Uzye Muyipekinye Ukuyipa kwe Yehova?

1-2. Acani cino umuntu azipizile ukutalicila ukucita pano atani abatizwe?

PA MYAKA 5 yino yapita, awantu ukucila pe 1 milioni wabatizizwe nu kuwa Inte zya kwe Yehova. Awavule pe wa-a wasambilizile icine ‘ukufuma ku wutici’ ndi vino calinji kwe Timoti. (2 Tim. 3:​14, 15) Ne wamwi wasambilizile mu wusongo ne wanji lyo wakota nu kukota. Papitako imyaka yimwi ukufumilila pano e nakulu-wantu wumwi uwa myaka 97 wasambizile Baibolo ni Nte zya kwe Yehova nu kubatizwa.

² Nga cakuti kwawa wamwi wano wakamisambilizya Baibolo, nanti nga cakuti mwakulila mu lupwa lwa kapepa, uzye mukakwelenganyapo pa kubatizwa? Nga avino mukalonda, lyo mukakwelenganya ukucita icintu icicindame nkaninye. Nomba pano mutani mubatizwe, muzipizile ukutalicila ukuyipa kwe Yehova. Mwe co-o icipande, twandi tusambilile muno mwasula ukuyipa kwe Yehova. Swinya candi cimyavwe nu kumanya umulandu wuno mutazipizile mwatina ukuyipa nu kubatizwa.

UZYE UKUYIPA ACANI?

3. Landaniko pa vyakulolelako vya mu Baibolo ivya wantu wano wayipile kwe Yehova.

³ Wano Baibolo yalandapo ukuti wayipile kwe Yehova, wapawulwanga ukuwomba umulimo uwuyiwele. Uluko lwa wina Israeli lonsinye lwayipile kwe Yehova. Lelo wamwi pe wa-a wayipanga kwe Yehova munzila iyiyiwele. Ku cakulolelako, e Aaron wazwalanga icitambala pano palinji “icimanyilo icitele icakuyipa,” [NWT] akuli ukuti akayembelelo ka kwe golide. Ka-a akakuyembelela aka kwe golide kalanjizyanga ukuti wapawuzilwe ku kuwomba umulimo uwuyiwele uwakuwa wesimapepo mukulu uwa wina Israeli. (Lev. 8:9) Swinya awa Naziri nawo wayipanga kwe Yehova mu nzila iyiyiwele. Izwi lyakuti awa “Naziri” lyafuma kwi zwi lya ciHeberi ilyakuti nazir lino likasula mukuti “ukupawulwa,” nanti “ukuyipa.” Awa Naziri wazipizile ukuwakonka Amasundo ya kwe Musa yano wawapile.—Impe. 6:​2-8.

4. (a) Avyani vino umuntu akawika sana pa nkolelo nga cakuti wayipa? (b) Amwinye muno cikasula “ukuyiwilila” wemweneco? (Lolani ni cikope.)

⁴ Nga cakuti mwayipa kwe Yehova, lyo mwasolapo ukuwa mwe wasambi wa kwe Yesu. Swinya lyo mwandi mwawika ukulonda kwa kwe Yehova pa nkolelo mu wumi winu wonsinye. Uzye mukucita wo-o mwasanzyamo vyani? E Yesu watili: “Ndi wumwi akulonda ukunkonka wazipila ayiwilila umwenecho.” (Mat. 16:24) Izwi lya ciGreek lino wapiliwula ukuti “ayiwilila umwenecho” lingasula nu kuti ‘ukuyikana.’ Nga cakuti mwayipa kwe Yehova, muliwakana ukucita vyonsinye vino visimusecelesya. (2 Kor. 5:​14, 15) Pe vyo-o pawa nu kukana cita “ukulonda kwa muwili,” ponga ngati akucita uwuzelele. (Gal. 5:​19-21; 1 Kor. 6:18) Uzye mukwelenganya ukuti ukukonka ya-a amasundo kuliwamicinga? Mutaliwalola ukuti yakumicinga nga cakuti mwakunda e Yehova swinya mwasinincizya nu kuti ya-a amasundo yawelako ku kuti ivintu vyamizipila. (Amalu. 119:97; Ayize. 48:​17, 18) Umwanawitu wumwi uwizina lyakuti Nicholas walanzile ukuti: “Mungalola amasundo ya kwe Yehova ngati ansimbi zya mu cifungo, zino zikacinga umuntu kukucita vino akulonda. Nanti ngati we waya wino wacinga ku vimbwi yino yikumicinjilila ku viwipe.”

5. (a) Uzye muzipizile ukucita wuli pa kuyipa kwe Yehova? (b) Awupusano ci wuno wawa pa kuyipa nu kubatizwa? (Lolani ni cikope.)

⁵ Uzye muzipizile ukucita wuli pa kuyipa kwe Yehova? Muzipizile ukumunena mwi pepo ukuti mwandi mwamuwombela nu kuwika ukulonda kwakwe pa nkolelo mu wumi winu wonsinye. Nga mwacita wo-o lyo mwamulaya ukuti mulitwalilila ukumukunda ‘numwezo winu wonsi, nuwumi winu wonsi, namano yinu yonsi, namaka yinu yonsi.’ (Mar. 12:30) Pakuyipa kwe Yehova kukawa ukuwa wenganye. Lelo pa kubatizwa peni pakawa awantu swinya apano wakamanya ukuti fwandi we-e umuntu wayipa kaali kwe Yehova. Ukuyipa wawa amulapo wuno tuzipizile ukulola ukuti wacindama nkaninye. Fwandi muzipizile ukwikalilila kwe wo-o umulapo swinya ne Yehova nye avino akakwenecela.—Ekawi. 5:​4, 5.

VINO VINGALENGA MUYIPE KWE YEHOVA

6. Acani cino cingalenga wumwi ayipe kwe Yehova?

⁶ Kwawa imilandu imivule yino yingalenga muyipe kwe Yehova, lelo umulandu uwukulu awakumukunda. Nomba asa kulanda vye ukuti namukunda. Lelo pakalondekwa ukuwa “namano yakulonda kwakwe” “nukwiluka kuno Umuzimu wakwe wukapa” akuli ukuti ukusambilila pe Yehova. Nga mwacita wo-o cingalenga mu mukunde. (Kolo. 1:9) Ku cakulolelako, ukuyisambilizya Baibolo kungalenga musinincizye ukuti (1) e Yehova akuno wawa, (2) e Baibolo alizwi lyakwe, ne (3) akawomvya iwungwe lyakwe kukuficilisya ukulonda kwakwe.

7. Avyani vino tuzipizile ukuwacita pano tutani tuyipe kwe Yehova?

⁷ Wano wakayipa kwe Yehova wazipizile ukumanya amasambililo ya kutalicila aya mu Baibolo nu kwivwila amasundo yakwe. Wakakwelezya na maka yawo yonsinye ukuwizizyako wanji pe vino wasambilila. (Mat. 28:​19, 20) Wakakunda nkaninye e Yehova swinya wakavwambisya ukuwamupepa wenganye. Uzye avino cawa na kwe mwemwe? Nga cakuti mwakunda nkaninye e Yehova, mutaliwalonda ukuyipa nu kubatizwa pa kuti vye musecelesye wino akamisambilizya Baibolo nanti awakwasi winu, nanti pa mulandu wakuti avino waciwuza winu wapinguzilepo.

8. Avyani vinji vino vingamyavwa ukupingulapo ukuyipa kwe Yehova? (Amalumbo 116:​12-14)

⁸ Nga mukwelenganya pe vino Yehova wamicitila, muliwamusalifya swinya muliyipa kwe weliwe. (Wazyani Amalumbo 116:​12-14.) E Baibolo yikalondolola e Yehova ukuti, wekapa wa “vyawila vyonsi ivizima nivilambu.” (Jemu. 1:17) Icicindamisye pe vyo-o ivyawila, anzuwi ya mwana wakwe e Yesu Klistu. Co-o icawila cacindama nkaninye amuno calenga twawa iviwuza ivizima ivya kwe Yehova. Swinya calenga tuwe nu longo lwakwikala umuyayaya. (1 Yoh. 4:​9, 10, 19) Ukuyipa kwe Yehova yawa anzila yakulanjizizyamo ukuti tukasalifya pa nzuwi na pa vizima vyonsinye vino watucitila. (Amasu. 16:17; 2 Kor. 5:15) Co-o icisinka calandwapo na mwibuku lyakuti Ungikala Amanda Pe! mwi sambililo 46 icisinka 4, pano pawa ne vidyo ya mamineti yatatu iyakuti Ukupa Ivyawila Vinu kwe Leza.

UZYE MUYIPEKINYE UKUYIPA NU KUBATIZWA?

9. Amulandu ci wuno mutazipizile ukuyipaticizya ukuti mpakanye mu batizwe?

⁹ Mpindi zimwi mungayivwa ukuti mutafisilepo ukuyipa nu kubatizwa pa mulandu ni vintu ivilekane lekane. Ku cakulolelako, ncepamwi mungalola ukuti paliko mumwi muno muzipizile ukupilukako pa kuti mwakonka amasundo ya kwe Yehova. Nanti pamwi mungalola ukuti mukulondekwako impindi yakuwomya isuwilo linu. (Kolo. 2:​6, 7) Mwakwizuka ukuti asa wasambi wonsi wano wakalunduluka pa mpindi iyili yonganye. Swinya asa wacitici wonsi wano wakayipekanya ukuyipa nu kubatizwa pacimo icili conganye. Fwandi mwakwelezya na maka ukuzifyako muno mukulondekwa ukuzifya ukulingana na pano papelezile amaka yinu, asa kuyilinganya kwe wanji.—Gal. 6:​4, 5.

10. Uzye mungacita wuli nga mwalola ukuti mutafisilepo ukuyipa nu kubatizwa? (Lolani na kambokosi kakuti “Kwe Wano Wakulila mu Cine.”)

¹⁰ Nga mwalola ukuti mutafisilepo ukuyipa nu kubatizwa, mutazipizile ukunenuka. Lelo muzipizilevye ukutwalilila ukuwombesya pa kuti muficilisye wowo uwuyo. Mwapepa kwe Yehova ukuti amyavwe ukupilukako muno mukulondekwa. (Flpi. 2:13; 3:16) Nga mwacita wo-o, mungasuwila ukuti e Yehova ayivwile ipepo linu swinya wandi amyavwe.—1 Yoh. 5:14.

CINO CIKALENGA WAMWI WATINA UKUYIPA NU KUBATIZWA

11. Uzye e Yehova aliyavwa wuli awawomvi wakwe ukutwalilila ukuwa ni cisinka?

¹¹ Wamwi nanti acakuti wafikapo ukuyipa nu kubatizwa, wacili wakakwivwa intete. Ncepamwi wakakwelenganya ukuti, ‘Nga cakuti nabatizwa, ningiza ncite uluwembu ulukulu ica kuti mbingwe nu kuwingwa.’ Nga vino mukayivwa, muzipizile ukusuwila ukuti nga mwayipa nu kubatizwa e Yehova aliwamipa vyonsinye vino vikulondekwa pa kuti ‘mwakwikala ndimuno akalondela.’ (Kolo. 1:10) Swinya alimipa na maka ayakucita ivizima. E Yehova watulanjizya ukuti angatwavwa pa mulandu wakuti wavwa awantu awavule. (1 Kor. 10:13) Akakwavwa awantu wakwe ukutwalilila ukuwa ni cisinka. Awuli umulandu wuno awavule wasiwinjilwa mwi wungwe lyakwe.

12. Avyani vino mungacita pa kuti mutakacite uluwembu ulukulu?

¹² Swensinye pa mulandu wa kuti tutapwililika tukakwelezwa ukucita iviwipe. (Jemu. 1:14) Lelo mweweneco amwewano muzipizile ukusolapo nga akucita wowo uwelezyo nanti nga akuwukana. Icisinka acakuti pasi wino angamisolela ivyakucita mu wumi winu, mweweneco amwewano mwawa na zyozyo insambu. Nanti aca kuti awantu wamwi wangalanda ukuti utanga uleke ukucita ivintu vimwi nu kuleka vino ukayivwa, vino wakalanda avyawufi. Icisinka acakuti mungaleka. Fwandi nga cakuti mwelezwa, mungasolapo ukukana cita iviwipe. Pa kuti mwacita wo-o, muzipizile mwapepa kwe Yehova cila wanda. Mwawazya Baibolo lyonsinye nu kwelenganyapo. Swinya mwazanwa mukulongana nu kuwombako umulimo wakuwizya. Ukucita wo-o, kulilenga muwe na maka ya kutwalilila ukwikalilila ku mulapo winu uwa kuyipa, akuli ukuti ukutwalilila ukuwa ni cisinka kwe Yehova. Mwakwizuka lyonsinye ukuti e Yehova aliwamyavwa.—Gal. 5:16.

13. Avyani vino tukusambililako kwe Jozefu?

¹³ Cingiza cimipepucile ukwikalilila kumulapo winu uwakuyipa nga cakuti mwelenganizizya lyankani pe vino mungiza mucite nga mwelezwa. E Baibolo yalandapo pe wamwi wano wacisile wo-o nanti aca kuti nawonye watalinji awapwililike. Ku cakulolelako, e muka Potifa welezizye imiku imivule ukuti acite uwuzelele ne Josefu. E Jozefu citamutalizile ukupingulapo ivya kucita, amuno lyo welenganyapo kaali. E Baibolo yikalanda ukuti ‘wakanile’ swinya walanzile ukuti: “Ngamuno chani chino ingachita ichintu chiwipe ndivino choo, mbembuke kwe Leza?” (Inta. 39:​8-10) E Jozefu wamanyizile kucili ivya kucita pano atani ayelezwe nu kwelezwa. Na co-o calenzile cimupepucile ukucimvya uwelezyo.

14. Uzye mungacita wuli pa kuti mwakana amelezyo?

¹⁴ Uzye mungakolanya wuli e Jozefu nga mwelezwa? Pe yonye impindi apano muzipizile ukumanyila kucili vino mungiza mucite nga cakuti mwelezwa. Mutazipizile nanti katicinye ukucita vino Yehova wapata nanti ukutwalilila ukuvyelenganyapo. (Amalu. 97:10; 119:165) Nga mwacita wo-o, mutaliwembuka nga mwelezwa.

15. Uzye umuntu angalanjizya wuli ukuti ‘akavwamba’ Yehova? (Waheberi 11:6)

¹⁵ Mpindi zimwi mungalanga mwasinincizya ukuti mwazana icine swinya mukalonda nu kuwombela Yehova nu mwezo winu wonsinye, lelo mucili mukakwivwa intete zya kuyipa nu kubatizwa. Nga vino mukayivwa, lyo icakulolelako ca Mfumu Davidi cingamyavwa, wino walenzile kwe Yehova ukuti: “Njelezya Leza, umanye amelengania yane; njelezya, umanye ukwelengania kwane. Lola ndi mwenene muli ichenjezya nanti ichiwipe ichili chonsinye, unkolelele munzila zyamuyayaya.” (Amalu. 139:​23, 24) E Yehova akapaala wonsi ‘wano wakamuvwamba.’ Mungalanjizya ukuti mukumuvwamba ukupitila mukuwombesya pa kuti mufikepo ukuyipa nu kubatizwa.—Wazyani Waheberi 11:6.

TWALILILANI UKUPALAMILA KWE YEHOVA

16-17. Avyani vino Yehova akacita na kwe walyanye wano wakulila mu cine? (Yohani 6:44)

¹⁶ E Yesu watili e Yehova awino akalenga awasambi ukupalamila kwe weliwe. (Wazyani Yohani 6:44.) Ya-a amazwi aya cisinka swinya yakawomba na kwe mwemwenye. Kwawa icizima cino Yehova akalola cino cikalenga atupalamika na kwe weliwe. Akalalola wenga na wenga ukuti ‘amuntu wakwe’ nanti aciya camutengo kwe weliwe. (Amasu. 7:6.) Swinya wonye avino akamilola na mwemwe.

¹⁷ Ncepamwi mwe wacitici wano wakulila pa wakwasi wa Nte. Nga ca kuti avino cawa, manda yamwi mungakwelenganye ukuti mukawombela e Yehova pa mulanduvye wakuti avino awakwasi winu wakacita, asa pamulandu wakuti e Yehova awino wamipalamika kwe weliwe. Lelo e Baibolo yikati: “Palamilani pakwe Leza, nawe wandi apalamile kwemwemwe.” (Jemu. 4:8; 1 Imila. 28:9) Fwandi nga mwapalamila kwe Yehova, nawe asilema na kwisote ukupalamila kwe mwemwe. E Yehova asimilola ukuti mwawa piwumba, lelo akalola umuntu wenga na wenga ukuwikako na walyanye wano wakulila mu cine. Nga cakuti wumwi wapalamila kwe weliwe, nawe akapalamila kwe weyo umuntu, ukulingana na vino e Jemusi 4:8 yikalanda.—Linganyaniko ne 2 Watesalonika 2:13.

18. Avyani vino tulisambilila mu cipande cino cikonsilepo? (Amalumbo 40:8)

¹⁸ Nga cakuti mwayipa kwe Yehova nu kubatizwa, lyo mukulanjizya ukuti mukukolanya e Yesu. E Yesu wayikundizile ukucita vyonsinye vino umukwasi wakwe wamunenile. (Wazyani Amalumbo 40:8; Hebe. 10:7) Mu cipande cino cikonsilepo, tulisambilila pe vino vingatwavwa ukutwalilila ukuwombela e Yehova na pa nsizi ya lubatizyo.