“Umunyonko Wandi Azyulupuke”!

1. Uzye umulumendo wumwi walanjizizye wuli ukuti walinji ni suwilo iliwome ilyakuti kuliwa ukuzyulupuka?

UMULUMENDO uwizina lyakuti Matthew walwala indwala imbipe nkaninye yino yalondekwanga ukumulepula pamiku imivule. Wanda wumwi lyo ali ni myaka 7 watambanga JW Broadcasting^® ponga na walupwa lwakwe. Ku nsilo ya kwe yo-o programu waweni e vidyo ya lwimbo yino yalanjizyanga awantu wakupocelela wano wazyulupuka.b Pansizi ye programu, e Matthew wakatusile aya pano palinji awakwasi wakwe, awalema amakasa nu kuwanena ukuti: “Uzye temwalola? Nanti nafwanye ndizyulupuka. Mutize mwasakamikwa nanti cimwi, mwize mutwalililevye ukundindilila.” Yelenganyani vino wa-a awakwasi wafwile wayivwile ukulola vino umwana wawo walinji ni suwilo iliwome ilya kuzyulupuka.

2-3. Amulandu ci wuno cacindamila ukukwelenganya pawulayo wakuzyulupuka?

² Cacindama nkaninye ukuwakwelenganya pawulayo wa mu Baibolo uwakuti kuliwa ukuzyulupuka. (Yoha. 5:28, 29) Amulandu ci? Amuno impindi iyili yonsinye tungalwala indwala imbipe nanti ukufwilwa wino twakunda. (Ekawi. 9:11; Jemu. 4:13, 14) Lelo isuwilo lyakuzyulupuka lino twawa nalyo lingatwavwa ukusipicizya intazi zyamusango wo-o. (1 Tes. 4:13) E Baibolo yikatunena ukuti e Yehova watumanya icete sana swinya watukunda. (Luk. 12:7) Lelo nga twelenganya pi suwilo lya kuzyulupuka, apano tukalola ukuti wo-o vino Yehova alituzyulupula wulyanye vino twalinji na melenganyo yano twakweti, lyo cikusula mukuti watumanya icete. Swinya pamulandu wakuti watukunda, aco watupelela nu longo lwa kuwa nu wumi wamuyayaya. Fwandi nanti twafwanye, alituzyulupula.

³ Mwe co-o icipande twandi tusambilile pamilandu yino yingalenga tusuwile ukuti kuliwa ukuzyulupuka. Twandi tulande na pilyasi lya mu Baibolo lino likawomya isuwilo litu muno mwawa amazwi yano yali pi waliko pano pafumile umutwe. Yano yakati: “Umunyonko wandi azyulupuke.” (Yoha. 11:23) Namukulecelezya, twasambilila pe vino vingalenga tuwe ni suwilo iliwome ilyakuti kuliwa ukuzyulupuka.

VINO VINGALENGA TUSUWILE UKUTI KULIWA UKUZYULUPUKA

4. Acani cino cingalenga tusuwile vino wumwi watulaya? Lanjililani.

⁴ Pakuti tusuwile vino wumwi watulaya, tuzipizile ukusinincizya ukuti weyo umuntu akulondesya swinya ali na maka yakuficilisya. Ku cakulolelako, tuti: Ing’anda yinu yononeka nkaninye pamulandu ni cimuza. Apano e ciwuza winu wamilaya ukuti, ‘Nandi imyavwe ukuzifya ing’anda.’ Swinya musuwizile nu kuti molimonye weyo umuntu akulondesya ukumyavwa. Ne nga cakuti wamanyicisya nu kuzenga swinya akweti ni viwombelo vino vikalondekwa, mungasuwila ukuti angakumanisya ukumyavwa nu kuti alificilisya vino wamilaya. Nge Yehova weni, uzye akalondesya swinya wakwata na maka yakuficilisya uwulayo wakuti kuliwa ukuzyulupuka?

5-6. Amulandu ci wuno tungasuwilila ukuti e Yehova akalondesya ukuzyulupula awafwe?

⁵ Uzye e Yehova akalondesya ukuzyulupula awafwe? Ukwasowa nu kuvwilika, akalondesya nkaninye. Wanenile wakalemba we Baibolo wamwi ukuti walembe pa wulayo wuno wukalanda pakuzyulupuka kuno kulicitika ku nkolelo. (Ayize. 26:19; Hos. 13:14; Ukuwu. 20:11-13) Lyonsinye nga cakuti Yehova walaya cimwi, akaficilisya. (Josh. 23:14) Swinya akalondesya sana ukuzyulupula awafwe. Acani cino twalandila wo-o?

⁶ Lekani tulandeko pamazwi yano Job walanzile. Wasuwizile ukuti nanti wafwanye, Yehova aliyivwa icete ukumulola naswinya. (Job 14:14, 15) Swinya wonye avino akayivwa na pawawomvi wakwe wonsinye wano wafwa. Akalondesya sana ukuwazyulupula pakuti wize wawa ninsansa nu wumi uwuzima. Nga wano wafwa ukwasowa ukukwatapo ulongo lwa kusambilila pe Yehova, weni ciliwa wuli? Nawonye walizyulupuka. (Imili. 24:15) Amuno e Yehova akalonda ukuti nawonye wize wawe nu longo lwa kuwa iviwuza vyakwe nu kwikala umuyayaya monye munsi. (Yoha. 3:16) Co-o cikulanjizya apatiswenye ukuti e Yehova akalondesya ukuzyulupula awafwe.

7-8. Amulandu ci wuno tungasuwilila ukuti e Yehova wawa na maka yakuzyulupula awafwe?

⁷ Uzye e Yehova wawa na maka yakuzyulupula awafwe? Ukwasowa nu kuvwilika, wakwata! Amuno we Leza “Wamaka yonsi.” (Ukuwu. 1:8) Fwandi wawa na maka yakucimvya umulwani uwili wensinye ukuwikako nimfwanye. (1 Kor. 15:26) Ukumanya co-o icisinka kukatuwomya swinya kukatusansamusya. Lekani tulandeko pecino caciticizile e nkazi Emma Arnold. Pano kwalinji Inkondo Yansi iya Citi Wili, we-e nkazi na walupwa lwakwe wapisile muntazi zino zyelezizye nisuwilo lyawo. Pano e nkazi Emma wasansamusyanga umwana wakwe umwanaci wino wafwizilwe awakundikwa wakwe mu nkambi ya wa Nazi, watili: “Nga cakuti awafwe watalizyulupuka, lyo imfwa yakwata amaka ukucila Yehova. Nomba wo-o asa vino cawa.” Kutawa icili consinye cino cawa na maka ukulusya e Yehova. E Leza wa Maka Yonsi wino wapanzile uwumi, wakwata na maka yakuzyulupula awafwe.

⁸ Umulandu wunji wuno walenga tusuwile ukuti e Yehova wawa na maka yakuzyulupula awafwe, awakuti atawa niciwilizi. Weni akakwita intanda zyonsinye mu mazina. (Ayize. 40:26) Cinji acakuti akakwizuka wonsinye wano wafwa. (Job 14:13; Luk. 20:37, 38) Fwandi cingawa acipepuke nkaninye ukwizuka nu tuticinye utwe wano alizyulupula, ukuwikako na vino walolekanga, imiwele yawo, vino vyawaciticizilepo apano na vino welenganyanga.

9. Amulandu ci wuno mwasuwilila mu wulayo wa kwe Yehova wuno wukalanda pakuzyulupuka?

⁹ Tungasuwila mu wulayo wa kwe Yehova wuno wukalanda pakuzyulupuka, amuno twamanya ukuti akalondesya swinya wakwata amaka yakuficilisya wo-o uwulayo. Umulandu na wunji awakuti: E Yehova wazyulupuzilepo awafwe. Ku cakulolelako, mu mpindi zya mu Baibolo, wapilepo e Yesu na wonsi wamwi awacisinka amaka yakuzyulupula wano wafwile. Lekani tulande pe wumwi wino e Yesu wazyulupuzile wo walandwapo mwi buku lya kwe Yohani icipandwa 11.

E CIWUZA WA KWE YESU WAFWA

10. Acani cino cacitisile pano Yesu walamvile e Jordani ukufuma ku Betani, swinya acani cino wacisile? (Yohani 11:1-3)

¹⁰ Wazyani Yohani 11:1-3. Yelenganyani pe cino cacitisile ku Betani kukusila kwa mwaka wa 32 C.E. Mwe ka-a kaya mwalinji wa ciwuza we Yesu, e Lazaro na wankazi zyakwe wawili, e Mariya ne Marita. (Luk. 10:38-42) Nomba e Lazaro wizile alwala, na co-o casakamisile nkaninye wankazi zyakwe. Swinya calenzile watume na mazwi kwe Yesu. Pano watumanga amazwi, lyo Yesu alamvile kaali nu luzi lwa Jordani. Ukufuma ku Betani ukuya ko-o kuno Yesu walinji, awantu wapitangapo mupipi na manda yawili. (Yoha. 10:40) Fwandi e Lazaro wasyazile afwa lyo ni ntumi zitani zifisye ilyasi. Pano wamunenile pa mfwa ye ciwuza wakwe, atakatusile palyanye, wamazileko amanda yawili apo wiza waya. Acino pakuti akafike ku Betani, lyo papita na manda 4 ukufumilila pano Lazaro wafwizile. Nomba uzye watili wafika, wisilevye nu kwiwililako? Awe! Wacisilepo cimwi cino calinji nu kusansamusya iviwuza vyakwe nu kucindika Yehova.​—Yoha. 11:4, 6, 11, 17.

11. Avyani vino tungasambililako kwe lyo-o ilyasi pakuwa na wuciwuza uwuzima?

¹¹ Kwawako cimwi cino iviwuza vingasambililako kwe lyo-o ilyasi. Ku cakulolelako, pano e Mariya ne Marita watumile amazwi kwe Yesu, watamunenile ukuti aye ku Betani. Walanzilevye ukuti e ciwuza wakwe amulwale. (Yoha. 11:3) Pano e Lazaro wafwile, wanga Yesu akunde nga wamuzyulupulizile kulyanye kuno walinji nanti acakuti kwalinji akutali. Lelo asa vino wacisile, wasozilepo ukuya ku Betani pakuti akawe ponga ni viwuza vyakwe, e Mariya ne Marita. Uzye na mwemwe mwakwata e ciwuza wino angiza mu kumyavwa ukwasowa nu kuti mumunene? Nga mwakwata, lyo mwamanya ukuti angamyavwa mu ‘mpindi zya ntazi.’ (Imilu. 17:17) Acino lekani tuwawa swe waciwuza awazima kwe wanji ndivino Yesu walinji. Lekani nomba tulande na pe vinji vino vyacitisile.

12. Acani cino Yesu walayile e Marita, swinya acani cino calenzile Marita asuwile vino wamulayile? (Yohani 11:23-26)

¹² Wazyani Yohani 11:23-26. Pano Marita wivwile ukuti e Yesu ali mupipi na ku Betani, paponye wakatusile ayamusunkanya nu kumunena ukuti: “Ndi achino wanga utele ulipo, mulali, umwanawitu ngali atafwile.” (Yoha. 11:21) Kweni, mukusimicilanye e Yesu nga wapozizye e Lazaro. Lelo walondanga ukucita cino cacizile na pakumupozya. Walayile e Marita ukuti: “Umunyonko wandi azyulupuke.” Swinya wamunenile na mazwi yano yalinji nu kulenga amusuwile, watili: “Nekuzyulupuka newumi.” Cino walandizile wo-o, apamulandu wakuti e Yehova wamupile amaka yakuzyulupula awafwe. Pakutalika, wazyulupuzile umwana umukazyana wino patazimvile ukufumilila pano wafwizile. Ne mukupita kwa mpindi, wizile azyulupula umulumendo wino nawenye patazimvile pano wafwizile. (Luk. 7:11-15; 8:49-55) Nomba uzye vwilani e Yesu angazyulupula umuntu wino wamala amanda 4 ukufumilila pano wafwizile swinya watalika nu kuwola?

“LAZARO FUMA!”

13. Ukulingana ne Yohani 11:32-35, uzye Yesu wacisile wuli pano waweni e Mariya na wantu wanji wakulosya? (Lolani ni cikope.)

¹³ Wazyani Yohani 11:32-35. Lolani cino cakonsilepo. Pa tazimvile nu kuzimba e Mariya nawenye wizile akatuka nu kuya mukusunkanya e Yesu. Walilevye wamusunkanya, wamunenile ngati avino ne Marita nye walanzile ukuti: “Ndi achino wanga utele ulipo, mulali, umwanawitu ngali atafwile.” Pano walandanga wo-o, lyo ali nu wulanda nkaninye swinya lyo akulosya ponga na wano walinji nawo. Acino e Yesu watili wawalola nu kwivwa kuno wakulosya, wivwile uwuwi nkaninye. Swinya pamulandu wakuti wawivwizile uluse, nawenye wizile alosya. Waweni vino cikakwivwika nga cakuti umukundikwa wafwa. Ukwasowa nu kuvwilika, e Yesu walondesyanga ukufumyapo cino calenzile awantu walosya.

14. Uzye vino Yesu wacisile pano waweni e Mariya akulila vikatusambilizya cani pe Yehova?

¹⁴ Vino Yesu wacisile pano waweni e Mariya akulila, vikatusambilizya ukuti e Yehova we Leza wa nkumbu. Amulandu ci wuno twalandila wo-o? Ndi vino twasambilizile mu cipande cino cafumileko, e Yesu akatulanjizya vino Umukwasi wakwe akakwelenganya na vino akayivwa. (Yoha. 12:45) Fwandi nga cakuti tukuwazya pevino e Yesu wivwizile iviwuza vyakwe uluse pano walosyanga icakuti nawenye walosizye, tungasuwila ukuti ne Yehova nye avino akayivwa nga cakuti walola tukulila pa mulandu nu wulanda. (Amalu. 56:8) Ukwasowa nu kuvwilika, co-o cifwile calenga muvwambisye ukupalamila sana kwe Leza witu uwa lukundo?

15. Ukulingana ne Yohani 11:41-44, cani cacitisile pa nkungwe ye Lazaro. (Lolani ni cikope.)

¹⁵ Wazyani Yohani 11:41-44. Pano Yesu wafisile pa nkungwe ya kwe Lazaro, wanenile awantu ukuti wafumyepo iciliwe. Lelo e Marita wakanile amuno walolanga ngati akununka. Acino e Yesu wamunenile ukuti: “Wuzye ntakunenile nati ndi ukusuwila ungalola ukuchindama kwakwe Leza?” (Yoha. 11:39, 40) E Yesu wizile apunamila mupela nu kupepa lyo pali awantu awavule. Acani cino wacitizile wo-o? Walondanga awantu ukucindika Yehova nga walola vyonsinye vino vyalinji nu kucitika. Acino wizile apunda ukuti: “Lazaro fuma!” Paponye e Lazaro wafumile munkungwe. Co-o cino Yesu wacisile wamwi wangalola ngati citanga cicitike.

16. Uzye ilyasi lino lyawa mwi buku lya kwe Yohani icipandwa 11 likatwavwa wuli ukutwalilila ukusuwila ukuti kuliwa ukuzyulupuka?

¹⁶ Ilyasi lino lyawa mwi buku lya kwe Yohani icipandwa 11 likatwavwa ukutwalilila ukusuwila ukuti kuliwa ukuzyulupuka. Amunzila ci? Yizukani vino Yesu wanenile Marita ukuti: “Umunyonko wandi azyulupuke.” (Yoha. 11:23) E Yesu wawa ngati Amukwasi wakwenye, akalondesya swinya wawa na maka yakuficilisya wo-o uwulayo. Ivilamba vino walukusizye avino vikalanjizya ukuti akalondesya ukuzyulupula awafwe nu kufumyapo uwulanda wuno imfwa yaleta. Swinya wo-o vino wazyulupuzile e Lazaro ukufuma mu nkungwe, calanjizizye ukuti wawa na maka yakuzyulupula awafwe. Teyelenganyani na swinya pa mazwi yano wanenile e Marita, ayakuti: “Wuzye ntakunenile nati, Ndi ukusuwila, ungalola ukuchindama kwakwe Leza?” (Yoha. 11:40) Fwandi twawa ni milandu imivule yino yalenga tusuwile ukuti e Yehova alizyulupula awafwe. Nomba avyani vino tungacita pakuti tutwalilile ukusuwila?

VINO TUNGACITA PAKUSUWILA UKUTI KULIWA UKUZYULUPUKA

17. Avyani vino tuzipizile twakwizuka pano tukuwazya amalyasi ya mu Baibolo yano yakalanda pakuzyulupuka?

¹⁷ Mwawazya nu kwelenganya pamalyasi ya wantu wano wazyulupusile. E Baibolo yalanda pa wantu 8 wano wazyulupusile.c Pano mukuwazya ya-a amalyasi, mwawikako sana amano, swinya mwakwizuka ukuti wa-a awonsi, awanaci na wana, akuno walinji. Mwalola na vino mungasambililako. Cinji acakuti mwalola vino ya-a amalyasi yakalanjizya amaka ya kwe Yehova na vino akavwambisya ukuzyulupula awafwe. Mwakwelenganya sana na pakuzyulupuka kwa kwe Yesu, amuno akuno kwacindamisya pe konsinye. Asa vyo-o vitupu, awantu awavule waweniko pano e Yesu wazyulupusile swinya twiza twawa nisuwilo lya kuzyulupuka pa mulandu wakuzyulupuka kwakwe.​—1 Kor. 15:3-6, 20-22.

18. Uzye indwimbo zino zikalanda pakuzyulupuka zingamyavwa wuli? (Lolani ne futunoti.)

¹⁸ Mwakwimbila indwimbo zino zikalanda pi suwilo lya kuzyulupuka.d (Efes. 5:19) Zyo-o indwimbo zikawomya isuwilo litu swinya zikatwavwa ukutwalilila ukusuwila ukuti kuliwa ukuzyulupuka. Fwandi mwateyelezya nkaninye nu kusambilila ivyakwimbila pa kuti mwakwimbila icete swinya mwalanzyanya amazwi ya mwe zyozyo indwimbo pano muli pa mapepo ya lupwa. Cinji acakuti, mwaswatila amazwi yano yalimo nu kwelenganyapo sana pakuti yamifika pa mwezo nu kuwomya isuwilo linu. Nga cakuti mwapita muntazi nanti nga mwafwilwa wino mwakunda, e Yehova aliwomvya umuzimu wakwe uwutele pakumizusyako zyozyo indwimbo zino ziliwomya isuwilo linu nu kumisansamusya.

19. Avyani vino tungakwelenganyapo pakuzyulupuka? (Lolani akambokosi kakuti “Amawuzyo ci Yano Mungawakolowozya?”)

¹⁹ Mwakwelenganya ukuti akuno muli pano vyo-o ivintu vikucitika. E Yehova watupa amaka yakwelenganya ukuti tuli munsi mpya. E nkazi wumwi watili: “Nkasumba impindi iyikulu ukwelenganya ukuti indi mu nsi mpya. Nga nkucita wo-o, nkalola ngati ndi mu paradaise nkununsya amaluwa amayembe yano yakuwalula.” Yelenganyani vino muliyivwa ukulola awonsi na wanaci awisuwilo wano walandwapo mu Baibolo. Weweni wino mukavwambisya sana ukwiza mukulola? Amawuzyo ci yano mulimukolowozya? Asa vyo-o vitupu, teyelenganyani na pe vino muliyivwa ukulola awakundikwe winu wano wafwa. Avyani vino mulicita nga mwawalolavye wazyulupuka? Amazwi ci ayakutalicila yano mulilanda? Uzye muliwakumbatila nanti ukulila ivilamba vya nsansa?

20. Avyani vino tuzipizile ukuvwambisya ukucita?

²⁰ Tukasalifya nkaninye wo-o vino e Yehova watulaya ukuti alizyulupula awafwe. Tusivwilika nanti katicinye ukuti alificilisya wo-o vino watulaya. Amuno wakwata amaka swinya akavwambisya ukuzyulupula wano wafwa. Acino lekani tutwalilile ukuwomya isuwilo litu ilyakuti awafwe walizyulupuka. Nga twacita wo-o, tulipalamila nkaninye kwe Yehova wino watulaya swensinye ukuti, ‘Awakundikwe winu walizyulupuka!’