Womvyani Ibuku lya Kuti Ungikala Amanda Pe!, mu Mulimo

Cizifile nkaninye wo-o vino tukweti e broshuwa iyipya ni buku ivyakuwomvya pa kutungulula amasambililo ye Baibolo! Tukulenga ukuti e Yehova atupe amaka pa kuti tupange amasambililo amavule na yanji. (Mat. 28:18-20; 1 Kor. 3:6-9) Nomba tungawomvya wuli vyo-o iviwombelo ivipya?

Ibuku lya kuti Ungikala Amanda Pe! lipanzilwe mu nzila ya kuti pawa ukulanzyanya swinya lili ni nzila iyipya iyakusambilizizyamo. Acino pano mukupekanya na pano mukutungulu isambililo mwakonka vyo-o ivisinka vino vyakonkapo.a

• Mwawazya ivyewo vya mwi buku nu kulanzyanya amawuzyo

• Mwawazya amawaliko yano watili “wazyani,” nu kwavwa umusambi ukwivwicisya vino angawomvya vyovyo ivyewo

• Mwatamba nu kulanzyanya e vidyo, ukuwomvya amawuzyo yano wamiwicizilepo

• Nga mukusambilila mwakwelezya ukumala isambililo lyonsinye

Mwatalicila ukupa umuntu e broshuwa pakulola nga akulondesya ukusambilila. (Lolani akambokosi kakuti “Ivyakupa Awantu e Broshuwa ya Kuti Ungikala Amanda Pe! pa Umuku Wakutalicila.”) Nga mwamala ukusambilila nu musambi mwe yo-o broshuwa, swinya mwalola ukuti akulondesya ukusambilila, mungamupa ibuku nu kutwalilila mwi sambililo 4. Lelo nga cakuti mukasambilila na wumwi mwi buku lyonga pe yano tukawomvya pa kutungulula amasambililo ye Baibolo, mungaleka ukusambililamo nu kumupa ibuku lya kuti Ungikala Amanda Pe! Mweweneco amwe wano muzipizile ukusola pano mungatalicila ukusambilila mwe lyo-o ibuku.

TAMBANI E VIDYO YAKUTI NDANJI KWISAMBILILO  LYE BAIBOLO ,APANO MWASUKE AMAWUZYO YANO YAKONKAPO:

• Avyani vino awasambi we Baibolo walisambilila mwe lyo-o ibuku ilipya?

• Amulandu ci wuno muzipizile ukulanjizya awasambi awapya yo-o e vidyo?

• Avyani vino muzipizile ukuwomelezya awasambi ukupingulapo nu kuficilisya?—Lolani e charti yakuti “Vino Vilimo ni Vyakucita mwe Cila Ciputulwa.”