Meta l-​Kristjani Jiġu Mgħarblin bħall-​Qamħ

FTIT qabel mewtu, Ġesù wissa lid-​dixxipli tiegħu: “Ara! Satana riedkom f’idejh biex jgħarbilkom bħal qamħ.” (Lq. 22:31) X’ried ifisser b’dan?

Fi żmien Ġesù, il-​ħsad tal-​qamħ kien jirrikjedi ħafna ħin u sforz. L-​ewwel, il-​ħassada kienu jiġbru l-​qamħ mill-​għalqa. Imbagħad, huma kienu jsabbtuh fuq qiegħa iebsa jew jużaw l-​annimali tar-​razzett biex jiġbdu s-​slitta tad-​dris minn fuq il-​qamħ ħalli jfarrkuh f’biċċiet. Dan il-​proċess kien jaqlaʼ ż-​żerriegħa minn maz-​zokk u l-​fosdqa. Imbagħad, il-​bdiewa kienu jgħollu din it-​taħlita fl-​arja. Il-​qalba, jew iż-​żerriegħa sħiħa, kienet terġaʼ taqaʼ fl-​art tad-​dris, waqt li ż-​żiffa kienet ittajjar il-​karfa lil hinn. Finalment, il-​qalba kienet tiġi mgħarbla bir-​reqqa biex jitneħħa kwalunkwe materjal ieħor mhux bżonnjuż.

Eżatt bħalma qal Ġesù, Satana attakka lid-​dixxipli taʼ Ġesù bla heda lura f’dak iż-​żmien, u hu jattakka lilna llum. (Efes. 6:11) Huwa minnu li mhux kull diffikultà li niffaċċjaw f’ħajjitna hija kaġunata direttament minn Satana. (Koħ. 9:11) Xorta waħda, Satana huwa ħerqan li juża kwalunkwe mezz għad-​dispożizzjoni tiegħu biex ikisser l-​integrità tagħna. Per eżempju, hu għandu mnejn iħajjarna biex ngħixu ħajja materjalistika, biex nagħżlu divertiment oġġezzjonabbli, jew biex nieħdu sehem fi mġiba immorali sesswalment. Jistaʼ juża wkoll lil sħabna taʼ l-​iskola jew tax-​xogħol u lil qrabatna li ma jemmnux biex jagħmlulna pressjoni ħalli nieħdu kulma nistgħu minn din id-​dinja kemm fl-​edukazzjoni u kemm f’karrieri li d-​dinja għandha x’toffri. Iktar minn hekk, Satana jistaʼ juża persekuzzjoni diretta fl-​isforz tiegħu biex ikisser l-​integrità tagħna lejn Alla. M’għandniex xi ngħidu, hemm ħafna modi oħrajn kif Satana bħallikieku jipprova jgħarbilna.

Kif nistgħu niqfulu lil dan l-​għadu qawwi? Ma nistgħux nagħmlu dan bis-​saħħa tagħna stess. Satana hu iktar qawwi minna; madankollu, aħna nafu li l-​qawwa taʼ Ġeħova ma tistax titkejjel tant kemm hija superjuri għal taʼ Satana. Jekk ikollna fiduċja sħiħa f’Ġeħova, nitolbu bil-​ħerqa għall-​għerf u l-​kuraġġ biex nissaportu, u nistrieħu għalkollox fuq il-​gwida tiegħu, hu se jsaħħaħna biex nirreżistu l-​attakki taʼ Satana.—Salm 25:4, 5.

Meta nkunu taħt prova, għandna bżonn l-​abbiltà li ‘nagħrfu nagħżlu kemm it-​tajjeb u kemm il-​ħażin,’ u b’hekk nevitaw li niġu mqarrqin mill-​makakkeriji taʼ Satana. (Ebr. 5:13, 14) Ġeħova jistaʼ jgħinna niżviluppaw din l-​abbiltà. Imma mbagħad għandna bżonn nibqgħu ngħixu ħajja tajba, akkost taʼ kollox. Jekk b’fiduċja nsegwu l-​gwida taʼ Ġeħova, hu dejjem se jappoġġa d-​determinazzjoni qalbiena tagħna biex nagħmlu t-​tajjeb.—Efes. 6:10.

Satana għandu mnejn jipprova jgħarbilna bħall-​qamħ. Imma bis-​saħħa taʼ Ġeħova, aħna nistgħu niqfulu, u nibqgħu sodi fil-​fidi. (1 Pt. 5:9) Iva, il-​Kelma taʼ Ġeħova tiżgurana: “Opponu lix-​Xitan, u hu jaħrab minnkom.”—Ġak. 4:7.