Umulandu Wuno Izina lya kwe Yehova Lyacindamila kwe Yesu

1-2. (a) Avyani vino Yesu wacisile pano walinji mupipi nu kumukoma? (b) Amawuzyo ci yano twandi twasuke mwe co-o icipande?

CALINJI amanguzi pe Cini pa Nisani 14, mu 33 C.E. lyo apano e Yesu wamalavye ukulya Icakulya ca Manguzi ice Tatakulu na watumwa wakwe pa muputule wapapela. Swinya lyo kwasyalavye katicinye ukuti wamupilucile, ukumupanzya, ukumupa imilandu, ukumucuzya nga nu kumukoma. E Yesu walanzile amazwi yamwi ayakuwomelezya awatumwa wakwe. Swinya pano watani wafume, e Yesu wapefile ipepo ilicindame nkaninye. Lyo-o ipepo lyalembwa mwi buku lya kwe Yohani icipandwa 17.

² Nomba avyani vimwi vino tungasambililako kwi pepo lino Yesu wapefile? Avyani vino vyamusakamisile sana pano atani afwe? Acani cino cacindime sana kwe weliwe pano walinji munsi? Ya-a ayali amawuzyo yano twandi twasuke mwe co-o icipande.

“NALEKA WAKUMANYA”

3. Amazwi ci yano Yesu walanzile mwi pepo lino wapefile swinya wasuzile mwinye? (Yohani 17:​6, 26)

³ Mwi pepo lino Yesu wapefile walanzile ukuti: “Naleka wakumanya.” Ya-a amazwi yacindime nkaninye kwe Yesu amuno wayalanzilepo imiku yiwili. (Wazyani Yohani 17:​6, 26.) Nomba uzye wasuzile mwinye? Uzye walondanga awasambi wakwe wamanye ukuti izina lya kwe Leza we Yehova? Awe mukwai, amuno lyo wamanya kaali izina lya kwe Leza pa mulandu wakuti walinji awa Yuda. Swinya izina lya kwe Leza lyawa imiku mupipi ne 7,000 mu mawaliko ya ciHeberi. Fwandi pano Yesu walanzile ukuti naleka wakumanya, atasulanga mukuti wawasambilizizye izina lya kwe Leza, lelo walenzile wamanye vino wawa. E Yesu wavwizye awasambi wakwe ukumanya Yehova icete, akuli ukuti wawavwizye ukumanya vino Yehova alicitila awantu munsi, vino wacita, vino alicita ku nkolelo ni miwele yakwe. Amuno e Yesu awino wamanya icete e Yehova.

4-5. (a) Avyani vino vingalenga tukundileko umuntu wumwi? Lanjililani. (b) Avyani vino vyalenzile awasambi wa kwe Yesu wamanye icete e Yehova?

⁴ Katulanjilile, tuti mwi wungwe linu mwawa e eluda wumwi uwizina lyakuti David. We-e umwanawitu we dokota swinya mwamanyana nawe pa myaka imivule. Nomba wanda wumwi mwalwala nkaninye icakuti mukuvwambikwa ukuya ku cipatala. Pano mwaya ku cipatala mwazana ukuti wenye umwanawitu awino wamiwombelapo mpaka mwapola. Vino wamicitila vingalenga mu mukundileko nkaninye swinya nga mwivwavye izina lyakwe mungakwizuka na vino wamyavwizye. Mwamanya kaali ukuti e David we eluda, lelo pe yo-o impindi mwamanya nu kuti we dokota wino wamyavwizye.

⁵ Wonye avino calinji na ku wasambi wa kwe Yesu. Wamanyile kaali izina lya kwe Leza. Lelo lyo-o izina lizile alicindama sana kwe woliwo pano Yesu wawavwizye ukumanya icete Yehova. Amulandu ci wuno twalandila wo-o? Amuno Yesu wakolanyanga sana Umukwasi wakwe e Yehova mwe vyonsinye vino walandanga nu kucita. Acino pano awasambi wakwe wateyelezyanga pano wasambilizyanga nu kulola vino wawombanga na wantu wanji, wizile awamanya e Yehova icete.—Yoha. 14:9; 17:3.

‘IZINA LYAKO, LINO WAMPA’

6. Uzye e Yesu wasuzile mwinye pano walanzile ukuti e Yehova wamupile izina lyakwe? (Yohani 17:​11, 12)

⁶ Mwi pepo lino Yesu wapefile wapepezileko na wasambi wakwe ukuti: “Wasungange uwawachinjilila namaka yizina lyako, lino wampa.” (Wazyani Yohani 17:​11, 12.) Uzye co-o cikusula mukuti e Yesu walinji nu kulamwita ukuti Yehova? Awe mukwai, amuno pano Yesu walanzile kwe Yehova, watili ‘uwawachinjilila namaka yizina lyako.’ Fwandi izina lya kuti Yehova litizile aliwa alizina lya kwe Yesu. Nomba uzye e Yesu wasuzile mwinye pano walanzile ukuti e Yehova wamupile izina lyakwe? Ica kutalicila acakuti, e Yesu watumilwe ne Yehova, swinya wamulandilangako. Wizizile mwi zina lya kwe Leza swinya vyonsinye vino wacitanga, wacitilanga mwi zina lya kwe Leza. (Yoha. 5:43; 10:25) Ica citiwili acakuti, izina lyakuti Yesu likasula mukuti “e Yehova wekapususya.” Fwandi muno mwasula izina lwa kwe Yesu mwasanzyamo ni zina lya kwe Yehova.

7. Amulandu ci wuno e Yesu walandilangako e Yehova? Landani pa cakulolelako.

⁷ Pakuti twivwicisye vino Yesu walandilangako e Yehova, tungelenganya pe co-o icakulolelako. Tuti e kateka akulonda ukunena awantu amazwi yamwi. Nomba wasolapo ukuti atume umuntu wumwi ku kumwimililako. Pano weyo umuntu akulanda amazwi yano e kateka amutumile, cingawa ngati e kateka awino akulanda. Wonye avino calinji kwe Yesu, walandilangako e Yehova amuno awino wamutumile.—Mat. 21:9; Luk. 13:35.

8. Uzye e Yesu wawombelanga wuli mwi zina lya kwe Leza na pano atani ayize munsi? (Ukufuma 23:​20, 21)

⁸ E Baibolo yikakwita e Yesu ukuti “eLizwi,” amuno na pano atani ayize munsi e Yehova wamuwomvyanga ku kunena awangeli na wantu vino akulonda ukuti wamanye nanti vino akulonda wacite. (Yoha. 1:​1-3) E Yesu afwile awili umungeli wino Yehova watumile ukutungulula awina Israeli pano walinji mu mayonde. Swinya pano Yehova wanenile awina Israeli ukuti wize wakwivwila we-e umungeli, wawanenile nu mulandu wuno wazipizile ukucitila wo-o ukuti: “Amuno aliwawombela mwizina lyane.”a (Wazyani Ukufuma 23:​20, 21.) Cino Yehova walandizile wo-o, apamulandu wakuti e Yesu awino akamulandilako. Cinji acakuti awino walanjizya sana ukuti e Yehova amutele swinya vyonsinye vino akacita avizima.

“TATA, LEKA IZINA LYAKO LICHINDAMIKWE!”

9. Uzye izina lya kwe Leza lyacindime wuli kwe Yesu? Amulandu ci wuno twalandila wo-o?

⁹ Ndi vino tulanzilepo, izina lya kwe Lesa lyalinji alicindame kwe Yesu na pano atani ayize munsi. Awuli umulandu wuno pano walinji munsi, vyonsinye vino wacitanga vyalanjizyanga ukuti izina lya kwe Leza lyacindama kwe weliwe. Pano walinji mupipi nu kumala umulimo wakwe munsi wanenile e yisi ukuti: “Tata, leka izina lyako lichindamikwe!” Paponye e Yehova wamwasusile mwi zwi kulu ukuti: “Nachindamika izina lyane, swinyanye ndilichindamika.”—Yoha. 12:28.

10-11. (a) Uzye e Yesu walenzile wuli izina lya kwe Yehova ukucindamikwa? (Lolani ni cikope.) (b) Amulandu ci wuno izina lya kwe Yehova lizipizile ukucindamicilwa?

¹⁰ E Yesu nawenye wacindisile izina lya kwe Yisi. Walicindisile wuli? Inzila yonga yino wacitizilemo wo-o, akupitila mu kunenako wanji imiwele imizima yino Yehova wakwata na vino wacita. Wacisile na vinjinye pakulenga izina lya kwe Yisi ukucindikwa. Walanjizizye ukuti e Yehova amutele swinya vyonsinye vino akacita avizima. Swinya walanjizizye ukuti ukucindika izina lya kwe Yehova kwacindama nkaninye pano wasambilizizye awasambi wakwe ukupepa ukuti: “Tata witu wamwiyulu: Izina lyako itele lichindikwe.”—Mat. 6:9.

¹¹ Amulandu ci wuno izina lya kwe Yehova lizipizile ukucindicilwa? Amuno mu Edeni e Satana wakwelenguzile izina lya kwe Yehova pano walanzile iviwipe pe weliwe. E Satana walanzile ukuti e Yehova awawufi swinya wimile e Adamu ne Eva ivizima. (Inta. 3:​1-5) Wo-o vino Satana walanzile calinji ngati akunena e Yehova ukuti asicita ivintu icete. Swinya calenga wamwi wakwelenganya ukuti e Yehova atawa icete. Mu mpindi ya kwe Job namo, e Satana walanzile ukuti awantu wasiwombela e Yehova apavye, lelo wakamuwombela pamulandu wakuti akawacitila vimwi. Swinya walanzile nu kuti awantu wangaleka ukumuwombela nga cakuti wawa ni ntazi amuno watamukunda. (Job 1:​9-11; 2:4) Fwandi palondekwanga impindi pakuti uwa wufi amanyikwe, nge Yehova nanti we Satana.

“NKUPA UWUMI WANE”

12. Avyani vino Yesu wayikundizile ukucita pamulandu wakukunda izina lya kwe Yehova?

¹² Pamulandu wakuti e Yesu wakunzile e Yehova, wayikundizile nu kufwa pakuti alanjizye ukuti izina lya kwe Yehova lyayana ukucindikwa swinya lyonsinye akacita ivizima.b (Yoha. 10:​17, 18) Awantu wakutalicila e Adamu ne Eva, wakanile ukwivwila Yehova lelo wivwizile e Satana. Nomba e Yesu wapusineko, weni wayikundizile ukwiza munsi nu kulanjizya ukuti wakunda e Yehova. Walanjizizye wo-o mwe vino walandanga nu kucita. (Hebe. 4:15; 5:​7-10) Watwalilizile ukuwa ni cisinka kwe weliwe mpaka pano wafwile imfwa imbipe pa cimuti. (Hebe. 12:2) Ukucita wo-o kwalanjizizye ukuti wakunda e Yehova ni zina lyakwe.

13. Acani cino tungalandila ukuti e Yesu awino wayine sana ukulanjizya ukuti e Satana we cawufi? (Lolani ni cikope.)

¹³ Vyonsinye vino Yesu wacisile pano walinji munsi, vyalanjizizye ukuti e Satana awili e cawufi. (Yoha. 8:44) Kutawa nanti wenganye wino wamanya icete e Yehova ndi vino Yesu wamumanya. Fwandi pe vyonsinye vino Satana walanzile pe Yehova panga pawe ica cisinka cimwi, e Yesu nge wamanyile. Nomba pamulandu wakuti vyonsinye vino Satana walanzile pe Yehova vyalinji avya wufi, acino calenzile e Yesu atwalilile ukucindamika izina lya kwe Leza. Na palyanye pano calolesile ngati e Yehova amulecelezizye, watwalilizile ukuwa ni cisinka kwe weliwe.—Mat. 27:46.c

“NAMALA UMULIMO WUNO WAMPILE”

14. Uzye e Yehova walambuzile wuli e Yesu pa wucisinka wakwe?

¹⁴ Mwi pepo lino Yesu wapefile uwusiku pano atani afwe walanzile ukuti: “Namala umulimo wuno wampile ukuti mbombe.” Wasuwizile ukuti e Yehova walinji nu kumulambula pe vino watwalilizile ukuwa ni cisinka. (Yoha. 17:​4, 5) Swinya ataluvinye nanti katicinye ukusuwila mwe Yisi. Amuno pano wafwile, e Yehova atalesile atwalilile ukwikala mu nkungwe. (Imili. 2:​23, 24) Lelo wamuzyulupuzile nu kumupa icifulo icicindame kwi yulu. (Flpi. 2:​8, 9) Mu kupita kwampindi, e Yesu wizile awa amfumu mu Wufumu wa kwe Leza. Avyani vino wo-o uwufumu wulicita? Icasuko kwe lyo-o iwuzyo tukacizana mwi pepo lino Yesu wanenile awasambi wakwe ukuti wapepa ukuti: “Uwufumu wako wize; ukulonda kwako kuchitwe munsi ndivino mwiyulu.”—Mat. 6:10.

15. Avyani vinji vino Yesu alicita?

¹⁵ Nombanye e Yesu alimukulwa na walwani wa kwe Yehova nu konona awawipe wonsinye pa Armagedoni. (Ukuwu. 16:​14, 16; 19:​11-16) Pa nsizivye ye co-o, alinyepa e Satana nu kumusumbila “mu cizinji,” muno atalikwata amaka yakucita icili consinye. (Ukuwu. 20:​1-3) Mu myaka 1,000 yino Yesu aliteka, alileta umutende munsi swinya alilenga awantu ukuwa awapwililike. Cinji acakuti alizyulupula awafwe nu kulenga insi yonsinye ukuwa we paradaise. Nga wiza wacita vyonsinye vyo-o lyo apano ukulonda kwa kwe Leza kwaficiliswa.—Ukuwu. 21:​1-4.

16. Uzye ivintu viliwa wuli pa nsizi ya myaka 1,000?

¹⁶ Uzye ivintu viliwa wuli pa nsizi ya myaka 1,000? Uluwembu nu kukanapwililika vitaliwako. Fwandi awantu wataliwalondekwapo e Yesu ukuwalandilako pakuti e Yehova awatetele nanti wa 144,000 pakuti watwalilile ukuwa iviwuza vya kwe Yehova. Swinya “Umulwani wakupelelechezya ukuchimvwa nanti ukononwa, amfwa.” Mu nkungwe mutaliwa umuntu uwili wensinye, amuno wonsinye walizyulupuka. Wonsinye wano waliwa munsi waliwa awapwililike.—1 Kor. 15:​25, 26.

17-18. (a) Avyani vino vilicitika pansizi ya myaka 1,000? (b) Avyani vino Yesu alicita nga cakuti imyaka 1,000 iyakuteka kwakwe yiza yasila? (1 Wakorinte 15:​24, 28) (Lolani ni cikope.)

¹⁷ Avyani vinji vino vilicitika pa nsizi ya myaka 1,000? Pe yoyo impindi kulicitika ivintu na vinjinye ivicindame. Kutaliwa nanti wumwinye munsi wino alitela avwilike ukuti e Yehova amutele swinya wawa nu mulinganya. Amulandu ci wuno twalandila wo-o? Mu Edeni, e Satana walanzile ukuti e Yehova awawufi swinya atawa nu lukundo ku wantu. Asa mulandu na vyonsinye vino Satana wawifile, awantu wa kwe Yehova walanjizya pa myaka imivule ukuti vyonsinye vino Yehova akacita vyawa avizima. Acino pansizi ya myaka 1,000 izina lyakwe lilicindamikwa umuyayaya. Swinya pasi wino aliwavwilika ukuti Amukwasi walukundo.

¹⁸ Pa nsizi ya myaka 1,000, wonsinye walimanya ukuti vino Satana akalanda pe Yehova avya wufi. Avyani vino Yesu alicita nga cakuti imyaka 1,000 iyakuteka kwakwe yiza yasila? Uzye alicita vino Satana wacisile nu kupondocela Yehova? Awe mukwai! (Wazyani 1 Wakorinte 15:​24, 28.) Alinyocezya Uwufumu kwe Yisi nu kutwalilila ukukonka uwutunguluzi wakwe. Aliyikundila ukucita vyonsinye vyo-o pa mulandu wakuti wakunda e Yehova.

19. Uzye e Yesu akalola wuli izina lya kwe Yehova?

¹⁹ E Yesu walanjizizye sana vino umukwasi wakwe wawa. Awuli umulandu wuno Yehova wayikundizile ukumupa izina lyakwe. Nomba uzye e Yesu akalola wuli izina lya kwe Yehova? Akalilola ukuti lyacindama ukucila icili consinye. Wayikundizile ukufwa pamulandu na lyonye izina, swinya aliyikundila ukunyocezya vyonsinye kwe yisi pa nsizi ya myaka 1,000 iyakuteka kwakwe. Uzye tungakolanya wuli e Yesu? Tuliyasuka lyo-o iwuzyo mu cipande cino cikonsilepo.