Kaxxa għall-​Mistoqsija

◼ Qabel ma pubblikatur mhux mgħammed jiġi approvat għall-​magħmudija, sa liema punt irid ikun qed jattendi l-​laqgħat tal-​kongregazzjoni u jieħu sehem fil-​ministeru?

Li wieħed jitgħammed hu l-​iktar deċiżjoni importanti li jistaʼ jieħu. Għalhekk, qabel ma individwu jiġi approvat għall-​magħmudija, irid ikollu fehma raġunevoli taʼ dak li jistenna minnu Alla. Minbarra dan, diġà għandu jkun qed juri li hu determinat li jgħix fi qbil mal-​ħtiġijiet t’Alla.

Il-​Kristjani huma kmandati li ma jabbandunawx il-​laqgħat tagħhom flimkien, u għalhekk pubblikatur mhux mgħammed għandu diġà jkun qed juri d-​diliġenza f’li jattendi l-​laqgħat tal-​kongregazzjoni. (Ebr. 10:24, 25) Ukoll, ġeneralment ikun qed jieħu sehem billi jikkummenta. X’aktarx li jkun miktub fl-​Iskola tal-​Ministeru Teokratiku, għalkemm dan mhux meħtieġ.

Minbarra dan, peress li l-​Kristjani ngħataw l-​inkarigu li jippritkaw l-​aħbar tajba u jagħmlu dixxipli, pubblikatur mhux mgħammed għandu jkun qed jieħu sehem regulari fil-​ministeru qabel ma jitgħammed. (Mt. 24:14; 28:19, 20) Kemm-​il xahar għandu joħroġ fil-​ministeru qabel ma jkun jistaʼ jitgħammed? B’mod loġiku, għandu jingħata biżżejjed żmien biex juri li determinat b’mod sod li jkollu sehem regulari u żeluż fil-​ministeru xahar wara l-​ieħor. (Salm 78:37) Madanakollu, m’hemmx għalfejn tħalli ħafna żmien jgħaddi bejn meta jibda joħroġ fil-​ministeru u meta jikkwalifika għall-​magħmudija; ftit xhur biżżejjed. Kemm għandu jkun qed iqattaʼ ħin fil-​ministeru? M’hemm l-​ebda regola stretta dwar dan. L-​anzjani għandhom iqisu ċ-​ċirkustanzi uniċi taʼ kull pubblikatur u jkunu raġunevoli u bilanċjati.—Lq. 21:1-​4.

L-​anzjani (jew il-​qaddejja ministerjali fil-​kongregazzjonijiet fejn hemm tassew ftit anzjani) li jiltaqgħu maʼ kandidat għall-​magħmudija għandhom jiftakru li kull individwu hu differenti, u għandhom jużaw l-​għaqal meta jiddeċiedu jekk jikkwalifikax għall-​magħmudija. Għandhom jistennew minnu li jkollu xewqa kbira li jkun wieħed mix-​Xhieda taʼ Ġeħova u li juri apprezzament għall-​privileġġ li jissieħeb mal-​organizzazzjoni taʼ Ġeħova u li jieħu sehem fil-​ministeru. L-​anzjani jifhmu li għadu ma laħaqx il-​maturità spiritwali jew kiseb s-​sengħa taʼ evanġelizzaturi mgħammdin tal-​esperjenza. Jekk l-​anzjani jħossu li l-​kandidat ma jikkwalifikax għall-​magħmudija, b’qalb tajba għandhom jinformawh bir-​raġunijiet Skritturali għad-​deċiżjoni tagħhom u jgħinuh jirċievi l-​għajnuna spiritwali.