna. Wara t-​taħdita jkun hemm Studju tat-​“Torri tal-​Għassa” li jdum siegħa, li fih il-​membri tal-​kongregazzjoni huma mistiedna biex jipparteċipaw f’diskussjoni t’artiklu mill-​edizzjoni għall-​istudju tat-​Torri tal-​Għassa. Din id-​diskussjoni tgħinna napplikaw il-​gwida tal-​Bibbja f’ħajjitna. L-​istess materjal huwa studjat f’kull waħda mill-​iktar minn 110,000 kongregazzjoni madwar id-​dinja.

Niġu megħjunin intejbu l-​abbiltajiet tagħna tat-​tagħlim. F’lejla matul il-​ġimgħa nerġgħu niltaqgħu għal programm li jinqasam fi tliet partijiet. Dan jismu Il-​Ħajja u l-​Ministeru Kristjan Tagħna u hu bbażat fuq il-​materjal li jkun provdut kull xahar fil-​Fuljett għall-​Istudju tal-​Laqgħa tal-​Ħajja u l-​Ministeru Tagħna. L-​ewwel parti taʼ din il-​laqgħa, Teżori mill-​Kelma t’Alla, tgħinna biex insiru familjari maʼ silta tal-​Bibbja li l-​kongregazzjoni tkun qrat minn qabel. Imbagħad hemm Irsisti fil-​Ministeru. Din tinkludi turijiet dwar kif niddiskutu l-​Bibbja m’oħrajn. Xi ħadd inkarigat biex jagħti l-​pariri jagħmel l-​osservazzjonijiet tiegħu sabiex jgħinna ntejbu l-​abbiltajiet tal-​qari u t-​taħdit. (1 Timotju 4:13) L-​aħħar parti hi Għix Bħala Kristjan. Din tikkunsidra kif nistgħu napplikaw il-​prinċipji tal-​Bibbja fil-​ħajja taʼ kuljum. Tinkludi wkoll diskussjoni li tgħinna nifhmu iktar il-​Bibbja.

Meta tattendi l-​laqgħat tagħna, bla dubju se tkun impressjonat bil-​kwalità tal-​edukazzjoni tal-​Bibbja li tkun qed tirċievi.—Isaija 54:13.

• X’tistaʼ tismaʼ fil-​laqgħat tax-​Xhieda taʼ Ġeħova?

• Liema mil-​laqgħat li jmiss taʼ kull ġimgħa tixtieq tattendi?

Mill-​istampi taʼ dan il-​browxer, innotajt kemm ix-​Xhieda taʼ Ġeħova jilbsu pulit meta jattendu l-​laqgħat tal-​kongregazzjoni tagħhom? Għala nagħtu daqstant attenzjoni għall-​ħwejjeġ u d-​dehra tagħna?

Biex nuru rispett lejn Alla tagħna. Huwa minnu li Alla jara lil hinn mill-​apparenza tagħna. (1 Samwel 16:7) Però, meta niltaqgħu biex inqimuh hija x-​xewqa mill-​qalb tagħna li nuru rispett kemm lejh u kemm lejn l-​aduraturi sħabna. Kieku kellna nidhru quddiem imħallef fil-​qorti, konna nagħmlu ċert li l-​apparenza tagħna turi rispett għall-​pożizzjoni tiegħu. Hekk ukoll, il-​mod kif nidhru fil-​laqgħat juri l-​istima tagħna għall-​“Imħallef taʼ l-​art kollha,” Alla Ġeħova, u għall-​post fejn inqimuh.—Ġenesi 18:25.

Biex nuru b’liema valuri ngħixu. Il-​Bibbja tinkuraġġixxi lill-​Kristjani biex jilbsu “bil-​modestja u b’moħħ f’loku.” (1 Timotju 2:9, 10) Li nilbsu “bil-​modestja” jfisser li nevitaw ħwejjeġ li jistgħu jiġbdu l-​attenzjoni lejna minħabba li jkunu jagħtu fil-​għajn, provokattivi, jew skullati u mqaċċtin. Barra minn hekk, li jkollna “moħħ f’loku” jgħinna nagħżlu ħwejjeġ sbieħ li mhumiex mitluqin jew estremi. Dawn il-​prinċipji xorta jagħtu wisaʼ għal varjetà kbira t’għażla personali. Mingħajr ma nitkellmu, l-​apparenza attraenti u adattata tagħna tistaʼ ‘ssebbaħ it-​tagħlim tas-​Salvatur tagħna’ u ‘tigglorifika lil Alla.’ (Titu 2:10; 1 Pietru 2:12) Billi nilbsu pulit għal-​laqgħat, inkunu qed ninfluwenzaw kif ħaddieħor iqis il-​qima taʼ Ġeħova.

Tħallix lil ħwejġek iżommuk milli tattendi s-​Sala tas-​Saltna. Ħwejjiġna mhux bilfors iridu jkunu għaljin jew tad-​ditta biex ikunu adattati, nodfa, jew preżentabbli.

• Kemm hu importanti l-​mod kif nilbsu meta nqimu ’l Alla?

• Liema prinċipji jiggwidaw l-​għażliet tal-​ilbies u d-​dehra tagħna?

Jekk qed tistudja l-​Bibbja maʼ Xhud taʼ Ġeħova, probabbilment tipprova tgħaddi l-​materjal qabel kull studju. Sabiex tibbenefika iktar, ikun aħjar li tagħmel l-​istess qabel ma tattendi l-​laqgħat tal-​kongregazzjoni. Niksbu l-​aħjar riżultati meta jkollna rutina tajba.

Iddeċiedi meta u fejn se tistudja. Meta tistaʼ tikkonċentra l-​aħjar? Forsi filgħodu kmieni qabel ma tibda ġurnata xogħol jew forsi aktar tard filgħaxija wara li t-​tfal ikunu marru jorqdu? Anki jekk ma tistax tistudja għal ħinijiet twal, iddeċiedi kemm tistaʼ twarrab ħin għall-​istudju u pprova tħalli xejn itellfek. Fittex post kwiet, u neħħi kull ħaġa li tistaʼ ttellfek billi titfi r-​radju, it-​televixin, u l-​mowbajl. It-​talb qabel ma tibda l-​istudju se jgħinek tistrieħ mill-​ansjetajiet li jkollok fil-​ġurnata. B’hekk, tkun tistaʼ tikkonċentra fuq il-​Kelma t’Alla.—Filippin 4:6, 7.

Immarka l-​materjal u pprepara biex tipparteċipa. Ibda billi tieħu idea ġenerali tas-​suġġett. Aħseb dwar it-​titlu tal-​artiklu jew tal-​kapitlu, ikkunsidra kif kull sottotitolu jorbot maʼ din it-​tema, u eżamina l-​istampi u l-​mistoqsijiet bħala reviżjoni li jenfasizzaw il-​punti prinċipali. Imbagħad, aqra kull paragrafu, u fittex it-​tweġiba għall-​mistoqsija stampata. Fittex u aqra l-​iskritturi mniżżlin, u aħseb kif isaħħu l-​materjal. (Atti 17:11) Meta tkun tistaʼ tidentifika t-​tweġiba, immarka xi kliem jew frażijiet importanti mill-​paragrafu li se jgħinuk tiftakar it-​tweġiba matul il-​laqgħa. Imbagħad, fil-​laqgħa, jekk trid tistaʼ tgħolli idek u tagħmel kumment qasir fi kliemek.

Billi teżamina s-​suġġetti differenti li huma diskussi kull ġimgħa fil-​laqgħat, tkun qed iżżid ħsibijiet ġodda mat-​“teżor maħżun” tiegħek tal-​għarfien mill-​Bibbja.—Mattew 13:51, 52.

• Liema rutina tistaʼ tagħmel biex tipprepara għal-​laqgħat?

• Kif tistaʼ tħejji lilek innifsek sabiex tagħmel kumment fil-​laqgħa?

Minn żmien il-​qedem, Ġeħova ried li kull familja tqattaʼ ħin flimkien biex jibnu relazzjoni b’saħħitha miegħu u biex isaħħu lil xulxin. (Dewteronomju 6:6, 7) Huwa għalhekk li x-​Xhieda taʼ Ġeħova kull ġimgħa jwarrbu xi ħin biex il-​familja tqim flimkien—jiddiskutu f’atmosfera rilassanti l-​affarijiet spiritwali li jkunu adattati għall-​bżonnijiet tagħhom. Anki jekk tgħix waħdek, ħin bħal dan jistaʼ jkun opportunità imprezzabbli biex tqattaʼ xi ħin m’Alla, forsi billi tikkunsidra proġett taʼ studju tal-​Bibbja li tkun għażilt int stess.

Ħin biex tersaq eqreb lejn Ġeħova. “Ersqu qrib lejn Alla, u hu jersaq qrib lejkom.” (Ġakbu 4:8) Insiru nafu lil Ġeħova aħjar meta nitgħallmu dettalji dwar il-​personalità u l-​azzjonijiet tiegħu permezz tal-​Kelma tiegħu, il-​Bibbja. Mod faċli kif tistaʼ tibda l-​qima tal-​familja tiegħek huwa billi flimkien tqattgħu xi ħin taqraw il-​Bibbja b’leħen għoli, forsi billi ssegwu l-​iskeda taʼ kull ġimgħa tal-​Laqgħa tal-​Ħajja u l-​Ministeru Tagħna. Kull membru tal-​familja jistaʼ jaqra silta, imbagħad ilkoll tistgħu tiddiskutu x’tgħallimtu mill-​Iskrittura.

Ħin biex tersaq eqreb lejn il-​membri tal-​familja. Irġiel u nisa miżżewġin, kif ukoll ġenituri u wliedhom, isaħħu r-​relazzjoni tagħhom meta jistudjaw il-​Bibbja bħala familja. Għandu jkun ħin pjaċevoli u taʼ paċi u xi ħaġa li kull membru fil-​familja jkun qed iħares ’il quddiem għaliha kull ġimgħa. Skont l-​età tat-​tfal tagħhom, il-​ġenituri jistgħu jagħżlu suġġetti prattiċi x’jiddiskutu forsi billi jużaw artikli mit-​Torri tal-​Għassa u Stenbaħ! jew mill-​websajt tagħna, jw.org. Tistgħu titkellmu dwar problema li wliedkom iffaċċjaw fl-​iskola u kif jistgħu jittrattaw magħha. Għala ma tarawx xi ħaġa minn fuq JW Broadcasting (tv.jw.org) u wara tiddiskutuha flimkien? Għandkom mnejn tieħdu pjaċir tipprattikaw l-​għanjiet li se jitkantaw fil-​laqgħat u tieħdu xi ħaġa żgħira tal-​ikel wara l-​qima tal-​familja.

Dan il-​ħin speċjali li tqattgħu kull ġimgħa tqimu lil Ġeħova flimkien se jgħin lill-​membri tal-​familja kollha jieħdu pjaċir jistudjaw il-​Kelma t’Alla, u hu se jbierek l-​isforzi tagħkom bil-​kbir.—Salm 1:1-​3.

• Għala nwarrbu ħin għall-​qima tal-​familja?

• Il-​ġenituri kif jistgħu jagħmlu dan l-​istudju pjaċevoli għall-​familja kollha?

Dawn in-​nies għala jidhru daqshekk ferħanin? Qed jattendu waħda mill-​assembleat tagħna. Bħall-​qaddejja t’Alla tal-​passat, li kienu istruwiti biex jingħaqdu tliet darbiet fis-​sena, aħna nħarsu ’l quddiem biex niltaqgħu fi gruppi akbar. (Dewteronomju 16:16) Kull sena jkollna tliet okkażjonijiet: żewġ assembleat taʼ ġurnata u konvenzjoni reġjonali li ddum tlett ijiem. Kif nibbenefikaw minn dawn il-​laqgħat?

Isaħħulna l-​fratellanza Kristjana tagħna. Bħalma l-​Iżraelin ferħu f’li jfaħħru lil Ġeħova “fost il-​qtajjaʼ miġburin,” hekk ukoll aħna nieħdu pjaċir inqimuh flimkien f’okkażjonijiet speċjali. (Salm 26:12; 111:1) Dawn il-​laqgħat joħolqu opportunità biex niltaqgħu u nassoċjaw maʼ Xhieda minn kongregazzjonijiet oħrajn jew saħansitra minn pajjiżi barranin. F’nofsinhar, nieħdu pjaċir nieklu flimkien fil-​post fejn tkun qed tinżamm l-​assemblea, u dan iżid mal-​atmosfera ferriħija taʼ dawn l-​okkażjonijiet spiritwali. (Atti 2:42) F’dawn l-​assembleat kbar naraw b’għajnejna stess l-​imħabba li tgħaqqad lill-​“fratellanza kollha” tagħna madwar id-​dinja.—1 Pietru 2:17.

Jgħinuna nagħmlu progress spiritwali. L-​Iżraelin ibbenefikaw ukoll billi ‘kienu fehmu l-​kliem’ tal-​Iskrittura li kien spjegat lilhom. (Neħemija 8:8, 12) Aħna wkoll napprezzaw l-​istruzzjonijiet tal-​Bibbja li nirċievu waqt l-​assembleat tagħna. Kull programm huwa bbażat fuq tema Skritturali. Permezz taʼ taħditiet interessanti u reċti żgħar, nitgħallmu kif nagħmlu r-​rieda t’Alla f’ħajjitna. Niġu inkuraġġiti meta nisimgħu l-​esperjenzi taʼ dawk li b’suċċess qed ikampaw mal-​isfida taʼ li jgħixu bħala Kristjani f’dawn iż-​żminijiet diffiċli. F’konvenzjonijiet reġjonali, reċti bil-​kostum jagħmlu r-​rakkonti Bibliċi iktar reali għalina u jgħallmuna lezzjonijiet prattiċi. F’kull assemblea jkun hemm magħmudija għal dawk li jridu jissimbolizzaw id-​dedikazzjoni tagħhom lil Alla.

• L-​assembleat għala huma okkażjonijiet taʼ ferħ?

• Kif tistaʼ tibbenefika jekk tattendi assemblea?

Ftit qabel mewtu, Ġesù avża: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.” (Mattew 24:14) Imma dan ix-​xogħol taʼ ppritkar madwar id-​dinja, kif kellu jitwettaq? Billi nsegwu l-​eżempju taʼ Ġesù waqt li kien fuq l-​art.—Luqa 8:1.

Nipprovaw nikkuntattjaw lin-​nies fi djarhom. Ġesù ħarreġ lid-​dixxipli tiegħu biex jippritkaw l-​aħbar tajba minn dar għal dar. (Mattew 10:11-​13; Atti 5:42; 20:20) Dawn l-​evanġelizzaturi tal-​ewwel seklu kienu inkarigati biex jippritkaw f’territorji speċifiċi. (Mattew 10:5, 6; 2 Korintin 10:13) B’mod simili llum, l-​ippritkar tagħna hu organizzat sew, u kull kongregazzjoni tingħata territorju xi tkopri. Dan jippermettilna nwettqu l-​kmand taʼ Ġesù biex “nippridkaw lin-​nies u nagħtu xiehda bir-​reqqa.”—Atti 10:42.

Nistinkaw biex inkellmu lin-​nies kull fejn jistgħu jinstabu. Ġesù kien t’eżempju wkoll billi pprietka lin-​nies f’postijiet pubbliċi, bħal f’xatt il-​baħar jew qrib xi bir li kien jintuża mill-​komunità. (Marku 4:1; Ġwanni 4:5-​15) Aħna wkoll nitkellmu man-​nies dwar il-​Bibbja kull fejn nistgħu—fit-​toroq, f’postijiet taʼ kummerċ, fil-​ġonna, jew bit-​telefown. Nagħtu xhieda wkoll lill-​ġirien tagħna, lil sħabna tax-​xogħol u tal-​iskola, u lil qrabatna kull meta jkollna l-​ħin opportun. Dawn l-​isforzi kollha flimkien għamluha possibbli għal miljuni taʼ nies madwar id-​dinja biex jisimgħu “l-​aħbar tajba taʼ salvazzjoni.”—Salm 96:2.

Tistaʼ taħseb f’xi ħadd li tixtieq taqsam miegħu l-​aħbar tajba tas-​Saltna t’Alla u xi tfisser din l-​aħbar għall-​futur tagħhom? Iżżommx dan il-​messaġġ taʼ tama għalik innifsek. Aqsmu maʼ ħaddieħor kemm jistaʼ jkun malajr!

• Liema “aħbar tajba” jeħtieġ tiġi pritkata?

• Ix-​Xhieda taʼ Ġeħova kif qed jimitaw il-​metodu taʼ Ġesù rigward l-​ippritkar?

Il-​kelma “pijunier” spiss tirreferi għal dawk li jesploraw territorji ġodda u li jwittu t-​triq għal taʼ warajhom biex isegwuhom. Ġesù kien bħal pijunier, ladarba ntbagħat fuq l-​art biex iwettaq il-​ministeru li jagħti l-​ħajja u biex jagħti l-​opportunità lin-​nies għal salvazzjoni. (Mattew 20:28) Illum, is-​segwaċi tiegħu qed jimitawh billi jqattgħu kemm jistaʼ jkun ħin ‘jagħmlu dixxipli.’ (Mattew 28:19, 20) Xi wħud irnexxielhom jagħmlu x-​xogħol li nsejħulu s-​servizz taʼ pijunier.

Pijunier huwa evanġelizzatur full-​time. Ix-​Xhieda taʼ Ġeħova kollha huma pubblikaturi tal-​aħbar tajba. Però, xi wħud organizzaw ħajjithom biex jaqdu bħala pijunieri regulari, billi jqattgħu 70 siegħa kull xahar fix-​xogħol tax-​xandir. Sabiex jagħmlu dan, ħafna wħud jaħdmu part-​time sekularment. Oħrajn jintgħażlu biex jaqdu bħala pijunieri speċjali f’postijiet fejn il-​bżonn taʼ proklamaturi tas-​Saltna huwa ikbar. Dawn jiddedikaw 130 siegħa jew iktar fil-​ministeru kull xahar. Il-​pijunieri huma kuntenti jgħixu ħajja sempliċi, b’fiduċja li Ġeħova se jagħtihom il-​bżonnijiet tal-​ħajja. (Mattew 6:31-​33; 1 Timotju 6:6-​8) Dawk li ma jistgħux jaqdu bħala pijunieri full-​time jistgħu jaqdu bħala pijunieri awżiljarji meta jkunu jistgħu, billi jżidu l-​attività taʼ ppritkar tagħhom għal 30 jew 50 siegħa fix-​xahar.

Pijunier hu mqanqal mill-​imħabba għal Alla u għan-​nies. Bħal Ġesù, aħna ninnotaw il-​kundizzjoni spiritwali ddisprata li ħafna nies qegħdin fiha llum. (Marku 6:34) Imma aħna għandna l-​għarfien li jistaʼ jgħinhom issa stess, u b’hekk ikollhom tama soda għall-​futur. L-​imħabba għall-​proxxmu tqanqal pijunier biex jagħti b’ġenerożità mill-​ħin u l-​enerġija tiegħu sabiex jgħin ’l oħrajn spiritwalment. (Mattew 22:39; 1 Tessalonikin 2:8) B’riżultat taʼ dan, il-​fidi tal-​pijunier titqawwa, jersaq eqreb lejn Alla, u jesperjenza ferħ kbir.—Atti 20:35.

• Kif tiddeskrivi pijunier?

• Xi wħud x’jimmotivahom biex jagħmlu x-​xogħol taʼ pijunier full-​time?

L-​edukazzjoni teokratika ilha karatteristika tax-​Xhieda taʼ Ġeħova. Hemm skejjel speċjali għal dawk li jiddedikaw il-​ħin kollu tagħhom għax-​xogħol tal-​ippritkar tas-​Saltna sabiex ikunu jistgħu ‘jwettqu bis-​sħiħ il-​ministeru tagħhom.’—2 Timotju 4:5.

L-​Iskola tas-​Servizz taʼ Pijunier. Meta pijunier regulari jlesti l-​ewwel sena tiegħu fis-​servizz full-​time, hu jattendi skola taʼ sitt ijiem li ssir f’Sala tas-​Saltna fil-​viċin. L-​iskop tagħha hu li tgħin lill-​pijunier jersaq eqreb lejn Ġeħova, isir iktar effettiv fl-​aspetti kollha tal-​ministeru, u jkompli jaqdi lealment.

L-​Iskola għall-​Evanġelizzaturi tas-​Saltna. Din l-​iskola taʼ xahrejn hi disinjata biex tħarreġ lil pijunieri li għandhom l-​esperjenza u li huma lesti li jitilqu d-​dar tagħhom biex imorru jaqdu fejn ikun hemm il-​bżonn. Huma bħallikieku jgħidu, “Hawn jien! Ibgħat lili,” u b’hekk ikunu qed jimitaw lill-​aqwa Evanġelizzatur li qatt qeda fuq l-​art, Ġesù Kristu. (Isaija 6:8; Ġwanni 7:29) Li jmorru jgħixu ’l bogħod mid-​dar forsi jinvolvi li jkollhom jadattaw għal mod taʼ ħajja iktar sempliċi. Il-​kultura, il-​klima, u l-​ikel forsi jkunu differenti għalkollox minn dak li jkunu mdorrijin bih. Forsi saħansitra jkun hemm bżonn li jitgħallmu lingwa ġdida. Din l-​iskola tgħin lil aħwa rġiel u nisa mhux miżżewġin u lil koppji miżżewġin, li għandhom bejn 23 u 65 sena, biex jikkultivaw il-​kwalitajiet spiritwali li jkollhom bżonn fl-​inkarigu tagħhom u l-​abbiltajiet li se jgħinuhom jintużaw iktar bis-​sħiħ minn Ġeħova u l-​organizzazzjoni tiegħu.

L-​Iskola taʼ Gilegħad. Bl-​Ebrajk, il-​kelma “Gilegħad” tfisser “Gozz taʼ Xhieda.” Mindu bdiet l-​Iskola taʼ Gilegħad fl-​1943, iktar minn 8,000 gradwat taʼ din l-​iskola ntbagħtu bħala missjunarji biex jagħtu xhieda “sa tarf l-​art” u kellhom suċċess kbir. (Atti 13:47) Meta gradwati waslu għall-​ewwel darba fil-​Perù, kien għad m’hemmx kongregazzjonijiet fil-​pajjiż. Issa hemm ħafna iktar minn 1,000 kongregazzjoni. Meta l-​missjunarji tagħna bdew jaqdu fil-​Ġappun, kien hemm inqas minn 10 Xhieda fil-​pajjiż. Issa hemm ħafna iktar minn 200,000 Xhud. Il-​kors taʼ Gilegħad li jdum ħames xhur jinkludi studju bir-​reqqa tal-​Bibbja. Dawk li qed jaqdu bħala pijunieri speċjali jew bħala missjunarji li jaqdu fil-​ministeru, dawk li jaħdmu f’uffiċċji tal-​fergħa, jew indokraturi li jżuru l-​kongregazzjonijiet u n-​nisa tagħhom jiġu mistidnin biex jattendu din l-​iskola għal taħriġ intensiv ħalli jgħinu f’li jistabbilixxu u jsaħħu x-​xogħol madwar id-​dinja.

• X’inhu l-​iskop tal-​Iskola tas-​Servizz taʼ Pijunier?

• Għal min hi disinjata l-​Iskola għall-​Evanġelizzaturi tas-​Saltna?