ICIPANDE CA KUSAMBILILAMO 23
ULWIMBO 2 Izina Lyako we Yehova
Vino Izina lya kwe Leza Lyacindama kwe Sweswe
“Mwewakalola wane,” avino Yehova walanda.—AYIZE. 43:10.
VINO TWANDI TUSAMBILILE
Twandi tusambilile pe vino tungacita pakulanjizya ukuti e Yehova amutele nu kuti vyonsinye vino Satana akalanda pe weliwe avyawufi.
1-2. Twamanya wuli ukuti izina lya kwe Leza lyacindama nkaninye kwe Yesu?
IZINA lya kwe Yehova lyacindama nkaninye kwe Yesu. Swinya wacita ivivule pakulenga izina lya kwe Yehova ukumanyikwa. Mu cipande cino cafumileko, twasambilizile ukuti wayikundizile ukufwa pakuti alanjizye ukuti izina lya kwe Yehova alitele nu kuti vyonsinye vino Yehova akacita avizima. (Mar. 14:36; Hebe. 10:7-9) Swinya pansizi ya myaka 1,000 iya kuteka kwakwe, aliyikundila ukunyosezya Uwufumu kwe Yehova pakuti izina lyakwe litwalilile ukucindikwa. (1 Kor. 15:26-28) Vyonsinye vino Yesu akacita pamulandu ni zina lya kwe Yehova vikalanjizya ukuti wamukunda nkaninye.
2 E Yesu wizile munsi mukunena awantu vyonsinye vino Yehova walondanga ukuti wamanye. (Yoha. 5:43; 12:13) Walenzile izina lya kwe Yehova ukumanyikwa ku wasambi wakwe. (Yoha. 17:6, 26) Swinya wasambilizyanga nu kucita ivizungusyo mwi zina lya kwe Yehova. (Yoha. 10:25) Cinji acakuti pano wapepelanga awasambi wakwe ukuti e Yehova awawasakamala, wamunenile ukuti awacita wo-o “mwi Zina” lyakwe [Yehova]. (Yoha. 17:11) Ukwasowa nu kuvwilika izina lya kwe Yehova lyacindime nkaninye kwe Yesu ukucila icili consinye. Fwandi pasi nanti wumwinye wino angati amwina Klistu nga cakuti atamanya izina lya kwe Yehova swinya asiliwomvya
3. Avyani vino twandi tusambilile mwe co-o icipande?
3 Swe wina Klistu tukakolanya e Yesu ukupitila mu kukunda izina lya kwe Yehova nu kulicindika. (1 Pet. 2:21) Acino mwe co-o icipande, twandi tusambilile umulandu wuno Yehova wapela wano wakawizya “ilandwe zima . . . ilya Wufumu” izina lyakwe. (Mat. 24:14) Twandi tusambilile na pevino izina lyakwe lyacindama kwe sweswe wenga na wenga.
“AWANTU WANO WAKAKWITILWA PI ZINA LYAKWE”
4. (a) Avyani vino Yesu wanenile awasambi wakwe pano atani anyocele kwi yulu? (b) Aliwuzyo ci lino tungayikolowozya?
4 Pano Yesu atani anyocele kwi yulu, wanenile awasambi wakwe ukuti: ‘Muliyizuzwa namaka pano umuzimu wutele wiza kwakwe mwemwe, mwize muwe mwewakalola wane mwe Yerusalemu namwe Yudeya monsi na mwe Samariya ukufika nakuno insi yapelela.’ (Imili. 1:8) Fwandi ilyasi lizima litalinji nu kuwizwavye mu Israel mutupunye. Awantu wonsinye wakweti ulongo lwa kuwa awasambi wa kwe Yesu. (Mat. 28:19, 20) Nga mukwizuka e Yesu wawanenile ukuti: “Mwize muwe mwewakalola wane.” Nomba uzye wa-a awasambi awapya walinji nu kumanya izina lya kwe Leza nanti walinjivye nu kuwa awakalola wa kwe Yesu? Vino vyacitisile vyo vyawa pa Imilimo icipandwa 15, vingatwavwa ukwasuka lyo-o iwuzyo.
5. Uzye awatumwa na wasongo wa mu Yerusalemu walanjizizye wuli ukuti awantu wonsinye wazipizile ukumanya izina lya kwe Leza? (Lolani ni cikope.)
5 Mu 49 C.E., awatumwa na wasongo wamu Yerusalemu wasunkine ponga mukulanzyanya nga cakuti wano asa wa Yuda wazipizile ukuzembululwa pakuti wawe awina Klistu. Pansilo ye ko-o ukulanzyanya, e Jemusi umunyina wa kwe Yesu walanzile ukuti: E “Simoni walondolola vino pakutalika Leza wapechezile awina nsi asenda wamwi awakwe woliwo awawa awantu wano wakakwitilwa pi zina lyakwe.”[NWT] Alizina lya kwe weni lino Jemusi walandangapo? Wambuzile amazwi ya kwe kasesema Amosi nu kulanda ukuti: “Apano awantu wonsi waliwavwamba Imfumu e Leza, awantu wonsi wano nita ukuti wakwitilwa pi zina lyane. Avino Imfumu e Leza wataka.” (Imili. 15:14-18) Fwandi wa-a awasambi watalinjivye nu kusambilila pe Yehova lelo walinji nu ‘kuwakwitilwa pizina lyakwe.’ Co-o cikusula mukuti, walinji nu kuwanena awantu pi zina lya kwe Leza, swinya awantu walinji nu kuwawamanyila kwe lyonye izina.
Pano wano walinji mwi wumba lino lyatungululanga mu mpindi ya watumwa wasunkine, wizile awiluka ukuti awina Klistu wazipizile wakwitilwa pi zina lwa kwe Leza (Lolani paragrafu 5)
6-7. (a) Amulandu ci wuno Yesu wizizile munsi? (b) Acani cinji icicindamisye cino Yesu wacisile pano wizile munsi?
6 Izina lya kwe Yesu likasula mukuti “e Yehova wekapususya.” Swinya e Yehova wawomvizye e Yesu kukupususya wantu wonsinye wano wawa ni suwilo mwe weliwe na mu mwana wakwe. E Yesu wizile munsi mukupa uwumi wakwe pakuti aluwule awantu awavule. (Mat. 20:28) Wo-o vino wacisile calenga twatetelwa nga twawembuka nu kuwa nu longo lwakwizawa nu mumi wamuyayaya kunkolelo.—Yoha. 3:16.
7 Nomba amulandu ci wuno awantu walondecelwanga inzuwi? Amulandu na vino vyacitisile mu Edeni. Ndi vino twasambilizile mu cipande cino cafumileko, awakwasi witu awakutalicila e Adamu ne Eva, wapondocezile Yehova nu kupanya ulongo lwakuwa nu wumi wamuyayaya. (Inta. 3:6, 24) Lelo e Yesu wizile mukucita icintu icicindame nkaninye ukucila na pakupususya swe wantu. Twamanya ukuti e Satana walanda iviwipe ivivule nkaninye pe Yehova. (Inta. 3:4, 5) Acino awantu walondekwanga ukumanya ukuti e Yehova atacisile iviwipe ivili vyonsinye, amuno amukwasi walukundo swinya amutele. Pa mulandu wakuti e Yesu wimililangako e Yehova, wacisile vyonsinye vino vyalondekwanga pakuti acindike izina lya Mukwasi wakwe.
Pasi nanti wumwinye wino angati amwina Klistu nga cakuti atamanya izina lya kwe Yehova swinya asiliwomvya.
8. Avyani vino awina Klistu wonsinye wazipizile ukumanya?
8 Wonsinye awasambi wa kwe Yesu wano walinji awa Yuda na wano watalinji awa Yuda, walondekwanga ukumanya e Yehova wino walinji nu kuwapususya. (Yoha. 17:3) Cinji acakuti ndi wulyanye vino calinji kwe Yesu, walinji nukuwakwitilwa kwi zina lya kwe Yehova. Swinya walondekwanga nu kumanya umulandu wuno cacindamizile ukumanya izina lya kwe Yehova. Walondekwanga ukucita vyo-o vino twalandapo pakuti wapusuke. (Imili. 2:21, 22) Acino awina Klistu wonsinye awacisinka wazipizile ukumanya e Yehova ne Yesu. Awuli umulandu wuno pano Yesu wapepanga walecelezizye na mazwi yano yawa pe Yohani icipandwa 17 ayakuti: “Naleka wakumanya, ndilandalila ukuchita wowonye, alyakuti ulukundo luno wankunda luwe mwakwe woliwo, nani mwakwe woliwo.”—Yoha. 17:26.
“MWE NTE ZYANE”
9. Tungalanjizya wuli ukuti izina lya kwe Leza lyacindama kwe sweswe?
9 Twalola ukuti pakuti tuwe swe wasambi wa kwe Yesu, tuzipizile ukutwalilila ukulenga izina lya kwe Yehova ukucindikwa. (Mat. 6:9, 10) Tungalanjizya ukuti twacindika izina lya kwe Leza ukupitila mwe vino tukacita. Nomba tungacita wuli pakucindamika izina lya kwe Leza nu kulanjizya ukuti vyonsinye vino Satana walanzile pe Yehova avyawufi?
10. Avyani vino vyawa mwi buku lya kwe Ayizeya icipandwa 42 ukufika ku 44? (Ayizeya 43:9; 44:7-9) (Lolani ni cikope.)
10 Mwe Ayizeya icipandwa 42 ukufika ku 44 mwawa vino vingatwavwa ukulenga izina lya kwe Yehova ukucindikwa. Mwe vyo-o ivipande e Yehova akanena wano wasimupepa ukuti walanjizye nga cakuti twa leza twawo atwacisinka. Swinya akawakolowozya nga cakuti kwawa wino akatwimililako nanti inte wino angalanjizya ukuti molimonye atwa cisinka. Nomba kutawa nanti wumwinye wino akapa uwusinincizyo wakuti to-o twa leza atwacisinka!—Wazyani Ayizeya 43:9; 44:7-9.
Tukalanjizya ukuti kutawa e Leza winji ukucila pe Yehova ukupitila mwe vino tukalanda nu kucita (Lolani amaparagrafu 10-11)
11. Ukulingana ne Ayizeya 43:10-12, avyani vino Yehova akanena awantu wakwe?
11 Wazyani Ayizeya 43:10-12. E Yehova akanena awantu wakwe ukuti: “Mwe nte zyane, . . . Swinya ne Leza.” Akawakolowozya iwuzyo lyakuti: “Wuzye kuli leza nawinji?” (Ayize. 44:8) Sweswe twawa nu longo lwa kulanjizya ukuti kutawa e leza winji ukucila pe Yehova nu kuti izina lyakwe lyakulisya pa mazina yonsinye. Tukacita wo-o ukupitila mwe vino tukalanda nu kucita. Cinji, tukalanjizya ukuti twakunda e Yehova swinya twawa ni cisinka kwe weliwe, ukupitila mwe vino tukasolapo ukucita mu wumi asa mulandu ni ntazi. Nga twacita wo-o, lyo tukulenga izina lya kwe Yehova ukucindikwa.
12. Uzye uwusesemo wuno wawa pe Ayizeya 40:3, 5, waficilisizwe wuli?
12 Nga cakuti tukulenga izina lya kwe Yehova ukucindikwa lyo tukukolanya e Yesu. E Ayizeya walandizile lya nkani ukuti kuliwa wumwi wino alipekanya “inzila yakwe Leza.” (Ayize. 40:3) Uzye wo-o uwusesemo walinji nu kuficiliswa wuli? E Yohani Kabatizya wapekinye inzila ya kwe Yesu. Nomba yalinji anzila ya kwe Yehova, amuno e Yesu wizizile mwi zina lya kwe Yehova swinya walandilanga mwe lyonye izina. (Mat. 3:3; Mar. 1:2-4; Luk. 3:3-6) Mu wusesemo uwuli wonganye walanzile nu kuti: “uwukankala wa Mfumu e Leza wuliwumbulika.” (Ayize. 40:5) Nomba uzye co-o calinji nu kucitika wuli? E Yesu wimililangako e Yehova. Fwandi pano wizile munsi calinji ngati e Yehova nye umweneco awino wizile munsi.—Yoha. 12:45.
13. Uzye tungakolanya wuli e Yesu?
13 Nasweswenye swe Nte zya kwe Yehova ndi wulyanye vino Yesu wawa, tukakwitilwa kwi zina lyakwe swinya tukanena awantu ivizungusyo vino Yehova wacita. Nomba pakuti tuwe Inte zya kwe Yehova izyacisinka tuzipizile ukuwanena awantu vino Yesu wacita pakucindika izina lya kwe yisi. (Imili. 1:8) Amuno kutawa nanti wumwinye wino wawizizye pi zina lya kwe Leza ndi vino Yesu wacisile. Acino tuzipizile ukumukolanya. (Ukuwu. 1:5) Anzila ci zinji zino tungalanjizizyamo ukuti izina lya kwe Yehova lyacindama kwe sweswe?
INZILA ZINJI ZINO TUKALANJIZIZYAMO UKUTI IZINA LYA KWE YEHOVA LYACINDAMA
14. Ukulingana na Amalumbo 105:3, tukayivwa wuli pi zina lya kwe Yehova?
14 Tukakwivwa icilumba pi zina lya kwe Yehova. (Wazyani Amalumbo 105:3.) E Yehova akakwivwa icete nkaninye nga tukuyilumvya pi zina lyakwe. (Jere. 9:23, 24; 1 Kor. 1:31; 2 Kor. 10:17) “Ukuyilumvya pi zina lya kwe Yehova” cikasula ukuyivwa icilumba ukuti e Yehova we Leza witu. Tukalola ukuti lwawa alongo ukunena wanji ukuti e Yehova amutele nu kuti vyonsinye vino akacita avizima. Fwandi tutazipizile twakwivwa insoni zyakunena wano tukawomba nawo, wano tukasambilila nawo, awina mupalamano na wantu wanji ukuti swe Nte zya kwe Yehova. E Satana awino asilonda twanena wanji pe Yehova. (Jere. 11:21; Ukuwu. 12:17) Awuli umulandu wuno weliwe na wonsinye wano wakamutunjilila wakalonda awantu wiwilile izina lya kwe Yehova. (Jere. 23:26, 27) Nomba pamulandu wakuti twakunda izina lya kwe Yehova tukalonda twamulumbanya impindi yonsinye.—Amalu. 5:11; 89:16.
15. Uzye ukulilila pi zina lya kwe Yehova kwasula mwinye?
15 Tukatwalilila ukulilila pi zina lya kwe Yehova. (Joel 2:32; Roma. 10:13, 14) Ukulilila pi zina lya kwe Yehova kusisulavye ukumanya nu kuwomvya izina lyakwe. Lelo kwasanzyamo nu kumanya e Yehova icete, ukumusuwila, ukumulenga ukuti awatwavwa nu kututungulula. (Amalu. 20:7; 99:6; 116:4; 145:18) Cinji acakuti ukulilila pi zina lya kwe Yehova kwasula nu kunena wanji izina lyakwe ni miwele imizima yino wakwata, ukuwavwa ukupilula imiwele yawo pakuti wamusecelesya nu kumuwombela.—Ayize. 12:4; Imili. 2:21, 38.
16. Avyani vino tuzipizile ukucita pakusinila e Satana ukuti awawufi?
16 Tukayikundila ukucula pa mulandu ni zina lya kwe Yehova. (Jemu. 5:10, 11) Nga cakuti twatwalilila ukuwa ni cisinka kwe Yehova na pano tukucula tukasinila Satana ukuti awawufi. Pano e Job walinji nu wumi, e Satana walanzile pe wano wakawombela e Yehova ukuti: “Umuntu alitaya vyonsi alyakuti awe nuwumi.” (Job 2:4) Cino wasulanga acakuti awantu wangatwalililavye ukuwombela Yehova nga cakuti ivintu vikuwazipila mu wumi. Lelo nga cakuti wawa ni ntazi wangaleka ukumuwombela. Nomba vino e Job wacisile vyalanjizizye ukuti vino Satana walanzile avyawufi. Nasweswenye tungasinila Satana ukuti awawufi nga twatwalilila ukuwombela Yehova asa mulandu ni ntazi zino tungapitamo. Tungasuwila ukuti e Yehova alitwalilila ukutwavwa pa mulandu wi zina lyakwe.—Yoha. 17:11.
17. Ukulingana ne 1 Peter 2:12 anzila ci yinji yino tungacindicilamo izina lya kwe Yehova?
17 Tukacindika izina lya kwe Yehova. (Imilu. 30:9; Jere. 7:8-11) Pa mulandu wakuti tukakwimililako e Yehova swinya tukawizya pi zina lyakwe, vino tukacita vingalenga izina lyakwe ukucindikwa nanti awe. (Wazyani 1 Peter 2:12.) Fwandi tuzipizile twakwelezya na maka ukucindika izina lya kwe Yehova ukupitila mwe vino tukalanda nu kucita. Ngatwacita wo-o lyo tukulenga izina lya kwe Yehova ukucindikwa asamulandu nu kuti tutapwililika.
18. Anzila ci nayinji yino tungalanjizyamo ukuti izina lya kwe Yehova lyacindama? (Lolani ne futunoti.)
18 Tukawika amano ku kucindika izina lya kwe Yehova asamulandu na vino awantu wakatulola. (Amalu. 138:2) Amulandu ci wino twalandila wo-o? Amuno ngatwacita vino vikasecelesya Yehova ilivule awantu wasikwivwa icete swinya wakatupata nanti ukulanda iviwipe.a E Yesu wayikundizile ukufwa imfwa imbipe pakuti acindike izina lya kwe Yehova. ‘Atasakamile ukusewana’ nanti vino wanji walinji nu kuwamulola. (Hebe. 12:2-4) Lelo wawisile amano ku kucita ukulonda kwa kwe Leza.—Mat. 26:39.
19. Uzye tukayivwa wuli pi zina lya kwe Yehova, swinya amulandu ci?
19 Tukakwivwa icilumba ukuwombela Yehova nu kwitilwa pi zina lyakwe. Co-o cikalenga twavwambisya ukutwalilila ukumuwombela asa mulandu watuseke. Amuno izina lya kwe Yehova lyacindama kwe sweswe ukucila na vino awantu wakatulola. Acino lekani swensinye tutwalilile ukulumbanya Yehova asa mulandu na vino Satana angacita. Nga twacita wo-o tulilanjizya ukuti izina lya kwe Yehova lyacindama sana kwe sweswe ndi wulyanye vino lyacindama kwe Yesu.
ULWIMBO 10 Lumbanyani Yehova e Leza Witu!
a Impindi yimwi umonsi wacisinka e Job watalisile ukwelenganya pe vino awantu walinji nu kuwamulola pano iviwuza vyakwe vyatalisile ukulanda ukuti kufwile kuli vimwi vino waluvinye. Pakutalika pano Job wafwizilwe awana na pano vyonsinye vino wakweti vyalovile, “atatela awembuke kukukwina Leza nanti ukumupa imilandu.” (Job 1:22; 2:10) Lelo pano wamunenile ukuti waluvinye, watalisile ukuyipokolola nu kulanda amazwi “cilande lande.” [NWT] Wizile awika amano ku kucindika izina lyakwe ukucila ukucindika izina lya kwe Yehova.—Job 6:3; 13:4, 5; 32:2; 34:5.