Mutatina

Vino Yesu Wacisile

VIDYO: E Yesu Akuwizizya e Zakeyo

1. Tambani e VIDYO, nanti wazyani Luka 19:1-7. Apano mwasuke amawuzyo yano yakonkapo:

1. Acani cino cingalanga calenzile awantu wamwi wataluka e Zakeyo?

2. Cani calenzile e Yesu amuwizizye?

Avyani Vino Tukusambililako kwe Yesu?

2. Pa kuti tuwizizye awantu pa Wufumu wa kwe Leza, tutazipizile twatina.

Mwakolanya Yesu

3. Mwakweyamila pe Yehova. Umuzimu wa kwe Leza wavwizye Yesu pano wawizyanga, na mwemwenye wungamyavwa. (Mat. 10:19, 20; Luk. 4:18) Pano mukulonda ukuwizizya wino mukutina, mwapepa kwe Yehova ukuti amyavwe ukusipa.​—Imili. 4:29.

4. Mutapingula umuntu ukulingana vye na vyo mwamulola. Tungapotwa ukulanzyanya zuwa na wumwi pa mulandu vye wa kuti amukankala, amupina, vino akuloleka, nanti vino wazumilamo. Lelo mwakwizuka ukuti:

1. E Yehova ne Yesu wakamanya vyo vili mu mwezo wa muntu; sweswe tusimanya.

2. Mutazipizile mwalola ngati Yehova angapotwa ukwavwa wumwi.

5. Mutatina lelo muzipizile ukucenjela nu kuwa nu mucinzi. (Mat. 10:16) Mutapanzinkana. Mwaleka ukulanzyanya mu mucinzi nga cakuti wumwi atakulonda ukwivwa nanti nga mwalola ukuti ivintu vingawipa nga mwatwalilila ukulanzyanya.​—Imilu. 17:14.