Baibolo Ikapilula Awantu

Cani calenzile e nakulubantu uwamyaka ukucila 60 aleke ukupepa amakolania? Mwivwe vino wandi alondolole.

“Nsi ne Muzya Wamakolania.”​—ABA DANSOU

WAKWASILWE MU: 1938

INSI: BENIN

VINO WALINJI: WAPEPANGA AMAKOLANIA

VINO NALINJI: Nakulizile mukaya kano witanga ukuti So-Tchahoué, kano kawela mumbali ye sumbi, kuno kwawa nkaninye amatipa. Wano wakakwikala mwe kaa akaya wakateka ing’ombe, imbuzi, ing’onzi, inkoko, swinya wakakoma ni nswi. Kwe yo-o incende kutawa imisewo, awantu wakawomvya vye amawato. Amang’anda amavule wakazenjela vye ni vimiti ni sote, lelo kwawa yamwi yano wakazenjela ni njelwa. Awantu awavule kwe yoo incende awapiina. Nomba nanti cawa woo, kutawa nkani wucintivwa ndi vino cawa mu misumba yinji.

Pano nalinji ne mutici, e tata wasenzile nene ne songo wane umwanaci nu kutwala kuno wakasambilizya intambi ni vyamapepo. Nalile nakula, natalisile ukupepa kaleza kano wakakwita ukuti (Oduduwa), kaleza kwa Yoruba. Nazenjezile kaa kaleza akang’anda kuno nayanga mukufima inzuwi zya kandolo, inkunda, ni nyama impusane pusane. Ilivule indalama zyasililanga vye mukufima inzuwi kwe kanye kaleza.

VINO BAIBOLO YAPILUZILE UWUMI WANE: Pano natalisile ukusambilila Baibolo, nizile imanya ukuti e Yehova, awili e Leza wenganyensu uwa kusimicila. Nasambilizile nukuti asilonda tuwapepa amakolania. (Ukufuma 20:​4, 5; 1 Wakorinte 10:14) Nilusile cino nalinji nukucita. Nasumvile amakolania yonsinye na vyonsinye vino vyalinji mu ng’anda vino vyakumile ukupepa amakolania. Nalesile ukuwuzya kwe wano wakalandila lya nkani vino vilicitika ku nkolelo. Nalesile nukuzyevyako ivya ntambi, nintambi zyapa vililo.

Pamulandu wa kuti nalinji ni myaka ukucila 60, citapepusile ukuleka ukucita vyoo. Walupwa lwane ni viwuza, na wina mupalamano watakunzile swinya wansekanga. Nomba napepanga kwe Yehova ukuti anjavwe ukucita icilungamane. Amazwi yano yawa pa Imilumbe 18:​10, yasansamusizye nkaninye, yakati: “Izina lya Mfumu Leza [Yehova] lyakolana nakapungu kawome, kano umulungamane angaya akazane itulwa.”

Cinji cino canjavwizye akulazanwa mukulongana ni Nte zya kwe Yehova. Wa-a awantu wakundana nkaninye. Cino nakunzile nkaninye aca kuti wakakonka sana amasundo ya mu Baibolo yano yakalenga wawa ni miwele imizima. Vino naweni vyalenzile nsinincizye ukuti ukupepa kwa Nte zya kwe Yehova akuli ukupepa kwa kusimicila.

UWUZIMA WUNO NAZANAMO: Ukukonka ivisinka vya masundo ya mu Baibolo kwalenga ndakwivwana icete na wana wane. Pe yoo impindi ni ntazi zyacepa. Kunsizi nononelanga indalama zyane ku tumakolania utwavye tuno tutanjavwanga nukunjavwa. Yoo impindi nkapepa Yehova wino alifumyapo intazi zyonsinye zino tukapitamo. (Ukuwumbulika 21:​3, 4) Nawa nkaninye ni nsansa amuno nomba nsi ne muzya wa makolania, nkawombela e Yehova wino akanjavwa nukuncinjilila!