Womvyani Ibuku lya Kuti, Ungikala Amanda Pe! pa Kwavwa Awasambi Ukuwomya Isuwilo mwe Yehova ne Yesu

Pakuti umusambi asecelesya Leza, azipizile ukuwa ni suwilo iwome. (Hebe. 11:6) Tungawavwa ukuwomya isuwilo lyawo ukuwomvya ibuku lyakuti Ungikala Amanda Pe! Mwe lyo-o ibuku mwawa amawaliko, uwulondolozi uwivwike, amawuzyo, Amavidyo yakufika pa mwezo apano ni vikope ivizima. Nga tukwavwa awasambi ukuwa ni miwele ya wina Klistu nu kuwa iviwuza vya kwe Leza, lyo tukuzenga ukuwomvya iviwombelo vino vitange vipye nu mulilo.​—1 Kor. 3:12-15.

Wamwi cikawawomela ukusinincizya ukuti wangawa iviwuza vya kwe Leza wino wasilola. Acino tuzipizile ukuwavwa ukumanya Yehova nu kumusuwila.

TAMBANI E VIDYO YAKUTI WOMYANI ISUWILO LINU MWE YEHOVA, UKUWOMVYA IBUKU LYA KUTI “UNGIKALA AMANDA PE!” APANO MWASUKE AMAWUZYO YANO YAKONKAPO:

• Twamanya wuli ukuti we-e e nkazi wapekanizizye icete isambililo?

• Uzye tewawomvya wuli amawuzyo yakulundapo pakumanya vino umusambi akuyivwa nu kwelenganya pi waliko lye Ayizeya 41:10, 13?

• Uzye e vidyo na mawaliko tevyavwa wuli umusambi?

Awantu awavule watamanya uwupiliwulo wa nzuwi swinya watamanya ukuti acawila cino Yehova wawapa. (Gal. 2:20) Acino tuzipizile ukuwavwa ukuwomya isuwilo lyawo mu nzuwi ya kwe Yesu.

TAMBANI E VIDYO YAKUTI WOMYANI ISUWILO LINU MWE YESU, UKUWOMVYA IBUKU LYA KUTI “UNGIKALA AMANDA PE!” APANO MWASUKE AMAWUZYO YANO YAKONKAPO:

• Avyani vino tetwalola vino vikulanjizya ukuti umwanawitu wapekanizizye icete isambililo?

• Uzye tewawomvya wuli ivyewo vyakuti “Manyilapo na Vinji” pakwavwa umusambi?

• Amulandu ci wuno ipepo lyacindamila ku musambi?